متاهات

غضب

يسعد مساؤكم...حبايب عذرا للتأخير الصار...بس عندي ظرف ...والنت خلص الاشتراك...واضطريت اشترك على الرصيد لان المجهز ماموجود...
وهسة حاولت اكتب على السريع لان ملتزمة وياكم بموعد...اعوضكم بالبارت القادم ان شاء الله...تحياتي
متاهات
همس ليل
البارت الثالث العاشر
وصلت لبيت اهلي...ومن دخلت حسيت اكو شي
جانت امي تبجي ومهند يحاول يسكتها...
_خير شكو....احجوا
التفتوا علية امي وابوية ومهند حتة احمد موجود
_اليوم مهند حيسافر
_لا...صحت بصوت
تقرب مهند علية وشبكني...
_صبا ...احنة موحجينا بهذا الموضوع سابقا
كمت ابجي بحضنه....بس كلت راح افكر...
ليش مهند ..مالنا قيمة بحياتك...كلنا نحبك ماتقدر هالشي
_حبيبتي والله مقدر...بس شوفة عينج حتة تعيين مامحصل هنا
_مثل ماحصلت لاحمد ...حصل لنفسك
_باعي اني ماكلتلج من البارحة لان ادري راح اظلين تقنعين بية...
حبيبتي ادعيلي بالخير...ولا تعرضين
ظليت اشهك بحضنه ومجلبة بيه مااريد اعوفه
هذا سندي...صح ابوية عايش...بس فقير...
طول عمري اعتمد على مهند ...
احسه ابوية واخوية...وهو هم حيل حنين
ويعاملني مثل بنته مو بس اخته...
حسيت احد جرني من حضن مهند...
التفت شفت هشام...جان حيل ضايج
_هشام كله خلي لا يسافر...
عفية هشام كله....
مو صاحبك...
سحب راسي لصدره..ودنك يهمس بأذني
_اشش...كافي صبا خطية اخوج مادشوفين شلون ممرود
جلبت بقميصه من يم صدره وظليت ابجي ...
ماكدر اسكت ادموعي...
كوة سكتت...هشام راح اوصله للشمال...
طلعوا واحس اخذوا روحي وياهم...
بيومها بتت يم اهلي...هشام كال مالحك ارجع..
ابقي هنا ...
بس خلصناها بجي اني وامي...
وابوية حيل مقهور بس ساكت...
ظليت افتر بالبيت واذكر من جنة سوة...
شلون جان يحجي وياي...يجيبلي حلويات مثل الجهال
حتة من كبرت...
شكد شايل همي....بكلشي...
لليل دك تلفوني...
باوعت ام هشام...اول مافتحت خط اجى صوتها يهلل
_شنو اليوم ماناوية ترجعون...
لو هيج الشوك لاهلج كاتلج...
_هسة شتريدين باجي...اني بايتة يم اهلي
_خفتن وراحة..بس ابني وين...بس لا تكولين
يبات وياج...وين يخلوكم ...
ليش عدهم مكان...
_خابري ابنج وعرفي وين
سديت التلفون بدون حتة سلام...
كلش ضايجة منها...ومطايقة اسمع ولا اتحمل
اي حجاية منها ...
بقيت لثاني يوم العصر يلا رجع هشام
خابرته طبعا اطمن على وصولهم وعلى رجعته
من وصل ضرب هورن وطلعتله...كال تعبان اريد ارجع ارتاح...
وطول الطريق اسأله...وين وصل مهند
شلون اصدقائه...اخذت رقم تلفون صديقه
هواي اسال...هو جان يجاوب بشكل اي ولا بس
وصلنا للبيت فارغ...بس اسينة
_عادي شنو الجديد...اكيد عدها عزومة ...حجى هشام
صعدنا للجناح...هو راسا دخل سبح
من طلع سالته...اسويلك شي تاكله
_لا ...بس تعاي يمي...
تمدد على الجرباية...ومن صعدت يمه...خلى راسه على صدري...ولف ايده حول خصري...
_تعبان صبا...اريد انام ارتاح...
_نام حبيبي
كعدت على صوت الباب يندك...
باوعت لمكان هشام ماكو طالع..
كمت فتحت الباب ...شفت لارا
_شلونج صبا...اكدر احجي وياج...
