صرخات أنثى

البارت الثاني

......... البارت الثاني ...........
.........#صرخات_أنثى .........
.......... #بقلمي_شمس........

رجعت للبيت تعبانه .. ماما مسويه سبزي وتمن عنبر .
اووووف شگد احبها ريحتها واصله لوين ..

احب نفس ماما بالاكل ..
شفتهم كلهم مجموعين ع السفره ..
حنين .. اي همزين اغسل واجي .. يمكن هاي اخر مره اگعد وياكم .. دور تتحسرون عليه
بس بالعطل ننجمع..
محمد .. اي عاد انتي شلونج يا ايناس طالب ..
حنين .. اصلا اني الكل يشبهني بيها وهم اني احلى
محمد .. همزين انتي زرگه
حنين .. هههه قصدك هنديه اخبل .

بابا .. كاااافي بصياح اني موگلت مااريد نگره وحجي ع السفره ..
احترموني شويه واحترموا نعمة الله ..

سكتت ورحت للغرفه ابدل .. حتى متغديت وياهم من ورى محمد بابا عصب ..
واصلا ابويه مسويلنا نظام جيش بالبيت ..
الگعده بموعد والنومه بموعد وحتى الاكل ..
لان هو نائب ضابط بالجيش .. وكله بنظام

يجي اسبوع ويروح اسبوعين ..
يعني منشوفه هواي وماما ربتنا وتعبت علينا ..
حالتنا ع گد الحال .. بس حلوه
واهلي ممخلين شي بنفسي ..

بدلت وغسلت اجيت .. لگيت بابا رايح للغرفة ينام
واخواني هم ..
حتى بنين .. بس نسرين تلم المواعين وماما تنضف بالصوبه وتبدل الها فتيله تحظرها ..
تگول الجو بدا يبرد ..

صبيت وگعدت اكل ..
نسرين .. شلونها الجامعه ..
حنين .. مو حلوه هوسا وبس ولد ..
نسرين .. اي جا شعبالج .. وبعد مشايفه شي

ماما .. حنين الكليه بيها هواي اشياء وولد واختج رفعت راسنا وماخجلتنا .. دخلت للجامعه وطلعت ماكو ولد اتقربلها ..
وانتي اريدج مثلها ..مو يقشمرج واحد وبحجه حب وهالشغلات ومعليج بالبنات ..
ترى ابوج واخوانج مايتفاهمون ..

حنين .. يمه اني تربيتج .. يايوم سويت الموزين حتى هسا اسوي .. شنو ماكو ثقه?

ماما .. اني ثاقه بيج .. وهذا الحجي حجيته النسرين هم وهاي يمج اسأليها .. بس اني امج واوصيج
الدنيا تغيرت .. روحي بطريقج وتعاي بطريقج ..

خررب نفسي انسدت .. ولان سبزي يضوجوني ..
لو طرشانه ماضوجوني 😡

كملت غسلت مواعيني .. ورحت للغرفه اني ونسرين
وگعدنا نسولف ونضحك ..
تالي اجه عبد الله خطيبها .. وراحت

وخطيه ياليت تگعد يمه ويسولفون .. محمد ينزل من الغرفه مالته ويگابلهم ماادري شنو من عقليه عنده ..
غير الخطوبه خلوها للتعارف ..
انت شعندك گاعد بنصهم ..
ونسرين تنحرج من محمد تتركهم وتطلع ..

حنين .. ارجعي اگعدي يمه .. قابل هو جاي يشوف خلقه محمد ..
نسرين .. لج استحي . متشوفين محمد گاعد ..
حنين .. هسا اطيره الج

صحت .. محمد تعال شويه ..
اجه محمد ..
ها شكو شتردين متشوفيني گاعد اسولف وي الولد ..

