متاهات

ألم لا يحتمل

يسعد مساؤكم بالخير والبركة...اعتذر حبايب..بس ماكدر اغير باحداث لقصة هاي واقع مو خيال...
ولازم التزم بالاحداث حتى لو كانت مؤلمة...تحياتي
متاهات
همس ليل
البارت الرابع عشر
ظليت انتظر على نار..دكيت على هشام جاوبني
_ماكو شي... اني ارجع اخابرج...
رجع متأخر...كال ماكو خبر...
بس شكله حيل ضايج...
كعدت نص الليل هو ماكو بمكانه....
طلعت اشوفه وينه...جان كاعد بالصالة يدخن...
وشكله مهموم...استغربت شبيه...
اجيت كعدت يمه وخليت ايدي على فخذه...
_شبيك هشام...صاير شي
انتبهلي...ومد ايده طفى الجكارة بالمنفظة...
جر راسي لحضنه...وباسني من راسي...
وظل يمسد على شعري...
_هشام جاوبني...
تنهد ...ماكو شي لسة ننتظر خبر
_مهند
_اي
من كال هيج راسا فزيت وسحبت نفسي...
كعدت مقابيله...خابروك بالليل علموده
هز راسه ب اي
_دحجي شكالوا...ومنو ذولة
_جماعة عرف وسطتهم...كالوا مو من ضمن الي خلوهم بالسجن...
_لعد شنو ...وينه وماكو اي اتصال...
جماعته الي طلعوا وياه وينهم...
باوع علية وبعينه حيرة...
_باجر يرجعولي خبر
_عفية هشام خوما بيه شي
وكف على حيله...ومد ايده...
_كومي نامي عندج دوام ...وان شاء الله ماكو غير الخير
بقيت كاعدة للصبح....وين اكدر انام وكلبي مشتعل نار على خيي
وهشام جان هم كاعد ...حسيت بيه للصبح يتكلب
خاف الح عليه بالسؤال واسمع خبر موزين...
اخر شي كمت توضيت ...
وظليت اقرا قرأن لحد ماطلع الفجر صليت وحاولت ارجع انام...
غفيت وفزيت على حلم...
مهند يطلع من باب بيتنا....
ركضت وراه..مهند وين
التفت علية مبتسم...رايح بعيد
سمعت صوت صياح مال حمام...
التفت اريد اشوفه وين هذا الصوت
من رجعت اباوع على مهند مالكيته
فزيت من الحلم ...وكلبي مقبوض
باوعت هشام طالع....
خابرته...كال شفتج تعبانة ومانمتي الليل كله
لا داومين اليوم...
بقيت افتر بين الغرفة والصالة مثل الي مضيع شي
وادعي يارب عديها على خير ورجع خيي سالم...
للظهر اجى هشام...
وبدخلته بس باوعت لعيونه عرفت صاير شي
جانت عيونه حمر دم...
باوع علية واحسه بيه كسرة...
هزيت راسي استفهم ...صوتي ماقبل يطلع ويسأل
تقرب مني وجرني لحضنه...
واني متيبسة بمكاني....حسيت ريكي نشف
والهوى نحصر بصدري...
سمعت شهكة هشام...
_لا دكول....لا دكول
عددتها اكثر من مرة واني ما اريد اسمع شي
والكلمة كوة تطلع من حلكي...
بعدني عن حضنه...بس بقى لازمني من يدي...
اباوع عليه...هاي دموع تلمع بعينه لو شنو
سحبني بهدوء للمغسلة وغسل وجهي...
_نروح لاهلج ...
_ليش
عقلي مايقبل يسال او يسمع...
_جاوبني ...شكو
_مهند...لكوه
فتحت عيني...اي وينه
_غركانين هو وجماعته
_لا
صحت بصوت يمكن هز البيت...
وهشام لزمني قبل ماوكع بس سحبته وياي للكاع
كعدت واني الطم على وجهي
_جذب كوللي جذب ...
مابي شي هسة يجي...
_كومي حبيتي...اهلج ينتظرون...
