متاهات

مواجهة وعناد

متاهات
همس ليل
البارت الثالث
رحت ورة مهند واني خايفة لا يكون سواها صدك
وكاله...
_هامهند محتاج شي
_تعاي اكعدي احجي وياج
كعدت واني متأكدة هشام كايله شي...
بلحظتها شكد حقدت عليه...
_شصاير اليوم
اشرت براسي ...شصاير
ماردت استعجل خل انتظر اسمع منه ...
_من رجعتي من المدرسة...
دنكت...واني افرك بيديه ...
_عادي تصير ...ولد تحارش وكفته عد حده
_هو الغلط غلطنا لان نخليج ترجعين وحدج...لوما
هشام مر بالصدفةجان ممكن شيصير..
_ليش شكالك هشام
_كال من اجيت عليك...وصلت راس الفرع وشفت بالمراية ولد ملاحك صبا....
وظل يحجي علية شلون نخليج وحدج ترجعين
_يوميا هبة وياي...بس هالمرة تخربطت
_ميخالف خيتي لازم احد وياج...الدنيا ماتتأمن
هسة خلصت...وبالكلية اذا الله سهل ...اخليلج خط
ترخصت منه وكمت بعد ما اكلت طن هوى ...
وهذا هشام بعد لو يصير روحي بيده ماأعبره...
مرت فترة انتظار النتائج واني كاعدة على نار...
وهشام ابد ماشفته بعد اذا اجى يوم ودخل البيت
أدخل للغرفة ما اطلع الا من يروح
_صبا...وينج
سمعت صوت مهند واني بالغرفة...
_ها هنودي...
_طالعة النتائج...باجر نروح نجيبها
كمت اكمز بدون شعور...دخل احمد
_خبال..مو على اساس راح اطلعين طبية
_جان طلعت انتة لعد
هز ايده وصعد
_معليج منه...المهم اطلعين كلية بيها خير...
ثاني يوم رحت من الصبح على هبة ورحنا للمدرسة
والمديرة تاخرت يلا جابت النتائج...
وكل شوي مهند يدك علية...
_لج هبة ٨٠ معدلي ...الحمد لله يارب
_بالعافية ...اني اذا مانزلت درجتي بالامتحان الي أجلته...يطلعلي ٧٠
بقينا نشوف معدلات البنات لحد مادك مهند كال واكف اباب المدرسة...
طلعت وية هبة
_لج باعي ابو شعلة وياه...
من سمعت هيج اصفريت...اني ماحجيت لهبة
عن الاتصال....
_شبيج صبا...شو ضجتي
_لا ماكو شي عادي
_زين شعجب هو دائما وية اخوج
_مهند من تخرج ديشتغل وياه ...وهمة اصدقاء حيل
راحت هبة واني مشيت باتجاهم واحاول اباوع بس على مهند...سلمت من وصلت وانطيت النتيجة لمهند
_مبروك خيتي..
هشام هم شافها...خوش درجات...مبروك
جاوبته شكرا...
مهند...خلي نوصلج دنرجع للشغل...
هشام ...شراح تقدملها
مهند...تريد تربية...
هشام...شعجب مو قانون
اني بقيت دايرة وجهي...مااريد اجاوبه
مهند...رغبتها تربية
هشام...شكو بيها بالخير مقدما...
وصلوني...وراحوا...
شوكت اخلص منه...عبالك داتعاقب على خطأي..
ودائما يصير كدامي..
بس الغريب...بعد كم يوم تفاجأنا بزيارة مفاجئة
من ام هشام واخته لارا...
اجوي يباركولي على النجاح...وجان جايبين وياهم هدية...
من راحوا وفتحت الهدية لكيتها فستان وردي
طويل طبعا...
ضجت ماعرف ليش...وخليته بالكنتور...
رغم مهند كم مرة سال ليش ماتلبسيه...
كل مرة اكوله شكل
التهيت بعده بالتقديم...ومهند وابوية انطوني كم فلس هدية..
وحتة هم اجهز ملابس للكلية...مبلغ مو جبير..
ولازم ارتب وضعي بيه...
اخذت وقت افتر بالسوك حتة احصلي شي مناسب
خلال هالوقت نعزمنا على عرس اخته رند
بس ماقبلت اروح...لح مهند كتله مو رحت بالمهر بعد
شكو
راحت بس امي...واحمد يشتغل وابوية طلع للكهوة يم اصدقائه...
بقى مهند...اندكت الباب ومهند بالحمام
طلعت دافتحه لكيت هشام كبالي...
_ليش انتي تفتحين الباب...مهند وينه
_وعليكم السلام...الناس تسلم اول
تافف ...وينه اخوج...
_بالحمام....تفضل بالصالة هسة يخلص...
