إغتصاب

الجزء 17

مرو شهرين بي حلوها ومرها ما فهمت ليهم شي بالذات لما عرفت اني حامل،، سكته علي الموضوع ما كلمت زول غير الدكتورة الوقفت جمبي ولي هسي مساعداني،، وبتحاول فيني اني امشي الشرطة واشتكي عليه رفضت ليها،، عارفة انو كتار حا يقولو علي اني شخصيتي ضعيفة ومعناها انا راضية بي كدا،، بس المجتمع ما برحم ولا اهلي الولدوني وربوني ديل ما حا يغفرو لي،، بكرا الجرايد وناس الفريق ببقي لبانة علي لسانهم الفيني والما فيني بقولوه،، زنب اسرتي شنو تتبهدل معاي وابوي استاذ زنبو شنو يبقي راسو واطي طول حياتو تاني،، واختي العندها شفع زنبها شنو تتطلق ونسابتها يطولو لسانهم فيها،، حاجات كتيرة انا ما بقدر عليها ولا بقدر اواجها،، منو تاني الحا يرضي يعرسني او يقرب علي باب بيتنا،، انا الشفتو في حياتي ما هين ومن اقرب الناس لي خلاني ما بثق في زول،،

بقيت عايزة اقلبها جحيم علي اسامة واخد حقي بي يدي براي مع اني النوع الشخصيتها ضعيفة وعلي نياتي ما عندي شدايد بس الحصل لي دا علمني كتير،، اسامة طلع واحد كل الصفات الكعبة فيه مش قلت ليكم كتير المظهر الخارجي بغش الزول ما بتعرف نواياه الا تعاشرو،، وبرضو بعد دا تحزر منو في لحظة غفلة ممكن يطعنك من وراك طوالي،،

المهم ابيت اجهض الجنين زنبو شنو وكفاية الغلط في حياتي كان ،، انا اتغيرت في الشهور البسيطة المرت علي دي بقيت واحدة تانية،، بداوم علي صلاتي وبصوم وبستغفر وبدعي انو ربنا يصلح حالي،، يوم كنت قاعدة كدا اتزكرت كلام الدكتورة القالتو لي داك انو الله لما يحب حد ببتليه والله قعدت ابكي من جواي،، لي خير الحصل لي دا،، صاح قاسي شديد بس هو الخلاني اتقرب من ربي،،

الفترة القعدتها مع اسامة دي عرفتو واحد تاني واحد خسيس بسكر وبشرب نوع سجائر ما ياهو،، بلعب قمار،، بالليل عادي بقلب البيت بار،، بطبل غرفتي علي والليل كلو بقعد خايفة استغفر وادعي انو يعدي اليوم علي خير،، قرفت صاح من وضعي بس ما بي يدي حاجة حاولت اتصل بي سارة واتفاهم معاها رسلت ليها رسايل كتيرة في الواتساب وحكيت ليها الحصل لكن ما رضت تسمعني،، الوجعني اني اختها ومهما كانت بينا مشاكل وغيرة دا ما بخليها ما تصدقني،، قلت معليش يا مريم بكرا ربنا بثبت ليك حقك والله عالم قالو فيني شنو اسامة وزينب،،

بالنهار كدا الشقة بتكون صانة كنت راقدة في السرير اسمع ليك صوت اسامة زي بتكلم في التلفون ومنفعل.. قمت براحة فتحت الباب وعلي اطراف رجولي قربت من الصالة وبقيت بسمع في الكلام ياربي في شنو شاحدة عليك الله ما ترتاح يوم في حياتك دي،،

اسمعو زي دي بت البتكلم معاها يا زفت الطين قلت ليك اوعي تتصلي بي هنا تاني يمين بالله تلاتة العملتو في صاحبتك اعمل اكعب منو فيك،،

انا اتهجمته وختيت يدي في خشمي ودمعتي نزلت،، زينب!! اكيد دي زينب..

وكان بسكت وتاني برد بي رد اكعب من القبلو..

يادين(استغفر الله العظيم بعتزر عن الالفاظ السيئة بس استدعي الامر لازم ازكرها زي ما اتحكي لي) قلت ليك انتي ما عندك عندي شي انا ما صاحبتك الهبلة يا ماما عشان تركبيني حمار،،

سكت وشكلها بتقول ليه في كلام يا خسارة ما بقدر اسمعو،،

بعدها ضحك وقال ليها اعرسك؟ انتي جادة ياخ الكلمة دي كبيرة عليك شديد،، عرس شنو البعرسك ليه انتي،،

وشوية سكت كدا وردا تاني،، انا اسامة دا بي كامل قواي العقلية وعدتك وقعد يضحك بي طريقة مستفزة،، انا يوم جبتي لي تسجيل الحيوانة دي وقالت ما عايزاني ما ضربتك علي يدك ولا قلت ليك عندك هدية عندي ولا بي مقابل،، يا ماما انتي حبيتي تلعبي بالحبلين بس ما معاي انا،، احسن تختيني قبل اوريك كويس الوش التاني،،

وانا وقت عملت كدا لحظة شيطان صاح ما كنت دايرا لكن... وسكت..

رجعت لي ورا وكتمت الشهقة ودخلت قفلت الباب قعدت السرير وبقيت ببكي،، لي يا زينب تعملي فيني كدا عشان شنو انا ضريتك بي شنو بس ياخ لي هدومي كنت بديك ليها،، مصاريفي كنت بنقص منهم وبديك ليهم،، لي كريماتي بتقسميهم معاي النص،، دا كلو عشان القروش القروش تطير لو بتخلي الزول يكون خسيس كدا ويبيع اقرب الناس ليه..

بس اسامة كان عايز يقول شنو وسكت تاني...

يتبع....