ولازم اروح اكمل الاجراءات
_ولك يا اجراءات...
جلبت بقميصه...جان كاعد مقابيلي واني اهز بيه
واصيح...
_وينه مهند ...وينه
لبسني جبتي ولحد.ماصعدني بالسيارة...
ووصلني لاهلي...اني مامصدكة واحس اني بكابوس
اريد اصحه منه مااكدر...
وصلت وشفت هوسة يم باب اهلي...
احس كلبي يريد يوكف من كد مايدك سريع...
نزلني وهو ساندني...
دخلت شفت احمد كاعد بالكاع وهو يبجي ويدك على راسه...
وابوية يمه...وهوسة ماكدر اميز...
دخلت للصالة وتلكني خالاتي وبناتهن الي مكابلات امي...
بعدها مادري شصار فقدت ..
ساعة ابجي...ساعة الطم...
وساعة اظل صافنة عليهم واني مامصدكة الي صار..
طبعا حتة ينقلوهم من تركيا للعراق يراد وكت..
بس بعدين عرفت هشام دافع هواي فلوس
وناس جماعته هناك مساعديه وبدون مايروح ...
دزوا الجنازة بالطائرة...
ماعرفت التفاصيل...ولا يوم سألت...
شيفيد اعرف...هو العزيز وراح
بقينا يومين....لحد ماوصلتنا...
بس ماغمض لي جفن ولا نشفت دمعة عيني...
جنت احس اشتعل نار....
شي موجر بصدري ...ماداكدر اطفي بالبجي
جابوا جنازته...
بلحظتها يلا صدكت...شهكت عليها...
واني احس روحي تريد تطلع...
نمت على التابوت واني احاجيه
_ليش خيي...مو كتلك لا تسافر...
مو كتلك خليك يمنة...
رحت لمنيتك برجليك...
لمن تركتنا....لك خوية كسرت ظهري
ليش هيج...
جنت اصيح واريد بس اطلع الحركة الي بداخلي مايفيد...
حسيت واحد جرني...يريدون يشيلون الجنازة
التفت شفته هشام...
_هشام لك هذا مهند ليش تخلوهم ياخذون...
مو ادكول خويي وصاحبي...
ماحاجاني بس شفت دموعه...اي دموع جان ينزلن على خده...
انطاني لبنت خالتي لزمتني...
ومن شفتهم رفعوه ظليت اكمز بمكاني مامصدكة...
ماعرف شسوي...طول الفاتحة ماغمضلي جفن
ولا بطلت بجي...والاكل تركته...
اخر شي وكعت من طولي...
وبنت خالي دكتورة شكلتلي مغذي....
وبالليل اجاني هشام للغرفة...
جان شكله تعبان...وتحسه مكسور حتة اكثر من احمد اخوية...
من طب طلعوا بنات خالي...
وكف يباوع علية واني مددة والمغذي مشكل بيدي
_ليش دسوين هيج...
مهند بس عزيز عليج...
من جاب اسمه...رجعن الدموع يصبن وحدهن
كعد يمي...وين ايمانج...وين صلاتج...
هذا كله امر الله...شراح يصير من تسوين هيج
ماجاوبته...
_صبا لخاطر مهند ...صيري قوية...باعي امج راح تموت...
لو ابوج الي نهد حيله....
غير يتقون بيج وباحمد..
ظل يحجي ويشجع بية...
واني ولا يمه...
طلع...وبنت خالي ضربتني ابرة مسكنة...
كعدت الفجر شفت خالتي اتصلي...
جانت كلش مؤمنة وملتزمة...
من خلصت صلاة وشافتني كاعدة اجت يمي...
_خالة...مايصير هيج...انتي داتكفرين
الي يعترض على قضاء ربه...
ومايتقبله...نوع من الكفر...
لعد شنو فائدة صلاتج..
اذا هيج حالة جزع عندج...
كولي ياالله واستغفري ربج...
كومي صلي واقريله قرأن...
شافت ماجاوبتهة...
