متاهات

ضغط مستمر

متاهات
همس ليل
البارت السادس
دك تلفوني...باوعت رقم غريب...
ماجاوبته...رجع دك مرتين هم ماجاوبت
اجاني مسج.... اني ام هشام
من دك هالمرة راسا فتحت خط
_الو شلونج صبا خالة
_هلو خالة اسفة ماجاوبت راسا...
شفته رقم غريب
_حقج خالة...الدنيا ماتتأمن...
شلون ابوج وامج
_الحمد لله
_يمج همة
_لا اني بالمطبخ وهمة بالغرفة...تحتاجين احد منهم
_لا حبيبتي اريد احجي وياج
سكتت...تفضلي خالة كولي
_شوفي حبيبتي...اعتبريني مثل امج واسمعيني
اني احب بناتي ياخذن احسن نصيب...
ومن مستواهن مو اقل...لان تقارب المستويات
يبعد المشاكل عن حياتهم ومايظلون يشتكون
سكتت....واني لزمت كلبي بيدي...
كلت يجوز عرفت بمهند يريد لارا...
_وانتي هم مثل بنتي...ولان احبج...اصور زواجج من ابني مو صحيح...
طبعا مو قصرا بيج ....لان انتي حبابة والف واحد يتمناج....
بس لان راح اتعبين وية ابني...هو يجوز لان يحب اخوج وعلى حبه اختارج...
او لان عطف على وضعكم...وهو كلبه طيب..
ماعرف شلون يساعدكم بغير هالطريقة....
خاصة وهشام يريد زوجة مطيعة وماتدخل باي شي
وشافج مناسبة...
رجعت سكتت...اني ماجاوبتها لان كل كلمة دكولها
سجيبة وتطعني بكلبي...
_خالة لا تزعلين مني...ثقي اريد مصلحتج...
وبعد بكيفج...اذا تكدرين تتحملين وضعه...
شكو بيها ما اعترض...
اول وتالي يرفعج لمستواه...
_مشكورة خالة على النصيحة...
سديت التلفون واني الوب....
ليش هالتجريح...قابل احنة اختارينا وضعنا...
هاي ارزاق ربنا....
ليش دائما الغني يجرح الفقير...
شنو عباله ماعنده احساس...
لو الحاجة تخليه مايحجي...
لا والله لو مو هشام..لو اكبر من هشام
ما انزل راسي...ولا اخلي احد يمس كرامتي
هاي بعدنا بالبداية وهيج تسمعني حجي وتجرح
من نزوج شراح تسوي....
بليلتها مانمت...وبقيت للصبح دمعتي على خدي
حسيت حيل جرحتني...
الصبح كعدت وية مهند ...
_صباح الخير ياحلو
_صباح النور هنودي..
صبيتله ريوك...
_شنو ماداومين
_مهند...مااريد ارجع للشركة
_ليش
_اريد درجع خبر لهشام...ماموافقة على الزواج
صفن بوجهي وحسيته اضايق...
_ممكن اعرف ليش
_اريد اكمل كلية...ومن اريد ازوج...اشوف واحد من مستواي...
ما ارفع راسي لفوك وتنكسر ركبتي...
سكت مهند...بس شفت بعيونه نظرة غريبة
نظرة حزن...ندم...وشي اخر
طلع لدوامه...ومثل ماتوقعت...بعد ساعة دك تلفوني
باوعت هشام
ماجاوبت...دك مرة ثانية...فتحت خط
اجاني صوته العصبي
_شنو معناه هالحجي
_ياحجي
_الي كلتيه لمهند
_ما اريد اشتغل تعبانة واريد احظر نفسي للكلية
_مو اقصد هالشي
_لعد شنو
حسيته تنرفز زيادة...ورفع صوته
_الرفض مالتج
_ها...افتهمت...عادي انتة تقدمت واني رفضت
شنو المشكلة
_هيج يعني
_هو الزواج قسمة ونصيب...
_زين صبا...