_تفضلي...
دخلت وكعدت على القنفة...جانت تفرك بيديها
كعدت مقابيلها...خير لارا اكو شي
_بس ردت اسأل...
سكتت...واني انتظر اريد اعرف شتريد
_صدك مهند سافر
_منو كالج
_البارحة امي خابرت هشام وسمعتها دكوله سافر
_مهند هاجر مو سافر...فرق بين الاثنين
_ليش..
_سؤالج ماله جواب
غطت وجهها بيديها وكامت تبجي...
_ليش هيج سوة...شراح يلكى هناك
باوعت عليها مدري انقهر عليها...
مدري انقهر منها...
جانت تشهك وتحجي..
_مو بيدي والله...ليش يسافر...
حتة مااجى سلم ولا دز حتة رسالة
_شيدز...شيشوف...بابا انتي صرتي علة ذمة رجال
انتهى الموضوع...
انسي بعد وعيشي حياتج...
_ما اكدر ...كلشي يذكرني بيه...
حاولت بس مداكدر
وكفت...حبيبتي...لا تكدرين من تعيشين الترف وية رجلج...
من كل كم شهر تسافرين وتغييرين جو...
تنسين مهند واهل مهند...
ماجاوبتني...مسحت ادموعها ونزلت
اني هم رتبت السويت ونزلت اسوي عشى
وتلكتني بوجهي عبالك تنتظر انزل...
_ها هلت العروسة...
_خيرج باجي
_شلون اتسدين التلفون بوجهي
_استغفر الله شتريدين هسة
_ماعاجبج مو...سهلة خلصنا من اخيج...
يوم لج...
عافتني ومشت...شكد اتنكط سم ياربي
الاشهر الي بعدها مهند وصل تركيا واستقروا بيها ...
رادوا يشوفون شلون الوضع هناك يلا يكملون ...
واني حياتي صارت روتين...
هشام حيل انشغل عني ...لان جان مهند.شايل هواي عنه
وبالبيت قلت نزلتي ..
حتة غلاية جاي جبت فوك....
بس لو اكو مطبخ صغير جان خلصت...
وهية اصلا امه التهت وية لارا يجهزون لعرسها...
على اساس نهاية التاسع...
خلال هالوكت تركت المانع لان وعدت هشام نسوي طفل...
وصار فترة...كلش خاملة وبس اريد انام...
من رحت لاهلي مريت على المختبر...
حللت طلعت حامل...حيل فرحت...
وكلت خلي اسويله مفاجئة بس هالمرة بدون
علم امه...
ماكتله ضميت الشغلة...
ثاني يوم...خابرني الظهر...كال حظري نفسج...
فعلا تحظرت اجى المغرب...كتله وين نروح ماقبل
بس من وصلنا ...
اخذني لمطعم ...ومن كعدنا...
_اليوم شنو...
صفنت واني افكر...ماعرف شنو
طلع علبة صغيرة...كل عام وانتي بالف خير
صفنت عليه...وبعدين اذكرت عيد ميلادي...
فرحت بداخلي لان اذكر هالشي...
_حياتي...شلون عرفت...
_من الفيس...
_شنو
ضحك...لا جذب شلون انسى
_وبعد اسبوع شنو
_يوميا هية مسوين كعدة...
جان يحجي وبوجهه ضحكة...
حسيته عبالك يستحي او يضوج من هيج شغلات
_ماكتلي بعد اسبوع شنو
_عيد زواجنا...بس قبطنا سنة وماكو وعدج
_منو يكول
صفن علية...شنو من يكول
_اني حامل...
تفاجأت بالفرحة الي انرسمت على وجهه...
لزم ايدي وعصره بيده...
_صدك صبا
_اي...البارحة حللت يم اهلي
_البارحة وماكلتي
_جنت ناوية اخليها نحتفل سوة بعيد زواجنا
سكت بس عيونه جان بيها الف حجاية وحجاية
_خلي اشوف شجبتلي...
فتحت العلبة لكيت مدالية بيها حرفه وحرفي بالانكليزي
تبسمت...ليش مرات ابداخلي احسه يريد اظل اكدله اني احبه...
من رجعنا للبيت...لكينا امه واخواته كاعدات...