انتي ماتحبيه...تحبين نفسج..
فتحت عيني عليها...
_اي لو تحبيه صدك...جان مأذيته
هو راح شهيد ...الي يغرك يعتبر شهيد
المفروض هسة ماتركين القران من ايدج...
وتوكفين بفاتحته...
وتقومين بواجبج...مو كاعدة تعاندين بنفسج وماتاكلين...ودكين وتطلمين...
شراح يسويلج هالشي...
يرجعه ...لا...على الاقل اخذي اجر من صبرج
عافتني وراحت وظليت افكر بحجيها...
صدك وين صلاتي واني هيج جزعت...
شسويت رجعته ...
باقي الفاتحة كمت اكل شوية من يجبروني...
خالتي وزعت اجزاء قرأن...نختم
واني كاعدة...تخلي جزء بيدي...من تشوفني اسده
يعني خلصته...
تاخذه وتخلي جزء ثاني...
وهكذا من الصبح لليل...بحيث بالليل عرفت ختمت القران....حسيت هدوء غريب نزل على صدري..
هبة ماعافتني طول الفاتحة...
ومن بديت اصحى ...كمت استوعب الي حولي
شفت ام هشام موجودة...وعرفت من هبة
طول فترة الفاتحة هية هنا...
وفجأة سمعنا صوت...وشفت لارا دخلت..
لارا...بعد زواجها كضتهة ترجع فترة وتسافر...
من دخلت تبجي ومنهارة تلكتهة امها تريد تسكتها
حسيت بحقد وكره غريب عليهن...
ردت اكوم من مكاني...بس هبة لزمتني
كالت لا تسوين مشكلة...
بعدين امها اخذتها وراحت...
بقيت اسبوعين يم اهلي...
هشام جان يجي يشوفنا...بس ما احجي وياه شي
كم كلمة وهاي هية...
امي وابوية كام يحجون علية...
رجعي لبيتج وكليتج...
وهشام هم اجى كال كافي...
رجعت وياه...بس مو صبا القديمة...
اكو شي انكسر بداخلي...
ونمى داخلي كره وحقد على اهل هشام
حتة هشام كمت اكره شوفته...
واذا حاول يلزمني اشمئز من لزمته...
جنت احس همة السبب...
رجعت اداوم بس احس نفسي بغير عالم...
ماتت الضحكة بداخلي...
هشام تركني براحتي غركانة بحزني...
كام يطلع من الصبح...ومايرجع الا بالليل ...
ومن يحاول يسحبني لحضنه بالليل...
اسحب نفسي منه...
مرة مرتين وبطل...
سمعت حجي خالتي...من اختنك واحس بالضيق
اقرأ قرأن...
طلعت الاربعيين...ومن رحت وشفت كبره
تمنيت اموت بلحظتها واندفن بصفه
مر شهرين...واني على وضعي...
ام هشام خلال هالوقت التهت وية لارا...
عرفت جانت حامل وطرحت...
وفترة نامت مستشفى...
يوم رجع هشام من الشغل...
غسل وطلع...جنت كاعدة اقرأ علة القنفة
بعد ماهملت دراستي...
اجى كعد يمي...
مد ايده على رجلي...
راسا فزيت وسحبت نفسي
_صبا مو كافي عاد
_هو شنو الكافي
_كافي عازلة نفسج...
اعرف بيج متأذية...
بس خلينا نشارك حزنا...
احجي وياي...
صار شهرين ماحاجين سوة اكثر من كلمتين لو تلاثة
رجعي كعدي يمي...
حتى نكدر نجاوز الأزمة سوة...
_نجاوز...ونكدر...
ليش انتوا هم مقهورين
فتح عينه بصدمة...
_ليش لعد
وكفت...ليش...لان انتو السبب...
انتو خليتوا يسافر...
تكبركم...وغروركم وجشعكم...
وكف وحسيته صار عصبي
_انتو انتو...منو احنة...
وبعدين لوما ادري بيج مقهورة...
ومتأذية جان صار لي غير كلام وياج...
