زمــــــــــن الضيــــــــــــــــاع

جزء 62

مساء المحبة .. حلقة اليوم ستكون طويلة .. نتمنى ان تنال اعجابكم وترضي اذواقكم

زمن الضيـــــــــــــاع

حلقة -17 - الجزء الثــالث

#قصص #واقعية #عراقية #قدوري #الدوري

رغم معرفتي بموعد عودة علي من الدوام .. بقيت كل شويه اتوايگ على باب الحوش عسى ولعل يحضر قبل موعده ..

بعد ان تغديت وي ابو فيصل وخلصت شغل البيت .. تمددت على القنفة اللي بالهول وبقيت لاويه رگبتي باتجاه باب الحوش اللي تركته مفتوح حتى يطبب علاوي سيارته بلا ما يكلف نفسه وينزل يفتحه ..

ما اعرف ليش بذاك اليوم تأخر هوايه .. ما رجع للعصر .. حتى نومة الظهرية من قلقي عليه طارت من بين عيوني ..

من سمعت صوت تايرات سيارته اقتربت من باب الحوش عفت القنفة وطلعت تلگيته ..

قبل لا يوگف السيارة وينزل منها .. فتح الجامة وطلع راسه وگال لي ::- هاااا يمه بشري ..؟!! حمامه لو غراب ..؟!!

ضحكت .. هاي السالفة مال حمامة لو غراب اول مرة اسمعها منه .. گلت له :- يا ابني .. هاي منين جايب لي هاي السالفة مال حمامة لو غراب .. مو عيب ..؟ دنزل من السيارة .. وان شاء الله خير ..

طبگ سيارته بواجهة الطرمة ونزل وتقدم مني وباس ايدي اثنينهن والضحكة ماليه وجهه وطافحة الفرحة من عيونه .. :- احچي لي شصار يمَّ ؟؟.. وبعدين احچي لچ سالفة الحمامة والغراب .. هههه .

بين ما دا ندخل للبيت حچيت له زبدة اللي دار بيني وبين ابوه .. طوه گصته وطارت البسمة من بين شفايفة وگال :- يا امي .. ليش هي المشكلة يم النسوان .. البنية وامها طايرات بيَّ .. بس المعضلة يم هذا .. ملعو... اعوذ الله منك يا حلگي .. ما احب المسبة .. بس مرات الواحد ينجبر على حچاية الموزينة ..

بهاي اللحظة اجتزنا عتبة باب البيت وطلع ابو فيصل شايل بريجه دا يروح يتوضى على حافة ساگية البستان .. مثل ما متعود .. حتى يصلي العصر .. ويبدو كان يسمع حچينا .. عافني علي وتوجه لابوه وباس ايده واستقبل الاب بابتسامه وگال له :- هاااا .. ياااا ولــ .. هاي سنين الله كلها باقي تنتظر ... هههه .. د حچي .. گول من الاول .. كان هسه ولدك بطولك .. هههه .. على كل حال .. اخذ امك وروحوا لعند هضيمة اخذوها وياكم شوفوااا ..

ما متعود علي ولا اي واحد من اخوته يجادلون ابوهم او يطيلون بالحچي ويا .. او يقاطعوه ... قبل لا يكمل ابو فيصل حچيه قاطعه علاوي ..:- الله يحفظك يابا .. شنشوف .. السالفة ما سالفت نسوان .. هذا ابوها .. ما اعرف شگول عنه ..

گال له ابوه :- هاااا .. دير بالك تتعود تسب .. بعدين هذا راح يصير عمك .. ما يصح تسبه .. ههههه .. ابني هاي السوالف مار علينا هوايه مثلها .. فلا تشيل هم .. خلي يروحن النسوان ونشوف ردهم ويصير خير .. اهم شي انفكت الچبسة .. ههه .