متاهات

البارت السادس عشر

يسعد مساؤكم...اليوم جماعة الفيس لكيتهم طالعين علية مظاهرة يطالبون بارت هدية..
هذا بارت صغيرون...وباجر ان شاء الله موعدنا بعد الفطور بارت طويل...تحياتي
متاهات
همس ليل
البارت السادس عشر
_شوفي ستي...اني من عائلة على كد حالهم...
جنت اشتغل وادرس لحد ماخلصت ثالث متوسط ...
شفت الدراسة ماتوكلني خبز...
قررت انزل اشتغل...ونزلت اشتغلت اشكال..
عامل بناء...حمال...عامل بمطعم ...كلشي
بقيت سنتين على هالحال...
يوم صديق ابوية جابلي شغلة عامل بمحل جملة عند سيد يسموهابو خضر....
اشتغلت عنده ٤ سنوات اول شي عامل بالمخزن..
بعدين صعدني بالمحل الرئيسي...
ومن شاف أمانتي وشطارتي خلاني جوة ايده
شكو شغلات تخص الفلوس...او مشاوير تخص بيته
يدزني ...
لحد ماصار عمري ٢١ سنة...
مرة دز بيدي فلوس لبيتهم ...وطلعتلي بنته...
مو بنية كمر ونازل على الكاع...
شفتها مرة وطاح كلبي....
كمت اتحيز فرص حتة بس اشوفها...
اشهر اراقب بيها من تروح للكلية...ومن ترجع
ابو خضر جان حيل معتمد علية لان ماعنده ولد
جان يحمد بية ...
ويكول اتمنى عندي ولد مثلك...
واني جنت حيل واثق من نفسي...
وبتهور شباب...حجيت وية ابوية يخطبها لي...
ابوية طبعا تخبل...كال وين انتة وين هية...
بس ما سمعت حجايته ورحت خطبتها من ابوها
واني واثق منه مايرفض طلبي...
اني اسمع حجيه...وحاول اكتم دموعي واني اذكر مهند
_واكيد رفضك
_لا ابد بالعكس ابوها فرح...
وكال انطيني مهلة احجي وية البيت...
ونتفق اجيب اهلك...
طرت من الفرح...وماكدر اوصفلج مشاعري
يوم.. يومين.. اسبوع وماردلي خبر...
واني انتظر...لحد يوم دزني لبيته...
وهم طلعتلي بس هالمرة متقصدة تطلع...
وياريتها ماطلعت...
_ليش
_فاجأتني...كالت انتة خوش ولد...
وابوية يعزك حيل...
بس احنة مانتراهم
كتلها ليش اني احبج وشاريج
كالت انتة مامخلص دراسة يدوب ثالث متوسط
ولا وضعك المادي زين حتة يغطي على فرق الدراسة
_شجان جوابك
_ظليت ساكت وصافن عليها...
حسيتها انسانة ادور مظاهر...
بس جنت احبها...ومستعد اذا غيرت رأيها اتناسى الي كالته...
سكت فجأة...ومرت على وجه تعابير ماعرفت افسرها
_وبعدين
_حسيتها شمرتني من سابع سما...
بعد ماجنت طاير ومامصدك نفسي راح تكون لي
سألتها ليش جاية تكولين هالشي لي...
كالت ابوية ديجبرني عليك...
واكيد انتة ماتقبل تزوج وحدة غصب عنها..
هزيت راسي وعفتها ومشيت...
ساعة اكول خلي ازوجها حتة لو غصب...
هية بعدين تتقبلني...
وساعة اكول لا شلون اقبلها على نفسي...
تالي الامر...رحت لابوها...واعتذرت منه
كتله بعدني مامستعد للزواج...
بس جرحها ظل بكلبي...
وقررت ابني نفسي...
وفعلا بلي جمعته اشتريت بسطية...
واخذت بضاعة من ابوها...
وشوية شوي كبرت نفسي من بسطية..
لمحل صغير...لمحل اكبر...
لحد يوم سمعت توفى السيد ومحله عرضوا للبيع...
رحت اشتريته وكبرته...
هاي رحلة تعب مال ١٧ سنة يلا وصلت لهذا مكاني...
_الله يوفقك ...تعبت زنلت
_ادري دوختج بحجي بس ردت احجيلج قصتي..
_وزوجتك
_زوجتي اقاربي ازوجتها من عمري ٢٧ يعني صار ١١ سنة على زواجنا...
ماجذب عليج...واطعن بيها...لا والله
خوش بنية وحبابة...ومامقصرة بشي...
وعندي ولد وبنيتين..
_ليش تريد تزوج عليها...
_مشكلتها همها البيت والجهال...
عبالها من تطبخ وتنظف اربع وعشرين ساعة...
خلاص راح ترضيني...
_فهمها هالشي
_حاولت مافاد وياها...
ومع ذلك ماجنت ناوي ازوج...لحد ماشفتج
صبا اني حبيتج غصب عني
هو كال الحجاية...
اني جسمي كزبر...حسيت هالشي غلط اسمعه
وغلط اسمح لشخص يكوله...
_ابو علي رجاء...
ما اريد تكمل...صدك ماعرف وضعي...
ولحد ماعرف ...مايصح اسمح لرجال يحجي وياي هيج
_ليش ماتفضيها...اطلبي الطلاك بالمحكمة
واي مصاريف وحتة المحامي علية
_اشكرك...بس هاي شغلة شخصية...
اني اتصرف بيها...
_مادام تخصج يعني تخصني
انطيني عنوان زوجج السابق واني اتفاهم وياه...
لهنا وحسيت هو حيل ديحشر نفسه وياي...
وكفت على حيلي...
_ابو علي رجاء...ما اريد تحشر نفسك بهالموضوع...
