متاهات

خطوبة

يسعد مساؤكم...اعتذر للتأخير الصار بس النت ثكيل ومايحمل ..متابعة ممتعة

متاهات
همس ليل
البارت الثامن
_عرضي يقدم مرة وحدة بس...
قريت المسج واني مصدومة....
هزيت راسي ورجعت قريته...
شكد حقدت عليه...وشكد انقهرت من جوابه...
على الاقل جان جاملني....
كالها بغير اسلوب..بس مايكون هشام اذا مو يحجيها بهالطريقة...
حسيت رطوبة على خدي...
رفعت ايدي اتلمسها....دموع
شوكت نزلت...وليش...
الي مايريدني ما اريده..
بس هذا حجي لسان...
احس الالام يدك بكلبي....
عيني ما اخذت نوم للصبح...
ثاني يوم داومت واني تعبانة...
عيني ادور عليه كلما اطلع من محاضرة...
ومن طلعنا خارج الجامعة...
عيوني ظلت تفر بين الناس...
بلكت اشوفه جاي...
جنت اتأمل المسج مال بارحة نكتة....
او نوع من رد الاعتبار لان رفضته اول مرة...
بس بعد اسبوع من الانتظار والتأمل...
عرفت كان قاصدها....
تعبت نفسيتي حيل...
وكمت ماركز بقرايتي...
اكو وجع بداخلي ماكدر اوصفه بالكلمات...
بعد الاسبوع الثاني...
اتخذت قراري...
يكفي عاد ما اخليه شي يكسرني...
حتة ماوضح وشرح...
ليش مو من حقي يشرح...
شو هو خبص الدنيا حتى يعرف سبب الرفض...
لو هو ربه وحد....استغفر الله...
شجاني...
كمت كل ما احن له واشتاق...
افتح المسج...اشوف نفسي شلون هاني....
مر شهر تقريبا...
حتة لمهند كام مايمر...
ولا مهند يجيب طاري له...
هو مهند خطية وين شايفته....
اشو يركض اربع وعشرين ساعة...
جنت بكل صلاة فجر الي ما افوتها ابد...
ادعي لاخوية ربي يريح باله...
البارحة ماترك احلامي هشام...
وشكد.حاولت ابعده عن فكري مافاد...
غزاني شوق غريب له...
من دوامت اليوم...وبعد المحاضرة الثانية...
طلعت واني مدنكة واحاول اركز وية البنية الي تحجي وياي...
فجأة سمعتها دكولي
_صبا...هذا الولد الي دائما يجي عليج
_شبيه..
_واكف ينتظرج...
من كالت هالحجاية...
حسيت رجلي ثكلن...كامن مايحملني...
وكفت بمكاني ورفعت راسي...
فعلا جان واكف نهاية الممر...
بقيت اباوع عليه...وهو هم...
بس تعابير وجه ما ادل على شي..
_صبا شنو فلمه هذا الولد...
نكدر نكول الحب...
التفت عليها...
_اقاربي واخته بكلية العلوم يجي عليها...
وبطريقه يمر يشوفني شمحتاجة...
عفتها ومشيت باتجاهه....
من وصلت وكفت مقابيله....
نظراته حامت على وجهي....
_ممكن اعرف شعندك هنا
_الناس تسلم اول....
_استاذ هشام....رجاء جبتلي حجاية بالقسم....
ما اريد بعد تجي هنا...
صفن بوجهي..
عفته ومشيت...سمعت صوته حجى بعصبية...
بعد خطوتين من مشيتي
_اوكفي...وارجعي هنا
وكفت واني متفاجأة من طلبه...
لا مو طلب جان أمر....
التفت عليه....لا ابالك اشتغل عندك..
_صبا ارجعي هنا واسمعيني...
لو تعرفين شغلج...
باوعت حولي كومة طالبات....
غير طلاب غير كليات...
على شنو اسويلي هوسة يتغنون بيها...
هذا تفكيري بلحظة صار...
رجعت مقابيله....ما شبعت تهديد كل ماتشوفني
_والله طالعلج لسان...
_استغفر الله....شتريد هسة
_خلي نطلع نتفاهم...
_ما اطلع خارج الكلية...
_خلص امشي نكعد بالحديقة ...
رحنا كعدنا على مصطبة ....
بدت المحاضرة...فالموجودين قلوا ....
بقى كم نفر...
كعد بصفي مسافة قريبة...
جنت اباوع كدامي ما التفت عليه...
_باوعيلي...
التفت عليه...خير شرايد
_هاي ثاني مرة دكوليها....
