متاهات

حادث عارض

متاهات
همس ليل
البارت السابع
اباوع الشخص الجرني هشام...
جان يمشي سريع وكايدني وراه...
ومشيي صعب بالكعب العالي...
احجي وية نفسي ...هسة شجاني ولبست هالعلو
باع اني شحجي...غير اشوف هذا شيريد هسة
جارني وراه....
باوعت للمنظر مالنا...وتبسمت...
وهو ولا التف...ولا يمه...على مشية الوحدة...
لحد ماوصلنا للحديقة خارج القاعة...
اخذني على صفحة...
شنو الي خلاني اسكت ...ماعرف...
سرعته بالمشي ومامنطي مجال احجي...
لو هبطتي من حسيت واحد لزمني...
وكف مقابيلي....ليش تضحكين...
لازم عجبج الموقف
جنت الهث عبالك طالعة من سباق مرثون ...
_اضحك على الموقف...شنو ساحبني وراك بلا زحمة
ومن سمحلك تلزمني...
رفع اصبع كدام حلكه...اششش..مااسمعلج صوت...
اشر على ملابسي...
هو هذا هم لبس..
باوعت على لبسي...
_شبيه لبسي...هذا هديتكم بنجاحي
_اعرف الزفت مال نجاحج...بس ماوكفتي دام المراية وشفتي شلون ضيك...
الفندي اخوج ماشافج...
_شلون عرفت ...
لاكة حواجبه باأستغراب...
_هو شنو شلون عرفت
_هديتكم
_هسة اني وين احجي وانتي وين تحجين
_لا الله عليك شلون عرفت
_لان اخذت لارا بوقتها واشتريناه سوة
باوعت عليه بلحظتها...
جان اكو شعور غريب انبثق بداخلي...
شعور حلو لامسني ....
حسيت بشوق غريب له...
ظليت اتأمله...
كشخته بالغاط الاسود...
نظرة عيونه السودة الغاضبة...
شعلة الشيب الي تنطيه مظهر هيبة فوك هيبته...
_هم صفنت علية...مو داحجي وياج
فزيت من صفنتي ...خرب ما ابطل هالحالة..
_هشام ...عزيزي...انتة اقاربنا صح...
بس هالشي ماينطيك حق تحشر نفسك وياي...
عندي اب واخ هما يحاسبوني...
وكايلة هالحجي سابقا ...
شنو موقعك تحاسبني...
حسيت عيونه جدحت نار...
وبد يتقرب باتجاهي...واني ارجع ليورة
_شبيك...هشام...
جنت امتمت بالحجي لان حركته ربكتني...
_ردت اسويلي موقع وانتي رفضتي...
وهسة اريد اعرف سبب هالرفض...
جان يحجي ويتقدم...
لحد ماظهري صار للحايط...وهو مقابيلي واكف
خلى ايده على الحايط قريب وجهي...
التفت على موقع ايده ...
_هسة
بلعت ريكي بصعوبة...ماعرف شنو الصار بية
_مايصير...الي دسويه...
وين احترامك لمهند
_اشش...ولا كلمة...زوديها...
راح تبقين هنا واكفة لحد ماتحجين...
صفنت عليه شكوله
_احجي عاد
_ انتة مو كلت ولا كلمة
خزرني بنظرة عينه...لازم عجبج الوضع..
فتحت عيني ...هذا شيحجي...
_خلاص...راح احجيلك...بس مو هسة...
تعال للكلية...
وخر ايده....روحي اكعدي يم امج ولا ادكومين بعد
جنت امشي كوة....
وادري هو وراي بمسافة...
لحد ماوصلت كعدت يم امي وفعلا بعد ماتحركت
مو لان هو كال....
بس الموقف هزني ....
اجى مهند وحسيته حيل ضايج...
حقه لارا كل العيون عليهة...
شراح يقاوم وية ذولة...
واعرف كل زين امها تريدلها مستوى عاليا ماديا...
_يلا نروح تأخر الوقت
_احسن اني هم دخت
من طلعنا تفاجأت هشام واكف يم سيارته...
اول ماشافنا...تقدم وفتح الباب الخلفي
الي يصير ورة مهند لامي...
رحت من الجهة الثانية صعدت...
من صعد عدل المراية...تبسمت بداخلي
عرفت ليش فتح الباب لامي...
بس المشكلة ما اشوفه يباوع...
معقولة ما انتبه عليه...
وصلنا...جان بعده جمعة وماعندي دوام...
بس ظليت شايلة هم ليوم دوامي وجيته
شراح اكوله...
قابل اكوله امك قللت من قدري...
هسة شجاني وكتله اكولك بعدين...
بس ماجان عندي غير حل خلاني ابموقف محرج
داومت...وابد ماركزت باي محاضرة...
وية كل ريست اتخيل راح اشوفه كبالي...
حتة تجنبت اروح للكافتريا....
خلص الدوام وهو ماكو...