كاللهم صبا حامل...كلهم باركوا...
الا امه حسيتها صفرت ...
وكوة كلمة مبروك طلعت من حلكها...
هشام جان يحير شيجيب...
فاكهة وحلويات...وهاي قبل ما اصير حامل..
امه جانت تنتحس من هالموضوع..
دكول شو ماجان يجيب هيج...
مع العلم هو ينطيها مصروف وتجيب براحتها...
وابد ماشفته ماحاسبها فد يوم...
يوم حنة لارا جان نفسه عيد ميلاد زواجنا...
واني ماتنحست احضر...لخاطر هشام...
ولان حسيت مهند من اخابره مرتاح...
كلت لعل بيها صالح له...
لبست فستان مكسم على الجسم ماروني...
وسويت شعري ومكياج مرتب...
بس طول الحفلة هم ماعفتني امه...
تتعمد تطلب مني اسوي شغلات مو من اسينة...
مثلا صبا شو ماكو العصاير...
اروح اشوف وينها...ارجع الكاها تحجي علية
على انه كلشي ماعرف...وهية علمتني
البس واتمكيج..
وهالشغلات...غضيت النظر اريد تخلص الحفلة...
اخر شي طكت روحي...
من اجو اهل الولد يحنون العروسة...
وكفت يمي...شوفي...هاي الناس الواحد يتباهى بيهم
مو مثل بعض العالم...
_المهم تكون النفوس نظيفة وبيضة مو سودة وسمانية
_هاي عليمن
_افهميها مثل مايعجبج
عفتها ورحت للمطبخ...
تلكاني هشام...جان هستوة طاب للبيت
_هاي شنو شطالعة...
_حلو
_اي ..ماخلصت الحفلة..
_على وشك
تقرب يمي ...وخلى ايده على خصري...
وقرب حلكه من أذني...
_عوفيهم واصعدي
فزينا على صوت امه
_امي شنو السالفة منة العالم ...
اول مرة ادشوفها
_ادري زوجتي لو صاحبتي...
حتة منة العالم...
عافها وصعد...
وهية ظلت تباوع علية بنظرة غضب...
عدت الحنة والعرس على خير...
وسافروا لارا وخطيبها شهر عسل...
وامه فرغتلي...كلما اتشوفي تبسمر...
ومرات حجايتها بالوجه...
مرة نزلت وجانت تخابر لارا...
من شافتني غيرت الموجة ...
_اي ماما شفتي شلون متونسة...
وموكتلج...
زين سمعتي كلامي وماخذتي ذاك الفكر...
_ماكو فكر غيركم...
سدت التلفون...شكلتي
_ماكو شي خالة...
_كتلج لا تكولين خالة...
بس ماتكدرين فكر ومتعلمة على السوقية ...
_والله العز عز النفس مو الحال
_شنو قصدج ماعدنا عزة نفس...
_وينها عزة النفس...
تباعين للناس من برجج العالي...
ترة ولد الخير مايستصغرون غيرهم...
بس الي ماشايف وشاف صعبة عليه
_تفضل شوف مرتك شلون تحجي...
هاي صوجك انتة نطيتهة مجال علينا...
شكد كتلك مستصغرتنا... وانتة ولا يمك
طبعا جانت تحجي واني التفت واشوف هشام وراي واكف...
ومن نظرة الغضب الي بعينه ووجه المحمر...
عرفت سمع بس اخر حجاية...
كمت ما اسمع شدكول ...
رغم افتهمت من حجيها دائما توزه تجاهي...
بالي جان بلي ممكن يسويه بعد حجايتي
_صعدي كدامي...
_هاي الي الله كدرك عليه...
صار ساعة تهين بينا...مسويتلك سحر
التفت عليها وصاح ...كافي...
رجع علية...اصعدي كدامي داكلج
بلحظتها كلش خفت....
ماعرف شيسوي...بس حسيته حيل عصبي
صعدت ...وبقيت كاعدة بالصالة...
واني مية فكرة ابالي...
فزيت على طبة الباب من فتحها ورجع طبكها بقوة
وكف مقابيلي واني كاعدة ...
وبنفس اللحظة جرني من ايدي وكفني...
_اسمعي الي اكوله زين...وافهميه
اي تجاوز اسمعه منج مرة ثانية..
