#بسمة_الحزين17
Shahd Alsalman
صحت بسمة وطابت طلعناها من المستشفى ودتتحسن يوم بعد يوم
امي طردت خالتي ورزلتها وحجت عليها كالتلها لا اختي ولا اعرفج تزرعين الفتنة ببيتي علمود بنتج وهي لو عايشة مترضى ع السويتي طول عموج كلبج اسود ومتحبين الخير لاحد
وخالتي هم طلعت بالوجه الاسود وتبجي بس محد سامحها بينا
بسمة خلصتها نوم وراحة واعرف بيها مقهورة من زياد ومن اللي صار هواية
زياد كام ميجي للبيت اصلا ولا شفناه من بعد الصار
وهي صحتها تحسنت و رجعت مثل قبل
فد يوم جنا كاعدين وجتي يمنا نزلت
- ها يمة شون نزلتي مو زين عليج
- نزلت على كيفي خالة ما بية شي
- شون صرتي بنيتي
- الحمدلله عمو خير من الله
- اجيبلج شي حبيبي تاكلين
- لا كلبي
- مشتاقيلج والله بسوم
- تشتاقلكم العافية يمكن لازم بعد تتعودون على غيابي
- شنو قصدج عمو ؟
- ما اكدر ابقى هنا بصراحة اريد اتطلك
- لا بسمة شدتحجين
- سماوي لهنا و يكفي ما اكدر اكثر والله حاولت هواية وياه وحاولت اربح واكسبة بس مكدرت ما اتحمل يصير شي لاخ
- بنتي استهدي بالرحمن اكيد من زعلج هيج تحجين بعدين كل اثنين يصير بينهم مشاكل
اجيت للبيت وسمعتها دتحجي ويا اهلي وتكللهم ع الطلاك خليتها تكمل كلامها اريد اسمعها شتكول
- الي صار بينا مو مشكلة ولا حتى احنا مثل اي اثنين بعدين اني تعبت من كل شي انتو كلكم تعرفون بزياد وكلكم جبرتو بية وخليتو يعيش وياية ما اريد اكول تدمرت من هالزواج لان انتو صرتولي اكثر من اهل وحبيتوني ومحسستوني بغير الحنية
انت خالة صرتي مثل امي بس من الاول مكتيلي الحقيقة و لا حجيتيلي عنة شي ظلمتيني بكد محبيتيني
وانت عمو جبرتة بية حتى ترتاح وتخلي يستقر بس اني فقدت اماني وراحتي ومع هذا ما انكر شكد احبك واحسك مثل ابوية
راشد دافعتلي ومخليتة ياذيني بس ردت تخسرة كأخ من وراية وبسبب خالتك همين
سماوي انت اختي المجابتها امي والله
الله يحميكم ويكفيكم الشر كلكم بس اريد اتطلك ما اتحمل اكثر
- بسمة
سمعت اسمي انداريت شفتة زياد
- اكيد سمعت الحجي الصار فخلينا نتطلك بهدوء بدون مشاكل يكفي الصار لليوم
- اني اسف واعتذر منج ومن اهلي
اذيتكم هواية لو من الاول متقبل وفاتها لمرتي وراضي بقدري يمكن جان حياتي صارت بخير ويمكن جان عرفتج بغير ظروف بس ما اكدر اطلكج
ما اريد اخسرج
- زياد ما اريد اكمل وياك اريد اشوف حياتي واكمل دراستي وابني نفسي
- بسمة ما اكدر والله حياتي انكلبت وتغيرت للاحسن بسببج انت ابني اني امي اهلي كلنا هنا تغيرنا انت بسمة هالبيت ورجعتي الروح بية
- اتاخر الوكت على هالحجي وخسرتني واني هم خسرت روحي جنت كبالك محاس بية تجرح بكلامك وتقلل مني وما يهمك اي شي غير نفسك بس هسة خلص كل واحد بينا عرف مصيرة
- مصيري وياج الله شاهد علية واهلي شهود على كلامي يكفي تبجين مو زين عليج وسامحيني وانطيني فرصة
- اخذت كل فرصك وما بقى عندي كلب يسامح وينطي طول عمري انطي بلا ما اخذ انداس بدون ما اكول اخ افرح الكل بس محد فكر بية يفرحني او يسعدني كلكم فكرتو بنفسكم حتى اني مفكرت بس بيكم انت واهلي واهلك طلكني اريد ارتاح