تنفست الصعداء مثل مايكولون....
طلعت واني فرحانة ما اجى...
بس الفرحة ماكملت...عبرت الشارع الاول
واكفة بالجزرة الوسطية...وما اشوف الا هشام واكف عبر الشارع...
اكو بسمة على وجهه...عبالك حس بتوتري
عيني عليه من داعبر الشارع...
وفكري شارد شراح اكوله...
وفجأة سمعت صيحته باسمي...
وترني صوته وكفت بمكاني وبنفس اللحظة صوت هورن عالي...وشحطت بريك قوي ...
الموقف لحظة صار....
بس اذكر التفت...شفت سيارة زلت عني...
وصاحبها جر ابريك....
نزل من سيارة يحجي ويغلط...
ماحسيت الا هشام جرني من ايدي على صفحة...
وكام يصيح على صاحب السيارة...
والاتهامات متبادلة...
من الهبطة...ما افتهم شيكولون...
بس شفت هشام جر الولد من ياخته...
واجو شباب فاككوهم...صديقاتي جروني
للرصيف....
اباوع صار ازدحام والسيارات الي بعد هالسيارة واكفة...
رجعت نظري للسيارة....
شفت السيارة صاعدة الجزرة الوسطية...
حسيت كلبي رجع لدكاته بس بسرعة ...
المرور اجو يحاولون يفتحون الطريق....
اجى هشام...يلا اصعدي بالسيارة...
صعدت بدون مناقشة...
بس تاخر شوي ...
من اجى جان بيده بطل مي...انطانياه بعد مافتحه
_اشربي....
ساق السيارة بس احسه متوتر...
ومثل المرة السابقة توجه لمطعم بالكرادة ...
لحد ما وصلنا...هو ماحجى رغم توقعت راح يثور
بوجهي...
وصلنا وكعدنا على ميز ..وهو ساكت...
بس طلع جكارة شعلها وبدى يدخن ...
_وين جان بالج...
_هو شصار ..
_يعني شنو شصار ...
_لا صدك داحجي ماعرفت ...بس سمعت صوتك من صحت علية
طفى الجكارة بعصبية بالمنفظة...
_جنتي تعبرين...وهو اجى سريع ضربلج هورن
بس الظاهر بالج مشغول...
هو يسوق سريع اضطر يزل بالسيارة...
ومن سرعته صعد الجزرة...
سمعت حجيه...وتخيلت لو مازال جان اصار بيه
مديت ايدي للمي الي خلاه النادل...
اريد اشرب...لان حسيت ريكي نشف واني اتخيل نفسي
مطيرتني السيارة ...
يجوز جان هسة ميتة اني...
_اسم الله
الظاهر كلت الحجاية بصوت مسموع...
باوعت لهشام يفتح باكيت الجكاير بتوتر
_شلون أنحلت...شفتك تلاغيت وياه
_معليج شلون حليتها ...راح ادزلج شي تأكليه
_لا ما اريد
سكت وظل يباوع علية...حسيت نظرته هالمرة مختلفة...بحيت ارتبكت من تفحصه
_نروح احسن خاف أتأخر
_يلا كومي...
وصلني بهدوء وماحجى شي....
لليل صفنة تاخذني وصفنة ترجعني...
وكل شوي اتخيل نفسي ممددة بالشارع...
بالليل اذكرت هشام ماسألني ...
همزين بلكت نسى الموضوع...
سمعت صوت مهند...خطية حبيبي يشتغل لساعة متأخرة بالليل...
رحت سويتله عشى...
ومن رجعت فتحت موبايلي ...
لكيت مسج من هشام...
_عيني ماتاخذ النومة....بس اغمضهن اذكر حادثة الصبح...
يمكن مية مرة قريتها....
فرحة بداخلي مو طبيعية ...
ممكن يكون فعلا مهتم بية...
خابرت هبة...
_هلو هباوي شلونج حبي
_شلوني ..مكعدتني من النوم تساليني شلوني
_مال الثول شبيج...
مو يكولن الصديق وقت الضيق
_وهسة شنو  ضيقج بهالليل
_لا والله بلا شقة....محتاجتج بشغلة
_باجر ما اداوم ماعندي شي...امرلج للكلية
_لا اني هم ماراح اداوم...
امرلج الصبح...
الصبح رحتلها...وحجيتلها كل الي صار...
واحنة كاعدين بصالتهم...
طبعا اصرت اتريك وياها لان الخاتونة ب١٠ وماكاعدة
_ايا نذلة...هية هيج الصداقة...
كل هذا يصير وياج وماتحجيلي
وج اني من يباوع علية واحد اجي اركض اكولج
_لا تزعلين...بس اعرف راح تاكلين راسي
_تعرفين هالشي لان الي سويتي غلط
_يعني شلون غلط وهية استصغرتني
و....
قاطعتني...وعرفنا كرامتج ومن هالحجي...
انتي صدك تحجين...