سد التلفون.. اختنكت...ليش هالشعور
شو ما افهم نفسي...اكرهه واشتاق له
اضوج منه...وانقهر من يزعل منه...
يجوز هاي المراهقة...ولان ما نعجبت بشخص ابد
وج يامراهقة عمرج ١٨ سنة...
ضحكت على نفسي اسال واجاوب..
*****
مهند...
بعد رفض صبا لهشام...
صعبت شغلتي اكثر ما هي صعبة...
شلون احجي وياه واخطب اخته...
واختي هسة رافضته...
وماكدر اضغط عليها علمود مصلحتي...
بس شلون بلارا...خاف تروح مني
شكول لها وين وعدي لها...
دكيت عليها ...
_هلو حبيبي...شلونك
_شلون لارا
_خيرك هنودي...شبيك
_مابية شي
_شلون مابيك شي...مبين من سلامك ...
وين كلمة روحي...وين كلمة حبيبتي...
سكتت ماكدرت اجاوبها
_مهند احجي لا تخلي بالي
_لارا ماكدر احجي وية هشام حاليا على موضوعنا
_ليش مهند ...امي بعدها تضغط واني يوميا حجة مطلعة...
_جدت ظروف خلتني ماكدر احجي وياه
_ياظروف...بس لا قصدك لان هشام يريد يخطب صبا...
هالشي بصالحنا مو ضدنا
_بصالحنا لو موافقة
_وليش يمة ماتوافق...هية اتحصل مثل اخوية
_شنو هالحجي لارا...
ليش ماتحصل...لو لان مو من مستواكم
لعد اني هم مااناسبج على هيج...
_لا مهند موقصدي والله....
بس يعني هشام فرصة لاي ابنية...
_مو كل البنات يفكرن هيج....والظاهر انتة هم يراد تعيدين التفكير بموضوعنا
_هاي شبيك مهند...تريد بس تزعل
_اي مو عقلي زغير...روحي لارا رحمة لاهلج
سديت التلفون واني شايط...
ما ادري انقهر من حجايتها...
لو من حظي الي خلاني احب وحدة صعب اتصير لي
لو انقهر من الوكت مايمشي عدل وياي...
لليل رجعت خابرتني وتعتذر...
ما اكدر ازعل منهة ...احسها النفس الي يطلع وينزل بصدري...
بس كالت راح اصر على الرفض لحد ما اخلص ثالث
وانتة على وعدك من تخلص السنة لازم تتقدم...
******
صبا...
بعد مارحت للشركة...وهشام دزلي راتبي وية مهند
اول فترة جانت حازة بنفسي الي صار...
واشتاق لشوفته...ومن يجي على مهند...
اصعد من شباك البيتونة اباوع عليه...
بس بعدين قويت نفسي...ليش اظل متعلكة بأمل
كاذب...
بعدني ابداية حياتي...
خلص الشهر وطلعت القبولات...
وانقبلت تربية جامعة بغداد....
وطبعا اعلى قسم...لان معدلي يقبل كلية اعلى
رحت وية مهند  قدمت...
وبلشت دوام...كليتي بنات فقط....
مهند راد يخليلي خط...بس شفته تكلفة عالية
والكيات اصرفلي...
فما قبلت...وتحججت لان الخطوط يتاخرون بالرجعة...
مرت تلث اشهر...تعلمت البس وارتب نفسي
وطبعا من داومت عدلت حواجبي...
وصار تغيير بشكلي....
وبالكلية وخاصة اذا بنات هواي تتعلمين منهم
جنت اخذ الشغلات الزينة منهم....
جنة كروب كم بنية...بس ماكو وحدة مقربة...
بقت هبة صديقتي المقربة...
ونتخابر دائما....
ومرات تجيني للكلية....
مرة رجعت للبيت...ومثل كل يوم انزل من الكية
براس فرعنا...
واتمشى للبيت....شفت اباب بيتنا سيارة...
بس جديدة ماعرفتها...
من بديت اتقرب...بدت معالم شخص متجي على السيارة تتوضح لي...
