دخلت غرفة جوري وساعدتها في التمارين وحكت ليها عن ياسين ، واثتاء الدردشة سألتها :
-عايزة اسألك ياجوري ، فارس وياسمين اتعرفو وين ؟
ردت جوري:
-ياسمين كانت معانا في لندن ، وكان عندنا لمة بتاعت السودانيين في لندن ومشينا وهناك اتعرفو ياسمين وفارس وبقو اصحاب شديد ..
-طيب وعرسهم حيكون متين ؟
-عرس!؟ عرس منو يابت!؟؟
-عرس فارس وياسمين
ضحكت جوري وقالت :
-منو القال ليك انهم مخطوبين !!؟
اندهشت سلمى وقالت :
-يعني مافي علاقة بيناتهم !؟
-لا ، هم بس مجرد اصحاب شديد
-لكن هو كان قاعد يشطب في بيتو عشانها ..
-ايوا لانها هي مهندسة ديكور وجات اجازة طويلة شوية هنا ف هو استغل الحتة دي وخلاها تعمل ليو ديكور بيت المزرعة بتاعو ..
ضحكت وواصلت : مخك مشى بعييد شديد 😹 و على فكرة ياسمين دي مرتبطة والبوي فرند بتاعها انا بعرفو
ابتسمت سلمى ل جوري و قالت بتخاطب نفسها :
طيب ياترى حبيبتك منو يافارس ، عندي فضول اعرف البت السرقت قلبك مني ، عندي فضول اعرفك قاعد تجهز في بيتك لمنو ..
عاينت ل جوري وقالت :
-طيب حبيبتو منو ؟
قالت جوري:
-ماعارفة والله ، فارس ما قاعد يتكلم معاي في المواضيع دي كتير ، لكن عموما الجارين وراو كتار شديد ، وبقت تضحك .. وضحكت سلمى معاها ..
بعد خلصو الونسة وحصة العربي حست سلمى بتحسن في مستوى جوري ، فعملت ليها اختبار بسيط جابت فيو 6/10 ، انبسطت سلمى شديد لانو الاختبارات الفاتت كانت بتجيب في حدود 4/10 😅 ...
و رجعت غرفتها عشان تلبس وتستعد ل موعد ياسين في المطعم .. فعلا لبست وكانت رنا منتظراها ب عربيتها برا ، وساقتها وصلتها للمطعم وودعتها جمب باب المطعم ورجعت ..
دخلت سلمى المطعم وقعدت مع ياسين الكان منتظرها ب حماس ...
ياسين كان شاب 32 سنة ، اسمر و طويل بطنه منتفخ الى حد ما ، وشنبو غزير ، عندو صلعة كبيرة في مقدمة راسو "جلحات" ، كان خجول و جبهتو ب تتصبب عرق من التوتر بمجرد ما قعدت سلمى ..
كان اللقاء فاتر جدا وممل ، والونسة كانت تقليدية جدا .. في الاخر وصلها بالعربية لحدي الفيلا واتواعدو بلقاء تاني خلال الاسبوع ده ..
دخلت سلمى الفيلا وحاسة بالاحباط الشديد ، ما حاسة انو شخصية ياسين بتتناسب معاها على الاطلاق ، ما ده فارس احلامها الانتظرتو فترة طويلة ...
