السلام عليكم
خواتي و صديقاتي ... و كل المضافات بصفحتي ....
احب اتكلم بموضوع مهم جداً جداً ... والي نعاني منه نحن الكاتبات ....
يجوز اكو بعض الكاتبات ما رح تتفق وياية لان الكلام خالي من الرتوش و خالي من المجاملات ... يمكن لان رح يخلي المتابعين لبعض الكاتبات يزعلون لذلك رح يقل اعداد متابعيهم ... وهذا الشي الي يخليهم ميتفقون وياية يجوز بقلبهم يتذمرون لكن ع لسانهم ما ينطقون ...
هذا الشي ما رح اختلف وياهم بي حقهم ... وهذا شي همه احرار بي...
لكن اني لا ....رح ادخل بي و اتكلم بجد و ممكن اتناقش حتى لو ع حساب اسمي....
ما رح اجرّح مثل البعض ... و لا رح اهين او اتعالى بالكلام ... رح اتكلم بلغة مؤدبة و رصينة...
انا انسانة حالي حالكم ...
متزوجة و عندي اطفال ٢ بالمدرسة و اوائل الحمدلله اني موظفة و عندي بيت اسكن وحدي مو بغرفة مع اهل زوجي...
عملي يتطلب مني التركيز والكتابة دوماً ... و يمكن اغلبكم يعرفون اني معلمة و تصليح و وكفة و ووو... هواية اشياء ... اكيد رح البعض يظن سوء كما متعارف عليه بهالايام و يكولون المعلم مرتاح و شكو عليه عنده عطله و عنده و عنده و ميدرس و مقصرين بواجباتهم...
احب اكول هذا الكلام عاري من الصحة و منافي للمجهود الي نبذله ... اتكلم بشكل شخصي و عن نفسي ... بس شهر السابع و الثامن كاعدة التاسع من بداية دوام لحد السنة الثانية شهر السابع...
هذا من غير الاجايز ماكو ... فقط ٧ ايام خاصة و مرضية بطلعان الروح ينطوني يوم فقط ...
المهم هذا مو مقصد كلامي....
المقصود من موضوعي هو (((... المتابعة ...)))
الي تقرالي انا بالخصوص و لكل كاتبة حالياً تكتب بالعموم ...
عزيزتي ... انت اكيد ام و ربة بيت و منكم موظفة و منكم ما متزوجة بس عدها مسؤوليات ... و منكم المتزوجة و ما عدها اطفال لكن التعب نفسي و الاجهاد كبير ع نفسيتها... هذا كله نفسه الكاتب يلاقي بحياته و يلاقي ممكن اكثر ...
ما عدا النفسية ... الي تتغير حسب ما نواجهه بيومنا ...
قبل سنتين بالضبط صرت حامل و كنت حابته كلش و محتاجته ... رغم عندي اولاد و الحمدلله الله ناطيني لكن كنت متمسكة جدا بهالحمل...
لكن شاء القدر و ما انكتبلي و وكع و بصعوبة ... رااح و ترك عندي مشاكل صحية و منها نفسية...
لكيت الكتابة متنفس للطاقة السلبية بداخلي ... و مكب للهموم المتراكمة...
الحمدلله نجحت و بنفس الوقت حصلت راحة لنفسيتي...
ما جنت استرجي اكول كاتبة عن نفسي ...
جنت اكول هاوية...
لكن بعد فترة صديقات الي شجعوني اسوي صفحة باسم مستعار لكن يسبقه كلمة كاتبة لاستحقاقي هذا اللقب من نظرهم ...
رفضت و ردت ما اسويها لكن فكرت هذا تشجيع لبعض مكنوناتي اطلعها اكثر ... و فعلاً كتبت بمجال العامي ٣ قصص اخرهم كانت اغلال القدر و اقواهم ...
و نفسيتي تحسنت اكثر بالتشجيع و المتابعة من الكثيرين ...
قررت اكتب بعدها في كنف الظلم فكرتها ضخمة و اجتماعية و بيها هواية شخوص... لكن مكدرت اكمل الفكرة و لا اكتبها لان دخلنه بموسم دراسي و طرأت ظروف ايضاً عليه...
اجلتها ... بعد فترة حسيت روحي كلش تعبت محتاجة اكتب ... حاولت اكتب مكدرت ...
اني طبعي ما اكدر اكتب كل الرواية واحتفظ بيها و بعدين انزل ... ما اعرف شنو السبب ميطلع عندي...
فكرت اكتب قصة صغيرة و ثنائي واحد بيها... و سميتها قناع القوة... و بديت اكتب ... و انزل ... خيالي الواسع رفض البساطة ... و دخلت شخوص اكثر و كبرت ...