كلبي كام يدك سريع...
من وصلت انتبه هو....
عدل وكفته...وشمر الجكارة...
تبسمت بداخلي...
نفس الحركة من شفته اول مرة...
_السلام عليكم...شلونك هشام
_وعليكم السلام...الحمد لله
نظرت عينه تفحصتني من قمة راسي الى اخمس قدمي...
ربكتني هالنظرة...
ترخصت وفتت...واحس نظراته زرفت ظهري..
ثاني اليوم من خلصت دوام...
طلعت خارج الجامعة وية كروبي...
جانت السيارات على الجهة الثانية من الشارع...
من داعبر لاحظت نفس سيارة هشام...
هزيت راسي...كلت يجوز نفس الموديل...
بس من عبرت...شفته واكف مقابيلي...
تفاجأت بيه...
_شلونج صبا
_هشام...شجابك هنا
_تعاي اوصلج ونحجي
_اسفة ...راح ارجع وية جماعتي
_صبا...لا تعاندين تعاي اريد احجي وياج
_واذا كلت ما اجي
_ما اعتقد تريدين تسوين مشهد كدام الطلاب
صفنت عليه...جان يحجي بهدوء بس بثقة...
اشرت للبنات روحوا...
وصعدت...هو صعد وجان مركز على السياقة...
هناك المنطقة بهيج وقت ازدحام...
بس شفته من فتحة على الجادرية رجع للكرادة...
_وين رايحين...
_نكعد بمكان نحجي..
_ومنو كالك اقبل هالشي...
رجاء هشام وصلني للبيت
_كتلج نحجي شوية...وبعدين اوصلج...
لا تخافين مااخطفج
_مو دكول اخت صاحبي...شلون تقبل هيج تسوي
سكت فترة...بعدين جاوبني
_قصدي شريف...مو غير شي حتة اعتبر خاين صاحبي...اذا هيج تقصدين
وصلنا لمطعم...ركن السيارة وطفاها
التف علية...انزلي
_واذا كتلك ما انزل
_يعني شلون اليوم نبقى نجادل مثل المزعطة
_اذا ادشوفني اني زعطوطة شكو جاي تحجي وياي
ضرب الستيرن بيده بحيث فزيت
_استغفر الله...شلون اليوم...انزلي فضيني
جان يحجي بعصبية...ساعتها صدك خفت
نزلت ودخلنا...اختار ميز قريب على الجامة
_شتاكلين
_ما اريد شي ...احجي الي عندك وفضني
صاح للنادل وطلب عصاير وكيك...
وطلع باكيت الجكاير...وشعله جكارة...
واني اراقب حركاته....
_هسة اريد اعرف شنو سبب رفضج
_حيل...مو دشوف السؤال متأخر..
_ماردت الح عليج
_ماردت تلح...لو شفتها صعبة على نفسك ترفض...
طفا الجكارة بالمنظفة بعصبية...
_فسريها مثل ماتردين...وجاوبيني
جريت نفس واني افكر شلون اصيغ كلامي
_ليش تريد تعرف...
_اعتبري فضول...
_اريد اكمل دراستي
_هذا مو سبب..لاني ما اعترضت على المسألة
وصل النادل...هو سكت بين ما خلى العصاير
_بعد انطيني سبب مقنع
_هشام...ليش مانترك هالموضوع...
اذا تعتقد كرامتك انجرحت...
احب اكلك الف وحدة تتمناك...
ماوكفت علية
_ومن الالف اختاريت وحدة بس...
واريد اعرف سبب رفضها
_شمعنى اني....اصلا انتة ماتثق بية...
ليش هالتمسك...
_منو كال ما اثق...وبعدين اني عمري ما ردت شي وماحصلته
_يعني مجرد رغبة من تنتهي وتصحى تتندم
_انت شتدخربطين بالحجي...
رغبتيش...
لا تحجين شي ماتفهمين عنه...
_هسة اذا ما افهم ليش مصر تعرف السبب
تعصب وجر باكيت الجكاير خلاه على الموبايل...
