صرخات أنثى

البارت الخامس

……… البارت الخامس ………..
………#صرخات_أنثى ……...
......…. #بقلمي_شمس……..

استغربت شنو بالعافيه ..
باوعت العلياء .. گالت ردت اسويها مفاجأة وانطيجياه بيوم الحنه ..
بس ماما گالت خاف ميصير ع قياسها ..

حنين .. حضنتها ليش تسوين هيج .
علياء .. انتي الي لا تسوين هيج احنا اخوات ومابيناتنا خجل .. #شمس

الثوب يخبل عليه .. الصدر مفتوح وبي فتحه من الصفحه ومخصر وهو ردن يخبل ..
رجعت للبيت فرحانه .. ماما تبتسم ..
گالت بالعافيه
حنين .. يعني انتي تدرين وساكته
ههههه اي ادري بس علياء گالت تريدها مفاجأة ..
واني اصلا ناويه اشتريلج قماش واخيطه الج ..
بس صديقتج سبقتني .. #شمس

يمه بعد روحي صديقتي واخيتي ..
ماما .. الله يحفضجن ويديم الخوه بينجن

اجت نسرين من الصالون صابغه شعرها وحافه وجهها .
طالعه تخبل شكل ثاني .
لان احنه منحف الا للزواج ..

حضنتها وكالعاده بقينا نبجي .. وهي تگلي لتبجين هم انتي راح تتزوجين وتنسيني .
حنين .. وين اتزوج اشو بابا صارله يومين من اجه وهمه ماكو لسا مااجو ..
نسرين .. ههههه وشدعوه مستعجله .. يدرون زواجي ومشغولين بس يخلص الزواج تلگيهم فوگ راسنا ..
حنين .. ههههه صدگ تعاي اراويج الفستان الي خيطته علياء الي ..

نسرين .. ياي يخبل بالعافيه .. لو هيج الصديقات لو ماكو ههههه . #شمس

خلصنا تحضيرات وباجر الحنه .. كملنا كلشي حميت مي وسبحت بالليل ..
شسورتلي شعري نسرين هو طويل تعبها ..
تالي كوته الي بالاوتي ..
صار يخبل ..

ثاني يوم هم تحضيرات وغدا احنه مسوين دولمه وماما طبخت وياه تمن ومرگ ..
لان اجو خالاتي وبناتهم وعماتي البيت هوسه ..
راحت نسرين للصالون هي وابتهال بنت خالو ..
بس بنين بقت تساعدنا .. #شمس

خلصنا غدا بدلت ولبست فستاني يخبل كلها تعجبت عليه
وشعري جبته صفح ع متني ..
اجت مرت عمو فيصل ام حسين ..
شافتني ابتسمت .. گالت ماشاء الله شطالعه عبالي انتي العروس ..
اني ثگلت وحسبت حساب التصرفاتي گدامها ..

اجت نسرين تخبل طالعه حبيبتي ..
وامي بس تباوعلنا وتقرأ المعوذات تخاف من عماتي ليحسدن ههههه ..

تونسنا ورگصنا وزعنا كيك وببسي بطاله .. اكلوا خلصوا طلعوا .. #شمس
بقوا قليلين .. رادت علياء تطلع هي وامها ..
لبست حجابي ع راسي . وطلعت اوصلهم ..
بوستهن وطلعن ردت ادخل اندگت الباب..
عبالي علياء رجعت ..
فتحتها كلها وابتسم ..
شفت عمو وحسين بالباب ..
وهو يباوعلي من فوگ لجوه ويضحك ..

استحيت غطيت روحي بالحجاب .. وگلتلهم ادخلوا ماكو احد غريب جوه ..
مشيت گدامهم فتحت الاستقبال ..
بس گلت اجه عمو فيصل وحسين .. ههههه كلهن تطافرن حتى نسرين شايله بدلتها وتركض ..
موقف ماانساه ..
دخلوا ..
اني دخلت ولبست دشداشه ولفيت شعري ..
وطلعنا بسرعه .. #شمس

لان ماما گالت راح يبقون ع العشا ..
التمينا البنات .. وحده تسوي بتيته ووحده بادنجان ووحده تگلي طماطه .. وسوينا كباب عروگ وخضره

التمت السفره .. فرشناها ع طولها ..
وكلها گاعده ولمه حلوه وسوالف وضحك وبابا يسولفلهم ع الجيش ..
بس اني استحي اكل .. لان حسين صاير مقابيلي وكل ساعه يرفع عينه ويباوع ..
واني استحي ممتوقعه هذا الجامد هيج يسوي .. ونسرين تضحك عليه طبعا محد يعرف من عماتي وخالاتي لان جانوا منتضرين بابا حتى يفتحون الموضوع ..

خلصنا عشا .  گال بابا جاي بسرعه ..
سوينا جاي وغسلنا مواعين بنات خالاتي راحوا البيت خالوا عمود حنه الولد ..
بس بنات عماتي وايات هم هنا .. وكنت خايفه لان هي موجوده ..

جاي اصب بالجاي وهي تخلي شكر .. گلتلها ايات بعدج عندج علاقه بحسين ..
ايات .. يا هذا المغرور خلي يولي .. اصلا مااحب هيج نماذج ..
حسيتها ضايجه منه بس مااعرف شنو السبب سكتت ..

اخذت الجاي قدمتلهم .. #شمس
عمو فيصل گال تعالي حنين اگعدي بابا .. اريد احجي وي ابوج بموضوع حتى ناخذ رأيج ..
ماما اكيد گالت البابا وعنده علم ..

حجه عمو وگال حسين يريد حنين وبنت عمه ويعرفها واحسن من الغريب ..
اني احس قطرة دم مابيه ..
بابا .. گال حسين وليدي وافتخر بي .. والتفت عليه انتي شنو رأيج بابا ..
اني سكتت ودنگت ..
محمد ..گال طار اللسان
خزره بابا سكت .. شگد مكروه ..#شمس

عمو گال .. لتستحين بابا احجي موافقه او لا
حنين .. بكيفكم
عمتي گالت السكوت علامه الرضا مو حنين
ابتسمت
هلهلت مرت عمو .
گالت خلص الجمعه الجايه العقد احنه مرتبين امورنا والذهب مشتريه بس الحلقات ناخذهم يشترون
وحنونه بنيتي حتصير واول جنايني والي تريده يجيها

احس الفرحه مسايعتني وحسين يباوعلي ويضحك امي مااتحملت گمت للمطبخ ..
كل البنات باركلي وبوسني الا ايات ..
ايات .. اگول سألتيني تالي مو خاليه .. ويمكن عافني من وراج هاي من يمته علاقتج انتي وياه ..

حنين .. اني مو مال علاقات ايات الي يريدني يجي يخطبني مو يتونس وبس ..
تركتها ورحت للغرفه .. ضيعت فرحتي ..

طلعوا بيت عمو .. واحنه البنات بقينا للصبح نسولف دور الكهرباء انطفت وبقينا ع اللاله ..
ونخطط شنو البس بالعقد حايره ..
تالي قررت أاجر بدله وفستان ..
بقين نايمه بفراشي واشكر واحمد الله ع سعادتي ..
احس نفسي محظوظه ..
لان من اني صغيره لسا كل الي اتمناه يصير .. ماعدا الفنون الجميله 😡

نسينا باجر زواج نسرين ..
ثاني يوم .. التهينا بالزواج .. وهم خطار وهوسه اجو الصبح اخذوا ملابسها للبيت ..
كملنا غدا وبدلنا ومنتضرين العروس تجي من الصالون
#بقلمي_شمس
يتبع… .