فتحت أمنه عيونها وحاسة بدوار فظيع حاولت تحرك يدها بس كانت مثبتة نسبة للدريبات الكانت موصلة بيدها، حاولت تركز وتجمع وأول زول شافتو حاتم اللي كان قاعد جمبها وماسك يدها وأول ما شافها فتحت عيونها طوالي دنقر باس يدها حمد الله على سلامتك حبيبي، كده برضو تخوفيني عليك كده 😭 ما تشوفي شر يا غالية، انا حصل لي شنو وجبتني هنا ليه عندي شنو انا؟؟؟ شالو منك دم بس لسى نتيجة الفحوصات ما ظهرت، إنتي هسي حاسة نفسك كيف؟
معدتي واجعاني شديد يا حاتم ما عارفه مالي ليها كم يوم بالطريقة دي، إنتي يا أمنه قبل كده رجعتي دم ولأ دي اول مرة؟؟؟؟؟؟
سكتت أمنه وابت توريهو قبلت عكس وجات دمعة نازلة منها، عملت شنو مع خطيبتك؟ كدي سيبك من خطيبتي وريني انتي طوالي في الحالة دي يا أمنه ما تخوفيني عليك الله انا والله اعصابي باظت من شفت الدم قبيل وكلمت الدكتور اول ما جبتك هنا، بس انقطع كلامهم بصوت الممرضة اللي جات تسأل أمنه من وضعها، اها بقيتي كيف يا أمنه؟ خوفتي خطيبك عليك وخوفتينا معاهو 😉😉 عاين حاتم ل أمنه مبتسم وقال للمرضة دي الخير والبركة بتاعتنا كيف ما نخاف عليها؟؟؟ وأمنه ما قادرة تدي اي أقوال
مدت الممرضة لحاتم نتيجة الفحوصات وطلبت منه يسوق أمنه بعد الدرب يخلص يوديها للأخصائي وشوية وخلص الدرب وقامت أمنه مستندة على حاتم ودخلت للدكتور وراهم أن أمنه بتعاني من جرثومة معدة ولازم تاخد علاجاتها في وقتها وتنظم وجباتها حفاظا" على نفسها أما بالنسبة لموضوع الدم فكذبت أمنه وقالت ليهم دي اول مرة، فذكر الدكتور أن لو اتكرر كم مرة هنا بتبدأ الإشكالية فنفت أمنه وساقها حاتم وطلع بيها من المستشفى بعد ما اشترى ليها علاجها كامل ورجعو المكتب شالت حاجاتها ووصلها حاتم بيتهم.
تمت أمنه الأسبوع راقدة في البيت محافظة على وجباتها ومنتظمة في علاجها بس دون ما تحس بأي تحسن ورجعت شغلها بعد اسبوع والناس بتجهز لعرس حاتم اللي قرب شديد، عرفت فيما بعد من حاتم موعد الزفاف وإن ما عندو اي خيار آخر ولازم العرس يقوم في الموعد المحدد، أما فيما يتعلق بعلاقتو معاها فهو ممنون ليها على الأيام القضاها معاها، أمنه طلعت وخلتو يتكلم دون ما تسمع بقية كلامو وبقت تتعامل معاهو في حدود الشغل بس ولو عليهو هو فهو اصلا ما كان بقعد في المكتب كثير نسبة بإنشغالو بتحضيرات الزفاف، ومرت الأيام على أمنه صعبه جدا وبقت معتادة على أنها ترجع دم بس لساها كمان محتفظة بسرها لحالها، وانقضت مدة الشهرين وباقي أسابيع لموعد الزفاف، وحالة أمنه الصحية بدت تسوء يوم عن يوم والناس كلها بدت تلاحظ لوضع أمنه بس هي مكابرة وممثلة فيها طبيعية.
وقبل الزفاف بإسبوع تعبت أمنه جدا وساقوها أهلها وجرو بيها الحوادث الأخصائي قال لازم يعملو منظار في أسرع وقت ممكن وفعلا حجزو ليها في عيادة خاصة وعملو ليها المنظار للمعدة وكانت الصدمة لأسرة أمنه كبيرة جدا وغير متوقعة 😭😭
يتبع....