ماتلومين الا نفسك...
شنو شايفتنا مجدين من اهلج حتة هسة
شفنا الخير...
من جاب طاري اهلي...كلش انفعلت
_شجاب طاري اهلي...لو حايط نصيص لك ولامك
هزني حيل...الظاهر انتي مو مال احترام...
جنت ما اصدك من ادكول امي...
بس لسانج صدك طويل...
_اي مو امك قرأن منزل ماتغلط...
وهية وحدة متكبرة وكلها اخطاء
اجاني راشدي  بنفس اللحظة الي ترك ايدي...
جنت مامتوازنة راسا وكعت على القنفة...
وكعتي صارت قوية على بطني...
_اياج اتجاوزين بعد...
عافني وطلع ...بقيت نفس نومتي على قنفة ماعدلت
نفسي...
ماعرف بلحظتها انقهر لان رفع ايده علية
لو لان سمع لامه بدون مايسمعلي...
عدلت كعدي بس حسيت بطني تقلصت وصار عندي وجع ..
لليل مارجع للبيت واني وج بطني زاد...
نمت وهو ماكو...
وثاني يوم صبحت...حسيت اكو شي
من رحت للحمام شفت عندي نزف بس قليل...
خفت كلش...
ظليت حايرة شسوي...
ورغم الصار بس بالي بقى يمه...
مبين مابايت بالبيت...
نزلت جوة...بعدني احجي وية اسينة
_الظاهر سحرج مو قوي كفاية...
وبدة يصحى ابني منه...
التفت عليها...شجاوبها بلة هسة
_عموما كلها كم يوم ويتندم على الساعة الي دخلج بيها هنا...
_حسبي الله ونعمة الوكيل
فتت اريد اصعد...
_قبل لا اصعدين دزي وية اسينة ملابس لهشام دينام بسويت الخطار
باوعت عليها بحقد
_مو كتلج لا تندكين بية...حجت وياي
صعدت واني الوب...
بطني توجعني ...فوك ماهو غلطان النوب زعلان
بس هو شمدريه سمع بس اخر جملة...
واني كملتها حجيت على امه...
حتة لو جان سمع مني...سألني شصار..
قبل لا يمد ايده ويهدد...
جنت احجي وية نفسي..
لليل زاد عندي النزف وعندي الم صار...
وهو ابد ولا صعد ولا سأل عني...
مادام هيج خلي اروح من الصبح لاهلي اشوفلي دكتورة...
بس النزف زاد ...وكمت مالحك على نفسي...
وخفت كلش من شفت الدم هواي صار...
دكيت عليه ماجاوبني...
مرتين بالثالثة ...بجيت..
_وين خيي شوف الي كلت يصونج شسوة ...
شلون صان...
حرت شسوي ماعرف ادبر حالي...
ولا سامعة وحدة شسوي بهالحال...
اخر شي شفت النزف اخذني...
دكيت على احمد اخوية...جانت الساعة ب٢ بالليل
كتله الحكني ...جيب امي وتعال...
_شبيج صبا...هشام وينه
_ما ادري احمد...راح اموت...تعالي
ماعرف شصار بس كمت ماكدر اوكف على رجلي
من اشوف كمية الدم...
ماعرف الخوف ...ماعرف هو فعلا انزف اخذني.
دخت...
سمعت صوت الباب انفتح...
بس احس نفسي كام يغمى علية...
منو دخل ماميزت...سمعت صوت امي...تصيح يمة بنيتي شبيها...
والباقي خيلات...واحد يحاول يسدني...
واني مثل اللعابة لا اكدر ارفع ايد ولا رجل...
واكو حجي ...ما افهمه...
شوي حسيت كأنما طايرة بالجو...
جنت انام واصحى على خيلات واصوات وارجع انام...
اخر مرة شميت ريحة خنكتني...
بعدها ما دريت وين رحت...
من بديت اوعى احس نفسي بنفق ضيق ومظلم...
واني امر خلاله...لا مو امر اندفع...
اكو اصوات يمي ...بس ماكدر اجاوب...
لساني ثكيل...وعيني كلما افتحها ترجع تغمض...
شوي واكو احد كام يطبطب على خدي...
يريد يوعيني ....فتحت عيني شفته هشام...
