إغتصاب

الجزء 28

ﺭُﺑﻤﺎ ﺍﻷﻗﺪﺍﺭ ﺗﺄﺗﻴﻨﺎ ﺑِﻤﺎ ﻻ ﻧﺸّﺘﻬﻲ ؛ ﻟﻜِﻨﻬﺎ ﻣُﺤﺎﻃﺔ ﺏَ ﻫﺎﻟﺔٍ ﻣِﻦﺍﻟﺨﻴﺮﺓ ﺳﻨُﺒﺼِﺮُﻫﺎ ﺑﻌﺪَ ﺣﻴﻦ..

تاني يوم قمت من دغش الرحمن بنضف وامسح واجهز وبخرت البيت وطردت عبدالله علي شغلو،، ناس امي وابوي جايين قال لي ايوااا ايوااا اللقي احبابو نسي اصحابو،، لكن كراع البقر جيابة بكرا بتجيني تتبكي لما بطنك بس توجعك،، غاظني طبعا وبقي يطلع لي في فضايحي ضربتو وقلت ليه امشي يا ثقيل،،

ناس ابوي جوني وهاك يا ونسة وكلام وعبدالرحمن شالو ابوي وقعد بيه في التلفزيون،، بقينا ساكتين زي تقول كل حد عندو كلام كتير في جواه لكن منتظر التاني يبدا هو،،

سارة قالت لي عندك خبر عن زينب حصل ليها شنو؟

لالا لي زمن ما عارفة عنها حاجة تانية..

قالت لي الله يجيرك جاها مرض كدا بشتن جسمها كلو بقت زي المجنونة هسي ما بتتعرف بس قاعدة في بيت امها بعد اتطلقت وفضايحها كل يوم شارطة الفريق قالو..

ربنا يشفيها ما لي دعوي بيها،،

سكتنا تاني من جواي قلت اللهم لا شماتة بس ربنا اخد لي حقي ليك الحمد والشكر،،

امي قالت لي الحمدلله الله حلاك من الاسمو اسامة دا ما استاهلك،، ورزقك بي واحد ماشاءالله مستتك هدا،،

الحمدلله يا امي عبدالله ودناس وبخاف ربنا فيني،،

سارة ردت يا امي ما تقولي ليها وخلاص الحصل شنو،،

بقيت بعاين ليهم الاتنين ومن جواي فعلا نفسي كان اعرف الحصل من كلامهم دا..

سارة قالت لي انتي ما عارفة الحصل تاني نحن رحلنا بيتنا ال في الحلة اها وقعدنا هناك يوم قاعدين في حالنا جات ام اسامة هايجة وتكورك وجايطة بتكم القليلة ادب الما مربية ترفع قضية خلع في ولدي انا،، انا ولدي يشتريها ويبيعها المطلوقة الهاملة،، نحن الكلام ما رضانا وما سكتنا ليها وزي ما قالت قلنا كمان،، ونحن ما بنشمت في الناس لكن اليوم داك كان يوم جمعة اظن يا امي سمعنا بي الزغاريد قالو اسامة الليلة عقدو علي بت من بنات الحلة وهسي هو جاي في الشارع من الخرطوم يسوقها،، اها زي العصر كدا سمعنا الصرخي والولولة لفحنا تيابنا وجرينا نعرف الحصل شنو،، لاقانا ابوي رجعنا قال لينا اسامة ومعاه كم واحد من اصحابو العربية اتقلبت بيهم في شارع الخرطوم مدني وما معروف حيين ولا ميتين،، اها يومين كدا مشن سمعنا من ابوي مشي ليه انو اسامة دخل العناية المكثقة وربنا يرحمو تاني اتوفي،، وتاني صاحبو مازن المعاه داك دخلوه العناية المركزة وبعدها اتوفي برضو،، واصحابو التانين ديلك حالتهم حرجة ما بعرف الحصل عليهم شنو،،

قعدت ابكي وابوي جا هرج فيهم يعني برضو مصريين تحكو ليها الحصل،، الحصل حصل يابتي مريم،، ومن يومها نحن فتشنا ليك ما عرفنا ليك جهة ولا محل امك دي تدعي ليلا ونهارا ما بتنوم انو ربنا يحميك من شر عبادو،، يابتي الشيطان شاطر قدر يفرقنا،،

قمت وقلت ليه يابا ما تقول كدا الحمدلله هسي الله جمعنا ومبسوطين مالنا ومال زمان تاني،، قلت ليهم اني ما حكيت ل عبدالله حاجة وانهم ينسو الحصل دا زي ما كأنو حصلت حاجة..

