دخل لكافيتيريا مع اصحابو خداو طاولة على جنب و قعدو يحكيو في مواضيع مختلفة يضحكو و يفدلكو و يعملو فالسيلفي و عاملين جو لي يراهم يعرف قداشهم ناس مضخمين و كلاس اصوات ضكاتهم ملات الكافيتيريا الكل اما شكون ينجم يقرب منهم و يحكي معاهم الناس الكل تعرفهم كلهم من عايلات معروفة فلبلاد بكلمة وحدة منهم يشريوك و يبيعوك عادي، هو كان غاطس في تيليفونو يبارتاجي في تصارو هو و اصحابو فالانستجرام حتى يسمع صوت قاطعهم
.... : تفضلو شنوا تطلبو ؟
عبى راسو باش يشوف مصدر الصوت معرفش علاه اما حس انو جذبو كان صوت انثوي فيه نبرة حنينة برشا تلفت باش يشوف مولاتو كانت طفلة واضح من لبستها أنها تخدم سارفور قعد سارح معاها و يدقق في تفاصيلها شاف مع وجها لي مافيه حتى نقطة متاع مكياج اكثر حاجة جذبتو ليها هوما عينيها الخضر لي باين عليهم التعب حسها حاجة جديدة عليه فيها حاجة مختلفة مش كيف لبنات لي موالف بيهم رجع صوتها فيقو من سرحتو كيف وصلت ليه باش تسألو
... :تفضل مسيو شنوة تطلب؟
اصلان (و هو يغزر في عينيها) : قهوة من فضلك.
راحت باش تجيب الطلبيات متاعهم و هو باقي يتبع فيها حتى اختفات مفهمش علاه باقي مركز معاها لهالدرجة يسمع في صاحابو يحكيو
راجي: ملا كعبة هالسارفورا 😍😍
سليم : اي عندك الحق يا صاحبي هههه
قدير : ايا يزيو ياخي شنوا لي عجبكم فاها
راجي : يا ولدي ملا بدن عندها راهي مززززززة
اصلان : راجي سكر فمك لا يتهد اليوم
تلفتو ليه الكل مصدومين فيه
راجي : شبيك صاحبي ياخي تابعتك و حنا ما فيبالناش هههه
اصلان : قتلك سكر فمك قالو تابعتني 😒😒😒
هوما هكاكا و هي رجعت في يدها پلا متاع الطلبيات متاعهم حطت لكل واحد طلبيتو قدامو وقت وصلت لراجي حطت الكاس متاع الكابوتشينو قدامو و جات ماشية اما وقفها كيف شدلها يدها غزرتلو مفجوعة 😨😨
راجي : ها يا قطوس قداش الليلة ؟
.... : مفهمتكش مسيو ؟ ( تشوف معاه مستغربة مش فاهمة شنوا يقصد و مش حابة تعمل مشاكل باش متطردش مالخدمة عانات برشا باش لقاتها)
راجي: شبيك ياخي متفهمش سألتك قداش الليلة متحبش تعدي ليلة معايا صدقني باش نشيخو برشا و نوعدك كان وافقت باش نكون حنين معاك ونزيدلك فالسوم اه شنوا رايك فالعرض ؟
موش مصدقة لي قاعدة تسمع فيه اول مرة تتحط في موقف كيف هاكا عينيها جغللو بالدموع و الغش مكنها من كلامو الوقح معاها ما فاقتش مع روحها كيفاش هزت يدها و عطاتو كف لا يقرا ولا يكتب
....: انت شنوا تسخايب في روحك بانى حق تحكي معايا هاكا اه ياخي انتي تسخايب لي بفلوسك تنجم تشري لعباد يا مسخ 😡😡
حكم خدو من كثر الصدمة اول مرة يتضرب و من شكون من فرخة تي امو و بوه عمرهم لا مدو يدهم عليه كيفاه تجي هي توا و تضربو قدام الناس الكل الناس لي قعدت تخزرلهم مدهوشة مكنو لعصب منها معادش يشوف قدامو هز يدو باش يرجعلها الكف دورت وجها خايفة منو تستنى في الضربة لي باش تجيها منو اما حست فما شكون واقف بيناتهم و حاكم يد راجي و يغزر معاه عينيه مليانين غش هو يعرف صاحبو و متعود عليه يظلم لبنات اما عمرو مكان عندو اعتراض بالعكس كان يشيخ بالضحك عليه اما توا حاس لي الموضوع يعنيه هو بالدرجة الاولى مش فاهم علاش اما شاف انو لازم يدخل و ينقدها من بين يديه
اصلان : شبيك ياخي هبلت سيب الطفلة في حالها
راجي : ياخي مشفتهاش كيفا ضربتني تحبني نسكتلها
اصلان : من وقتاه رجعنا نضربو النسا اه
راجي : اصلان مدخلش روحك ابعد من قدامي خيرلك
اصلان : و كان منبعدش شنو تعمل اه
راجي : علاش الدافع عليها بربي وحدة مسخة و ق**
مزال مكملش كلمتو و تجيه بونية من عند اصلان خلاتو يفقد توازنو و يطيح فالقاعة
اصلان : سكر فمك انتي هو لمسخ ياخي شكون لي بدا آه شكون لي كان يبزنس فيها ؟ ، تلفت يحكي مع الناس لي موجودين غادي الكل اسمعوني بالباهي الطفلة هادي من اليوم راهي تابعتني و ردو بالكم واحد يقرب عليها ولا يخمم يعملها حاجة رجع تلفت لراجي لي كان الدم ينزف من فمو على خاطر البونية لي كلاها : تفهم فيا ولا لا 😠
راجي: باهي يا اصلان باهي تتخلى على صاحبك في خاطرها من اليوم انسى لي عندك صاحب اسمو راجي
و خلاهم و خرج لحقو سليم اما قدير بقى مع اصلان يهدي فيه
قدير : هدي روحك عيش خويا متعملش هاكا كلو على خاطر طفلة شنوا صارلك ياخي
تذكر الطفلة تلفت باش يشوفها مالقاهاش باقي يلوج عليها بعينيه اما شي ريحتها مفماش زفر بغش و هز الفاست متاعو من على الكرسي و تيليفونو و مفاتح الكرهبة و جا خارج متلفتش لوراه بلكل و مسمعش صاحبو لي كان ينادي عليه كل همو توا انو يلوج على الطفلة و يلقاها مزال مش فاهم علاش دافع عليها رغم انو ميعرفهاش اما مش مهم المهم عندو توا انو يلقاها و يطلب منها السماح علي عملو صاحبو، طلع في كرهبتو و مشا خلى لغبار وراه...
#
kawtar
أنت تقرأ
البرسيم الضائع
Romanceالسلام عليكم حبوبات❤❤ انا راني اول مرة نكتب حكاية نتمنى انكم تشجعوني😍😍 متعودة نقرا لحكايات لكن ولا مرة كتبت يعني هذي اول تجربة ليا في عالم لكرونيك😘😘😘 راح نزل اول حلقة هي مزالت قيد الكتابة اذا لقيت تفاعل كل ما نكتب نزل لكن اذا ماتفاعلتوش و معطي...