عافني وراح...
الايام جانت تمشي بطيء...
البرودة بعلاقتي بهشام وصلت اعلى درجاتها
ورجعت امه للبيت...
مرة نزلت اريد اخذ شي من المطبخ
_كولي... اسألي
_عن شنو
_حماتج...مو طرحت...ودخلت بالمستشفى...
_حوبت المسكين راح بسببها
_تشمتين
_اللهم لا شماتة...بس ربج مايضرب بحجار
_لج شلون عين صليفة
جنت داخذ ماعون واكفة اصب اكل من الطباخ
وهية واكفة اباب المطبخ...
التفت عليها...
_مو بصلافت عيونكم...
مشيت وصلت يمها...وقبل ما اطلع
_ان شاء الله ربج مايضيع حقه...
ولا يسعد بنتج ولا يهنيها...
مثل ماورطته وعافته
رفعت ايده تريد تضربني...
بس رديت ايدها...
_يوم لج وتبين حوبته ...
_لج شلون لسان سليط عندج صاير
_مو عبالج صبا القديمة الي جانت تسمعلج وتسكت
لا....
دير بالج بعد ...
عفتها وصعدت...واني متعجبة من نفسي...
بالليل...ومن طبت الباب...عرفت وصلتله الحجي
دخل للغرفة عصبي..
واكفة اصفط ملابسي بالكنتور...
ماخفت ولا نهزيت مثل قبل...
احس نفسي بايعة ومامشترية عشرته
_صبا شنو هالحجي...
باوعت عليه...ياحجي
_تعرفين عن شنو اقصد
سديت باب الكنتور...والتفت عليه
_لا ماعرف شتقصد...لان ماعرف شنو وصلتلك
جرني من ايدي حيل
_مو كتلج لا تجاوزين على امي
نفضت ايدي منه...
_خليها تعوفني بحالي...
شفته متفاجأ...شبيج..شصارلج
شنو يعني اذا طلبت منج تسألين على حماتج
_لا تطلب ولا تسال...
تعرف ليش...لان اكره اختك وامك
جنت واكفة بتحدي له...وبداخلي نار اريد اطفيها...
بقى صافن علية ومصدوم...
واول مرة عاجز شيسوي...
تركني وطلع...وبقى كم يوم ينام بالصالة...
ما اهتميت...بالعكس..
وجوده يمي على الجرباية جان يقرفني...
قربت الامتحانات النهائية ...
والبعد بينا زاد...كمنا كلما نلتقي نتعارك على اتفه الاسباب..
اذا مالكه قميصه مغسول يتعارك...رغم اكو غير قمصان
كام يريد الا اني اسوي عشى...
ومن اسوي لازم يلكه شي ينتقده...
وامه بعد الصار... كامت مو هلكد تركز وياي
خاصة ادشوف علاقتنا متوترة اني وهشام
مرة رجعت من الكلية ميتة حر...
فتت راسا للحمام...
وادري هشام مايرجع هسة...
طلعت لافة منشفة...وتفاجأت هشام كدامي
شفته ظل يباوع علية ...
وعيونه تحوم حول جسمي...
تقدم علية ...ونفس اللحظة جرني من خصري لحضنه
خليت ايدي على صدره احاول ابعده
وهو شفايفه تمشي على وجهي...
حسيت كل قبلة نار تجويني....
دفعته...ابتعد وهو يباوع علية...
_شلون صبا ...ليمتى تبقين هيج
_مااطيق لمستك...
عفته واكف مصدوم من حجايتي ودخلت لبست ثوبي...
دخل وراي ....شنو تقصدين
_مثل ماسمعت
_نسيتي انتي زوجتي ...وعندي حقوق عليج
_هاي كل الي تفكر بيه
جنت احجي وظهري له...
دارني عليه...صبا شفتج ساكتة وعازلة نفسج
بقيتج براحتج ...كلت حزينة خليها تعدي هاي الفترة حقها...