سكتت...
_ليش هالجفى اليوم...هاي مو كان الحمد لله على السلامة...
فز كلبي...خفت لا جان مريض...
_ليش شبيك...مو هياتك كدامي
_ليش ماتدرين جنت مسافر
_اها...حمد لله على سلامتك
_شو اتكوليها من ورة خشمج...
التفت عليه بعصبية...يعني شلون بلة من ورة خشمي
جان يباوع علية بتفحص واكو بسمة بعينه...
ربكتني نظرته....بعدت نظري..
وبديت الف حزام الجنطة على ايدي
جر الجنطة من ايدي...
_مالها ذنب الجنطة...
ليش متوترة...
_مامتوترة....هسة ماكلت شتريد
جر نفس....ليش دزيتي المسج..
من كال ذكرني دنكت واني حيل مقهورة منه
_جاوبيني صبا....
وكفت ...دزيته لان عدت التفكير وعرفت اسباب الرفض مو قوية كفاية...
وانتة سحبت عرضك...
خلص انتهى الموضوع...
_اكعدي...مو كلت اكعدي
_ماكو بينا بعد كلام
_ لا اكو...لا تصرفين مثل الجهال...
اكعدي وخل نتفاهم..
رجعت كعدت...
_هسة اريد اعرف شنو سبب رفضج اصلا
ما سمع مني جواب...بعدين فكرت خلي اجاوبه
حتة نسد الموضوع بعد...
_ماقبلت لان شفت الفرق بينا جبير...
_اي فرق
_الفرق المادي...
طبعا جنت احجي واباوع كدامي ما اباوع عليه
سمعت تنهيدته...
_باعي علية ....
التفت ...
_شوفي عمرها الفلوس ماتقيم الانسان...
واني لوما اشوفج مناسبة لي ما اتقدم...
هذا زواج مو لعبة...
فهمتيني...
بقيت اباوع بعينه من يحجي...
جنت اتمنى يكول اختاريتج لان احبج...
مو لان مناسبة...
_عموما هسة انتهى الموضوع...
خلص عرفت السبب...
_منو كال خلص
_انتة مو سحبت عرضك
سكت وجهه نظره كدامه...
_اني ابد ما لغيت هالموضوع من بالي...
بس ردت انطيج فرصة ...
_والمسج
_اريد تعرفين شي صبا...
اني ما احب افسر كل تصرفاتي وافكاري...
خليها ابالج ها الحجاية
نرفزتني حجايته...
_يعني شنو قصدك من الي سويته...
تريد ترجعلي الموقف...
_اي مو كدامج طفل ...
يول احجي عدل...
_نرجع هسة شتريد بعد شهر جاي
_اولا جنت مسافر وهسة رجعت...
ماكالج مهند....
_شكو يكولي...
وكف فجأة ...عموما الجمعة يمكم احنة...
_دقيقة هية لعبة لو شنو...
باوع علية صفح ..وهو يفتح باكيت الجكاير...
طلع وحدة وشعلها...
وبعد ما اخذ نفس جاوبني
_هو لان مو لعبة...كومي كملي محاضراتج..
عافني وراح قبل ما احجي شي....
ظليت اصفن الجمعة يعني بعد يومين...
هذا صدك يحجي...
والموقف السواه... وجرح كرامتي...
وامه شراح دكول علية ...
وووو...هواي امور ظلت ادور ابالي...
لحد الخميس بالليل...
من اجى مهند وحجى وياي...
_تعاي صبا احجي وياج...
كعدت يمه على القنفة بالصالة...
_شوفي خيتي هشام كالي رايحلج للكلية
فتحت عيني متفاجأة
_لا تتفأجين الولد ترة رجال بمعنى الكلمة واخو خيته
يعني مايطعن صاحبه...
وادري نيته شريفة...
بس جنت اتمنى تجين انتي تحجيلي..
دنكت خجلانة منه...
_المهم اعرف شنو انتي وشنو اخلاقج...
وادري ماتطلع العيبة منج خيتي...
هسة باجر راح يجون اريد كلمة نهائية حتة ابلغ الوالد...
_مهند ماعرف شكول ...
خايفة..
_من شنو
_هشام صعب ماتعرف بشنو يفكر...
_ماتحتاج تخافين...
كل الي عليج تفهمين شيريد...
عوفي تفكيره...
بسطي امورج تتبسط...
_والفارق بينا...خاف ما اكدر اتجاوزه
ضحك...خيتي شلون ماتكدرين...
اسهل شي عدكم البنات تتكيفون وية العيشة بمستوى اعلى...
