بسمة الحزين

14

#بسمة_الحزين14
Shahd Alsalman
رجعت للمطبخ شفت سما واكفة رحت حضنتها وبجيت هي فزت علية وسالتني كتلها خليني ارتاح هيج وخطية ظلت حاضنتني محجت شي

- تعالي اكعدي بسومة
شبيج حبيبي منو مبجي عيونج الحلوة
- سما ليش مكتولي كل شي من الاول
- شنو النكولة ؟
- جبرتو زياد بية وهو جان يشرب وتعرفون هالشي وخليتو يسوي كل شي غصب عنة
- منين جبتي هالحجي
- هسة سمعت خالة تكول لام جيهان هالحجي اني والله مزعلانة بس مقهورة لو انت مكاني شسوين
- اكلب الدنيا والله بس اني الصدك ما اعرف بي يشرب ادري امي جبرتة من وكعت وبالمستشفى بس اقتنع وكال اي وهياتة كدامج شوفي وضعة احسن من قبل
- ام جيهان حقها
- لا مو حقها بسمة انت متعرفين شي خالتي اصلا انانية مثل بنتها ولو هي ميتة الله يرحمها بس عبالك هم و غيرهم لا من راحت وسافرت ما فكرت حتى بأبن بنتها المهم هم شيريدون ميحسون بأحد ولا يفكرون
- زياد يحب بنتهم وجان لازم يبقى مخلص الها والهم
- لعد ليش ما اخلصت هي لبنتها وبقت تربي ابنها يمنا وويانة شفتيها انت شلون اللبس والمكياج وكلة اخر موديل واكيد هناك متونسة هو بس زياد اللي اكلها وتعب بموتتها وحس ولا هي وابوها ناس ما يعرفون هالشي تحججت ما اكدر ابقى هنا بس جذب هي حتى لا توكع بمسؤولية تربية يامن متريد تلتزم بشي
- ما اعرف شكلج
- لا تخليها تأثر عليج خالتي ونعرفها تحب الحجي الزايد و متحس بأحد وجيهان جانت شوية احسن منها بس اخويا يحبها ومرتاحين جانو بزواجهم فما نكول شي ولا نحجي الاهم سعادتة وهسة هو تغير ورجع مثل قبل على ايدج
- الله كريم
- يلة كومي غسلي وجهج وصلي ع النبي
- عليه الصلاة والسلام
- لا تضوجين من امي هي تحبج كلش والله بس هي ام اعذريها وانت فاهمة وعاقلة
- واني احبها صحيح كلامج والله ارتاحيت من حجيتلج
- بسومة اسالج سؤال
- اي كولي
- تحبين زياد ؟
- اممم
- ها ولج عااااا تحبي مو ؟؟
- هههههه اذا اكلج ما اريد هالحجي يطلع من بيناتنا
- طبعا
- حبيتة كلش لزياد بس ماكو فائدة من هالحب كلبة متعلق بجيهان واني بالنسبة الة مجرد صديقة او احد يذب علي حملة
- يعني ولو سخافة مني اسال هالسؤال بس مصار شي بينكم
- لا مصار شي
- صدك تحجين هذا اخويا غير اغبر اكو واحد عندة وحدة مثلج وما يحس ولا يسوي شي
- لا تحجين علي
- وجمالة تدافعيلة ههههههه عيني شكد محظوظ هذا اخويا
- لج على شنو محظوظ شبيج ترة عادي والله ههههه
- شكد تحبي
- احبة لدرجة اكدر اتركة يفضل سعادتة وراحتة علية
- يعني حتعوفي
- الله كريم سماوي يلة راح تحترك الفطاير طلعيهم
بس امانة سماوي ما يطلع هالحجي وميحتاج احلفج انت كلمتج راس مال اوكي ؟
- مراح اكول والله اعتبري نسيت الكلتي
- حبيبتي فدوة لعينج

