متاهات

مفاجأت

يسعد مساؤكم....متابعينا الاعزاء...اتمنى تعذروني اليوم البارت مو طويل...عندي ظروف...ولان ملتزمة وياكم نشرت ...ان شاء الله على الجاي اعوضكم ...تحياتي
متاهات
همس ليل
البارت الخامس
ثلاث ايام طكت روحي من الكعدة لان مااكدر اتحرك
وتعلمت على الشغل والطلعة ...
واحد هم يغير جو البيت...
ثالث يوم بالليل سمعت جرس الباب...جنت بالغرفة ..دخلت امي
_كومي يمة...بيت ام هشام اجو
كعدت متفاجأة...
_منو قصدج اجى
_ام هشام وهشام ولارا...يلا يمة عيب من الناس فضيها...
راحت واني كمت على كيفي ومرتبكة...
فتحت كنتوري حايرة شألبس...
ما استغربت جيتهم...لان من نجحت هم اجوي...
بدلت وطلعت اعرج لحد ماوصلت الصالة...
سلمت على امه واخته...ومن وصلت له
جان نظرته مغضبة...يبوه عليك...
غير لو افهم شبيك...حجيت بداخلي
طبعا امه وابوية وامي التهو يسولفون عن اشخاص واحداث مانعرف عنها شي
ومهند وهشام يسولفون سوة....
بس لاحظت نظرات لارا لمهند...مانزلت عينها من عليه
جانت تتأمله...وتبتسم من دون ما تحس على نفسها...
حسيت كل الحب بعيونها...بس ياهل ترة شنو شعور مهند
حاولت اتجى واكوم للمطبخ...
حضرت عصير..وصحت لمهند يقدمه
هالمرة ...جان هشام يحجي وية ابوية....
فشفت نظرة مهند للارا....نفس نظرتها....
اويلي عليك ياخوية...شلون واكع وكعة....
وين انتة وين هية....شورطك....
نقهرت حيل عليه...مهند طيب وكلبه حيل حنون
اخاف ينصدم ....
امها رغم المرة ماشفنها منها شي مو زين...
بس مبين أتحب المظاهر وتحب بناتها ياخذون مستوى خاصة من ناحية المال...
وكله تحجي فلانة هيج اخذت وفلانة هيج رجلها
جابلها....
وقبل مايطلعون...سمعت هشام يحاجيني
_شلون صارت اصابعج خوما بعدها توجعج
رفعت نظري له...جانت نظرة عينه غريبة..
_لا احسن الحمد لله
_خوش...الدكتور كال اسبوعين ونفتح الجبس...
عود اجي اخذكم وية مهند
_ماكو داعي...مهند يوديني
سكت الكل وحسيته حيل ضاج من حجايتي...
جاوب ابوية راد يجبر الموضوع
_وليدي مانريد نتعبك
_لا عمي ماكو تعب...هي الشركة تتكفل بكل علاجها...
لان السبب احنة بالي صار
_لا مو انتو...الطابعة بمكانها جانت واني سحبتها...
فماكو داعي تكلفون نفسكم...
بين عليه أتعصب...من حركة رجله...كام يهز بيها
حجت امه...لا خالة شكو بيها...هية بالشركة الحادثة صارت...
واحنة اهل...ليش اتكلفين اهلج....
ضجت من حجايتها...وشفت مهند هم انزعج...
بس امي ظلت تشكر منها...
طلعوا ولا باوع علية هشام...
ثاني يوم من رجع مهند الظهر...امي وابوية نايمين
وطبعا احمد دولة بحاله...
على كد الوجبة نشوفه...
_اصبلك غدة
_صبيلي وتعاي اكعدي احجي وياج
صبيتله..جان عدنا ميز بلاستك بالمطبخ....
كعدت مقابيله وهو يتغدة...واني بيدي كلاص جاي اريد اشرب
_صبا...اليوم هشام فاجاني بطلب...
_شنو...
_طلب ايدج
من المفاجأة وكع كلاص الجاي من ايدي...
_اسم الله...شبيج...خوما انجويتي...
كمز مهند من مكانه...
