#بسمة_الحزين9
Shahd Alsalman
شهر واحنا على نفس الحال ما صار اي تغيير زياد ما يرجع للبيت ابد وميقبل احجي او اسأل شي وحتى ابنة ما يجي يمة ولا يعرف شي عنة يا دوب يبوسة وقليل ما يحجي وياه او يحسسة بالابوة
حقيقة ما اعرف شي عن زوجي ابد
يامن اتعلم على نظامة الجديد
صارت سما كلش قريبة علية تحجيلي كل شي وتسولف يعني صرنا خوات وصديقات
راشد كلش حباب ويعاملني كانما اختة الثانية شيجيب لسما يجيبلي
اما عمو وخالة اهلي وممقصرين وياية بشي
المشكلة اني محتاجة احس نفسي متزوجة محتاجة
لوجودة يمي كل حياتي كضيتها معتمدة على نفسي رايدة احد استند علي و ما اخاف من شي
حتى لو جنت داخلة تحدي بس مرات اضعف واحس اتعب
نومت يامن مثل كل يوم بالليل سويت عشا ويا سما بس اليوم حيل اهلي ببالي وكلش مختنكة حتى سما تكلي بيج اليوم شي مو طبيعية
اخذت تلفوني و طلعت اغاني ورحت بالمرجوحة
طلعت اغنية فقدتك والدمع ينزل بلا ما احس صدك مشتاقتلهم وتعبت من معاملتة الي و ما احس بأي راحة او سعادة برغم ما اشكي بس هذا الاحسة
منتبهت راشد فات بس شفتة جاي علية مسحت دمعي وسديت الاغنية
- شبيج بسومة خما اكو شي؟؟
- ما بية
- شون ما بيج كوة دتحجين ليش تبجين شصاير
- ما بية والله بس هيج مخنوكة
- زين كافي تبجين زياد ضوجج ؟
- لا والله بس اشتاقيت لاهلي
- الله يرحمهم تريدين اوديج الهم ؟
- ها
- اي اوديج شبيج صفنتي باجر اتحضري وناخذ امي وسما وهم نزور ونروح مناك للمقابر شكلتي
- ما اريد اكلفك
- باع شدتحجي ام عيون يلة مسحي دمعج وحضري نفسج باجر الفجر نطلع ان شاء الله
- الله ينطيك الصحة والعافية ما ادري شون اشكرك
- ادعيلي اتزوج وحدة ام عيون مثلج ههههه
- ان شاء الله احسن واحلى وحدة تاخذ يا رب
- تسلميلي يلة نفوت
رحت كلت لاهلي على سفرة باجر وامي كيفت
زياد اجة ورة شوية وكنالة بالاول ما قبل كالعادة ما يقبل يتجمع ويانة بعدين ابوية لح علي وكال اوكي
خطية شفتها كاعدة بالمرجوحة ودك بجي تخيلت زياد مضوجها بشي بس هي حقها تضوج وحقها تتطلك منة اعرف هو ميعاملها زين وهي بت اصل ومتحملتة طلعت مشتاقة لاهلها كلت اوديها ونزور صارلنا هواية مرايحين
صار الفجر صلينا وطلعنا يامن كل الطريق نايم وصلنا وطبينا بالاول زرنا المقابر هم راحو لاهلهم بعد ما قرو الفاتحة لاهلي اني هم رشيت مي وقريتلهم قران و فرغت يمهم كل البجي واندعيت هواية
وراها رحت يمهم زياد مو وياهم باوعتة شوية ليغاد عنهم واكف يم قبر مكتوب الشابة جيهان معناها هو يم مرتة بداخلي انقهرت هم عليها وهم علية لان اني مو بحساباتة ولا حتة مهتم لوجودي
لكيتة واكف وما ينطق و لا كلمة انطيتة قران كتلة اقرالها باوع علية واني كمت اقرا الفاتحة طبطبت على جتفة ورحت ليغاد دا انتظرة
