#بسمة_الحزين13
Shahd Alsalman
- الو
- الو منو
- اني بسمة
- هلا بسمة معرفتج اسف
- ولا يمهك شلونك
- زين وانت
- زينة الحمدلله خما اضوجك اذا ادك
- لا بس اكو شي ؟
- اممم لا ردت اتطمن عليك
- اني زين كلش اشكرج
- يلة اترخص لعد انتبه على نفسك بعد 10 دقايق الصلاة لا تنسى تصلي
- ان شاء الله تحتاجين شي
- فد كيلو سلامتك هههه
- هههههه الله يسلمج
شكد ارتاح من تحجي وياية بعد هالمكالمة كلش تغيرت وياها صرنا نتراسل ونتخابر ومن اجي نحجي اغلب الوقت اني احجي واسولف وافرغ كل البداخلي يعني تخليني اسولف كل شي مرات ابجي يمها مرات اخليها تنام يمي حتى اكدر اغفى ما اعرف شنو هي بالنسبة الي مفكرت بشي تجاهها
مرو 3 شهور تقريبا واني وهي صرنا اصدقاء كلش تغيرت هواية بطلت الشرب رجعت التزمت بصلاتي
مرات اضوج من الشغل ما اروح
حتى لاحظت يامن صاير انشط من قبل ومتغير ومرتاح وكلش يحبها مكضي النهار كلة بحضنها ويضوج من تطلع هي الا يروح وياها تقريبا اكدر اكول اتعلق بيها اكثر مني ومن باقي اهلي
يعني هي تتعب ويانة بس نتيجة تعبها دتبين على كل واحد بينا
خالتي ام جيهان كالت راح تجي زيارة لهنا كم يوم وترجع تسافر طبعا اني محرج منها بس امي كالت الموضوع يمي واني افهمها كل شي
اجت خالتي كلنا سلمنا عليها بس هي متعرفها عبالها صديقة سما او كرايبنا من اهل ابوية
من كنالها زوجة زياد ضاجت كلش وانكلب وجهها وحسيت تريد تنفجر بالبجي هزت براسها وفاتت جوة بالخطار
تغير زياد وياية هواية كلش صار احسن من قبل ورجع شوية شوية لطبيعتة حتى اسلوبة كلش حلو صحيح ماكو مشاعر بس اكو احترام وتقدير بيناتنا
بس دا احبة يوم عن يوم زيادة واعرف ما نكدر نكون سوة اولا لان وعدتة يطيب وينتهي هالزواج
وثانيا شون ابقى ويا انسان عايش ع الذكريات و ما يحس بية بس الله كريم منا لوكتها
كالو حتجي ام جيهان من السفر كم يوم وترجع طبعا اني متوقعة انه متحبني لان اكون زوجة زوج بنتها الثانية واكيد مراح تتقبلني بس هي كم يوم وتروح اعاملها بما يرضي الله وما الومها حقها
من فاتت سلمت ع الكل ما عرفتني هي بس كالولهة زوجة زياد كل تعابير وجهها انكلبت
راحة كعدو للخطار جبنا ضيافة اني وسماوي نقدم بس هي تخزر بية كأنو بايكتة لزياد مو متزوجتة وتباوع لزياد بنظرات عتب
سوينا غدا وكملنا وكل واحد راح لغرفتة بقيت اني بالمطبخ كلت اسوي شوية مقبلات لليل على معجنات لان نشوي اليوم بالحديقة وسما وياية تساعدني ودنسولف بس بالي يم ام جيهان
رحت دا اغسل ايدي فتت من يم غرفتهم اسمعهم يحجون وام جيهان تبجي مو قصدي اتصنت بس الصوت واضح والفضول اخذني
- ليش هيج ام زياد هي هاي تاليها
- ام جيهان مو كتلج الولد شنو حالتة شسوي شنو بيدي اني اشوفة يذبل كدان عيني
- يعني تكومين تزوجي
- اي زوجتة وجبرتة ارتاحيتي شوية خلي الله بين عيونج يعني هالطفل منو الة انت و جدة رحتو وتركتو حتى مفكرتو بي وهاي المسكينة تركض على يامن وابو التكول عبالك ابنها
- يعني هيج حتى هالطفل سويتو ابنها مو كافي اخذتو زياد من مرتة نوب ابنها
- هاي شبيج انت شدتخربطين اذا كلبج عليهم هيج مجان اخذتي ابن بنتج رحتي وشمعتي الخيط بعدين زياد هالكم شهر يالا رجع لطبيعتة جان بس يشرب ويسكر عندج علم لو لا
لوما هالبنية الله ينطيها جان هسة لاحك مرتة استهدي بالرحمن وصلي ع النبي جيهان راحت الله يرحمها بس زياد بعدة ولازم يعيش علمود ابنة
بقت خالتة تبجي وتندب الحظ وتنعى بنتها وممستوعبة زياد يتزوج غيرها
بس اللي قهرني اكثر انه امة اعترفت وكالت اني اللي جبرتة لو غيري وحدة متتحمل معناها هي ظلمتني وياه
و هي تدري وضعة وجانت تدري هو يشرب ومكلتلي من كل كلبي انقهرت لان هم السبب خلوني اتعلق بي واحبة واعرف هو مو الي ولا اليوم ولا بعدين ولا باي وكت حيصير الي
