ملاك تحت قناع الشيطان

16) تأنيب الضمير

فالليل رجع دوا معايا يانيس وعاودت جبدت معاه الموضوع ديال التصاور علاش وريتيهم لبنادم وعاود قال لي نفس الهضرة وريتهم غي لصاحبي وليد حيت كانتيق فيه .. درت ليه واحد الضحكة شريرة وقلت ليه .. هاد صاحبك وليد الي كاتيق فيه وكاتعاود ليه ماقالش ليك را كنت معاه ليوما فالدار .. تصدم حس بحال لا صاحبو غدرو ما فهم والو بحال لا ضربتو بتصرفيقة.. فاللول ماتيقنيش منبعد تأكد بلي هضرتي بصح .. صافي تما حسيت براسي بردت شويا مابقاش قلبي محروق رتاحيت شويا وأصلا ديك الساع كنت نسيتو مابقيتش كانبغيه صافي بلوكيتو و نعست. .. لاغد ليه الصباح مشيت لليسي مادخلتش مشيت جلست معا الدراري فالقهوة الي حدا اليسي بحال ديما .. كنت لابسا واحد التريكو سدري عريان وهيا تجرني صاحبتي مريم الي عارفا عليا كلشي قالت لي شداكشي فسدرك لاطراس ديال المصان شنو درتي معامن كنتي .. قلت ليها بعدي مني ماشي شغلك فيا ندير الي بغيت .. صافي مشيت لدار تغديت عاودت رجعت لليسي دزت عند الدراري للقهوة .. هادشي فشهر ربعة لموهيم جلست معا الدراري بقينا خالقين السعادة ضاحكين ناشطين واحد اللحظة بداو الدموع كايسيلو بديت كانبكي.. فرح مالكي ؟ علاش كاتبكي عاد دابا كنتي كاضحكي شنو طاري .. كلما كايزيدو يسولوني كانزيد نبكي .. جاني تأنيب الضمير مقود .. تفكرت كاع دوك الأغلاط الي درت .. تفكرت وليد الي مشيت معاه لبارح للدار .. بغيت نتاقم من يانيس ساعا نتاقمت غي من راسي لا بقيت على هاد الحال غا نخرج ليها .. وجهي ماشي ديال هادشي .. آش هاد الطريق غادة فيها .. المتيحان ديال لباك بقا ليه شهر ونص و أنا ماعارفاش تا سميات الدروس لعام كامل وانا من هدا لهادا .. آش غاندير دابا .. مابغيتش نضيع هاد العام خاصني نجمع راسي .. الدراري كايسولو فيا ما عطيتهمش راس الخيط ماقلتش ليهم مالي .. واحد اللحظة جرني واحد الدري سميتو يوسف الي هو صاحب بنت خالتي هدى دابا .. كان عشيري و عزيز عليا ولكن فاللخر ما صدقش منبعد نعاود ليكم عليه .. لموهم مشينا جلسنا فطبلة بوحدنا قال لي مالكي علاش كاتبكي .. قلت ليه لبارح مشيت معا واحد الدري للدار و أنا مامصاحباش معاه .. مسح لي دموعي قال لي كلشي كايغلط غي ماتعاوديش .. و قلت ليه مشكيلتي لكبيرة هيا الباك مازال ما عارفا والو فالدروس و مابغيتش نسقط مابغيتش نزيد عام آخر فهاد السطات تالزب .. بقا كايواسيني و ينصحني عطاني أمل كبير قال لي باقي لحال فين تجمعي راسك و تقدري من ليوما تبداي لخدمة غايقدك لوقت تبداي الدروس من اللول و كلشي غايدوز مزيان غاتنجحي .. عمرني نسا ديك الوقفة الي وقف معايا عطاني وقت وسمع ليا و خويت عليه قلبي .. بنادم فاش كايكون قلبو مجروح غي كلمة زوينة تقدر تفرحو وتبدل فيه شي حاجة .. واخا أنا مخاصما معاه دابا وحاقدة عليه لموهيم فداك الوقت كان عزيز عليا. موهيم درت بالنصائح ديال يوسف مشيت للدار جبدت الدروس بديت كانفهم درس لدرس بديت بالفزياء هو اللول كان عزيز عليا عونوني شي فيديوات فيوتيب باش فهمتو كاينين أساتدة الله يجازيهم بيخير كايديرو مجهود كيصورو فيديوات فيهم الشرح و كايلوحوهم فالأنترنينت .. نفس الشيئ للماط فهمتو بنفس الطريقة.. رجعت كاندخل للسوايع حيت كنت كانخلصهم وماكاندخلش كانمشي نتسركل وحتا لا دخلت ماكانعرف الأستاد علاياش كايهضر كانبقا عاطياها غي للضحك .. وليت كاندخل كانركز مزيان معا الأساتدة كانخدم التمارين و أي حاجة ما فهمتهاش كانطلب منهم يشرحو ليا .. وليت باغت نقرا من نيتي واخا حتال اللخر .. عمرنا نقولو مشا الحال إلى كان عندك شي هدف راك غاتوصل ليه وخا حتال آخر لحظة .. طبعت الإمتحانات ديال لعوام الي فاتو وشريت واحد لكتاب فيه الإمتحانات بالتخراج ديالهم .. بالنسبة للسيونص أمين هو اللي عاوني كان عندو معاه .. كنا كانتلاقاو وكايخدم معايا .. علاقتي بيه ولات مزيانة .. هو ولا كايبغيني ولكن أنا معتابراه صديق و صافي كانجلس معاه غي باش يخدم معايا و يفهمني يعني على حاجتي و أصلا دار فيا العيب و ماغانساهاش ليه .. فدوك ليام أمين عرفني على واحد صاحبو سميتو إلياس ولينا كانجلسو مجموعين منبعد إلياس خدا نمرتي ولينا كاندويو و قال لي بلي كانعجبو وبغا يتصاحب معايا .. طبعا ما غانفلتش هاد الفرصة باش نفقص أمين .. حس براسو خورناه .. عرفني على صاحبو وصدقنا مصاحبين وبقا هو ههههههه .. حسيت بالدري بغا يطرطق جا كايبكي عليا حشوما عليك و كدا تفارقي معاه انا كانبغيك مانقدرش نشوفك معا واحد آخر.. فوقما كايقول لي هاد الهدرة كانفكرو ففعايلو كانقول ليه نسيتي راسك شنو درتي ليا .. بعدا إلياس ما شفت منو غي الخير ماشي بحالك نتا .. علاش غانتفارق معاه نتا كانت عدك فرصة شحال هادي وضيعتيها .. هو كايزيد يندم كتر وأنا عاجبني الحال .