دا اريد افوت وسمعتها تبجي وشفت سما حاضنتها كلت اسمع شيحجون هاي العادة ما ابطلها مو بيدي تفاجئت من كلامها وسما همين حجت عن خالتي اني ما عندي اختلاط بيها ولوما زياد يتزوج جيهان مجنت حعرفها لجيهان يعني اقصد كشخصية وتصرفات جانت عدها نوع من الانانية والغرور بس اخويا ميشوف هالشي احنا ارتاحينا ويا بسمة اكثر من جيهان لان بسيطة وعفوية هو مو القصد احجي عنها الله يرحمها بس الشيء يالشيء يذكر

واللي فاجأني اكثر حب بسمة لزياد وطريقة كلامها عنة منو يكدر يترك اليحبة لان مديحس بي لليوم هي مسوت شي من اللي يسوو البنات لا لفتت نظرة لا تحرشت بي لا ضغطت علي حتى متبجي كدامة وتاخذ عطفة او حنان منة كل الوقت هي مهتمة بي وتداري حتة ابنة معقول اكو هسة وحدة هيج تحب وبدون مقابل كلت بداخلي شكد محظوظ بس ميقدر النعمة البيدة ولو هو يعاملها زين بس عايش ع الاطلال ويا جيهان لهسة وهالشي حرام لان دتنظلم بسمة

سوينا مشاوي بذاك اليوم وخالتي تخوزر بيها لبسمة وتتعمد تحجي على جيهان كدامها مثلا تكول جانت جيهان تسوي التتبيلة اطيب وطبخها يخبل وتعرف منو سوة التتبيلة لان سالت سما كالتلهة بسمة وحتة المقبلات تتعمد تحرجها وتضوجها بالحجي
او تاخذ يامن وتكلة مشتاق لماما حبيبي ف بسمة كامت تجاوب
- خالة هو بعدة صغير وميعرف شي عن امة
- وشلون حيعرف امة ماتت
- يعرف بس مو وكتها خلي شوية يكبر خطية بعدة ميستوعب
- لا يستوعب بس انت الظاهر تريدي ينسى مثل ما خليتي زياد ينسى
- مخليت زياد ينساها وما اريد ولا ناوية انسي يامن شي يخص امة
- باعي انت افلامج متمشيها علية لان مصارتلج خلفة لهسة تريدين تسحبين يامن الج لا هذا ابن بنتي ويبقى ابنها وابن زياد رجلها

ترخصت بسمة من عدنا وكامت لغرفتها

- ليش هيج حجيتي وياها خالة هي مسوت كل الكلتي شبيج ع البنية
-اشوفك كمت تدافعلهة نسيت مرتك مو
نوب ظلت تبجي خلتنا نتطشر اني هم كمت اخذت يامن ورحت للغرفة ورة بسمة لان ضايقتها بالحجي وهي متستاهل هالشي دكيت الباب كالت تفضل همزين مدتبجي
- اني اسف نيابة عنها
- لا تعتذر حقها هي متنلام
- انت ضجتي اعرف
- عادي لا تشيل هم
- شدسوين انت
- دا الم الهدوم
- عبالي زعلتي وحتروحين لبيت اهلج
- لا شزعل مو جنت شارتهم يبسو كلت اصفطهم
- بسمة
- شون تكدرين تتصرفين هيج ببرود وعقل
- يمكن لان افكر بالمقابل واحس بأحساسة
- يعني هسة تحسين باحساس ام جيهان بس متفكرين هي جرحتج بالحجي
- لا لازم ننطي عذر للي ديجرح قابل هي تجرح وتمشي غير اكو سبب ما بيها شي هو حجي ينحجي وياخذة الهوا ويروح كل شي بالدنيا يتغير واكيد هي تغير نظرتها عني بعدين
- هذا نام يامن
- خلي بفراشة وغطي بلة لحظة خل ابوسة كزكزت على خدودة
بستة وهو شايلة رفعت راسي صار زياد قريب علية يباوع بعيني وديتقرب علية اكثر ديبوسني حسيت على نفسي ووخرت ما اريد اسويها برغم متلهفة احضنة واريدة يحس بية ..