زمــــــــــن الضيــــــــــــــــاع

نجمة تباع للمرة الثانية 11

لطفا وليس امرا صوتوا للرواية كي تحفزونا على تقديم المزيد .. مودتي .

نجمة تباع من جديد

مشت السيارة مسافة قليلة واستدارت لجهة اليمين على نفس الشارع الرئسي اللي يودي لجامع الخلاني ..

من استعدلت السيارة بالشارع كنت اباوع لگدام .. صافنه على ابوي وعلى السيارات اللي دا يمشن گدام سيارة فخري بيك .. ضرب بعيني قرص الشمس الاحمر .. نفس لون قرص الشمس اللي شفته من دا نعبر الجسر بالربل يوم اللي وصلوني بي لبيت فخري بيك .. بس ما كان صافي مثل ما شفته اول مرة .. هاي المرة بي سواد .. وتحيط بي نتف غيوم منا ومنا .. ما لحگت اتمتع بشوفته .. كانت السيارة تمشي بسرعة .. اختفى ورا الابنية اللي على جانب الشارع العرضاني الجديد اللي جاي من جهة اليمين ..

انشغلت عن مراقبة قرص الشمس بايدين ابوي الخشنات .. بقى لازم ايدي ويباوع عليَّ وعيونه تهمل دمع .. ما عاد اسيطر على نفسي .. انفجرت بالبچي .. وبديت ابوس بچفه ..

شكو حنان كنت مفتقدته طيلة السنتين الماضيتين حسيته انبجس بداخلي من خلال لمسة چف ايد ابوي لخدودي ولشفايفي اللي كانت مبلله بالدموع .. تمنيت لو منهزمه وراجعه لبيت اهلي من اول يوم رفض بي فخري بيك يوديني الهم ازورهم .. ويعيرني بفقرهم ..

وگفت السيارة بالركن القريب من جامع الخلاني ..فك فخري بيك الستيرن من بين ايديه .. وطلع جگارة وورثها ونفخ دخانها على وجه ابوي .. هوايه ضجت من حركته هاي .. عدل ابوي گعدته واندار على فخري بيك بلا ما يحچي .. تنحنح بعد ما جر نفس ثاني من الجگاره ووجه كلامه لابوي :- شوف ابو نجومه .. هاي بنتك رفست النعمه برجليها . وجهها مو وجه نعمه .. اخذتها منكم صخلة .. ورجعتها الكم ثور .. مو بيدها .. الفگر يبقى فگر .. ما راح احچي لك التفاصيل .. ما اريد ادوخ نفسي وياكم .. هي خلي تحچي لك .. بس راح اگول لك شي واحد .. صار سنتين مدللها .. ترضاها تخوني وي اقوب واعز اصدقائي ..

راد ابوي يجاوبه .. اشر بيده عليه حتى يسكت الى ان يكمل حچيه ..

وتابع :- فما اريد من عندك شي .. هاي بنتك رجعت لك .. واني مقدر وضعك .. وما اريد ااذيك من وراها .. بس عتبي عليك .. لو مربيها زين ما كان سوت اللي سوته .. بس اكيد تربية بهار الوصخه .. شتترجه منها ..

اخذ نفسه اللاخر من الجگاره .. واندار علي ونفخه بوجهي .. وگال :-على كل حال .. راح اجيك من الاخير .. راح انطيك فرصة منا لبعد مية يوم .. بعدها الگاك محضر لي المية دينار اللي انطيتكياها .. دينار ينطح دينار .. افتهمت .. !!؟ ولا تتحجج لي و تگول لي هذا مهرها و ما مهرها .. ما اريد فضايح .. مية يوم .. تعرف يعني شنو مية يوم .. يعني يومية تحسب حسابك توفر لي دينار .. ههههه .. هاي بنتك گدامك .. رجعت مثل ما هي .. سر مهر .. جيسان ما جستها .. سمنتها وكبرتها وطولتها .. تگدر تبيعها لغيري بميتين دينار .. ههههه .. ادري بيك ما تعرف تتصرف .. ولا تعرف المن تبيعها .. بس عندك بهار خانم الدايحه .. لا تشيل هم .. هي تلگا لك مشتري .. يله ما بقى عندي وقت .. اخذها لبتك وروح .. فگر ابن الفگر .