فتحت الباب حتة يفوت
_هيج بسهولة...اخوج بالحمام...وماكو احد...
وتريديني افوت...
التفت عليه مصدومة....هذا شديحجي
_شو صافنة علية...شنو انتي ماعندج عقل...
لو تتعمدين تسوين هيج..
_انتة شنو مشكلتك بالضبط وياي....ليش تفسركلشي يبدر مني بالسوء
_ماشفت غير شي
_شلون يعني
_يعني مو اني الي اتصلت نص الليل...ولا اني الي جنت متواعد وية واحد بالفرع
وباندفاع وحدة نمست بكرامتها وسمعتها...
وبدون وعي...رفعت ايدي اريد اضربه راشدي
لكن هو جان اسرع مني...
لزم ايدي بقوة...حسيت بيها راح تتكسر اصابيعي بيده...
_هالمرة سويتيها...المرة الثانية ماتلومين بس نفسج
هد ايدي...وعافني وراح...
بقيت واكفة بمكاني مصدومة من تصرفي...
ومصدومة من حجيه....
دخلت جوة...واني حيل مقهورة...
مرات تصرف خطأ واحد ..ادفعين ثمنه غالي...
هو شخص واحد بس ليش هلكد مأثر علية رأيه
استلمنا النتائج بشهر السابع....
يعني لحد مايطلع القبول بعد اربع اشهر...
راح ابقى هيج...حتة الفلوس الي انطونياها مهند وابوية ماكفت غير شغلات بسيطة...
والمشكلة اني جنت كلشي ما اشتري...لان كاعدة بالبيت...
وبالدوام زي عدنا...يعني احتاج هواي امور...
صح كالوا بعد نطيج...بس خطية مهند تخرج هسة
وهم يلا يجمع كم فلس لزواجه....
مرة وصلني مهند لهبة...وهاي الطلعة الوحيدة الي
شفت اعلان حاطه محل كوزمتك....
فكرت خلي اشتغل هالكم شهر...استفاد منه للكلية
حجيت وية امي...كالت شكو بيها
وابوية...هم ما اعترض...
بقى مهند...من كتله تخبل
_كل عقلج اخليج توكفين بمحل
_شكو بيها هنودي ...
هو كماليات يعني بس نسوان يجن...
واكو هواي بنات يشتغلن بالمحلات
_وصاحبه مو ولد...وبعدين ليش تشتغلين
محتاجة شي
_اساعدكم اشيل نفسي
من اتخرج مو راح اقدم على تعيين...
_اي موظفة فرق...مو توكفين محل عرضة لحجي الرايح والجاي...
وبعدين منو مشتكيلج ومتعاجز منج
_لا تفهمها هالشكل...
زين ميخالف...دورلي على شغلة كاتبة يم دكتورة
لو اي شي مناسب
_ماكو شغل سدي الموضوع
عافني وراح....وهو ضايج...لثاني يوم بقى مغثوث
مني ...
بس فجاة صاحني بالليل
_مو جنتي تريدين تشتغلين
اني كيفت..اي هنودي الكيتلي شي
_اي هشام محتاج احد على جرد الوصولات...
يعني وياي بس انتي تبقين بالمكتب تسجلين الوصولات...
اني راسا نعقجت...وين ما اروح وراي
_لا مهند ما اريد
_ليش
_انتة مو جنت معترض على شغلي ....شو النوب راح تخليني بنص الزلم
_شنو هالحجي صبا...شايفتني ماعندي غيرة
_لا والله خوية مو قصدي...بس مو المعمل كله ولد
_اولا المعمل بيه قسم نساء وقسم رجال...
ثانيا انتي مو بالمعمل ...انتي بالمكتب...
وبيه موظفين وموظفات...صح مو هواية ...
والاهم وياي راح تكونين وية هشام
كتله بكلبي هية هاي المشكلة...
_لا مهند ما اريد منية احد...ليش كتله اصلا
_منيتيش...هشام بالشغل مايعرف ابوه...
وبعدين ماكتله ...جنت ضايج وسألني وكتله على فكرتج...
هو البنية الي جانت تسجل ازوجت وبطلت...
وصار مدة يدور على شخص ....
_ميخالف ما اريد....
_شنو السبب كوليلي...
ظليت ساكتة ماعندي عذر...
_عموما براحتج...بس لا ترجعين دكوليلي اريد اشتغل
من راح امي كالت شكو بيها...
على الاقل اجمعيلج كم فلس للدوام...
واخوج وياج...
بس ما اقتنعت...خليني على كم حاجة الي اخذتهة
واشوف ابوية بعد شكد ينطي ...
امشي اموري بيها وهاي هية...
ولا اروح جوة ايده هالمغرور...
بس الظاهر هو ماقابل يعوفني بحالي...
لو ادري شيريد...