يعني فترة وتتعلمين على هاي الحياة
_مو هذا قصدي...
خاف اتعير باجر عكبة منهم
_عفا عليج...ليش الفقر عيب...
_لا هنودي...بس همة ينظروله  هيج
_معليج من الباقين اهم شي هشام...
وهو اختارج ومقتنع...
دخلت امي...يمة اذا يمج الكمر شعليج بالنجوم
ضحكنا...ليش تعرفين
_اي يمة حجالي مهند...ربي يوفقج ...
تستاهلين مايوم تعبتينة ...
بعدها مهند تكفل بكلشي حجى وية ابوية وخابر خوالي لان ماعندي عمام...
واني عايشة بدوامة...
صار الصبح حايرة شلبس...
والمفروض شسوي...
نظفت البيت ...وظليت اروح منة واجي منة...
لحد ب٣ الظهر اجوا...
اني لبست تنورة وقميص وحجابي ومكياج خفيف...
هشام جان جايب عمامه وخواله...
بس النسوان امه وخالته ولارا...
طبعا احنة ماعدنا غير بس صالة وغرفة نوم جوة
وبغرفة النوم خلينا كراسي بلاستك...
امه كعدت يمي...خالة ما اخذتني بنصيحتي
واني لمصلحتج حجيت...
وسكتت...صح ماكالت اكثر من هيج..
بس نبرة صوتها جان يوحي بالتهديد...
قلقني حيل...
باوعت لارا شكد مكيفة وفرحانة...
كتلها بكلبي....حلمكم من سابع المستحيلات يتحقق
طول فترة الكعدة خالته تباوع بتعالي ومعاجبها الوضع...
وبنهاية الكعدة صاحلي مهند حتة اعقد شيخ..
حسيت كلبي راد يوكف..
خلولي كرسي ورة الباب...
سمعت صوت هشام من جواب الشيخ...
حسيت رجفة بدت من رجلي وصعدت للكل جسمي..
امي واكفة يمي...
تقرالي ايات....
الشيخ عاد اكثر من خمس مرات ...
واني مايطلع صوتي...
افتح حلكي اريد اجاوب...
بس الكلمة ماتقبل تطلع...
انفتخ الباب...وفزيت علة فتحته..
_خيتي شبيج جاوبي الشيخ...مهند حاجاني...
رفعت عيني المدمعة له...
دنك باس راسي...اذا ماقابلة ولايهمج نبطل...
هزيت راسي...بكلبي كلت شلون افشلهم..
_لا هسة اجاوب...
رجع عاد الشيخ...قولي نعم وانت وكيلي
كلت بس احسها طلعت كوة...
امي هلهلت ...بس امه بالجذب ماسوت شي
بس كلمة مبروك...
خالته حاجت امه مجاوزتنا...
_اكولج ام حسام...عود كعدة المهر سووها بقاعة
_اي طبعا وين عدهم مكان...
وعيونهن تتلفت على البيت...
شكد قهرني الموقف...
هاي بعدنا بالبداية...
طلعوا....واجى مهند وابوية واحمد باركولي
ماعرف افرح اخذت الي احبه...
لو انقهر من امه...
بعدين كلت ما اخليها تضوجني....
بالليل خابرني هشام...
اول حجاية كالها ...مبروك
_الله يبارك بيك
_شلونج
_الحمد لله
_ليش تاخرتي يلا جاوبتي
سكتت ماعرف شجاوب...
لان فعلا بلحظتها ماعرف شنو صار بية...
_ماعرف هشام بس يمكن طبيعي خجل
_عموما....خلال يومين امي تمر عليج..
ترحون للسوك اشتري النيشان...واختاري بدلة
للمهر...
_ليش وانتة
_عندي سفرة ...من ارجع نعقد محكمة
_مو هسة رجعت من السفر
_صبا اول فقرة لا تدخلين بشغلي...
ثانيا اني مالي خلك سوك وفرة نسوان
ماجاوبت بس انقهرت من اسلوبه...
_اشتري نيشان ثكيل...اني موصي امي
عرفته راد يجبر حجابته...
_مو مهم
_لا مهم...اريد شي مرتب ويسوة
تحتاجين شي
_سلامتك
_الله يسلمج
سد التلفون...واني روحي طاكة...
ماكو كلمة حلوة لوما هسة نخطبنا...
بعدها خلصت الايام بين الدوام...
ارجع بس اتغدة وابدل وتجيني امه اخذتني للصايغ مالتهن...
طبعا مانطتتي مجال اختار...
