ملاك تحت قناع الشيطان

35) ربي جاب لي سبب باش نتوب

فعلا بديت صفحة جديدة .. درت واحد المدرسة كاينا غي فالسطات .. لقيت فيها غاع صحابي تالليسي ولكن ما بقيتش كانعمر معاهم بزاف غي مرة مرة ومابغيتش نقرا معاهم درت شعبة مادايرها تا واحد فيهم حيت لا قريت معاهم غانرجعو لدوك ليام ديال لهبال
.. أنا مابغيتش نزيد نضيع أعوام من حياتي باغا نقرا ونوصل .. بعدت على الصداع وليت غي لقرايا و الدار .. كانجيب نقط مزيانة أنا من الأوائل فالقسم عجباتني الشعبة الي ختاريت رتاحيت فيها و خدمت فيها من قلبي .. وليت طرونكيل بزاف عايشة هانية بلا مشاكل رتاحيت بزاف رجعات لي الثقة فراسي .. إحساس زوين دخل تقرا تبع معا الأساتدة و تجلس القدام و تجيب النقط على دراعك بلا نقيل .. فرح دارت عقلها صافي مابقا لا سليت لا تصاحيب لا تقحبين .. أنا أصلا وجهي فيه البراءة كلشي فداك القسم كايحتارمني .. ختاريت قسم ماكانعرف فيه تا واحد حيت ما كنت باغا تا حاجا تفكرني فالماضي ديالي .. كايجيو عندي شي قحاب كايعرفوني على الدراري كايقولولي يالاه نخرجو ولا نسافرو كانقول ليهم لا مانقدرش كايقولولي ياه مالكي معقدة عيشي حياتك .. كانبقا نضحااك كانقول ليهم فخاطري كون تعرفوني شنو دوزت ماتقولوش هاد الهضرة .. نتوما يالاه عرفتو لحوا أنا تحويت ف 14 عام.. كميت شربت درت كلشي دابا عييت و تقادا جهدي وليت باغا غي لهنا و راحت البال .. وصلات واحد لوقيتة حسيت بالملل و الروتين فحياتي ما مولفاش نبقا بلا مغامرات .. بديت كانخرج للطريق تاني تصاحبت باش ندوز الوقت .. و كنت معاشرا معا واحد القحبة ولينا كانركبو مرة مرة فالطونوبيلات و لكن أنا كنت غي كاندوز الوقت ما خليت تا واحد يقيسني هي الي كانت كاتحوا .. و لقراية ما فرطتش فيها بقيت كانقرا مزيان .. موهيم دازت ليام تعرفت على واحد الدري باقي صغير قدي فالسن ولينا كانهضرو بزاف و كانتلاقاو مرة مرة واحد النهار عتارف ليا بالحب ديالو قلت هادا باغي يضحك عليا غايكون سامع عليا شي حاجة باغيني نتيق فيه يحويني ويمشي .. قلت ليه لا ولكن فاللخر قنعني .. تصاحبت معاه وحبست غاع التقحبين ماعرفتش علاش واخا جاوني فرص ماقدرت تا مرة نخونو .. هاد الدري بدلني كاملة و كان سبابي باش ندخل للطريق ديال بصح  .. بعدني على غاع الي كانو خارجين عليا حيت كايعرفهم واحد واحد .. زيرني بزاف و ما أترش ليا على قرايتي بلعكس هو كان كاينصحني .. وليت أي حاجة كانبغي نديرها كانفكر مية مرة حيت عارفة غاتوصلو لخبار .. هو صغير فالعمر ولكن راجل ونص قدر يربيني و يتوبني كون ماشي هو كراني باقا فديك الطريق العوجة.. لبنات كايقولولي شبغيتي بيه برهوش شوفي شي واحد كبير عندو طونوبيل بروفيتي فيه كانقول ليهم هادا لقيت فيه الي مالقيتو فتا واحد .. أنا ماباغا والو بغا غي الي يبغيني وعطيني الحب و الحنان بلا مقابل..  دوزت معاه مدة طويلة كانتلاقاو الراس فالراس عمرو حاول يقيسني عمرو حتا باسني محتارمني بزاف حتال مؤخرا ولينا كانفلوغطيو مرة مرة وصافي و أكثر حاجة خلاتني نبغيه هي عمرو فكر يحويني.. بالنسبة لي هذي هي الرجولة ماشي بحال شي زوامل هذفهم فالحياة هو الحوا .. كايحاول بنادم يفارقنا ما قدروش كايمشيو عندو وكايجبدو ليه الماضي ديالي كايقولو ليه بعد منها را قحبة ما تيقش فيها را ها شكانت كادير بكترت ما كايبغيني ماكايتيقش بيهم .. كايجي يسولني طبعا كاننكر كانقول ليه را غي كايكدبو عليك .. مؤخرا بدا كايشك و بدا كايقلب فالماضي ديالي وخايفا بزاف لا يلقا عليا شي حاجة .. كايشوف فيا مراتو تالمستقبل .. معرفني على دارهم محتارمني بزاف هو الوحيد الي بغاني بلا مقابل مابغيتوش ياخد عليا نظرة خايبة و يتصدم فيا .. و أكثر بلان خالعني هو بلان التصاور معا يانيس هو نفسو مقودة ماغايرضاش ..أول مرة كانطول فشي علاقة .. أنا معاه دابا هادي عاماين دخل ليا الفرحة فحياتي واخا كايكونو المشاكل مرة مرة ولكن هادا هو الحب نهار كانتخاصمو كانمرض حيت هو الوحيد اللي كاينسيني فهمومي هو بالنسبة ليا بحال شي دوا و لا بحال طبيب نفساني كانهضر معاه كانسا كلشي كانبقا غي نضحك أما فاش كانكون معاه كانكون طايرة فالسما .. بسبابو ربي هداني بدلني كاملة عقليتي تبدلات و لباسي وليت محترمة مابقيتش الي جا يبوسني الي جا نخصر معاه الهضرة .. حيت نهار كامل وهو كايوصيني ماديريش ماتفعليش كايخاصم عليا و كايحاول يوصل ليا المساج بطريقة مزيانة كانسمع ليه كتر من بابا .. أنا محتاجة غي الي يبغيني ويخاف عليا و يحن فيا هاديك هي الدنيا وما فيها  ماباغا لا فلوس لا والو .. وليت كانحشم نتلاقا بشي دري منغيرو كايجيب لي الله بحال لا غانخون راجلي .. دابا مسنيين غي فوقاش يسهل علينا الله و نتزوجو .. ماغانزيدش نهضر عليه كثر من هاكا كانطلب ربي يخلينا لبعضياتنا و مايتبدلش عليا ما قادة على صدمة أخرى.