#بسمة_الحزين15
Shahd Alsalman
مر كم يوم وام جيهان كالت مددت وما اروح لبعد شهرين هيج رحبنا بيها عادي ومكلنا شي بس هي اليومين الراحو كلهة تبسمر و تحجي معلك وياية وكانو صدك بايكة زياد
كامت تتعمد تغير نظام يامن او تنطي حلويات هواية مو زين علي وعندة تحسس هو وما اكدر احجي فادز سما عليها تكعد تتناكر وياها
زياد اصلا ماكو يروح لشغلة ويرجع متأخر جان عندة وجبة ادوية وتجهيز مستشفى بمواد فكلش يجي تعبان
من درت بية اتحسس واختنك من العطور والروايح القوية كامت ورشت عطر قوي هيجت الحساسية اعطس واكح وهي تكلي ايي ممتعودة بت فكر شجابج ع الماركات وشفهمج خلك اعدادية انت
كل يوم احنا هيج وتعير بية وتنتقص مني كمت اتضايق صحيح اتحمل بس الي طاقة وبعدها انفجر ما اكدر اصبر بس صبرت ودست على نفسي
شهر على هالحال مرات حتى تتجاوز بالحجي ومرة كالتلي جنا لوحدنا
- اهلج شمروج حتى يخلصون من مسؤوليتج ولا شون يزوجوج لواحد متزوج وعندة طفل مبينة
- خالة اني اللي قبلت بي واهلي ما الهم علاقة ومزايدة على احد عندي راتب من اخواني وبيتي وعايشة على راحتي مجنت مجبورة ولا شي
- ها يعني زياد علساس اليحبج وانت تحبي واخذتي شبيج انت ماما ترة زياد ميحبج ولا يكلب وحدة مثلج
- ومنو كالج اني احبة او اريدة يحبني يا خالة لا تدوسين ببطني الله يخليج
- يعني شحسويلي تسبيني
- حشاج ليش تكولين هيج بس صدكيني ما عندي شي ويا زياد و لا اريد اكون اكثر من التشوفي
- هذا حجي انت شفتي وضعة المادي وصيدلاني وحلو وبيت عندة وشمرتي روحج
- مفتهمت هسة اني مجبورة لو شامرة روحي
انت بكد امي واحترمج بس رجاءا خالة ثمني كلامج و مو كل واحد يتصرف بالطريقة اللي انت تفكرين بيها .. من رخصتج
عفتها ورحت للغرفة بس راسي حينفجر احسة من الضغط وكلامها الجارح عذرتها هواية بس كافي دتدوس علية وما تهتم مو هيج هم حرام
اجة زياد العصر شفتة من الشباك وكلت اكوم ابدل وانزلة بس شفتة يحجي ويا خالتة فبقيت بالغرفة كلت بعدين انزل
دقايق وصعدلي فاير نار وركع الباب حيل
- شكو ؟
- انت شلون تسوين هيج بيها
- شسويت شبيك
عرفت هي حجتلة شي من الصار بس لزمني من شعري وجرني
- والله احركج اذا بعد تجين يم مرتي او تجيبين سيرتها
- زياد توجعني وبعدين اني محاجية شي عنها والله
- مشككة صورها لان بيبيتة دتشوفة امة وانت جاية ولازمتها وسابتها وتكليلي محاجية شكد صلفة
- وخر ايدك عني والله مسويت هيج ابد وخر زياد
-فوكاها تجذبين
لزمني وكتلني اول مرة يمد ايدة علية من صياحة وصياحي اجة راشد علية غرفتة يمنا فتح الباب لكاه ديضرب بية
جرة عني ويصيح علي واني كوة اتحرك اجتلي سما همين كومتني كعدتني على الفراش جان خشمي ينزف رفعت راسي واجة هو ديشوفة مخليتة و راشد طلعة برة وكف النزف
كمت غسلت وجهي وكلت لسما تطلع بقيت لوحدي بجيت حيل من كل كلبي متوقعت انهان هيج اول مرة احد يمد ايدة علية مصدكني وصدك كلام خالتة شون اني اسوي هيج شي كلت ما اطلع ولا اسوي شي امشي كل شي طبيعي
نزلت جوة ورة ساعتين هيج وخالتة شمتانة بية عبالك
وتدري هو ضربني خالة ام زياد سالتني شون صرت كتلها ما بية شي كمنا نحضر للعشا دا اشتغل بصدر الدجاج واقطعة حسيت شي ينزل على شفتي