هية اختارت...صح جان شي حلو وثكيل وغالي
بس اصور مو حبا بية...
اكيد لان وصاها هشام...
ومرة ثانية اجت هية ولارا....
اخذوني اختار ملابس وبدلة للكعدة...
وطول الطلعة جانو لارا تختار لنفسها عبالك هية العروسة...
وامه تختار لي....وتفرض علية
يعني شختار دكول اوي شحاله...
وتختار شي ثاني...
بقينا كم مرة نطلع...كل مرة نفس الفلم يصير
حتة كرهت الطلعات وياهن...
بدل ماكون سعيدة اجهز لخطوبتي ...
اخر شي اخذتني مركز تجميل...
من طبت الظاهر عرف لان مديرة المركز تلكتها
طبعا مثل كل مرة....بدون ما تاخذ رأي
طلبت منها تحفلي وتعدل حواجبي...
من وحدة لوحدة استلمني...
الي تحف وجهي..
بعده وحدة تسوي حواجبي...
لوحدة تغسل شعري...
وحدة تكص وتصبغ...
غير القناعات الي خلوها للوجه...
جنت احس نفسي ضايعة بنصهم...
رجعت للبيت من شافتني امي
_اللهم صل على محمد...
يمة مشاء الله شلون طالعة...
وكفت كدام المراية ...
ماعرفت نفسي....هاي شنو ..
منو هاي ...تغير شكلي الطفولي...
جان باقي بس بدلة المهر...
من اجت تاخذني ..
جنت مقررة ماانطيها مجال تمشي رأيها هالمرة..
اني اختار...
اريد تبقى شخصيتي مستقلة
ما اخليها تخليني تبع لها...
وفعلا من رحنا للمحل راحت كبل ادور بالبدلات..
عفتها ورحت ادور براحتي...
ماعجبها اختياراتي بس اني صممت الي اخذ
الشي الي اريده...
ضاجت كلش...
هشام جان يخابر...ويكتفي شلونج كملتي...
وصى اخذ بدلة حجاب لان القاعة مشتركة..
وهالشي هم زعج امه كلش...
طلعت من المحاضرة...
وبالي مشغول...شو البارحة ماخابرني...
ليش...خاف امه وصلتله شي...
استغفرت ربي...بديت من هسة اتهم
دامشي بالممر وبالي مشغول وماحس الا شخص وكف كدامي..
رفعت راسي شفت هشام مبتسم...
راسا تبسمت وبينت الفرحة علية...
همس...شلونج
_الحمد لله...شلونك انتة...
_زين
_حمد لله على سلامتك شوكت رجعت
_البارحة بالليل...عندج بعد محاضرات لو  نطلع نتغدة
_نطلع...
اخذني لنفس المطعم...بس هالمرة من نزلنا من السيارة...
تقرب مني وكاد يدي...
وشبك اصابيع يده وية اصابيع ايدي...
فراشات رفرفت بمعدي....وشعور غريب
غزة كل حواسي....
لحد ماكعدنا على الميز..
دز اكل ....خلصتي كل شغلاتج
هزيت راسي...وبعدي تحت الاحساس السابق
جنت اباوع عليه وهو يحاجيني...
واكول وية نفسي...
هذا حبيبي وصار لي...
ودي اضمه بكلبي...
_صبا
_ها
_وين صافنة
_هيج...شنو ردت
رفع تك حاجب...
_كتلج باجر نروح نسوي تحاليل ...
وبعدها بيوم نعقد...حتة على نهاية الاسبوع نسوي الكعدة..
_هشام بس الزواج من اخلص الثاني مو
_مو هواي ...ترة تكدرين تقرين وانتي يمي...
عدنا خادمة اندنوسية ماتحتاجين تسوين شي.
سكتت...
_شبيج صبا
_خاف تمل...٣ سنوات هواي
_لا ماامل اني اريدج تكملين...
رجعنا للبيت...واني اتسائل...
شو ماعلق على شكلي...
معقولة ما انتبه على التغيير...
ثاني يوم اخذني للتحليل...
ومن ديسحبون دم مني...اصفريت...
اقترب مني ولزم ايدي...
_تذكرين من انكسرت اصابيع رجلج
هزيت راسي...
هو كام يداعب اصابع ايدي...
_هم جنت وياج ولزمت ايدج...
الظاهر حيل خويفة انتي...
_جرب الالم الكسر وبعدين احجي
ضحك...صفنت على ضحكته...
شكد حلوة اول مرة اسمعها..
_بيش طالبتني...
يلا خلصت الابرة...لو عجبج الوضع...