كمت احس بدوخة واني احجي تذكرت كلشي مر وياية وشكد حبيتة وشكد اذاني يحجي وياية ومسمعت شكال وما اتذكر شي وراها
دنحجي وهي تبجي بحركة واني وياها كوة مصبر نفسي وما اريد اقهرها بس حسيت بيها و عرفت مراح الكة بطيبتها او حنيتها مطولت دقايق و فقدت وعيها اكيد من الحالة النفسية التمر بيها بسببي وهي اصلا مجروحة مال عملية
قست ضغطها جان نازل انطيتها مهدىء ونامت
ما كدرت اطلكها ومكدرت تسامحني هي ابد
قررت تروح لبيتهم وبقيتها على ذمتي
البيت فرغ علية ويامن يشتاقلها كمت ادزة الها ويا راشد وسما لان متريد تشوفني
قدمت على كلية ويا سما جنت احصل اخبارها منها مرت سنة على فراكنا وهي متتقبل حتى تشوفني
اعترف اني حبيتها صحيح مو بكد جيهان بس حبيتها وتعودت عليها وكل السنة الفاتت اني ملتزم بصلاتي وشغلي طورتة وفتحت صيدلية ثانية شغلت بيها صيادلة وكمت اتعاقد ويا مستشفيات على مواد اجهزهم بيها والحمدلله رجعت اموري تحسنت بسببها كل شي اسوي اخليها هي كدامي
من اضعف اتذكرها من اكون محتاجها اقرا قران هي علمتني هالشي
ما احس اي شي صعب من اتذكرها تكلي توكل على الله او الجملة اللي دائما تكولها خير ان شاء الله حتى راشد كلي انت صاير تحجي مثلها الله اخذ مني جيهان وعوضني بيها
افتهمت معنى العوض ومعنى الحب الصافي شكد صافية جانت وياية وعلى كد طيبتها انجرحت كلنا خذلناها
وديت سما حتى تجيب نتيجتها وشفتها هي وياها بس دتبجي عفت السيارة ورحتلها
- شبيج بسمة
سما شبيها ليش تبجي
- ما بيها بس نجحت ومن الفرح تبجي
- صدك تحجين الف مبروك حبيبي
حضنتها بلا ما احس
- خلص لا تبجين اتكطع من دموعج
- احم احم
- شتريدين شطلعتي انت ولج
- طبعا نجحت
- مبروك كتكوتي
يلة امشو معزومين مال نجاح
- اني اترخص اخواني ينتظرون مني خبر
- وين بسمة مو عازمكم
- شكرا ما اكدر اروح وياكم من رخصتكم
وعافتنا وراحت حتى مطايقة تباوع بوجهي انهزمت بسرعة واخذت تكسي وراحت
- ميخالف زياد خليها براحتها
- سما صارت سنة معقولة مدتكدر تسامحني
- الله كريم انت هم حاول وياها لان تركتها بعد ومحجيت وياها مرة لوخ
- سما والله هواية حاولت بس ما اكدر اكثر خاف متريدني ودا اضغط عليها
- لعد خليها براحتها او طلكها وانطيها حريتها مدامك حاولت واني وراشد هم شكد حاولنا بس صعبة مدتقبل ترجع
- والله حبيتها ومفتقدها هواية كلش محتاجها تكون يمي
- ان شاء الله تحس بيك وترجعلك
- امين يا رب
- يلة نرجع حبيبي
- لا وين نرجع العزيمة بعدها فعالة
- ههههه فدوة لعينك الله يخليك الي يا رب
رحت استلم النتيجة الحمدلله نجحت وبتقدير جيد جدا من الفرحة بجيت ومصدكت نفسي شفت سما ع الباب وهي هم ناجحة متوقعت زياد اللي جايبها شفتة كبالي ويسالني بس مدا اكدر احجي بلحظة حضني ويهدي بية ويباركلي وكالي حبيبي
يا ويلي شكد طلعت حلوة منة وشكد جنت محتاجتلة صحيح اني اشتاق واحن الة بس اخاف ارجعلة
بالاول جان الموضوع اجبار وهسة اخاف لا يكون عذاب ضمير ع السواه واني هم انجرحت كرامتي
خليني احبة من بعيد ولا اكرهة واني قريبة منة