وصارت بيها احداث اكثر...
مشيت بيها و تدرون جنت انزل بارتين بالاسبوع.. جتي امتحانات نصف السنة ... اجلتها ع العطلة ...
و مجنت اتحجج ع الفارغ ... كنت صدقاً مشغولة بالامتحانات و التدريس ... مرت الامتحانات و كتبت بالعطلة كم بارت ...
بدت المتابعات يتململون... و يضوجون... و حسيت بهالشي من خلال تعليقاتهم...
عدت العطلة... و اجة الدوام و الحال صار متعب لان مادة لازم نركض بيها لان الامتحانات ممكن تتقدم... اضافة الى مرض ابو زوجي بالخبيث (الله يستر عليكم بالصحة) خلى زوجي يتغيب كثير عن البيت... و اني وحدي بكثير من الامور هاي من غير النفسية الي ديمر بيها زوجي ولازم اكون وياه بهالوقت تحديداً...
و نزلت منشور اعتذار حتى ااجل القصة... و المتابعات و اكول البعض مو الكل حطوا خطين جوا البعض..... تهجموا عليه و تهموني ما اراعي المتابعين ...ما جاوبت لكن حذفت المنشور و بنات متابعات باسلوب حلو و بعض الصديقات نصحوني اكمل حتى لو بارت بالاسبوع او كل اسبوعين بارت...
اخذت بنصيحتهم و كتبت البارت ١٤ و بعده ١٥ و اثنينهم بارتات دسمة من حيث الاحداث و الشخوص... ما قصرت ابد .. و ما تاخرت و اشكر كل الي تابعوني ... و وكفوا وياية و ساندوني من كاتبات و صديقات و اخواتي ...
وما انكر اني بطيئة بالكتابة لان احب اتخايل المشهد كامل و بهدوء بعدين اكتبه.... لكن من تقروا تلكوا كامل و قليل الاخطاء و مابي ثغرات... لان ادرسه كامل... رغم قلة المتابعين للقصة ع الفيس تخيلوا ٧٢ متابعة فقط بعضهم تعليقاتهم تحفزني ع الكتابة و بعضهم لا تحبط كل معنوياتي اصحاب تعليقات (تم) و (م) و الملصق اني كاتبة بارت جاهدني مشاعرياً و فكرياً و حتى تعب لايدي و همه يستكثرون علية الكلمة الحلوة ..... و كأنما مانين علية بالمتابعة ...
المهم....هسة اني احب اعيد توجيه كلامي للمتابعة و اكلها ... حبيبتي ع راسي متابعتج الي ... و هذا شرف الي اتابعيني ... لكن اني من الناس الحساسة جداً ... و المجهدة جداً ...
مجهدة نفسياً و جسدياً... و الكتابة عندي اجهاد لكن بنفس الوقت راحة لدواخلي ... و صفاء...
اني قبل فترة اسبوع كنت قريبة جداً من الاعتزال و ترك الكتابة...
لولا الحاح بعض المقربين الي...
ورجعت اكتب لخاطر المتابعين الي قلبهم وياية و صبورين علية....
ما احب اخفي عليكم بعض المتابعين متابعتهم الي تعب نفسي ... و ما اكوله بوجههم...
حتى لا اسبب الاحراج الهم بس همه ديضايقوني بتعليقاتهم...
المهم... المتابع لازم يوضع نفسه بمكان الكاتب و يتخايل روحه شلون رح يقدم وهو بهالظروف و الدوامة الي محاوطته ... اني انسانة و عندي ظروف و احب تتفهمون ...
لذلك ////// قناع القوةرح اتركها و اكملها كامل و انزلها بعد شهر الخامس .... و هذا قرار اخير الي يحب يبقى يتابع ديانا سعد ع راسي و كل الهلا نلتقي بعد رمضان و الي قرر ينسحب من متابعتي ايضاً ع راسي و هذا شي احترمه و قراره الشخصي ...
و اعذروني ع الاطالة
و شكرا لاصغائكم🌹
ام اية ديانا
أنت تقرأ
قنــــاع القـــــوة
ChickLitقصة دمجت فيها الخيال و الحقيقة ... مؤطرة بالواقع ... شخصياتها متشعبة ... محورها ارادة فتاة قوية كل امانينها ان ترى عائلتها التي تعيش حياة قريبة للبؤس ان ترجع حقها و ان تنعم بنعم كانت من نصيبهم يوماً لكن الحظ و القدر تكاتفا على عكس ذلك ... فتدخل لح...