ردت اتقرب واحاول اخفف عنج ...بعدتيني عنج
حاولت الفت انتباهج بكل الطرق وخليج تنتبهين لبيتج مافاد
شتريدين صار اربع اشهر هذا حالنا...
مهند مو بس عزيز عليج....
مو بس اخوج...
جان اخوية وصديقي وسندي اكثر من اخوتي...
_خوش صديق واخ دزيته للموت
_شتلغين انتي...شلون دزيته...
مو شفتي جان مصمم يسافر
_ليش مصمم....مو الخانم اختك عشمته وبعدين شافته مو مناسب ومراح يعيشها بنفس مستواها
مو لان حضرتك شفته مو لائق باختك
هزني حيل وهو لازمني من زندي...
_كافي عاد...لا تجيبين طاري البنية وتتهميها...
انتي ماتعرفين شي..
_وما اريد اعرف...
هية بعد ماتسوة راح الغالي
هدني ...استغفر الله...
لج بابا ناره بكلبي....وكلنا متأذين عليه...
بس الحياة تستمر...قابل نعترض على امر الله...
_حياتكم تستمر صح...
لان مو الالم الي هنا موجود عدكم...
جنت أشر على صدري ويدي ترجف...
دموعي تنزل وتغسل وجهي....
_هنا وجع...نار ماتقبل تطفىء
هنا هشام ...ادك على صدري...
كعدت على الجرباية وخليت وجهي بين ايدي...
حسيته كعد يمي...وحاوطني بيده...
_ماداعرف شلون اريحج...
اخذج ونسافر....شنو تريدين...
كوللي فهميني...شلون اخفف عنج
رفعت راسي له...
_تريد تريحني صدك
_وغلاتج اي شي اطلبين
_طلكني
نزل ايده والصدمة بينت على وجه...
بقى ثواني يباوع بوجهي عبالك يريد
يشوف صدك داحجي لو لا...
وكف...راح اعتبر نفسي ما سمعت الحجاية
امتحاناتج قربت...خلصي ولنا حديث ثاني...
الاسابيع الي تلت...
شفت هشام يحاول يكون قريب وبعيد بنفس الوقت
جان يجي المغرب...
ويحاول يتعشى وياي...يفتح مواضيع للحديث
بس يلكة اجابات مختصرة مني...
مامل..يسهر وياي واني ادرس للامتحانات
كام هو يوصلني للكلية ويرجعني...
كم مرة راد نطلع نتعشى برة....بس ماقبلت
امه من شافته هيج...
رجعت لاستفزازها...
من انزل لازم تسمعني حجي
_وين عايشين بيازمن وتبقين لابسة اسود
_بزمن الي قلت بيه الرحمة
لو تبسمرني على فلانة حبلت وانتي بعدج
لازم مابيج بعد خلفة...
واشكال لازم تلكى شي من انزل...
اني هم كمت ما اسكت اجاوبها...
لارا اخذها رجلها سافر للاردن وكعدوا هناك...
خلصت امتحاناتي...
وكام هشام يريد حقه...
ورجعنا للمشاكل والعركات...
بس مو بيدي جنت ما اطيقه ولا اطيق البيت
من ادخل من الباب احس واحد يخنكني
يوم رجع للبيت..واحنة كاعدين على العشى..
_ليش مانطلع لتركيا ...شوي نغير جو
_مالكيت غير تركيا...
_وين تردين مو مشكلة
_ما اريد اروح لاي مكان
كمت ..رحت دخلت للغرفة..
اجى وراي...صبا يكفي عاد...
خلينا نعيش حياتنا...اني هواي تحملتج
_محد طلب منك تتحمل
_يعني شلون فهميني...
_كتلك طلكني وعيش حياتك
_هية لعبة ...اطلكج...واعيش حياتي
بدون ما احس جرني باتجاهه...
ولزم راسي من ورة يثبته...
وايده الثانية حول خصري...
جانت شفايفه ادور استجابة ...وهية تقبل
وتفنن بقبلاتها...
حاولت ادفعه واجنب قبلاته...
بس هو جان مصمم...
