بسمة الحزين

6

#بسمة_الحزين6
Shahd Alsalman
كلت ما اوافق الا اشوف الولد اني اول تالي استحي ومراح احجي شي بس ميخالف هم اريد اشوفة
اجة وشفتة كلش ينحب شكلة بس حزين وعيونة بيها كسرة
يمكن علمود زوجتة التوفت ومنطق ولا حرف ولا سوة شي حتى كأنو كاعد على اعصابة

من طلعو حجيت ويا خالتي ومرت اخويا وكالولي يجوز مستحي وخجلان لا تاخذين الموضوع بتحسس كتلهم يجوز الله اعلم
فكرت وقبلت بي ودزيت خبر لخالتي بهالموضوع طبعا بعد ما اخذت موافقة اخواني الكبار وما ردت لا عرس ولا حفلة هو مترمل واني اهلي ما اكدر اسوي شي يعني صعبة علية

كملنا تجهيزات ومطولنا اقل الشهرين وعقدنا وسوينا لمة عائلية بينا وبينهم على غدا
كل هالفترة واني وهو محاجين سوة ولا واحد يعرف اللاخ ولا رقمة عندي تعاملي كلة ويا اختة سما وردة كلش حبابة وامة بعد احسن منها
من جيت للبيت وتعرفت بابو اكثر انسان يخاف الله والكل تهابة وتعرفت اكثر بي
واخو راشد كلش شقاوجي ويضحك ويسولف مو مثلة طول الوكت كئيب وحزين
شفت ابنة اول مشفتة كلش انقهرت علي وبجيت لان يتيم وهو صغير بعدة مشبع من امة حتى خالة كالتلي علواه لو تربي وتحنين علي اني ادري بيج حنينة والله يجازيج خير اذا ربيتي هاليتيم

من عقدنا جانت الغصة مبينة بجوابة وما حسيتة راغب لهذا الزواج بس قنعت نفسي مثل مكلولي مرت اخوية وخالتي انه هو طبعة هيج ميبين لاحد مشاعرة برغم هو شكلة مريح وينحب ونسوان اخواني الاثنين كلولي هو كلش ثقيل يعني صح شكلة حلو بس مينجرع من كد الكأبة البي حتى ابتسامة ميبتسم

كملنا لمة العائلة والغدا وودعت اخواني ونسوانهم وجهالهم وخالتي وصعدت وياه بالغرفة
ميتة خوف وخجل واحس كلش صرت نار وحمرة
عكسة هو الي طلع جكارتة ودخن وكعد ولا كانو موجودة

- اطلعلك هدومك تبدل وترتاح
- لا اني حطلع
- وين
- حطلع وبس لا تكثرين اسئلة
- لا على راحتك بس عبالي اطلعلك غير هدوم هيج قصدي
- لا مرتاح
- خير ان شاء الله
- باي
- الله وياك مع السلامة

تعلمت من امي طبع امتص غضب الرجال وما اعلي صوتي ولا حتى اتجادل وياه من شفت صوتة شوية علا وجاوبني بنتر كلت الوف السالفة على الهدوم

اني شاكة وهسة تاكدت انه هو مجبور على هالزواج
بس باعتباري تزوجتة ورضيت بي واني حاسة بالاجبار بعلاقتنا راح اتحمل واحاول اكسبة لصفي
لان من دون مبالغة برغم ما حجينا ولا صار بينا شي ولا اعرفة احس نفسي ميالة الة كلش شنو السبب ما اعرف
وكلت لازم ما اخلي احد يحس انه اكو شي بينا او برود راح امشي كل شي طبيعي سواء كدام اهلي او كدام اهلة

كمت دا ابدل اريد ارتاح اندكت الباب
- تفضل
- هاي اني سما ادخل ؟
- تعالي حبيبتي
- خما ضايقتج
- شون حجي تدفرين الباب برجلج وتفوتين حبي
- هههههه تسلمين
- شدسوين
- والله جنت اريد ابدل
- ها مو شفت زياد نزل كلت اصعدلج خاف محتاجة شي
- لا سلامتج اريد
- ضايقج بشي
- لا ليش
- يعني هيج دا اسال
- بالعكس زياد وردة ومحجة شي يضوجني بس صار عندة شغل طارئ وطلع
- ها خوش لعد اعوفج ترتاحين
- هسة انزل وياج اساعدج بس ابدل
- شتساعدين والله امي تجلفني بمكان المواعين انت عروس تمددي وارتاحي
- هههههه لا خليني اتعود اني اضوج من الكسل
- ماشي انتظرج

نزلت سما ولبست تراك بس بدون حجاب نسيت موجود ويانة راشد
طبعا مخلتني خالة اشتغل وحلفتني وكالت متمدين ايدج ابد كعدت يمهم ونسولف وحجيتلهم عن اهلي وليش ما كملت ومن هالامور

وسما كعدت تحجي عن الكلية وشتريد تدرس جانت بعدها سادس وكالت علواه تدخلين كلية وياية ونداوم سوة شكد حلو كتلها اتمنى والله بس صعب بعد ما كبرت وهسة البعمري حيتخرجون

خلصنا شغل المطبخ وكتلهم الجاي علية لعد حتى نكعد بالحديقة رحت سويت الجاي وصبيتة وشربناه وخالة تحجيلي عن زياد وشلون كمل كليتة وفتح الصيدلية
يامن يلعب بالعابة وعيني علي وصار تقريبا وكت الغروب كالت خالة نفوت نتوضة ونصلي
دا اريد افوت واجوي زياد وراشد سوة بسرعة حطيت الكلاو مال تراك على راسي
راشد مباوع نزل عينة وسلم بس زياد مو يمة اصلا فات وحتى ما سلم صعد كبل بقيت اني واكفة بالباب باوعت للسما وكتلة ربي منك الصبر وخليني قوية اعرف راح اتعب بس هو هم تعبان اني متأكدة ...