حنين .. روح جيب بطلين ببسي وتعال ..
وهذني ابطاله فارغات اخذهن وياك رجهن للرجال فشله

محمد .. يعني الا ببسي سوي جاي الجو بارد
حنين .. فشله ..كل مايجي نسوي جاي
محمد .. جا اعوفه وحده عيب
حنين .. قابل هو غريب .. وهاي خطيبته تگعد يمه .
محمد .. ها اي دروحي اگعدي يمهم مو تعوفيهم وحدهم حنين .. اي قابل شيسون . مو امة محمد كلها بالبيت ..
محمد .. امشي لا اطيح حظج لاتردين بوجهي ..

سكتت عنه .. لان السانه متبري منه ..
واني هم ماقاصره بس من الصراحه اني بس وي محمد لان بينا سنه ..
بس من أطلع ثوله وارتبك ..

مريت من يم الاستقبال لان الباب مفتوح .. اهلي ميقبلون ينسد .
شفت نسرين . اكلت اضافرها من الخجل هههه
وعبد الله يسولف ويبتسم ..

سمعت باب الشارع انفتحت . اجه محمد شبسرعه راح شبسرعه اجه ابو المحل براس الشارع ..

ركضت گعدت يم نسرين اجه شافني گاعده اشرلي ..
خليت البطاله بالصينيه وگلاصات ..
ووديتهن الهم ..
طلعت واجت ورايه نسرين ..

نسرين .. لج حنين عبد الله يگول نهايه الشهر نتزوج
وباجر يجون اهله يجيبون النيشان
وين نلحگ نسوي حلويات كيك ..
ومااعرف شنو البس ..

حنين .. انطيني ساعتين انام وافول .. واگعد اصيرلج
فردوس المختار .. ونزيهه اديب ..
ذولي مؤلفات كتاب دليل الطبخ والتغذيه. .
نتعلم منه طبخات وحلويات ..

رحت نمت گعدت الاذان يأذن مال المغرب ..
غسلت وتوضيت .. رحت صليت ..
شفت ماما ونسرين يسون كبه .. وبنين تگلي
ردت اسوي زلاطه ..

گالت نسرين .. لا عيني عوفي كلشي وسوي كيك
وشكرلمه ..
باوعتلها حظنتها حيل ..
حنين .. يعني بس هذني الاسبوعين يمي ..
اتحاضنا ونبجي ..
التفتنا ع ماما لگينا دموعها تنزل .. حضناها ونبجي ..

حنين .. يوم لتبجين اني يمج مااعوفج
ماما .. اي هم كم سنه وتتزوجين وتتركيني ..
حنين .. مااتزوج ولااعوفج ..
ماما .. مو گالتها نسرين قبلج ..
بنين .. ذكرتوني بأهلي من تزوجت .. وگعدت تبجي وبالگوه سكتناها وماما گالتلها اني هم امج وذني اخواتج لان خطيه مصارلها هوايه من تزوجت ..

كملنا العشا وتعشينا ..
واخواني گاعدين ويصنفون ويضحكون ع نسرين وهي خجلانه ولا خلوها تاكل..

خلصنا عشا وبابا فتح التلفزيون طالع الرئيس ..
واذا اخبار منتنفس ..
واحنا نحسب شوكت تخلص الاخبار حتى تبدي المسلسلات ..
اني كنت احب مسلسل الست وهيبه .. تابعته العام وهاي السنه هم سووله اعاده وممليت منه ..

اني ونسرين نسهر نبقى .. نتابع فلم السهره ..
وبيوم الفلم الرعب ..
الليل ماانامه ..

احنا التهينا بيومها نسوي كيك وحلويات . يعني متابعنا شي ..
سويت كيك وسويت كريمه بالبيت . كاكو ونشا وحليب وشكر واخلي مطيبات . واخلطها ع النار وبس تثخن اخليها ع الكيكه يصير الطعم يخبل ..

وسوينا شكرلمه ..
بس محمد طير نصهم .. ترس الماعون واخذه .. وبنين اجت هم گالت علي اشتهه ..
استحينا نحجي .. واضطرينا نسوي مره ثانيه ..
#بقلمي_شمس
يتبع..