دفعني للجرباية...
من انتهى...حاول يسحبني له ويحضني...
عفته...ودخلت للحمام...
جوة الدوش جانت ادموعي تختلط وية قطرات المي
ماعرف شبية...
بس ما اتقبله....
ثاني يوم كعدت لكيته طالع...نزلت جوة
داسوي ريوك...
_مافهمنا من باب الاسود ماتنزعيه...
ومن باب تريدين اطلعين تتونسين
_وين اطلع اتونس
_لاتغشمين نفسج...مو راح اطلعون لمصر
_منو كالج....هشام
_اي...يلا ياخذ بيج أجر خطية...
ركعت الكلاص بالسنك...
_الاجر يكون بيج...اذا وداج ابنج لدكتور يشوف حالتج
صعدت فوك...ودكيت على هشام
_هشام تعال
_خير صار شي...عندي شغل
_هسة تجي ماعرف
سديته واني اغلي...
صح مرات حجايات اكبر من هيج تحجي..
بس ماعرف صايرة ما اتحمل...
نص ساعة وهشام يمي...
_شكو شبيج...انكلبت الدنيا....
وحدة تخابرني تبجي...
والثانية تامرني...
شبيجن ...الضراير مو هيج
_ماعرف شوف صرفة وية امك
_يعني شنو اشوف صرفة وية امي...
عدلي حجيج
_اني احجي عدل...كول لامك تعدل حجيها
تعصب...وتقدم علية حسيته يريد يضربني
_صبا لاتختبرين صبري هواي...
لا تنسين هاي امي...
غصب عنج تحترميها..
_لا مو غصب...الاحترام المقابل هو يصنعه لنفسه
واني امك ما اطيقها بعد...
يا اخي مااطيقكم....داحس خانكيني...
مااتحمل شوفتكم....
جنت اصيح ...وهو واكف يباوع علية
نظرته غريبة ...صدمة ...عدم تصديق
غضب...بس احسه عاجز يصرف وياي
_ماداعرفج...شنو هالانفعالات...
هالحقد والكره....
وين صبا الطيبة...وين الحنية راحت
وين عقلج الجبير
_خلاص بح...صفكت بيدية
بح راحت وية روحت الاعزاز...
كتلها طمع امك...
كتلها عجرفتك...
تباوعون للناس من قصوركم العالية...
عبالك الله خلقكم بس انتو...
صاح بية...وبنفس الوقت لزمني من زندي
كافي صبرت عليج هواي....
بس لهنا وكافي تماديتي...
_طلكني وارتاح ويريحني
_ماطلك...حلم تحلمين..
دفعني ويريد يطلع...
_ماعندك كرامة...صحت براه
التفت وعيونه اطك شرار
_شنو ولج
_داكولك ماعندك كرامة...وحدة ماتريدك ليش مجلب
اقترب علية واني متوقعة راح يضربني ...
وفعلا اجاني راشدي طرش أذني..
_انت طالك
لمي هدومج ....
طلع واني كعدت على الجرباية ويدي على خدي...
دموع ماعندي جفت بعد...
كمت اخذت جنطة ولميت ملابسي السود بس...
نزلت....شفت امه واكفة بالصالة وبعينها نظرة شماتة
_مو كلنا من البداية...
ليش ماسمعتي الكلام
ينتظرج بالسيارة حتة يرجعج لاهلج
باوعت عليها...شجاوبها...انسانة مريضة
بس بداخلي من ودي اكطعها واطلع كل نار كلبي بيها
طلعت ولكيته كاعد بالسيارة
صعدت...وساق سريع بدون كلمة ...
وصلني...نزلت هو جان مخلي ذراعه على الستيرن وعيونه تباوع لكدام...
ذكرتني بمرة سابقة هالكعدة...
بس نزلت جنطتي ...انطلق بسرعة كبب ترابة وراه
واني بقيت واكفة بنص الشارع وعيوني وراه...
حسيت هاي نهاية قصة من الاصل بدت غلط...
....وتستمر الحكاية