شاب يخبل...وفلوس وشخصية...
ودفكرين بالكرامة...
_لا هبة كرامة الانسان فوك كل اموال الدنيا...
والزواجات الي تنبني على المصالح تفشل
_امنت بالله...شعنده مصلحة يمج
سكتت...
_زين انتي مصلحتج يمه شنو...
ماكو شي....
_والفرق المادي
_يعني شنو هو مايعرف هالفرق...
وبعدين يامة ناس ازوجوا واكو فرق بينهم ماديا
_صح...لان اكو قناعة ...
اذا امه من البداية تعيرني...
_باعي صبا...
الي افتهمت من حجيج...هشام محد يحكمه...
وامه لو عدها حجاية عليه...
ما اضطرت تخابرج...بس تدري كل زين ابنها يمشي الي براسه...
وانتي حققتيلها الي رادته...
_شلون اعيش بنصهم وهية رافضتني
_مادام هو رايدج وشاريج شتريدين منها...
_منو يكول رايدني
_لعد الي سواه شنو...
هشام ماحب يدخل من باب حبيات وكذا...
يجوز من باب احترام لاخوج...
ويجوز هو شخصيته مباشرة..
مايلف ويدور ...
_جان على الاقل يكول هالشي
_ماكال حجي بس كالها بفعل...
قابل شجابره يزوجج...
اني اكول ارجعي فكري زين...
هاي فرصة...ولا تنسين انتي هم تحبيه
_لا منو كال
_خاف ماتقبلين...بس شوفي عيونج شلون تلمع من تحجين عنه...
وما اكولج بعد امور..راجعي ذاكرتج وانت تفهمين نفسج...
رجعت منها دايخة اكثر من قبل....
ما اكدر انكر بعد ...فعلا احبه...حسيت بهالشعور
بيوم القاعة من اخذني للحديقة وكف مقابيلي...
ظليت افكر...
وبالليل اجاني مسج منه...
_مامداومة مو...عبالج نسيت الموضوع...
باجر عندي شغل...
بعده راح اجي ودفضيها...
تبسمت...همزين اندفع الموضوع يوم النوب...
ثاني خلص مابين المحاضرات والغدة والتنظيف...
بس كلشي اسوي بشكل الي ...
لان فكري جان يفكر ويحلل بالامور ...
لليل اتخذت قراري...
دزيتله مسج...
_لازال العرض قائم
شوي ورجعلي منه مسج
_اي عرض
ارتبكت شلون افهمه....
_عرض الزواج...
وهم اجاني مسج...بس جان صادم
****
مهند...
هالفترة هملت لارا...
تعب دوام الصبح وية اخوها...
وارجع دوام ثاني لليل...
ارجع تعبان...اريد بس ارتاح...
فمجرد مكالمة قصيرة بينا...
حسيتها بدت تذمر...
وتشتكي عبالك مو هاملها لخاطر اوفي بوعدي وياها
شفت وجه ثاني لها...
عبالك طفلة وتريد كامل الاهتمام بدون تقدير
اليوم خابرتني واني بالشغل...
_ها حبيبي...ماتمر علية اليوم...
صار هواي مامشاوفين..
_اعرف روحي انتي...شسوي ازدحام شغل...
بس افرغ امرلج
_صار كم مرة تواعدني...
يعني منو المفروض يستقتل على شوفة الثاني
عبالك ولا مشتاقلي
_مشتاقلج وكلبي طاك على شوفتج...
وهذا الي دسويه كله حتة نصير سوة
_ادري مهند بس خوما نخلصها هيج ركض هم لي حق اشوفك
_ميخالف حبيبتي فترة واجيج...
بس حسيتها زعلت مني....
فرحتلها بعد يومين....
جانت الروحة تسوة لن شفت فرحة عينها بشوفتي...
_لارا...امج هم رجعت تحاجيج...
سكتت ...
_يعني رجعت ...
_شعليك منها...مادكدر مدام هشام بصفي ويكول كملي يلا...
جنة كاعدين على مصطبة بالحدايق...
واني اباوع كدامي...مااكدر اباوع بعيونها...
اخاف اضعف...واني اريد ابقى محافظ عليها...
شفت اثنين كدامنا...
الولد جان لازم ايد البنية ويتلمسها....
وكاعد لطش بيها...
باوعت على لارا هم انتبهت عليهم...
_تصورين يحبها...
التفت علية...شدكول انتة...
رجعت نظري لهم...لا مايحبها...
لان الي يحب يحافظ على محبوبته...
مايخليها عرضة للحجاية...
ولا يخليها تغلط...
غير هالشي حرام...
باوعت للارا...لكيتها مبتسمة...
_شبيج...
_فرحانة لان صح اختياري..
_يلا كومي لعد احسن...
رجعت للبيت واني احلم باليوم الي يجمعني بيها
يمكن بيومها يصير بية شي من الفرحة...
.....وتستمر الحكاية