قعدو فطرو معاي وطلعو تاني فاتو،،

قعدت براي كدا وبتزكر في كلامهم والحصل لي زينب واسامة ومازن ربنا يرحمهم ويغفر ليهم،،

سبحان الله،، الحمدلله اني ما بقيت زيهم واخدت حقي بي يدي محكمة ربنا اقسي كانت،،

في النهاية بقي سري بيني وبين ربي مافي زول عارفو،،

العايزة اقولو انو مهما ربنا دا عاقبك في دنيتك دي دا عشان هو بحبك وعايز ليك الاحسن وداير يوجهك للطريق الصاح،، كتير مننا ما برضو بالبحصل ليهم وبقولو لي يارب تعمل فينا كدا،، بس صدقوني الله خاتي لينا الاجمل في الحياة دي ومستحيل يظلمنا او ينسانا او يتجاهل حد بقول يارب وبدعي وببكي وبلح في دعواتو،،،

يا مريم مريم...

هسسس اسكت يا عبدالله يادوب انا نومت عبدالرحمن قطع قلبي وانا ضهري واجعني براه شكلها بت المرة دي عايزة تعزبني اصلي عارفة البنات غتيتات،،،

قعد يضحك وقال لي خليها تعزبك وراك شنو غير الولادة انتي،،

حرقتني الكلمة دي اهااا وراي شنو طيييب انا ماشة بيت ابوي هسي دي شوف ليك زول يقعد معاك ما عندي اهل ولا ما عندي يعني ودخلت رفعت ليك الشنطة وعملت ليك روحي زعلانة وكنت صارة وفتحت ليك الدولاب،،،

طبعا وحاتكم اتجرس جرسة قرب يبكي من جواي قلت لي يا حليل امك الربتك راجل وانا جيت هبلت بيك كدا،،

عملت روحي زعلانة لسه وابيت اشتغل بيه قال لي خلاص انا اسف والله ما بعمل كدا انا ما بقدر حتي انوم من غيرك،،،

قربت اضحك بس صريت زيادة..

قال لي طيب عندي مفاجأة ليك

عملت روحي ولا سامعاه برضو..

قال لي نن رسلت لينا زيارة نجيهم في لندن وانا اخدت اجازتي والاسبوع الجاي مسافرين ليهم...

جررررر صرخته زي صرختها ديك ووقعت في حضنو وبقيت بنطط قول والله قول والله،،

ثبتني قوي بي يديه وقال لي انا بحبك يا مريم يا ام عبدالرحمن وعائشة كراعك لينة علي من يوم دخلتي حياتي،،

دموعي سالت ما عرفت اقول ليه شنو..

مسحهم لي بي يدو وقال لي يلا ماشين المول نشتري حاجات وجاك زول يا لندن..

بقينا نضحك زي الهبل وقلت لي

ه يا حليل اولادي الانت ابوهم...

  ........ الـنـهـايـة .......   

من الكاتبة:

الاخت الراسلتني انا فعلا ما عارفة عنها شي لا اسمها لا غيرو،، حتي حسابها بي اسم ما بتاعها،، ف للناس الراسلوني وطلبو يتعرفو عليها انا بعتزر ليهم اني ما عندي اي علاقة بيها وهي طلبت كدا بس مجرد قصة قالت حصلت ليها وانا حاولت انقلها زي ما هي ويارب اكون قدرت اوصل الاحساس بتاعها للقراء...

فاطمة قسم الله | @Novelsfatmagasmalla