راسا سحبت ايدي...ووجهي ينطي الالوان...
وصلني للبيت وراح كال عندي هواي شغلان لازم اخلصها...
ويوم العقد راح ابوية ومهند وياي...
وهو اجى وحده...عقدنا وراسا راح
يوم الجمعة جانت الحفلة الي ما اعرف اي شي عنها
كله هو وامه...
بس ماكلف اهلي اي شي...
اني اخذتله حلقة ذهب تسوة...
حبيبي مهند اشتراها ...
رحت للصالون وية امه واخواته...
طبعا بس مكياج..وتسويلي الحجاب...
ومثل كل مرة امه اختارت المكياج واخواته بكل شي حاشرات نفسهن...
يتعاملن وياي على ان ماعرف شي...
من خلصت المكياج ام الصالون ردت ابجي...
جان ابد مالايكلي....
كلتلها امسحي وغيريه..
_لا خالة مابقة وكت حلو طالع...هسة راح يجي هشام  علينا...
_ما اطلع منة بهيج مكياج
_هشام بس يوصل ونتاخر عليه يكلب الدنيا
_هسة اخابره...خلي ياخر نفسه شوي
_والناس الي تنتظر...وبعدين انتة مو اعرف من ام الصالون...
لارا...حلو مكياجج صبا حبي
_مقتنعة بحجيج
سكتت....
_مو من ذوقجج...جاوبتني امه
باوعت عليها...ولا اخليج تخربين علية فرحتي...
حجيت بكلبي....
وفعلا خليتها تغير بعد ماخابرت هشام يتاخر شوي علية...
بدلتي جانت وردي ...لان حسيت هشام يحب هاللون..
بس هم ماسمعت منه اي تعليق...
دخلنا للقاعة وسط الهلاهل والورد الي تنثره الفرقة...
بس شنو عالم ثاني فد ترتيب...
والناس الحاضرة وهمة ولبسهم غير شي
حسيت هذا مو مكاني وحيل توترت..
بس لزمة ايد هشام لايدي...
وابتسامته بوجهي...عبالك حس بخوفي...
خلاني اغير راي ...واخذ عهد على نفسي
احاول اكون كد اختياره...
بس ماجنت اعرف الي ينتظرني...
خاصة من امه عرفتني لبنات صعدوا يباركولنا...
وركزت على وحدة اسمها سالي...
دنكت وشاورتني...هاي جانت المفروض بمكانج تكعد
بس الحظ خدمج...
حسيتها طعنتني بسجين...
باوعت للبنية...شنو من جمال ..
شنو من اناقة...
ليش ما اخذها لعد هشام...
بلحظتها عرفت امه شلون تنزع مني الفرحة..
شكد حاولت اجاهل حجايتها...
بس من تصير كدامي سالي...
تشتعل الغيرة بصدري...
خلصت الحفلة ورجعنا للبيت....
مابعدها الحياة مشت روتين...
هشام الصبح يوصلني للكلية ...
ويرجع الظهر يرجعني...
واقصى شي يلزم ايدي...
ابد ماتجاوز هذا الحد...خلصنا شهر وشوية
على هالحال...
وبدت امتحاناتي النهائية...
مرات جنت اذكر حجاية امه...
واتسائل ممكن جانت حبيبته...
زين ليش تركها حلوة وانيقة وخريجة وبنت عائلة
وارجع استعوذ من الشيطان...
بس من اشوف بروده...
واشوف ابد ماينتبه على اي تغيير اسويه...
ترجع الشكوك تاكل براسي...
خلصت الامتحانات....
اليوم جان اخر يوم..
على اساس هشام ياخذني نتغدى...
بس كال عندي شغلة...
ورجعني للبيت...
دك تلفوني...باوعت ام هشام
_هلو خالو شلونج
_زعلانة منج ليش ماتسالين
استغربت هالشي
_اعذريني خالة ملتهية بالامتحانات...
_زين ليش ما اجيتي اليوم علة الغدة...
موكلتله لهشام عازمة بيت عمه ابو احمد
وخلي تجي صبا...
بنزين ذبت عليه وشعلت النار بيه...
يعني سالي موجودة ولذلك اعتذر عن الطلعة...
_ميخالف خالة على الجايات...
بديت اغلي....النوب ادك عليه مايجاوب
لحد الليل اجى مهند...
تلكيته...
_مهند اشو هشام ادك عليه مايجاوب
باوعلي بنظرة كلها حزن...
حسيت كلبي راح يوكف واني انتظر الي راح يكوله مهند....
وتستمر الحكاية