لليل دك موبايلي...باوعت رقم غريب...بس نفس رقمي..
الاختلاف اخر رقم بس ...استغربت وماجاوبت
اجاني مسج من نفس الرقم افتحي خط اني هشام
كلت ما اجاوب...وفعلا دك خليته صامت وماجاوبت
رجع دك مرة ثانية..
هالمرة جاوبته...ردت اعرف شيريد
_ليش ماتفتحين خط...
_خير رايد شي
_عدلي اسلوبج بالحجي
_استغفر الله.....هسة مخابرني حتة تحجي علية
_ليش ماتقبلين تجين تشتغلين بالمكتب
_ما احتاج صدقة من احد شكرا
_يا صدقة...اني محتاج احد يسجلي وانتي تريدين تشتغلين...
_بطلت ما اريد
_بطلت لو جنتي تريدين تاخذين راحتج...
رتبي امورج باجر اداومين وية مهند
سد التلفون واني اغلي....
هذا من كل عقله ....شنو هالتسلط مالته
لو يموت مااروح اداوم يمه....قابل شيريد يسوي...
جان الموبايل بيدي...باوعت عليه...
زين ليش رقمه يشبه رقمي...
معقولة التلفون والسيم كارت منه لذلك عرفني من خابرت....
******
مهند....
_لارا من أداوم صبا امر عليج للكلية
_شنو مااشتاقيتلي
كالتها بزعل
_ما اشتاقلج ...شدحجين....احس روحي راحت وياج
وعافتني باخر مرة شفتج
بس عيب من اخوج صاحبي اشوفج برة الكلية
_يعني نبقى بعد ٣ اشهر مانشاوف ترضاها
_ميخالف حبيبتي...نتحمل ...ان شاء الله بس تخلصين الثالث ...اكون جمعت كم فلس ...
واتقدملج...
ولو خايف لا ماترضى امج....
_لا تخاف امي تسمع كلام هشام...وهو يريد خاطرك
اكيد مايرفضك
_بس الفارق جبير لارا...راح تكدرين تتحملين ظروفي
_ليش دائما تعيد نفس الموضوع.....انت عندي تسوة
كل مال الدنيا...
لو خاف انتة غيرت رأيك...
_لج شغير اكو واحد يستغني عن كلبه...بس اني جنت متأمل اتعيين...
_لاتكمل ان شاء الله تتعيين ...يلا حبيبي امي اصيحني
سديت التلفون وياها...
كلما نتخابر تنطيني دفعة امل لباجر....
ابد ما انتبهت لها بيوم شكد جنت افوت لبيت هشام
بس ما فد يوم رفعت عيني على وحدة من اخواته
ولا اعرف وحدة من وحدة...
لحد يوم هشام خابرني كال تعال وياي للجامعة
نقدم لاختي....
هو مايندل بالجامعة....هشام من الاعدادية يشتغل وية ابوه...ودخل معهد بس حتة يكون عنده شهادة
جنت اني صف ثاني كلية...
ولارا نقبلت علوم ...
يعني قريب على كليتي...
رحتلهم يم البارك....واول مرة انتبه لها...
كملت التقديم لها....وسجلت الاقسام حسب مارادت
جانت من تحجي بنزاكة والراء تلفضه غين...
بعدها طلعلها قسم بايو...
هشام وصاني عليها....فجنت دائما امر عليها للقسم
اخاف تحتاج شي...
من غير جنت اخاف عليها من الشباب...
خوب جماعة الهندسة مكابلين البايو
لان اغلبهن بنات حلوات ومرتبات...
ويتقصدون صف الاول لان جديدات وبعدهن مماخذات على جو الكلية...
شوي شوي اخذت كلبي بضحكتها...
بمشيتها من تتهادى بيها....
بنزاكتها بالحجي....
بس جنت اعرف الفارق بينا...كافي من اشوف لبسها
حتة اعرف مستحيل تكون لي....
وغير هالشي احتراما لاخوها....
بقيت اراعيها طول السنة الاولى...
وحتة رقم تلفوني عدها ...من تحتاج شي ادك علية....
بالسنة الثانية....ولان جنت اشبع قهر من اشوفها
واموت غيرة من احس واحد يباوع عليها...
حاولت ابتعد واقلل روحاتي لها...
حتة من ادك علية....اروح اسويلها الي تريده...
وارجع بسرعة....
مرات بالليل اختنك من تخطر ابالي...
واظل اتكلب على نار.....
لحد يوم دكت علية...كالت رايدتك بشغلة...
رحت لقسمها...مالكيتها...دورت لكيتهة كاعدة خلف قسمها...
جانت اكو مصطبات وحدايق هناك...بس قليل يتواجد طلاب
_خير لارا...صاير شي
_لا ماكو شي...ليش هيج خايف
جانت كاعدة على المصطبة واني واكف يمها
_لعد شجابج هنا وحدج
_شبيه هنا...
