وصلت الكليه وبده راسي يوجعني مثل المره الفاتت...
دخلت اول محاضرتين والثالثه متحملت طلعت كعدت بالحديقه انتظرهم يخلصون....
ماعرف عله شنو دموعي كامت تنزل ...
يمكن عله وجع راسي او من ضيم مازن اللي نيه كلشي بينه...
رجعت للبيت راسي مسطور...
دخلت لكيت مازن نايم بالغرفه وني هم عالواهس بس نزعت الشال والجبه ونمت...
كعدت لكيت مازن يعاين عليه سوبت نفسي بعدني نايمه وتقربت منهه..
جنت مغمضه عيوني واحسه يمشي ايده عله زندي...
مادري فرحانه لو مقهوره.. ليش كدامي شكل ووراي شكل شيريد بالضبط.. شسويتله ني..
.
تحركت ونطيته ظهري لان ماتحمل دموعي يمكن تنزل بأي لحظه...
شبكني شويه وراها كام طلع...
وره مراح مبقت نومه بعيني فكره توديني وفكره تجيبني...
كمت سويت اكل ونظفت..
اخذت فستان بيتي قصير ودخلت للحمام سبحت وطلعت...
نشفت شعري واخذت الصايه ورحت للهول صليت المغرب...
بالركه الاخيره الباب سمعت صوت الباب نفتح ونسد...
خلصت صلاه ونزعت الصايه والحجاب..
التفتت لكيت مازن ورايه...
كاتلني هالرجال شيريد بالضبط .. بس والله لا احرك دمك ...
كعد هوه بالهول وني افرفر بالبيت واعرض بنفسي بلكن يحس شويه..
ملت روحي ...
من كدما نقهرت شلت التحفيه اللي موجوده بغرفتي وطشرته بالكال...
ثواني ومازن واكف بباب الغرفه..
اخذت التحفيه الثانيه وطشرته بالمرايه...
بوكته جنت بس ابجي واصيح..
اجه مازن لزمني ويسكت بيه..
كافي كافي شبيج شصارلج...
ني كال هيج لو عبالك نار وذبو البانزين عليهه...
شنو شبيه شنو... انته ...انته صوجك..
رح اتخبل من وراك... شمسويتلك ني...
ليش هيج وياي تتعامل.. ليش ويه الناس شكل وياي شكل.. احجيييي.. ذا متريدني طلكني ..
يي طلكني خليني اخلص ليش هيج...
بعدني ممكمله واجتني الضربه عله وجهي...
حسيت راسي افتر... دخت ووكعت..
شالني وبده يهز بجسمي حته اصحه زين..
دفعته وكمت اصيح من جديد..
اجه يلزمي وني ارافس بيه واضرب بصدره...
لزمني قومي وني هم تعبت من الضرب بقت بس الدموع تنزل..
رفعت راسي عليه.. مازن كولي شبيك ويايه.. مو ني ازل حبيبتك ليش هيج...
خله راسه عله راسي... ازل كافي لتأذين نفسج ني تعبان وو..
وو شنو كولي والله ماكول لاحد... حسيت عله دموعه بدت تنزل ... وني هم وياه عالواهس..
بين صوت البجي مالتي توسلتله يكولي شنو بيه.. جان جوابه بس تعبان..
عافني واكفه بنص الغرفه وراح يسبح..
بس اسمع صوت شهكاته وشلون يضرب الحايط..
ماعرف شسوي .. هوه ني احتاج واحد يساعدني ... لملمت الكزاز ونظفت....
طلع هوه من الحمام وراح للغرفه...
وره شويه اخذ السويج وطلع.... ظيت انتظره يجي مارجع لل12 بوكته جنت شبه نايمه وحسيت باب الغرفه نفتحت...
نام وتقرب عليه... اخذ نفس طويل وشبكني...
التفتت عليه.. فز من عرف ني كاعده ومنايمه..
مازن ليش هيج تسوي ... ليش بالليل تحضني وبالنهار ولا كأنك تعرفني... شنو اللي يخليك تبجي...
غمض عيونه قوي وجر نفس.... كام من مكانه .... لزمته من زنده وتوسلتله يجاوبني...
ماكدر ازل ماكدر اكولج ... بدت دموعي تنزل... كمت من مكاني وصرت بمستواه... مازن حته كلمه زونه ماجبته عله لسانك...
هوه هم كام يبجي ويايه... اخر شي راد يكوم سحبته قوي وكمت اصيح ... مازن كول الله عليك والله ماتشوف وجهي بعد...
التفت عليه بسرعه ولزمني من ملابسي... لج ني مو رجال مو رجال تدرين شنو مو رجال...
مابيه خير .. لو متزوجه حيوان هم احسلج...
كمت اشهك بالبجي... مازن شدتحجي كولشي مابيك... جنت احاول اقنعه او بالاحرى اقنع نفسي اللي سمعته خطأ...
هز جسمي حيل... لج شنو تقشمرين روحج لو تقشمريني... لج كل يوم اريد اتقربلج وماكدر تعرفين شنو ماكدر...
صحت بوجهه.. وهذا ميغير شي ني ما تزوجتك لهذا الشي .. تذكر ليش تزوجنه .. لانو نته وعدتني من عمري ست سنين نتزوج .. لان ني احبك...
ميهمني هذا كوله المهم نته زوجي وبس ... ني اقبل بكلشي.. حته لو مكسر ومتكدر تمشي هم اقبل...
مازن صارلي كم شهر انتظرك تصحه من الغيبوبه وتطلع ونرجع مثل قبل... شكد جنت ابجي بااليل اخاف تموت ومترجع...
يعني تريدني هسه اعوفك لانو مثل متكول نته مو رجال... صدكني ماعوفك وتكدر تتعالج ...
ازل افهميني والله حاولت اتعالج بس ذا تعالجت ممكن ميصير عندي اطفال وبكل الاحول محد مظلوم غيرج...
ميخالف ميخالف اقبل بكلشي... وحنه ممستعجلين عالاطفال كلشي بيد الله.... ويه ماجنت احجي لزمني صداع براسي قوي ...
متحملت الالم كمت من مكاني... اعيط وامشي من الالم احس راسي رح ينفجر...
مازن ورايه ويصيح شبيج... اريد اركز ماكو احس نشليت .. اخر شي غوشت الدنيا بوجهي ووكعت...
