إغتصاب

الجزء 02

اها مع عدم الموضوع الحاصل وكل يوم انا واختي نتشاكل.. بقيت انق في ابوي كل يوم عشان انزل اعمل الخدمة.. لما اتوسط لي عند راجل جيرانا وفعلا جابني ونزلني معاه في المؤسسة الشغال فيها.. كنت فرحاااانة لانها حاجة جديدة وموضوع جديد والاهم من دا ممكن القي لي عريس برضو 😂 زي ما قالو لي صاحباتي.. حظك بعد دا بورتك بتفك.. علي اساس اننا معانا بنات من الريف اولادهم دخلو المدرسة وهن صغار كدا.. دا الجايب لينا الهوي.. ما علينا بكرا بجيب لي موظف شغال في الحكومة مع انو امي دايرة لي واحد مغترب وكل مرة بتقصد تعيد لي الموضوع دا.. فلانة بت سعاد من الفريق البي هناك جاها مغترب مروووق والليلة عقدها.. علانة بت منال جيرانا القدامنا جاها مغترب مرطب ترطيبة وعقدها بعد بكرا وسايقا طوالي.. والموال ماشي.. طبعا مع كلام تاني اقعدي لي انتي كدا بتين تتلحلحي زيهن وتجيبيه بالبرادو.. يعني انا بقيت ساي لي الله كدا بكره المغتربين.. يوم عملت معاها الشكلة لاني خلاص تعبته من الموال دا يومي وامي محسساني اني تميت 30 سنة... قلت يا مريم معليش برضو دي امك وعايزة مصلحتك واطانشته جيت عايزة اكل.. يا يمةووووب علي وتاكلي بي نفس مفتوحة امشي اسمعي الزغاريد بره شارطه الفريق كيف الليلة عرس نسيبة بت سامية جابتو مغترب من دبي حقو يسد عين الشمس ملاهم دهب لما قالو بس جاب ليها جيب ما خلا شي خمسين مليون مال دا غير الشيلة وباقي الحاجات.. وجاب ليها مفتاح عربية وقتي هدية.. احييي انا لما اموت ياكي المرزوعة لي هنا تعملي لي مغسة.. يا امي عليك الله عايزة مني شنو المغترب استفدتو منو شنو هسي هدي عندك اختي عرستو ليها مغترب ياها قاعدة معانا بي اولادها لا ساقها معاه لا متعها.. عرستو ليها عشان القروش اول لاوكمان اكبر منها ب20 سنة وفي النهاية عمل ليها شنو كل يوم مشاكلهم مالية البيت وياها هي قعدتها في غرفتها دي واخرها جا هو زاتو لصق معانا في البيت .. يا امي القروش والاغتراب ما كل حاجة في الدنيا دي ارحميني عليك الله من السيرة دي..

لا كل حاجة ما اختك مسجمة زيك ما عرفت تكسبو وتكسب اهلو من الاول قلبتها مشاكل مع اهلو وضيعت القروش في الفارغةوالمقدود​ة..

اووووف يا امي انا بطلت اكل زاتي وماشة كلو كلو من البيت دا غاشية زينب اكل عندهم احسن لي من النقة دي..

يابت يا مريم تعالي هنا يابت مافي شي خاربا عليك الا صاحبتك الهاملة دي زاتا العاجبك فيها شنو..

ما جاية يا امي وزينب ما هاملة ولا حاجة انتي براك خاتة عنها شي كعب عشان ما بتريدي امها..

اي ما بريد امها المتجوهلة دي التخجل ساي مرا فاتت الخمسين وتتلبس في تياب الحرير وتعمل في المكياج وتكوي في شعرا وتقول كمان عندها مغص الدورة دي جهولة ام سكاسك.. المغص الاشرطا ان شاءالله..

قلبته خشمي وسكته لانو لما امي تبدا تتكلم تاني ما بتسكت والفيك والما فيك بتقولو..

لبسته عبايتي وطلعت زعلانة وما عندي نفس لي شي ياهو حالنا كدا بقينا علي طول في النقة والكلام الكتير الما بخلص وماشة وبكلم في روحي لما سمعته صوت جاني مريم يابت انتي جنيتي بتتكلمي براك مالك.. اتخلعته طبعا ورفعت راسي لقيتو ود جيرانا بابهم فاتح قدامنا طوالي خجلته خجل ما عرفت اقول ليه شنو.. ههه لالا مافي شي بس بفكر لي في موضوع كدا اي معليش وجري مشيت ليك منو خليتو مندهش بعاين لي اكيد بقول دي مجنونة رسمي ولا راكبا جن ما نصيحة.. وقت لفيت اللفة حتي وقفته وشلت نفس طويل واااااي قلبي عايز يقيف انا كل ما الاقي الود دا بتهبش وبجوط الدنيا وووب انا بكون قايلني ما براي صحي كلام امي انا لي يوم القيامة ما بعرس بي حالتي دي.. خلاص سجمي سجمي بقول علي روشة وخفيفة دي براها سبب لعدم العرس.. اها هو وينو العريس البعاينو ليه عامل كدا زي عمود الكهربا زي ما بقولو رضينا بالهم والهم ما راضي بينا..

يتبع....