#بسمة_الحزين12
Shahd Alsalman
متخيلت راح ابجي بيوم وبحضن وحدة غير حضن مرتي وحبيبتي جيهان ما اعرف شنو سويت اذيتها ما اذيتها حجيت شي غلط او سبيتها والله ما اعرف
كل الاعرفة من حجت وياية وضربتني خلتني انهار وافرغ كل شي
شكد جنت محتاج لهذا الشي ولحضن ولاحد يفهم البية ويحس بية بدون ما يكلي انساها وبدون ما يجبرني اعيش بدونها
هي تريد اثبت حبي الها وتريد اعيش على ذكراها وتريد اربي ابني وانتبه لحياتي علمودة هو
حتى اهلي برغم اعرف متأذين علمودي بس محد حجة وياية مثلها هي احتوتني وفهمت العلة ووجع كلبي ومضايقتني
اني ما اضوج منها بس مدا اتقبل تكون بحياتي وحدة ثانية غير جيهان
بقت يمي مقبلت تطلع وترجع للبيت بدلتلي هدومي
وخلتني اتمدد نمت من التعب
وهي جانت كاعدة بعد محسيت بشي
شفتة نام وكام يشخر عفتة ورحت انظف المطبخ صاير بي انفجار عبالك غسلت المواعين لميت الزبالة نظفت الثلاجة سمعت صوتة يصيح ويبجي ركضت علي فتحت الضوة مثل الطفل كاعد ويبجي رحت حضنتة
- اني يمك لا تخاف ليش تبجي
- اريدها جيبلي جيهان
- اشش اهدى كافي
- اريد ارتاح تعبت والله تعبت
- حترتاح بس كول يا الله اتوكل علي لا تخاف من شي
- ساعديني مدا اتحمل والله
- يمك اني انطيني مجال واني اساعدك لا تسد كل البوب بوجهي
- ساعديني
- خلص يمك والله ما اعوفك لحد ما تطيب
يلة تعال تمدد نام عندي
مددنا وحضنتة بلش يهدى ويسكت ورة شوية حسيت ديبوس ركبتي جمدت بعد ما بية قطرة دم
- شدسوي زياد
- اريدج
- انت مو بوعيك نام كافي
- ليش هدومج مبللة حبيبي
- جنت اغسل مواعين وطفر علية
- انزعي البلوزة تبللت
- لا هيج مرتاحة
يا الله شون ورطة هاي خجلت منة ومن كلامة وما ادري هو بوعية او لا بس سويت مثل مراد اصلا ذبت وياه
- احبج
- شنو
- احبج هواية
كام يتقرب مني اكثر وكالي احبج معقولة ؟
- صار شكد مبايسج وحاضنج
عرفت مو الي بس تاملت هيج
- زياد كافي
- لج مشتاقلج حرام عليج جيهان
- واني هم بس هسة نام ارتاح اني هم نعست
- نامي بحضني
- ماشي
نمت بحضنة على كد حبة الها حسيت نفسي احبة صحيح اني ما اريد شي بس والله حبيتة وهاي مصيبة لان حب من طرف واحد حيموتني الي وجمالة صرت الة جيهان بسبب اوهامة وبسبب تعبة
الله كريم يمكن بيوم يحس بية واذا محس خلص مو مهم اني احبة ومعناها راحتة الاهم حتى لو بدوني
غفيت يمة وكعدت قبلة حتى لا يتضايق وينحرج كمت ولبست هدومي رحت حضرتلة ريوك
بعدين كعدتة جانت ساعة 8
- زياد
- هممم
- كوم يلا ساعة 8 صارت
- بعد وكت
- لا يلة بينما تتريك وتسبح وتبدل
- عوفيني نعسان
- يلة كوم ههههه جنك يامن
- هههههه
اول مرة اشوفة يضحك كلت الحمدلله والشكر
كام وراح سبح وبدل واجة ع الريوك
تريكنا وهو ساكت
- شكرا
- على شنو
- على كل شي
- يلة كمل اكلك حتى تصلي
- اصلي ؟
- اي احنا شتفقنا مو كلنا بعد نحاول وننطي نفسنا فرصة شوية شوية ويتصلح كل شي
- راح اكدر
- راح تكدر متأكدة
شبعت وكمت اشيل ماعوني وكلاصي اغسلهم بينما هو يكمل حتى نطلع سوة وارجع ليامن خطية مشفتة البارحة وحتى مسالت عنة
- هاي شنو شبيها ايدج
-شنو شبيها
- زندج ازرك واحمر وايدج زركة
- ماكو شي متوهم
- شسويتلج البارحة ضربتج؟
- لا والله ماكو شي لا تخلي ببالك يلة تاخرت على شغلك و يامن همين ما ادري شسوة مسوة
- تحبي ؟
- اكو احد ميحبة يخبل حبيبي
- بس هو مو ابنج
- بس هو ابنك
سكتنا وصفنت بعينة وهو هم ما اعرف شلون طلعت مني هالحجاية ما اريدة يحس اني دا اسمعة او عبالة دا استعطفة مثلا
رحت عنة وشلت بقية الاكل ولميت المطبخ بدلت وطلعت
مقبل اسوق السيارة ووصلني كالي راشد يجيبها عود او اني واستغرب شوكت تعلمتها وكعدت احجيلة يعني تقريبا اليوم حسيت نفسي شوية مرتاحة بسبب كلامة ونشاطة
فتت للبيت لكيت خالة وراشد كاعدين حجيت وياهم علمود زياد وطلبت منهم يتركو براحتة وهم افتهمو الوضع لازم نخلي يتجاوز هالازمة ..