هزيت راسي واني مصدومة...
دنك يلم الكزاز لان ماكدر ادنك...
ورجع لمكانه...
_ليش هيج متفاجأة
_ماعرف...بس
_بس شنو
_ماعرف شكولك...لا اني من مستواه...
ولا ذاك الجمال حتة يباوع علية
ضحك....شكد احب عفويتج بالكلام...
_يعني شلون
_ماكو بنية دكول اني مو حلوة ومو مناسبة لولد
_هسة غير نحجي الصدك
عاف الخاشوكة من ايده وباوع علية
_صبا حبيبتي...منو كال انتي ماحلوة
_ماكلت ماحلوة...بس شكلي عادي مابية شي مميز
_شوفي خيتي...من اطلعين للشارع وتشوفين البنات
لا عبالج كلهن يخبلن وحلوات....
اغلب بناتنا جمالهن عادي...
بس المكياج والترتيب باللبس والفيكات هية الي تبرزهن...
وماكو وحدة ماحلوة...لازم بيها شي مميز
_اعرف مهند...بس هو وفلوسه ومركزه اكيد ايدور وحدة حلوة
_انتي ماتعرفينه...هشام مو من الشباب التافهين
الي يدور وحدة يتباهى بيها لان عند فلوس...
واكيد شاف بيج شي عجبه لذلك رادج
_وامه يجوز ماتقبل...دائما تحجي بالفلوس
_محد يمشي حجايته عليه...هو من النوع صاحب القرار الاول والاخير...
صح جان مهند يحاجيني ...بس بعدني مااستوعبت الي كاله...
_زين مهند احجيلي عنه شوية
_شنو تريدين تعرفين
_ليش هو لازم شغل ابوه مو باقي اخوته...
ماعرف كلي اي شي يوضح شخصيته
_اولا هشام اصغر اخوته...
اخو الجبير ازوج وطلع بالخارج...
واخوه الوسط ماله واهس بشغلهم صيدلاني وازوج دكتورة...
فاخذ حصته وفتح صيدلية وبنى بيت وعزل عن اهله...
هشام مو مثلهم من هو بالاعدادية يطلع وية ابوه للمعمل...
وتعلم من وكت على السوك...
ابوه تمرض وهو بالسادس ...فهو اكثر واحد داره
وبقى وياه...
واكتفى بالمعهد...وهو تقريبا صار يمشي الشغل
بس ابوه يوجهه لحد ماخلص معهد توفى ابوه
وهو استلم الشغل بمكانه...
ولها السبب اتشوفين شخصيته انضج من عمره...
لان ابن سوك وشايف ومتعامل وية اشكال
اما اخواته وحدة مزوجة اكبر منه ورند ولارا اصغر منه...
_ماعرف ...مهند مادحس اني مناسبة له
كام وكف ....فكري خيتي براحتج....
صح هو شخصيته مو سهل واحد يفهمها...
بس خوش ولد وخوش نصيب
من راد يطلع اذكرت...مهند ممكن سؤال..
_شنو كولي
_الموبايل كلت انتة اشتريته مستعمل...
زين والسيم كارت...مال احد
_لا طبعا شلون اخذلج سيم كارت مستعمل...
حتة اخذنا رقمين سوة واحد لج واحد لهشام...
بس فرق رقم واحد...
_ها اوكي
_ليش اكو واحد مضايقج بالتلفون
هزيت راسي لا
طلع وعافني غركانة بحيرتي....
وبعدني مامصدكة الي سمعته....
ماعرف شكد بقيت كاعدة بمكاني ...
حسيت على صوت امي اجت دسوي جاي لابوية
عفتها ورحت للغرفة ...
وكفت مقابيل المراية...صافنة على نفسي
معقولة عاجبته...بشنو نعجب...
فريت على نفسي اباوع على تفاصيل جسمي
حتة ماعندي تفاصيل انثوية كلش بارزة ممكن
ينجذب لها...
بالعكس اني ضعيفة...وشكد هبة اتكولي اسمني شوي يحلى جسمج....
اذا شنو جذبه....
رجعت قربت وجهي من المراية....
