زمــــــــــن الضيــــــــــــــــاع

هروب غازي 22

لطفا تابعونا وصوتوا لواياتنا كيتحفزونا على تقديم المزيد .. مودتي .

هروب غازي

مع الايام رجعت لحياتي الطبيعية .. مشكلتي مع زوجي طالب واهله ابتلى بيها ابوي .. وما فكرت بيها هوايه .. حتى ما كنت شايله هم .. ولا مخليتها على بالي .. بس اللي عرفته بعد ما لي رجعة لبيت طالب واهله ..

التهيت بالدكان وبالمسواگ وبشغل البيت .. وبديت اتعلم خياطة .. نبيهة بنت كاظم الطبيب ابو الصخولة .. واللي كانت اقرب صديقاتي وزميلتي بالمدرسة .. دخلت معهد لتعلم الخياطة في باب المعظم .. توسلت بابوي حتى اروح اسجل وياها واتعلم خياطة .. بس ابوي رفض رفض قاطع ..

كل ما تفرغ نبيهة من الشغل تجيني للبيت تشوّفني الدروس اللي ما خذتها بالمعهد ونبدي اني وياها نتعلم الفصالات على بقايا الملابس القديمة ..

الدكان اعزله المغرب .. فاكثر الاحيان اروح لبيتهم بعد المغرب وابقى وياها اتعلل واتعلم .. الى ان بديت اخيط بجايم نوم للاطفال ..

بلا ما استشير ابوي اشتريت مكينة خياطة ام الرجل .. من تعب ذراعي .. واشتريت طول قماش بازة مقلمة وبديت كل ما اخيط بجايم اعلكهن بالدكان وبيعهن .. الى ان عرفوا اهل المحلة باني البجايمن من خياطتي .. بدن نسوان الجيارين يجيبن قماش حتى اخيط لهن بجايم لاولادهن .. وبعدين شويه شويه تطور شغلي وبديت اخيط دشاديش للبنات والنسوان .. كنت اتفنن بالخياطة ..

نبيهة توظفت بمعمل خياطه حكومي .. وكانت تجيب لي مجلات بيها فصالات وموديلات ومن هالشغلات .. بديت اقلد ما موجود بالمجلات واحور بيهن حتى يتلائمن مع طبيعة الملابس الشايعة بمناطقنا .. مثلا .. الم الصدر اذا مفتوح واطول الردان والذيال اذا قصيرة .. استعين بالكشاكش وبغيرها حتى اخلي الفصال يحافظ على رونقه واناقته ..ومن كثرت مراجعة النسوان والبنات طرورت شغلي وبديت افصل ملابس للعرايس .. ومن البدلات بديت امكيجهن وجهزهن ليوم العرس .. غرفتي صارت لوحدي .. من يجي كريم من المدرسة اعوفه بالدكان والتهي بالخياطة وبالمكياج .. غازي بوقتها لبس عسكرية وما عاد ينزل الا بالاجازات ومرات خميس وجمعة ..

طبعا ابوي بالبداية كان ما يصرف له الامر ويدردم ويسب ويحچي .. بس من شاف الشغلة بيها وارد زين وفلوس .. غلس وما عاد يحچي وياي .. ولا عاد يقطب حواجبه ويغضب كل ما يشوف مرية تدخل لبيتنا .. وبعدين هو هماتين كبر بالعمروثكلت حركته وذب كل شغل المحل براسي ..

حتى وكالة الغذائية اللي حصلها من مصلحة المبايعات الحكومية ذبها براسي .. اني اللي تروح اجيب المواد من المخازنت واني اللي اسدد فلوسهن واني اللي اصرفهن .. مع هذا ما حسيت بالضجر ولا بالملل .. كنت بعز قوتي ونشاطي .. فرحانه بالشغل وبالمكسب .. وبديت احلم اشتري بيت لي ولغازي بعد ما ازوجه .. فد ولا جا على بالي الزواج والرجال ابدا .