فتحت عيني اكثر من مرة...
اخر شي من وعيت وباوعت عليه بقهر...
درت وجهي عنه وباوعت لامي...
_يوم عطشانة...
جاب كلاص مي حاول يشربني...وخرت وجهي للجهة الثانية...
عاد اجت امي شربتني...
من بديت استوعب...شفت نفسي بغرفة مال مستشفى...
واحس خواء بداخلي ...عرفت طرحت...
باوعت لامي...طرحت مو
امي كامت تبجي...ميخالف يمة تعوضيه
دنك هشام علية ...اهم شي سلامتج...
_يهمك سلامتي....
ليش هشام ادك عليك اربع مرات ماتجاوب...
_مو وكت هالحجي...بعدين نحجي ...ارتاحي هسة
جان الصبح طالع...
وبقينا للعصر وطلعوني...
ردت اروح لبيت اهلي ماقبل...
كال امج تجي يمج...
جنت ماخذة منه موقف...بحيث من يجي يريد يسندي...
ما اقبل...وكل مايلزم ايدي اسحبها...
وحتة من رجعنا امي باتت يمي يومين...
من يفوت للغرفة ادير وجهي...
بعدها امي رادت ترجع للبيت لان ابوية واحمد وحدهم...
وبنفس الوقت حسيتها ضايجة...
عرفت لازم امه حجت شي...
وطبعا هية بس صعدت حمدت على السلامة
وبعينها نظرة شماتة....
هشام وصل امي...ومن رجع جنت واكفة اريد ابدل ملابسي...
جان مابية شي بس دوخة تصير عندي من اوكف...
لذلك مستندة على باب الكنتور...
دخل هشام وتقرب يريد يسندني...
ابتعدت عنه...ورفعت ايدي..يعني لاتقترب..
_كافي صبا...ترة تعبت
_تعبت...الله يساعدك...
واني الي مشمورة هنا انزف وادك عليك...
وانتة ولا يمك الموضوع...
_انت غلطتي من جاوزتي على امي...
بس ماجنت اعرف بيج...
وكافي هبطتي من شفتج تنزفين وانتي بغير عالم
لو من كالت الدكتورة واكع الطفل...
_وهسة المفروض اتعاطف وياك...
واكولك ميخالف حبيبي الله يساعدك...
لو شنو تريد
سكت ماجاوبني...
_تعرف شنو شعوري واني احس ماكو احد عندي...
جنت خايفة هشام واني غركانة بدمي...
اول شخص لجأت لك...
وانتة شسويت تفصلةالتلفون بوجهي...
بعدني مامكملة حجايتي...
جرني لحظنه....كافي صبا ...الله يخليج...كافي...
والله متت واني اشوفج بدون حس بين ايدي
خلص بعد ماخليج يوم تباتين بعيد عن حظني...
بقيت كم يوم ماكدر اتقبل وجوده يمي...
الموقف الي صار سوة شرخ بعلاقتي بيه..
بس هو ماتركني...جان يجي ينام يجرني لحظنه
شكد احاول ابتعد مايقبل...
وكام يرجع من وكت ويحاول يبقى وياي..
اخذت وقت يلا رجعت شوي مثل قبل....
خلال هالوكت بديت مرحلة ثالثة ...
ورجعنا لروتين حياتنا....
امه ما اشوفها لان بين الكلية والدراسة...
ومن اشوفها اسمني بكم كلمة
خلصت ٢٠١٢ وبدت ٢٠١٣...
مهند قرر يترك تركيا ويطلعون للمانيا...وطبعا طلعتهم صارت عن طريق البحر...
هشام يتبع اخباره اول باول...
اجانة خبر لزموا اغلب الي حاولوا دخول حدود اليونان...
وخلوهم بالسجن....والاتصال بمهند انكطع...
ظلينا على نار ...نريد بس نعرف خبر...
وهشام ماخلة مادخل حتة يوصل لنتيجة...
يوم جنت اقرأ...وهشام مثل كل مرة متمدد وراسه بحظني يتفرج بالتلفزيون...دك تلفونه...
كعد على حيله...
جاوب وبسرعة بدل وطلع...شكد ردت اعرف منه وين رايح ما كال...
وتستمر الحكاية