جنت واكف يم كبر جيهان ودا اباوع كأنو اليوم دفنتها شفت بسمة يمي وتنطيني قران صار هواية مقاري قران واحس كلبي قاسي فاتحتلي سورة ياسين وهي دتقرة الفاتحة الها عجيب هي مو المفروض تضوج وتغار ليش هيج تتصرف وياية اني اريدها تطفر وهي ولا يمها دا اقرة وبالي مو يم الايات حسيت بايدها تطبطب على جتفي باوعتلها بعيونها الدمع وخرت وراحت شوية ليغاد شكد تمنيت ابجي مثلها هي واحس مثلها هي
خلصنا ورحنا زيارة وراها تغدينا من دنطلع من المطعم صاير شوية ع الشارع يامن نزل من السيارة ديلعب ويلحك بزونة صار قريب الشارع
سمعت صوت بسمة تصيح يااامن انداريت لكيتة قريب ويركض للشارع تجمدت بمكاني ومدري ليش مكدرت اسوي شي ولا اركضلة حسيت نهايتة مثل امة وخلص هو هم حيروح وشفتة مدمى وبالكاع مشمور وحتى الكبر وشكلة هم شفتة مدا اكدر اتحرك من مكاني واروحلة
صحت ياامن حتى ينتبه علية لهنا لان التهيت عنة شوية وما شفتة من نزل
بركضة سريعة رحتلة زياد واكف ولا تحرك بس اني وراشد نركض وسما ويانة بينة وبين الشارع شعرة وجاي لوري سريع شلتة وانداريت اريد اخلصة حضنتة وفات من يمي اللوري طاير بكل سرعتة كلت هاهية اني اندعمت وانتهيت بعد
اخذتة سما مني وراشد لزمني ردت اوكع رجعت اخذتة من سما احضنة وابجي حتى راشد اتخبل ووكع على حيلة هبطنا علي كلش وهو خاف ويبجي
العالم التمت علينا فد موقف كلش مرعب
باوعت لزياد صافن رحت علي صحت بي شبيك ليش متحركت هذا ابنك راد يموت بعدني ممكملة وكع علية وفقد وعية ووكعت وياه مكدرت اسندة ركض راشد وعمو علينا والناس يمنا اللي جاب مي
واللي يكول جيبو نودي مستشفى
كمت و فتحت حزامة ودكم القميص طبعا محجيت ولا كلمة ادري بي انصدم ودا اصحي بكل هدوء حاولت اسيطر على نفسي رفعت رجلة ليفوك كتلة لراشد جيب شي حلو وحطة بلسانة وسما تفرك ايدة وترشلة مي
عمتي شايلة يامن وطكت بجي وعمو يهفيلة شوية وفتح عيونة اول مفتح عينة شربتة ميرندا جابها رجال من الواكفين
باوعلي وكال جيهان حبيبتي
كتلة اني يمك يلة كوم كومناه وصعدنا بالسيارة طول الطريق هو نايم على رجلي واني حاضنة راسة واقرالة علي قران وامسح على ظهرة لبعد ساعتين متحملت من التعب نمت كعدت لكيتة كاعد يباوع من الجهة الثانية وحنوصل تقريبا محسيت بي من كعد
- شلون صرت
- زين
- دايخ
- اي
- هسة نوصل للبيت ونقيس ضغطك وترتاح
- اي
سالني عمو باوعلي من المراية
- انت شلون صرتي
- ما بية شي نمت وارتاحيت
- عرضتي نفسج لخطر علمود هالقزم وهو نايم ولا حاس
- صارت وقدر ولطف الحمدلله ماكو شي هو طفل شمعرفة
- ولا انتبهنا علي من نزل
- بعد انت كلتها قزم ههههه الحمدلله على سلامتة
- الحمدلله ما اعرف شلون اشكرج
- اي والله يا يمة فوكاها زياد تخربط
- خالة عمو شبيكم ليش هيج تحسسوني غريبة
- والله انت حالج حال سماوي الله يحفظج يا رب
- الله يديمكم عمو
وصلنا للبيت صعدت يامن لغرفتة بدلتلة وهو نايم خليتة يكمل نومتة رجعت لخالة جبت جهاز الضغط منها دا اقيسلة ضغطة ..
