#بسمة_الحزين5
Shahd Alsalman
فتحت الموضوع ويا مرت اخويا الجبير استحي احجي هيج ويا اخواني وكتلها توصلة الخبر هي كيفت كلش خطية بس اني ما اعرف شسوي
وصل الخبر لاخويا واجة وحجة وياية قنعني وكالي شوفيهم اذا كلبج ارتاح توكلي بالله ونسال عليهم واذا الله كاتبها ان شاء الله تم على خير
اجاني خبر من خالة البنية انه ما عدهم مانع نروح ونشوفها حاولت ويا زياد حتى يروح ويانة ما قبل وما ردت اغصبة اكثر
بس اني من عرفت بيها يتيمة وما عدها احد وبس اخوتها كلت بلكت وتحس بابنة وتشيلة وتربي وهمين تداري زياد والي عرفتة من خالتها هي مكملت علمود اهلها معناها حنينة وصاحبة مسؤولية ولو يعز علية بت اختي بس هي راحت لدار حقها وابني ديضيع كدام عيني دعيت من الله يوفقنا بهالزواج ويرتاح و ما يخيب ظني وتوكلت علي
رحنا اني وبنتي سما واخذت عمتة ويانة دنشوف البنية جانت خالتها ومرت اخوها موجودين
كاعدين دنحجي ويسالوني شون توفت مرتة وشوي فاتت بنية ما شاء الله شكد تنحب سمرة بس فاتح سمارها وعيونها كبار ملامحها حلوة وضعيفة
صليت ع النبي وكعدتها يمي وحجينا اني وهي تسولف وتندمج اجتماعية اذا اريد اقارن بينها وبين جيهان هاي البنية تنحب اكثر وتدخل للكلب بسرعة جيهان جانت شوية عدها تعالي لان مدللة ولان محامية وضع اختي كلش طاكين مع هذا هي حبابة الله يرحمها كملنا سوالف وطلعنا من يمهم
البنية رادت تشوف الولد وزياد ميقبل يروح ولا حتى يشوفها بس ابو وسما قنعو وحاولو وياه ورحنا بزيارة لوخ الهم شافتة وهو كاعد ما حجة ولا باوعلها اصلا خفت لا ترفض او تكول شي بس مكالت شي
وصارت الموافقة والحمدلله انه مرادت عرس او حفلة علمود اهلها كتبنالها مهر واخذتها للسوك جهزناها من كل التحتاجة واخذنا الذهب
بقى بس يعقدون...
بعد فترة عقدو وسوينا غدا هيج بين العوائل اهلها واحنا وهو ساكت ميحجي حيخبلني وخايفة لا اكون ورطت البنية بي وتدعي علية شلون يا ربي
سما كالتلي يمة خليها على الله والبنية ذكية وحبابة وتتحملة بس شوية صبر ووقت وكل شي يكون تمام ان شاء الله خلصت اللمة والعرسان صعدو للغرفة
ماكو 10 دقايق ونزل زياد كال رايح للشغل اتمالخت وياه ومفاد خلة وطلع ولا جن اكو بنية فوك او
داحجي وياه واستحيت حتى اصعدلها شكول شحجي دزيت سما عليها خاف مضوجها او مبجيها هم الله ميرضاها ويتيمة ومصار ساعة من اخوانها وصونا عليها وخاصة مرت اخوهم الجبيرة .