حاول تصلح زواجك احسن ...
عندك اولاد لازم تفكر بيهم...وخاصة زوجتك مامقصرة وياك...
وكف هو هم اثناء حجيي...
_اولادي مامقصر وياهم...وعندي امكانية افتح بيت ثاني...
ومن حقي بعد كل ذاك التعب ادور راحة نفسي وية وحدة احبها
_هاي شي عائد لك مايخصني
_لا يخصج...والايام راح تثبتلج...
طلع...واني اعصابي تغلي من حديثه
_اريد افهم شايلة خرزة انتي...
انتبهت على هبة تحاجيني...
_مافهمت شنو قصدج
_اريد اعرف شايلة شي شكو واحد غني يجيج
باوعت عليها وفكري راح لهشام...
_اكيد سمعتي
_اي...
هو عنده حق بشي واحد..
_شنو
_لازم تتصلين بهشام...
وتعرفين راسج من رجليج...
_ماعرف
_لازم تعرفين...
شمدريج هو وين هسة...مسافر وعايفج
لو مزوج
_مزوج...
هاي الحجاية شعلت نار كبرة بداخلي
_طبعا يجوز مزوج...
دباعي هذا ابو علي زوجته يمه ويدور يزوج...
مو عاد هشام صار سنتين بدون زوجة
وبعدين خاف ابو علي فعلا يدور على هشام ويحجي وياه...
وبوقتها موقفج محرج يصير...
رجعت للبيت وان مشتعلة نار...
والافكار تلعب براسي...
وبعد يومين من التفكير ...
قررت اخابره وارسالي على بر...
فتحت موبايلي...وطلعت رقمه...اصبعي على الاتصال
ومترددة...
اخر شي دست...طلع  الرقم مقفل
جربت مرة مرتين نفس الرد
ظل بالي...دورت الفايبر...
وكتبتله...هم ماجاوب...
لليل...اجاني مسج منه...
من شفت اسمه...ظلت ايدي ترجف...
اريد اكتب واجاوبه ماكدر...
كتبتله...شلونك هشام
_الحمد لله ...انتي شلونج
_نحمده...دكيت عليك يطلع مغلق الرقم
_اي اني مو بالعراق...
تفاجأت...هيج طالع وممكلف نفسه حتة يكول
-تحتاجين شي
_اي ردت اشوفك
تاخر شوي يلا جاوب...
_بعد اسبوع ارجع للعراق وامر عليكم
هذا اخر الحديث بينا...
بس عبالك جانت مفتاح لدموع جنت حابستهة
اسبوع اعده يوم يوم....
بس مرت ٨ ايام وماكو خبر منه...
يوم جنت نايمة وسمعت امي دكعدني وطلعت...
طلعت وراها اريد اشوف شتريد
جان شعري منفوش مال النوم...
ولابسة دشداشة قصيرة ...ونص ردن ...
جان الجو بعده بيه برودة بس من انام ماحب البس شي ثكيل...
دافرك بعيني ودخلت للصالة ...
_ها امي تريدين شي...
رفعت عيني وما اشوف الا هشام كدامي...
بقيت متيبسة بمكاني...
شفت ابتسامة على وجه...وعينه تكصني من فوك لجوة
_شلونج صبا
_زينة...
كوة طلعت الكلمة ...وجسمي لازمته رجفة برد
ماعرف من شوفته...
ماعرف من نظرته...
لو لان الجو بارد
جان واكف...استريح هسة اجي..
رحت لبست روب...واخذت قراصة...
مامشطت شعري...كلت خاف يصور عدلت نفسي علموده..
دخلت لكيت امي جايبتله جاي وكليجة...
كعدت مقابيله...ورفعت شعري بالقراصة...
ولاحظت عيونه تتبع حركتي...
_شنو ردتي
_تعرف صار سنتين من طلكتني...بس يمين
مو المفروض تكمل الاجراءات...
من كملت حجايتي...جان ديشرب جاي
رجع الاستكان بمكانه...وفتح باكيت الجكاير طلع وحدة وشعلها...
جنت اتبع حركة ايده...وصفنت عليه...
اكو بيه شي متغير...
ضعفان...اي ...وبعد انتبهت لشعره...
اكو شيبات متناثرة على كل شعره الاسود...
_بس اني بوقتها رجعتج لعصمتي
_شلون
_مثل ماسمعتي يعني بعدج على ذمتي...
خرستني حجايته...شجاوبه...
_شو ماجاوبتي
_حتة لو....هسة كمل الطلاك بصورة صحيحة...
مد ايده وطفى الجكارة بالنفاظة...
_خوش...انطيني كم يوم ...هسة رجعت من الاردن ...
وبعدها نتفاهم
_براحتك
كام طلع...واني نفس كعدتي عبالك واحد ضربني براسي...
*****
هشام...
شغلت السيارة وطلعت من يم بيتهم...
وبداخلي نفس لوعة يوم وصلتها...
بالمرتين جانت طالبة الطلاك...
ضربت الستيرن بيدي بقوة...
يعني شجنت متصور...
راح اتكولي تعال هشام كافي خلي نرجع...
وكفت السيارة على صفحة وخليت راسي على الستيرن
واتخيلت مظهرها من دخلت تفرك بعينها عبالك طفلة
شعرها متناثرة خصلاته...
والدشداشة الي مفصلة جسمها ....
كوة منعت نفسي اتقدم واخذها بحظني ...
واكولهة شكد مشتاق لحظنج...
رفعت راسي واني اجر حسرة...
خلي اشوف شلون نخلص هالموضوع...
وتستمر الحكاية

👇👇👇👇هاي من هشام لصبا