حبك جنة

الجزء 05

-ده شنو ، انا وين ، حاولت تقوم من السرير ما قدرت وحست بدوخة ف رقدت تاني ، اتلفتت حولها وعرفت انها في مستشفى ..

واصلت : رنا انا وين والجابني هنا شنو ..

-جابتك خالتو محاسن جارتكم ، وانا كنت بتصل في تلفونك ف ردت علي هي وورتني انك هنا وجيتك طوالي ، انتي ليك يومين هنا ، وانا وهي كنا بنتاوب ، وهسي هي رجعت قبل شوية .. حمدلله على سلامتك يا سلمى

سلمى وكأنها اتذكرت الحصل :

-امي ، امي وين يا رنا ، امي مااتت ؟؟ قولي لي لا عليك الله قولي لا

مسكتها رنا وحضنتها والدموع سالت منها غصبا عنها :

-انتي اقوى من كده يا سلمى ، عليك الله اتصبري ....

بعد 24 ساعة سلمى طلعت من المستشفى ومعاها رنا ، عشان تشيل حاجاتها وهدومها ، عرفت من رنا انو (سمر) جو خيلانها وساقوها بالغصب عشان يربوها في كسلا محل هم ساكنين خصوصا انو امها اتوفت وماعندها زول هنا .. امنة ما كانت والدة سلمى الاصلية ، كانت مربياها بعد امها وابوها اتوفوا وبقت زي امها وعوضتها عن الحنان الفقدتو ،

دخلت البيت ولقتو فاضي ، سمعت من محاسن انو خيلان سمر اللي هم اسياد البيت عارضين البيت للبيع بعد اختهم اتوفت .. دخلت شالتها حاجاتها وبكت بهستريا ، بكت فراق امها التانية ، واختها الصغيرة البقت زي بنتها ، و كل الذكريات العاشتها في البيت وودعت لحظاتها كلها

بمعنى اصح ودعت حياتها ! حست انها بقت جثة

كل شي راح

امبارح كانت سمر بتقول ليها لو امي ماتت ما تمشي تخليني ، و هسي هي المشت خلتها

خليتيني ليه يا سمر !

شالت معاها كم صورة ل سمر و لامها التانية آمنة ، وطلعت من البيت

رنا اصرت انها تجي تعيش معاها لحدي ما تدبر امورها وتشوف بيت تاني ..

مشت وودعت الخالة محاسن الجارة الطيبة ومشت ركبت في عربية رنا ومشت معاها البيت ..

#بليل في بيت رنا

سلمى : انا حاسة اني فقدت اي شي يا رنا ،

حتى جامعتي جمدت السنة وفقدتها

رنا :

-ما تقولي كده يا سلمى ، يا ما مرت عليك مواقف كتيرة واتجاوزتيها ب قوة وصبر ، دي ياها سلمى الانا بعرفها ، ازمة وحتعدي يا سلمى والحياة حتضحك ليك تاني ..

-عارفة يا رنا ! ل لحظة فكرت اني اخلي الشغل لانو بقى مافي ليو لازمة اصلا كنت بشتغل عشان الم قروش ل علاج امي ، لكن تاني ضحكت على نفسي لمن اتذكرت انو الشغل ده ياهو الحاعيش منو ، لو خليتو ح اشحت في الشوارع !

-بالمناسبة ناس خالتو انتصار سألوني منك لانهم كانو بتصلو عليك وتلفونك مقفول ، وريتهم بظروفك واتفهمو الموضوع .. قلت ليهم بعد كم يوم ح تنزل الشغل تاني ..

يتبع.....