#بسمة_الحزين18
Shahd Alsalman
خلصت العطلة و بدة الدوام تشاوفنا اني وسما
مر شهرين تقريبا ملتهين بالدراسة اجتني سما وجهها احمر و مرتبكة
- سماوي شبيج
- اممم تعالي نروح ليغاد
- ولج دحجي مو وكعتي كلبي
- عاااا مدا اصدك عزززة حتخبل والله حنجن
- صخام ولج شصار حوكع من طولي شكو
- وليد الحلو
- شبي
- لج صارحني
- لا والله وبعدين
- صارحني شنو وبعدين
- اقصد يعني حيخطبج
- امممم مكال بس كالي معجب بيج واريد نتعرف
- عوفي خل يولي
- شنو اعوفة لج اجة لعندي وكالها صدك تحجين بس المخبلة تعوفة
- سماوي صدك تحجين عود من يجي ليم اهلج ويطلبج ساعتها متعوفي وجلبي بي خلي يولي رايد لعب هذا
- اممم لا تطيرين فرحتي
- لج الفرحة حلوة من يكلج احبج ورايدج على سنة الله ورسولة اثكلي وانطي الوجه الناشف ومن يحجي وياج كليلة بيت اهلي موجود وحياك الله غير هالحجي انسي انت بنية صافية لا تلوثين نفسج بهيج شكولات حتى لو حلو الحلا للنسوان والرجال يحلى باخلاقة وتصرفاتة وصدقة مو بشكلة
- صحيح بسوم والله صدك كلامج بس اندفعت لان معجبة بي
- ادري حبيبي واعرف بيج عاقلة بس دا اذكرج
- يمة شكد احبج الحمدلله الله عوضني باخت مثلج
- فدوة لعمرج يلة للمحاضرة تأخرنا
- اي والله يلة
سما كامت تتضايق من تصرفات وليد يلاحكها واني اعرف بي ملعب ولو ناوي صدك يحجي ويكول اريدج على سنة الله ورسولة مو يظل اني معجب واني اريد اتعرف واني وهو كلشي ماكو
فد يوم واكفين ننتظر الخط واجة وليد يحجي ويا سما
- سما ترة محلو منج تخليني معلك هيج
- وليد كتلك حجاية وحدة لا علكتك ولا شي ذاك بيت اهلي وهلا بيك اني ما اسوي علاقة وتاليها تكلي ها والله ما اكدر اتزوج
- خلي نتعرف بالاول اني مطالب شي منج
- ولا اني كتلك كلي حجاية وحدة وواضحة ناوي تتقدم لو لا
- اخويا انت ليش مو واضح خلي اختك مكانها يعني ترضى احد يسوي سوايتك
- انت ليش تتدخلين اني حاجي وياج
- شون تحجي وياها هيج
- اكلج لا تظلين تستشرفين براسي وهاي صاحبتج مسوية روحهة فد نوب مكطعة الشرف هي بيوم النتائج صاحبها يحضن بيها هنا كلنا شفنا وسكتنا
- انت صدك قليل ادب وما عندك اي اخلاق
- انجبي لج شون شكولات اغاتج اجيبها واخليها تصادقني مو انت وجه البومة
- بومة بس محترمة نفسها روح منا لا اعيط والم الناس عليك صدك متستحي انت
يلة امشي سما
- وييين خلي اني هم اخذلي حضن شنو حلال علي وحرام علينا
- حيوان احترم نفسك ووخر ايدك عني
ووخر
- لك هدها وخر عنها
دا اوخرة ما شفت الا راشد يصيح ويركض علينا وزياد هجم على وليد ضربة بوكس وكعة بالكاع واثنينهم ملخو تملخ سحبت سما ورحت ليغاد عنهم واجوي جماعتة لوليد صار ضرب وعركة مو طبيعية كوة فاككوهم العالم كام وليد يصيح
- اجة صاااحبج هياتة
- لك انجب ابن الكلب ساقط اني زوجها يا قندرة
- ناصب علينا يا زوجها
- جلب هذا اخويا و هاي مرتة وهاي اختي
سكت وليد ومتوقع انه نكون اقارب وخروهم العالم واحد من اللاخ وراحو هو وجماعتة اني متحملت الموقف اللي صار كمت ابجي وسما ترجف من الخوف
- كافي تبجين ولى وراح مثل الجلب
- انت اللي كافي كلة بسببك
- اني شعلية
- هو اللي عبالة اني صاحبتك وظل يحجي علية وعلى سما لان حضنتني
- هسة احط القندرة بحلكة ويسكت هالساقط
- لا حط القندرة بحلكة وطلكني حتى يسكت
- بسمة اهدي
- وخري عني سما خلص كافي ارحموني ما اريدك طلكني خل يكولون مطلقة ولا يحجون بسمعتي
- خلص اهدي
- وخرو عني
مشت بعيد عنا وهي تبجي احنا التلاثة مصدومين منها ومن الكالتة معقول اني هيج اثرت على حياتها وسببتلها كل هالقهر والتعب ما نطتني الا كل حنية وحب وما اخذت مني غير الالم والجرح
صعدنا بالسيارة وراشد ظل يحجي وياية اكيد هي من خوفها وعصبيتها هيج حجت وسما همين بس اني مقتنع هي صدك متريدني بعد
