#بسمة_الحزين4
Shahd Alsalman
خلصت دراستي الاعدادية ومكدرت اكمل وضعنا المادي مو زين و لان علاج اهلي يكلف فضلت انه نصرف الفلوس على الدوة والاطباء علمود اهلي على انه اخلص دراستي
بابا ممخلص وامي يا دوب تقرة وتكتب واخواني بعد ما تزوجو والله وفقهم بشغلهم كدرو يكملون بس هم ينطون لاهلي راتب كل شهر يعني الحمدلله مستورين
وبرغم اهلي ما قبلو الا اكمل بس رفضت وكتلهم طلعتلي كلية بعيدة وقنعتهم بالظروف والوضع مكتلهم علمود العلاج حتى لا يحسون بالذنب واني هم قنعت نفسي شسوي بالشهادة التخرجو وكاعدين لا تعيين ولا شغل كلت الله يعوضني خير
يجوني ناس بس ما اقبل اتزوج محد يداري اهلي و صعبة اعوفهم
بيوم اتخربط ابويا هو عندة عجز كلوي بس هالمرة جانت الوكعة قوية حاولنا ننقذة بكل الطرق وانواع العلاجات حتى هو تعب وانتهى ما بقى بي حيل سوينا اخر حل اللي هو غسل الكلة ما طول اسبوع واتوفى
جان يوم صعب انه اتقبل ابويا ذاك الهيبة راح ومات وماكو صوتة ولا يصيح باسمي ولا يطل علينا ولا انطي دواه
بقينا اني وامي بالبيت امي كلش تأثرت بوفاتة لابويا واتدهورت صحتها اكثر واكثر اني كدرت اقوي نفسي علمودها وهي هاي حال الدنيا كلنا لهذا الطريق برغم اشتاقلة هواية واحتاجلة بس لازم اكون هيج واني مؤمنة ميصير اعترض على هالشي
لميت كل ادويتة واغراضة وبعد عدنا جدد ملحك يستعملهم رحت ووديتهم للصيدلاني الولد نعرفة وكتلة ووصيتة اي احد يريد دوة مثلة ياخذة بلاش بس يدعيلة بالرحمة يعني سويتة كأنما ثواب لروحة
اكيد اكو ناس محتاجة وحالنا احنا احسن شميكون
ما طولت امي بعد وفاة ابوية هي هم لحكتة بجلطة دماغية وتوفت مبقالي احد راحت هي هم واني اللي بقيت علمودهم تالي عافوني هيج
الله يرحمهم كل مرة اطلعلهم ثوابات واقرالهم قران وباللي اكدرلة ما اقصر الحمدلله على كل حال وان شاء الله ما اكون قصرت وياهم
كعدت بالبيت لوحدي وما قبلت اطلع منة ولا اعيش يم اخواني وهم همين خطية البيت ما قبلو نقسمة وصار بأسمي لان هم كلهم عدهم بيوتهم ومستقرين واخويا الجبير هو اللي كال هيج واخواني البقية ما اعترضو يعني امنوني ماديا
كل مرة واحد منهم يطل علية ونسوان اخوتي احبهم ويحبوني
صحيح توفو اهلنا بس بقينا واحد كلبة ع اللاخ واخونا الجبير هو اللي لمنة وصارلنا اب
اجتي خالتي وجايبة البنات وقمت بواجبهم وصاحتلي كالت تعالي نكعد وحدنا
- ها خالة كولي
- خالة انت تدرين شكد عزيزة علية ومن ريحة الغالية
- وانت هم حبيبتي خالة
- فدوة لعينج باعي ماما من الاخير اكو مرة تريد تزوج ابنها
- اي
- و اجت على بناتي بس هن بعدهن صغار و هم خوش عائلة والولد همين بس مرتة متوفية وعندة ولد واحد و هو صيدلاني
دانشي فكرج وشوري اخوتج واذا اكو قبول مبدئي نرد خبر للحجية
- بس خالة هو عندة ولد يعني ومتزوج
- مرتة توفت بحادث والطفل صغير انت على ايدج تربي ولان هم خوش ناس استخسرت يروحون لغيرج حتى والله لبناتي ما فكرت انت اولى منهم وكتلج بعدهم صغار
- لا خالة مو قصدي اعرف تفكرين بية بس ...
- يا حبيبتي فكري على راحتج واني انتظرج لا تكولين بس انت هسة وحدانية والله يرحمهم لو هنا جان فرحولج والله
- يصير خير خالة اشور اخواني وارجعلج خبر
- ان شاء الله يقربلج الخير وين مجان يا رب
- تسلميلي خالة
اتغدينا سوة والعصريات راحو ..