وشالهن من الميز...
وكف فجأة...رفعت نظري ....
_كومي خلي اوصلج...لان مالي خلك لعب الجهال
طول طريق الرجعة ماحجى شي...
وصلني للباب...
_هاي وصلتج للبيت سالمة...بس خلي ابالج الموضوع ما اتركه لحد مادكولين شنو السبب...
نزلت...وبداخلي ماعرف افسر فرحانة لان مصر .
وضايجة لان ماريد اتعرض لضغطه
غاب كم يوم...
وهم رجع اجى المرة للكلية...
جنت بالكافتريا...وما اشوف الا واحد وكف يمي
رفعت راسي شفت هشام واكف يمي...
انحرجت كدام الطالبات...
ترخصت منهم...
ورحنا على ميز ثاني
_هشام خير صاير شي
_يعني شيصير...اذا اكو شي نخابرج
_ليش جاي لعد
_لنفس السبب السابق
_ترة راح اتجيبلي حجاية
_كولي السبب واني اعوفج بحالج
_ترة مايصير هيج...
هز جتفه وطلع جكارة شعلها....
حط رجل على رجل وبدة ينفخ دخان جكارته
_ماعندي شي....راح ابقى مكابلج كل فترة....
_ماعندي شي اكوله...
باوع علية نظرة متفحصة....
_يعني ماعندج سبب....ليش الرفض
كمت...من حقي اقبل لو ارفض عفته وطلعت من الكافتريا...
بعدها باسبوع...جان يوم خميس معزومين على عرس اقاربنا...
العرس بقاعة واصر مهند نروح...
لان كلنا كأبة...رحنا اني ومهند وامي...
من اجيت ابدل حرت شلبس ...
ظليت ادور بالملابس...تلمست جيس...
صفنت شنو هاي...
فتحته شفته الفستان الي جابوه بنجاحي ....
قررت البسه ...
لبسته طلع فستان عدل...والفيكة بالردن كلها كبس
والفستان ضيك...
يأما همة مايعرفون قياسي
ياما اني سمنت...
كملته بشال نيلي بيه ورد وردي...
وقبله طوخت مكياجي...
باوعت غير شكل طالعة...
من طلعت مهند كال الفستان كصيف...
_ماعندي غيره...وبعدين هية حفلة جبيرة...
راح يعوفون الكل وينتبهون علية...
_دمشي...وبعد لا تلبسيه...
اخذنا تاكسي...
من وصلنا تفاجأنا بالعدد الموجود...
كلش هواي ...
اخذلنا مهند ميز بالخلف....
وجانت اجواء الحفلة كلش حلوة...
كام مهند...وبعد شوي رجع وياه هشام ولارا وعدي
سلموا علينا...
كمت سلمت على لارا...ومن التفت على هشام..
شفته يباوع علية بغضب...
هذا شبيه...حجيت وية نفسي
_هاي شنو صبا...الكلية هواي موالمتج...حجى عدي
ضربه على جتفه مهند...لك هاي اختي  لا تنسى نفسك...
_مو قصدي والله بس واحد لازم يبدي اعجابه بقدرة ربنا على الخلق...كالها وهو يضحك....
مهند قرب اصابيعه من عيون عدي...راح افكس عيونك ترة...
تأفف هشام وعافنا وراح ماخذ وياه لارا...
شوي وطلعت للحمام...اصلا اختنكت من الهوسة...
عدلت مكياجي...
وبطلعتي من الحمام...حسيت واحد جرني من ايدي
******
مهند.....
جنت اروح للارا بالكلية...
وكل روحة ارجع كلي امل...
دائما تشجعني...
رغم اعرف امها حيل تضغط عليها...
بس لسة هية مقاومة...
والوكت يمشي... واني مكانك راوح...
البيت صار كله براسي...
واليوم بالعرس...لارا طالعة تخبل...
شفت العيون شلون اكلتها....
حسيت بخنكة...معقولة امها من بين ذولة كلهم راح
توافق علية...
...وتستمر الحكاية