زمــــــــــن الضيــــــــــــــــاع

زواج نجمة 2

لطفا وليس امرا صوتوا للروايه كي ناتيكم بالمزيد .. مودتي .

زواج نجمة

الظهر .. كنت دا الاعب هضيمه بغرفتنا .. سمعت صوت باب الحوش انفتح .. وابوي مو على عادته من يجي من بره يطب بسكوت .. شو بذيچ الساعة كان صوته عالي .. من صار بالمجاز صاح :- نجمة ... يا نجمة .. وينچ .. يا بنتي .. اطلعي تلگي امچ ..

كل ظني امي ماتت .. ولا كان على بالي ترجع امي للبيت مرة ثانية ..

من سمعت طاري امي .. ما اعرف شصار بيَّ ..!!

دفعت هضيمه من گدامي وتعثرت بذيال دشداشتي من دا اگوم ..و طلعت اركض من الغرفة .. بهاي الحچي امي كانت واصله بنص الحوش .. من شفتها ما صدگت .. الدموع طفرت من عيوني وحسيت بغمامة گدامي .. وما عاد اشوف زين .. ركضت عليها وشبكتها وبديت ابچي ..

لحگتني هضيمه وحضنتها من ورا ..

اشتميت ريحتها .. كلش طيبة .. ردت علي روحي .. يجوز لو غيري مشتمتها كان نفرت منها ولعبت نفسها .. ما اعرف شنو كان بيها من ريحه .. بس اني شفتها احلا من ريحة الخضيرة .

من حضنتني .. گعْدَت بالگاع .. يمكن ما عاد تشيلها رجليها .. من فرحتها برجعتها للبيت .. حضنتنا لي ولهضيمه وبدت تبوس بينا وتبچي .. ابوي بقى واگف على روسنا ويردد وي نفسه:- هسه مو وقتها يا حليمه .. مو زين عليچ البچي .. يله اخذيهن للبنات وطبي جوه للغرفة ..

حالة أمي الصحية هوايه متحسنه .. وجهها راجع بي الدم .. ومبيّضة ومحلوة .. يمكن من الفي والراحة .. كلما احضنها شويه ارفع راسي وباوع عليها اريد اشبع منها .. ما مصدگه رجعت لنا ..!! كنت اظن نفسي بحلم .. وخفت لا يصحوني منه .. حتى لابوي ما اريد اسمع صوته .. اريد اسمع فد صوت امي .. ما خليت مكان بجسمها ما لزمته .. من اصابع رجليها لشعر راسها .. حتى اتاكد من صدگ بعدها طيبة .

ما صدگت من شفتها .. اول مرة اشوفها تبتسم .. مسحت دموعها بحرنة ايدها .. وردت كفت الشعر عن وجه هضيمه وباستها من گصتها . واندارت علي وبوستني من عيوني . حتى تنشف دموعي بشفايفها .

بداخل نفسي كنت اتمنى تطلع الخانم من الغرفة, بذيچ اللحظة .. وتشوفها امي وتطردها من البيت ..

صحيح كنت فرحانه وما افكر غير بس بحضن امي .. بس فكري شطح وبديت افكر شلون امي راح تتعارك ويا الخانم وشلون راح تخلصنا منها .. رغم انو المره ما اذتنا بشي .. وكانت مداريتنا .. تطبخ لنا .. وتغسل لنا هدومنا .. وتنظف شعرنا .. وتطببنا للحمام وتبدللنا هدومنا .. كانت تدارينا اكثر من امنا .. بس كنت حاقده عليها .. لان اخذت مكان امي ..!!

من صدگ ..!! بذيچ اللحظة طلعت الخانم .. سمعت صوتها من بين نشيجي ونشيج امي :- سلام .. همسر شما ..

وما اتذكر بعد شگالت بالعجمي..

صاح بيها ابوي قبل لا ترد عليها امي .. وجرها من ذراعها وطببها للغرفة ..