جان راشد فايت من يمي
- شبي خشمج
- اكو شي ينزل
- طالع دم تعالي اكعدي رجعي راسج لورة
- ما اريد هسة اوكفة اني
- تعالي لاتعاندين ديزيد الدم تحسين بدوخة
- لا
- كومي نروح للمستشفى
- ما اريد راشد ماكو شي هسة يوكف
- اهوو بسمة كومي حبابة يلة البسي شي بسرعة ودنروح
صاح لسما وكلها طالعين للمستشفى وحجالها
من وصلنا فحصني الدكتور وكال اكو جرح عالجة وخلصنا وطلعنا بس تعبت لان يوجع كلش
- شونج هسة
- الحمدلله اشكرك
- ليش سوة هيج وياج
- مسوة اني غلطت بشغلة وهو ضاج
- لشوكت تبقين هيج
- ما اعيدها بعد
- لج لا تخبليني اني اقصد تطمطميلة وتسكتين عنة وهو ميحس
- راشد
- كافي بسمة انت هيج دتدمرين نفسج و هو ولا على بالة ترة حجالي شنو الصار واعرف خالتي جذابة بس جنت متاكد من اسالج حتكولين اني الغلط بية جوزي عاد وانتبهي لنفسج ذولة ميحسون الا الواحد يسحب منهم كل شي و من يشوف نفسة ملبوس يجيج يركض لا كل شي تكليلة اي كافي دلال و هو ميستاهل مو اخويا بس ميستاهل
- الله كريم
- والنعم بي بس كافي
- خير ان شاء الله
رجعنا للبيت محجيت ولا كلمة رحت ونمت لان انطاني مسكن محسيت الا ثاني يوم الصبح وزياد ماكو خفت لا يرجع يشرب مرة لوخ دكيتلة
- الو
- شتريدين
-شلونك
- زين
- وين انت
- ببيتي شكو
- ماكو شي بس ما اجيت وظل بالي
- لا يظل بالج ولا تفكرين بية
- زياد مسويت شي والله صدكني وروح بابا وماما ما احلف بيهم جذب
- انت تريدين تلعبين علية مثلا لج لوما ذيج المرة سامعج شلون حجيتي وياها ومقبلتي تحجيلة ليامن عن امة
- تمام لعد دير بالك على نفسك
- عود معجبج الحجي
سديت التلفون بوجهة وقفلتة وكمت اشتغل مثل كل يوم
اجتي خالتة للمطبخ واني وحدي
- شفتي اليتحداني شلون يخسر
- متحديتج اني بس حرام عليج تذبين علية شغلة ممسويتها الله فوكانة اثنيناتنا ويعرف الحق ويامن لهذا ما اخاف اخسر خافي انت عود
- اطلعي من حياتة هو ميريدج بعدين انت شعندج طالعة ويا اخو البارحة وهو هيج يهتم بيج
- خالة لهنا وكافي حجاية لوخ والله اسويها عشاير ودم كل شي ولا تطخين سمعتي وشرفي والتحجين عنة راشد ابن اختج وعم حفيدج مراح اكلج عيب عليج بس ميصير وانت جبيرة وواعية
- يا سمعة يا شرف هو زياد كالي اني لليوم ما نمت يمها ولا تقربت منها ولا صار بيناتنا شي واكيد انت دتلوفين على اخو واصلا هو زياد بارد مثل مجانت تكول جيهان عنة يعني حتحتاجين لغيرة
من كالتلي هيج حسيت النار تطلع من عيوني شلون يحجي هيج عني و عن علاقتنا وتتجرأ وتحجي عن زياد اذا بنتها متصون رجلها مو معناها اني مثلها
- زياد رجال وغصبا عن الكل ومو بارد وانت دتجذبين لان مثل ما اتبليتي علية اتبليتي علي اترجاج لا تحجين بعد وياية خليني بحالي مو ناقصة مشاكل الله يخليج
عفتها ورحت انظف الهول وراها خابرت على اخواني
ارتاحيت من حجيت وياهم
بس المشكلة معافتني بحالي كامت تقرة براسة علمود راشد اعرف لان مبينة من نظراتة النا ووين ما يروح راشد هو وراه
حتى تلفوني شفتة يكلب بي وخليتة براحتة ما كتلة ليش ولا منعتة خلي يتاكد من كل شي بنفسة ..
