صرخات أنثى

البارت الرابع

……… البارت الرابع ………..
………#صرخات_أنثى ……...
......…. #بقلمي_شمس……..

مشى اليوم عادي .. ونسيت الموضوع كملت محاظرات ..
اجت علياء وطلعنا ..
دا نمشي يم الحدايق وناكل ونضحك ..
وشفت مهند گبالنا واگف وي اثنين ولد ويباوع ويبتسم بمكر مثل عادته ..

مااهتميت بس بداخلي خايفه ..
گلت العلياء يلة خلينا نروح خاف نتأخر ..
علياء .. خلينا شويه نستمتع بالمنظر شبيج دوووم مستعجله .
حنين .. لا ضجت خلينا نروح ..
علياء .. يله امشي .. اشو جنتي متحمسه للجامعه هسا كلما نجي معبسه ..
حنين .. بعدني ممتعوده وامشي بسرعه ولتلغين ..

امشي واباوع ورايه .. شفت السياره السوده دخلت لجوه واخذته .. (بقلمي شمس)
اذا يسمحوله يدخلوها ليش ذيج المره طلع بره ..

اوووه واني شعليه .. اجت الفورتات والبنات صارت مكاتل ياهي التصعد قبل وتحصل مكان ..
لأن اكو يبقن واكفات ..

مشت السياره وكل ساعه توگف بمكان .. منا لمن وصلت المنطقتنا روحي طلعت ..
وميته جوع .. وافكر شنو غدانه ..
علياء .. ههههه لج شگد تحبين الاكل ..
حنين .. ههههه بس من ايد ماما .. ومدام جسمي حلو مو سمين خليني اكل ..

وصلنا للبيت احنا بيت بصف بيت ..
سلمت عليها ودخلنا ..
دخلت لگيت الكل متغدي ومخلصين وبابا ملتحق ماهو ..
فتحت باب الغرفه شفت نسرين نايمه ..
بدلت بسكته بهدوء وطلعت ..
اتباوعت مسوين مرگ طرشانه .. استغفر الله
فتحت الثلاجه طلعت كبه اثنين گليتهن وحميت الجاي
اكلت ونمت ..

للعصر گعدت سلمت ع ماما ونسرين وبنين ..
وشفتهن يتبسمن ووحده تباوع للثانيه ..

حنين .. شكو شبيجن .
ماما .. اجوج خطابه
حنين .. هههه اكيد تتشاقن
نسرين .. والله شبيج
حنين .. مااريد بعدني شنو شفت بحياتي ..
بنين .. احنه مو نزوجنا واحنا صغار
حنين .. اني مااريد .. اريد اكمل دراستي ..
وثاني شي ذكرت ليش تسوون طرشانه مو اني مااحبها

ماما .. اي ياحياله گلبتي الموضوع بسرعه ..
غير تعرفين منو ..
حنين .. منو (بقلمي شمس)
نسرين .. حسين ابن عمو فيصل ..
حنين .. شنو معقوله حسين .. وشوكت اجو
ماما .. ها شو تغيرت ملامحج من عرفتيه حسين شكو😡
حنين .. لا ماكو شي .. بس مااتوقعت حسين مخلص هندسه وجاي يدرس ماجستير .. معقوله يفكر بيه

نسرين .. اي اجت مرت عمو اليوم .. وفتحت الموضوع وگالت هو اختارها لان بنت عمه ويعرفها ويگول الجامعه بيها اشكال البنات بس ماارتاحيت الهن ..
واريد حنين تربى ع ايدي ..
بس احنه گلنالها بابا ماهو من يجي تعالوا ..

حنين .. همه يحجون واني ممصدگه .. واخيرا ياربي
جنت بس احلم بي واتخيله مااتوقعت يجي يوم ويخطبني

حسين شخصيه وحلو من هو صغير .. هو هذي السنه خلص هندسه .. وطموحه يكمل ماجستير اني اتبع اخباره دايما لو من يسولفون اهلي اتنصت  ..

حبيته بداخلي حب طفوله ..من اني طفله يعني بالمتوسطه من تصير مناسبه ونجتمع عيني متفارقه
وهو جامد حتى مايختلط وي الولد ..
جان شاطر حيل وكلها تسولف بي وتمدح ..
حتى بابا كان يعاير محمد بي ..

حتى من كبرنا من يجي او نلتقي ابقى اباوعله ونسرين تگرصني تگلي نزلي عينج عيب ..
ليشوفج ابوي ..
تالي من اجت آيات بنت عمي احسان وگالت عدنا علاقه ونحب بعض يأست ونسيته ..

وهسا ممصدگة من گالوا خطبج .. زين وآيات شلون
دخلت للغرفه .. واگمز واهز 💃💃
اجت نسرين ..
يا حنين شبيج تخبلتي ليشوفج واحد .. شيگولون ممصدگه .. (بقلمي شمس)
وبعدين انتي مو ماتردين تتزوجين ليش غيرتي رأيج من سمعتي حسين الي خطبج ..

حنين .. ليش هو حسين ينرفض ابو عيون العسليه ..
نسرين .. ثگل شويه .. لتذبين روحج عليه خليج عزيزه واصلا اني حاسه عليج من زمان من نضراتج اله .
نسيت كلما يجي شلون اشبعج تگرص ..

حنين .. ههههه لا مانسيت لسا يوجعني 😂
نسرين .. ههههه تعالي احضنج .. ان شاء يصير من نصيبج ويسعدج ..
حنين .. امين حبيبتي وتحاضنا ..

تعشينا وكملنا وگعدنا ع التلفزيون .. اخبار ولقاء للرئيس
اوووي شگد تعجبني شخصيته ..
نسرين .. دسكتي ولج شو طلعت عينج .. حتى الرئيس ماسلم منج .
حنين .. ههههه لا ولج اشاقه وتعرفيني بس يمج. احجي هذا الحجي ..
اشرتلها ع ماما اجت اسكتي كافي الرئيس اجه ..
ضحكت نسرين ..
ماما جايبه صينيه بيها استكانات والشكر والقوري مال الجاي ..
صاحت اخواني وگعدنا نشرب جاي وسوالف وضحك .
تالي گمت درست ونمت .. (بقلمي شمس)
هذي الايام مااسهر هوايه ..

مرت الايام كالعاده بين الكليه والبيت .. تعب ودراسه الجو برد كلش والمطر بدا ينزل ..
بعد اسبوعين رجع بابا .. واحنه مخبوصين بالتنضيف والتحضيرات مال زواج نسرين ..

نسرين اخذتها بنين وبنت خالو اخت عبد الله للصالون ..واني اكرب ..
اجت علياء تساعدني خطيه بيومها اثنينا ممداومين
سوينا دولمه وسوينا صواني كيك وجهزنا ..

خطيه تعبت وياي .. تالي گالت اذا خلصتي تعالي وياي عندي شغله وياج ..
حنين .. لا مااگدر بعد عندنا شغل هوايه ..
علياء .. تعاي شويه مانتأخر .. گالت الماما خاله دقيقتين وارجعها ..
رحنا البيتهم لبست بس حجاب فوگ راسي ..
لگيت امها جاي تخيط فستان لونه وردي فاتح ..
كلش حلو وهي خياطها يخبل مثل الجاهز .

ام علياء .. تعاي ماما حنونه البسي هذا حتى اشوفه خاف عريض او ضيق ..
حنين .. لبسته عبالي بنيه نفس قياسي ويگدروه عليه
علياء .. ياي يخبل عليج طالع بلعافيه حبيبتي ..

استغربت شنو السالفه ..
#بقلمي_شمس
يتبع… ..