خاف حلمانة....لو اتهيء....
رجعت ابتعدت ...وفكري مايقبل يسكن...
زين اذا صدك رايدني...ليش كل ما يشوفني يرزلني
صدعت من الافكار الي ادور ابالي...
بالليل من نمت ...كل شوي افتح الموبايل...
جنت متوقعة راح يدزلي مسج او يحجي شي
بس ماكو اي شي بدر منه لمدة اسبوع...
*****
مهند...
لارا بقت تلح احجي وية مهند....
امها جاي تضغط عليها علمود توافق على العريس
قررت احجي وياه واشوف...
بس كلما احاول احجي اتردد...
شكله...احب اختك واريدها بقيها معلكة لحد مايصير عندي اتقدم...
لا مو هيج...اكوله حاب اناسبك...بس حاليا ماعندي امكانية ...
دخت...اخر شي كلت خلي احاجيه وهو الحديث يجي ابوقته...
ثاني يوم زيارته لنا رحت له للمكتب...
بس قبل ما احجي كال عندي موضوع وياك...
قلقت خاف عرف شي...
كتله كول...وجانت المفاجأة...يريد يتقدم لصبا
طبعا مااكول حيل صدمة...
لان هشام محد يفهمه ..ولا يعرف شيريد بالضبط
بس الي قهرني ...
هو قلت ثقة صبا بنفسها...
زين شلون راح تتعامل وياه ...
المهم ماكدرت احاجيه بموضوعي...
لا يصور استغليت الموقف...
وأجلت....
******
مر اسبوع وهو ولا جاب طاري....
لا مسج...لا مكالمة...وفوك كل هذا مهند بعد ماحجى وياي وسألني رأيي
يجوز جنت اتخيل...وهذا حلم ...
اي اكيد....تهيئات هاي كلها...
اليوم اروح افتح الجبس...
بدلت وحضرت نفسي....
بقيت انتظر مهند...شوي واجى
_يلا صبا خيتي..هشام ينتظر برة
من كال هالحجاية...كلبي حسيته كام يطبل...
ماكدرت اكوله ليش اجى...
طلعت لكيته واكف يم السيارة...
وبيده جكارة يحجي وية مهند...
بس شافتي شمر الجكارة...وظل ينتظر اصعد
طبعا بعد ماسلمت.....
وصلنا للمستشفى...نزل وياي مهند...وهو راح يركن السيارة...
بين ما فتحت الجبس ورجعت لكيته كاعد بالانتظار...
من طلعنا ...
مهند راح يجيب الدوة ...
هو فتح الباب الي يصير براه...حتة اصعد
من صعدنا عدل المراية علية...
_شنو تجرين بظهرج...لو شنو قصدج
_على شنو مافهمت
_ليش مارجعتي خبر
كلت بداخلي يعني الموضوع صدك مو تهيئات...
_شلون تتقدم لوحدة ماتثق بيها
_هالشي مايخصج ...اني احدد الي اريده
_ما اعتقد احنة نتوالم لعد...
التفت علية بعصبية...شنو
_مثل ماسمعت...انت تريد تسلط برأيك...
وعبالك تريد موظفة عندك مو زوجة
_والله صاير عندج لسان وتحجين...
رجع التفت لكدام وسكت...
عرفت مهند اجى...
بطريق الرجعة  جنت اشوف نظراته الي كلها غضب
وهو يباوعلي بالمراية...
وصلنا وماقبل يدخل...
ومهند راح للشغل...
بدلت واني احاجي نفسي...
شبيج صبا....ليش هيج جاوبتي...
انتي مامصدكة يباوعلج...بعد شنو هالدلال...
ليش هيج جاوبتيه...
ارجع اجاوب نفسي...ليش لا ...هذا زواج مو لعبة
اذا يبقى نفس طريقته بالتعامل...
مااريده...مو جارية لو موظفة عنده...
زين فكري بمهند...اخوج خطية يحب لارا
بلكت هالزواج يقربهم من بعض...
لليل فكرة اتجيبني وفكرة توديني...
بس مكالمة الليل غيرت كل الاراء....
وتستمر الحكاية ....