حبك جنة

الجزء 03

حست بالاحراج من كلامو وقالت و هي منزلة راسها و بصوت واطي :

-شمبات

بعد فترة العربية ركنت قدام بيت سلمى في شمبات ،

فارس:

- قلت ليك انا ما ظريف لدرجة اني اوصلك لحدي البيت ، لكن طلعت ظريف والله ما قايل روحي كده..

سلمى ضحكت وردت : شكرا على ظرافتك ، انقذتني من المطر ..

-شكلك بتكرهي الخريف

سكتت سلمى وسرحت بعيد و بعد برهه انتبهت معاو وقالت :

-شبه كده ، المهم اتفضل اشرب معانا الشاي ..

نزل وفتح ليها باب العربية وقال ليها بابتسامة :

-المرة الجاية ان شاءالله

عاينت ليو ل ثواني ، كانت اول مرة تنتبه انو ابتسامتو جميلة و عيونو فيها نظرة طفل صغير ، وفضلت متنحة في حركة انو فتح ليها الباب وبعد ثواني انتبهت ل نفسها واتداركت الموقف شالت شنطتها ونزلت ..

دخلت البيت لقت اختها سمر بتبكي ومعاهم جارتهم ،

رمت الشنطة سريع وجرت على اختها : في شنو يا سمر مالك ؟ امي كويسة ؟

جارتهم محاسن قالت ليها : ما تخافي هي كويسة بس قبل شوية اتضايقت شوية وسمر قلقت عليها و نادتني ..

سمر بصوت متقطع من البكا :

-انا مش قلت ليك ما تتأخري وتخلينا برانا

حضنتها سلمي لثواني وقال ليها : -معليش حبيبتي ما بتأخر تاني

ومشت على أمها باستها في راسها ويدها :

-امي ، مالك حاسة بشنو ؟

امها عاينت ليها نظرة فترانة :

-حمدلله على السلامة يابنتي ، انا كويسة ما تقلقي ، الغدا في التلاجة امشي اكلي ليك لقمة

-اكل شنو هسي يا امي طمنيني عليك

كانت سمر بتراقبهم من الباب ودموعها جارية ، جات جارتهم سلمت على سمر وسلمى وامها واستاذنت ومشت بيتهم بعد ما اطمنت انها بقت كويسة ..

بليل الساعة 12 شالت سلمى دفتر مذكراتها وكتبت فيو يومها وعن فارس وحركتو الرجولية معاها ، اثناء ما بتكتب دخلت عليها سمر وهي بتبكي ..

سلمى :- انتي لسه صاحية يا سمر ؟ امشي نومي بعد ده الساعة 12 ..

-انا خايفة يا سلمى ، امي حتموت واحنا ما عندنا قروش نعالجها ..

-اوعك تقولي كده تاني ، انا ح اشتغل و ألم قروش من مافي واجيبها تتعالج و حتبقى كويسة ان شاءالله انا متاكده ، بس نحن ندعي ليها ..