_كومي نروح يم قسمج ...وبعدين لاتجين اتكعدين هنا
دامشي كدامها
_مهند ...اوكف
التفت عليها...نعم
_شفت مني خطأ
رجعت وكفت يمها...لا ليش
_ضوجتك بشي...
استغربت حجايتها...لارا شبيج
_اني داسال شبيك...
لو خاف ثقلت عليك بطلباتي
_لا طبعا واني كايلج شتحتاجين اني حاضر
_لعد ليش تتجنب دشوفني
ظليت صافن عليها...
جانت تباوع علية بتوسل...ضعت بعيونها الصفرة
كعدت يمها على مسافة من وعيت على نفسي
_شتريدين لارا
_ليش دتحاول تبتعد....عيونك فاضحتك
بس اذا اني غلطانة كولي...حتة لا ابني أمال
جريت نفس....هاي شكولها
_انتي وصية اخوية وصاحبي...وهم اقاربي
_بس هيج
_كومي لارا نرجع
_ما اكوم...لحتة مادكولي
_شكولج
_بس هيج
_اني ما اخون الثقة...ولا اطعن خويي
_الي قصده مو شريف هو يخون الثقة... الي يلعب بالاعراض هو الي يطعن...
_واني لا هذا ولا هذا....
بس الفرق شاسع....والطرق مختلفة
_المهم قصدك ونيتك
_الله اعلم بيهم
_خليني اني هم اعرفها...
_انتي الف من يتمناج...
كومي ....
ردت اكولها خيتي...ماطلعت مني لان احساسي تجاههه مو اخوي
رجعتها للقسم....
بس بعدها ابد مادكت علية بقت اسبوعين...
اني كلت احسن خليني بعيد مادام افتهمت قصدي
بس جانت روحي  لايبة على شوفتها..
اخر شي ماكدرت رحت لقسمها...
لكيتها مامداومة....
صديقتها كالت صار اسبوع مريضة وماداوم
بيومها رجعت والقلق كاتلني...
خابرني هشام كال نطلع وية جماعتنا شوي
وبالطريق ماكدرت الا اساله
_هشام مريت على لارا اليوم اشوفها شمحتاجة
كالوا صار اسبوع مامداومة...
خير شبيها...
_خوش موصيك لعد....ماتدري اصلا اذا اداوم واني معتبرك عيني هناك
لو تعبت من طلباتها...
_لا ...جنت ملتهي تعرف اخر مرحلة السنة...
_حقك....وهية هم تبزع الدب...الله يساعد الي ياخذها
جاوبته بكلبي...خلي تبزع عشيرتي بس ادكوون من نصيبي...
_شبيها
_مريضة ضغطها يهبط وهية تعاند ما تأكل
انسد الموضوع...بس بقيت قلق عليها
من رجعنا....حاولت اقرا عندي امتحان ماكدرت...
ردت انام هم ماكدرت...
ماقبلت تطلع من افكاري....ولا الخوف عليها فارقني
اخر شي لزمت الموبايل ودكيت عليها
جاوبتني بصوت تعبان كلش
_سلامات كالو مريضة
_زين هسة يلا اذكرت تسأل
سكتت ....خيرج لارا...شنو يوجعج
سمعت صوت شهكتها من تبجي...
_ليش تبجين كلبي
كلتها بدون وعي...لان صوت بجيها شعل نار بصدري
_تعبانة منك...ليش تبتعد عني...شسويتلك
_لج ماسويتلي....بس
_بس شنو...مامفكر بية...كولها وريحني
_انتي تعبانة هسة ارتاحي ...
_لا ماتعبانة اخصمها كول ما افكر بيج
بس ذنبي بركبتك...انتة الي علقتني بيك
_اني
_اي ...اهتمامك بية...خوفك علية ...كل ما احتاج الكاك يمي....
ليش أملتني اذا ماتحبني
_احبج اكثر من روحي...
سكتنا اثنينة متفاجئين من الحجاية...
_روحي لارا...وانسي الي سمعتيه
_لا ما انساه...باجر تعال للقسم...
ثاني يوم رحت لقسمها...ردت اصحح الخطأ
بس من شفتها شلون ذبلانة...
من شفت ضحكة عينها لشوفتي...
من شفت لهفتها وهية دتلكاني....
نسيت كل قراراتي...
بس عمري ماخنت الثقة...
ماتجاوزت لو بلمسة ايد...
لو بحجاية ....
بالعكس احاول اصونها....
حتة ما اشوفها خارج الكلية...
صار سنة ...ودانتظر تخلص ثالث واتقدم
واني خايف من ردة فعل امها...
بس عايفها للظروف...
هية الي تحكم...
وتستمر الحكاية...