إغتصاب

الجزء 01

ﻟﺴﻪ ﺑﻜﺮﻩ ﻭﺑﻌﺪو

ﺃﻟﻒ ﺳﺆﺍﻝ ﻭ ﺭﺩ

ﻟﺴﻪ ﺃﻟﻒ ﻃﺮﻳﻖ ﻭ ﺳﻜﺔ

ﻟﺴﻪ ﺃﻟﻒ ﻭﺃﻟﻒ ﺿﺤﻜﺔ

اتخرجت من الجامعة وفرحانة الليلة اول يوم في الاجازة حا انوم زي ما عايزة لا اصحي سبعة صباحا عشان الحق مواصلات وكل يوم جارية عشان اركب الحافلة ولا المحاضرة تفوتني والاستاذ كالعادة يقفل الباب ويشيل الحضور وفوق لي دا يديهم امتحان بي درجات اظنو حقد منو او بكون اليوم دا مرتو مشاكلاه.. اصلا كل واحد بجي بفضي زهجو وعقدو فينا.. اتمغيت في السرير شديد امممم ياالله اول يوم في العطالة وجريت التوب وهاك يا نومة.. مريم مريم قومي انتي ما صليتي الصبح.. خلاص بقوم دقيقة بس انوم تاني.. ياخ الجو بارد مغري وجو الصباح واحلام العقل القليلة ادب بتجي في اللحظة دي.. بس عقلي رجع تاني ينادي فيني للصلاة.. مريم قومي كلها ركعتين خمسة دقايق.. ياالله الجو بارد شوية بس ارقد واقوم اصلي.. خخخخخ نومة واحدة صحيت حداشر قمته بالقوة عيوني مورمات وشعري منكوش علي العليه خشن.. نزلت رجولي كالعادة القميص معلق فوق من نومي الكعب جريتو والملاية في نص السرير والغرفة حالتها تقنع عن السؤال جايطة.. فتحت الدولاب ستين حاجة طقشتها وقعت شي شامبو وزيت بيبي اويل وجلسرين رجاء.. لالا يوووه اتكشح براه باقي فيه ربع وانا مفلسة وين غطايتو.. بقيت بفتش والرف التاني خاته فيه كريماتي مقلب اكتر من الغرفة.. علب كريمات فاضية معظمها بس ما جدعتها لاني بحب الملم العلب الفاضية وبقول حا احتاج ليها في يوم.. احتاج ليها في شنو ما عارفة.. بس امكن اخلط لي فيها خلطة صابون ولا كريم.. شلت فرشتي وصابونة وشي ومشيت اتسوكت واتوضيت وجيت صليت و شربت الشاي حتي رضيت علي روحي قمته انضف البيت الساعة حداشر ونص.. الملل بدي يحصل من اول يوم لاني بكره النضافة وبخاف بالمسح يدي يبقو خشنات.. الجامعة بي رغم كل شي بس مفر من شغل البيت الما بنتهي غسيل عدة وكنس ومسح ومرات كتير طبيخ.. صاح ما بعرف اعمل شي غير سلطة الاسود والزبادي والشبس والبطاطس باللحمة بس برضو بكره حاجة اسمها مطبخ.. انا من بكرا حا امشي المنسقية ابدا اجراءات الخدمة انزل لي في اي مؤسسة الكلام دا ما بنفع مع الفلس الحاصل دا.. سرحته في الوظيفة الافتكرتها سااااهلة بمجرد اني اتخرجته حا القاها.. ما صحيت من احلامي الكتيرة دي الا بصوت امي مريم يابت مريم تعالي ختي الفطور... ياالله ياامي انا براي بتك سارة وينا تجي تختو هي انا هسي انتهيت من النضافة ولا هي بس قاعدة ساي حلال عليها وحرام علي.. بطلي قلة ادب اختك الاكبر منك وعندها مسؤلية شفع ونزلت ماجستير.. انتي عندك شنو قراية وانتهيتي.. ويعني شنو عندها شفع كان ماسكاهم براها ولا متحملة مسؤوليتهم ما اربعة وعشرين ساعة جايطين لينا في روسينا.. سارة سمعت كلامي وجات طالعة وانتي مالك قاعد ليك وين قربو منك ولا قاعدة تشتغلي بيهم كتير.. واشتغل بيهم لي انتي امهم تتحملي مسؤليتهم مش تفكيهم لينا.. ياستي انا متحملاهم وما طلبت منك مساعدة.. ياخي واكتر من كدا تطلبي كيف.. والشكلة قامت.. ابوي سمعنا وجا قال لينا لما اموت ابقو تاني اتشاكلو بي راحتكم اصلو ما عندكم احترام لي.. سكتنا الاتنين وكل واحدة دخلت غرفتها.. جيت وبقيت بنقنق بس علي طول انتو سارة دي شايفنها الاحسن وفي صفها عشان هي الكبيرة يعني.. ما مشكلة الله يصبرني ويخارجني من البيت الفقر دا زاتي زهجته منو... والدموع جرو شلته التلفون وركبت السماعات وشغلت لي اغاني ربة هاجة كدا وبقيت بجبجب معاها بي اكتافي والصوت عاااالي لي درجة ما سمعت امي وهي دخلت وبتتكلم معاي الا بي يدها وهي بتقرصني في وركي شديد ووااااااي يا امي مالك حرام عليك والله قطعتي جسمي بالقريص دا.. قومي يا قليلة الادب ترقصي كمان انا هسي ناديتك لشنو.. قمته قالبة خلقتي وجيت ختيت الفطور وكالعادة الثقيلة دي جات قعدت تاكل ولا هاميها.. وانا محروقة منها قلت استغفر الله العظيم الله يتوب علينا ونرحل من البيت دا...

والله ارحلي هسي الماسكك منو كان.. انا هسي اتكلمت معاك؟

والله افتكر الكلام واضح واحسن تبطلي قلة ادبك دي..

لما تتأدبي انتي اول تاني تعالي اتكلمي.. والشكلة تاني بدت وقت سمعنا حركة ابوي حتي سكتنا..

امي خشما ما فتحتو بس حسيتا حا تقوم علي بالمفراكة وتدقني بيها لكن الله ستر..

يتبع....