متاهات

البارت الخامس عشر

متاهات
همس ليل
البارت الخامس عشر
من يوم وصلني هشام قبل شهر لحد الان...
لا خابر ولا سأل...
بوقتها اهلي لاموني....
واولهم احمد....
اعتبروا تصرفي غلط...
وجان المفروض اتحمل امه...
بس المشكلة مو بس امه...
المشكلة بية..كمت ما اطيق شوفتهم...
وهشام بقدر ما جنت احبه...
بقدر كمت اضوج منه واكره لمسته....
احمد كال هو اهلج كوة مشين عيشتهم
حسيته خايف يشيل همي...
بوقتها الليل كله ابجي....واني احس ماعندي ظهر ولا سند بعد مهند....
هالشي زاد الوجع عندي اكثر...
فقدت أماني ...فقدت السند...
الشهر منغلقة على نفسي...
وضايعة بافكاري وبحزني...
يوم اجت هبة علية...
جنة كاعدين على قنفة بالصالة ...
_صبا شلون لشوكت تبقين هيج...
حبيبتي الموت حق ومكتوب علينا....
هسة من يكول ...نطلع منه وتنفجر علينا سيارة
لو نندعم...
ومو هذا كله...مو هسة شباب فجأة بسكتة قلبية ويموت..
يعني هذا اجل انسان مايعرف ساعته...
_اعرف هذا الحجي كله...
بس تعاي قنعي كلبي.
ماتنطفى النار الي بيه...
_باعي اني اقرب وحدة لج...
وادري مهند جان مو بس اخوج...
واعرف حنيته....
بس لا انتي اول ولا اخر وحدة تفقد عزيز...
لو كل واحد يوكف حياته جان الحياة كله توكف...
الله من كتب علينا الموت والحياة انطانا نعمة النسيان...
_ماوكفت الحياة عندي...
شفتيني متت...أكل واشرب وكملت السنة بالكلية
_بس جسد...روحج ميتة....
هذا الي دكوليه روتين...بس وين مشاعرج
واكبر دليل هشام...
مو هذا اول رجل نعجبتي بيه...
مو اول حب...
عفتيه سنة ولا نسيتيه وجان مابينكم لا زواج ولا علاقة...اصلا ما مله عينج غيره...
_هبة احسهم السبب بالي صار لمهند...
هو ..امه...لارا...
جان مقتنع وعايش حياته...حطموا اماله...
جنت احجي وابجي
_صبا حبيبتي...مهند الله يرحمه مو صغير...
ولد شاب...يعني يكدر ياخذ قراره...
حتة لو تأذى...بس هواي يمرون بتجارب صعبة وفاشلة..
ماتكدرين تلوميهم...
حتة لو كلنا لارا وامها السبب بكسرته...
هشام شعليه...
فتحت حلكي احجي...قاطعتني
_باعي صبا..انتي تصرفين بأنانية...
مافكرتي بس بنفسج...
نسيتي مهند وهشام اقرب اصدقاء...
شكد صارلهم...مو كلتي اكثرمن ١٢ سنة..
مو جنتي تكولين دائما سوة...
يعني ما أثر بيه موت صاحبه...
مافكرتي بحزنه...
_بس هذا اخوية
_اي...واحمد هم اخوه...
بس هشام اقربله من احمد
الي اريده افهمج اياه ...هشام هم متأذي مثلج
بس مع ذلك حاول يوكف وياج...
ليش ما نطتي مجال ...
_ماعرف والله هبة....
كمت ما اطيقه...ما اتحمل صوته...
ولا شوفته
شلون اوصفلج...
تنهدت هبة...عموما الله اعلم شصاير شغلتج مو خالية
يجوز نفس عليكم...
بس اريد منج تفكرين شلون تستعيدين نفسج...
يمكن اتشوفيني طربكة واحب الشقة والضحك...
ومو كد انصحج...
بس فكري بكلامي...
حاولي توكفين على رجليج...
وصلتها للباب..
هبة تخرجت قبلي لان معهد...
وصارلها سنة كاعدة حالها حال اغلب الخريجين...
رجعت افكر بكلامها...
والاهم افكر بحالي...
براي رابع...شلون راح اخلص...
ابوية مريض اغلب الوقت حتة المحل مو هلكد يكعد بيه...
والي ينطيه احمد يدوب يمشي البيت...
صفنت لعد علاج ابوية مين...
وبديت اول خطوة ...بعد ماقررت اعتمد على نفسي
بدون ما افكر شنو راح يصير وية هشام...
اعرف خلص ...عزة نفسه وكبريائه مراح تخليه
يتنازل ويحاول يجيني...
او حتة يخابر...واني هم ماعرف...بعدني مامستعدة ارجع...
وماعرف شنو ردت فعلي من اشوفه...
فتحت محل ابوية...ونظفته ورتبته...
طلبت من احمد يخابر المندوب الي جان يجي يذب بضاعة للمحل...
وقبلها داينت من خالتي مبلغ...
مليت المحل بضاعة....
وكفت بيه من الصبح ليل...
جان ماكو بالفرع محل ثاني...واغلبهن على الشارع العام
لذلك الجيران واهل المنطقة اسهلهم يجون من محلنا يشترون...
وبقيت فترة العطلة كلها هيج...
وكل نهاية شهر اطلع مصروف البيت...
واطلع جزءسويت بيه سلفة حتة اسد خالتي...
بدا الدوام...
يعني ٣ اشهر مرت...
هالمرة ما أجرت خط...بقيت اروح بالكيات
حتة اوفرلي من المبلغ...
مو طول الاسبوع اداوم...علمود المحل
ايام الي اداوم اخلي ابوية بيه بس يتعب...
ومرة كاعدة وية كروبنا بالكلية...
وبالفترة الاخيرة...قليل اتواجد وياهم...
جانوا يحجون عن المكياج...
وبالي مو وياهم...بس انتبهت لبنية ويانة اسمها
زينب...
حجت عن محل اخوها...عند جملة بالشورجة
وشلون بعضهم يأخذون بضاعة على التصريف
ومرات يتأخرون...
ظليت صافنة على حجايتها ...
ومن رجعت للبيت بقيت افكر...محل ابوية..
زين يشتغل بس يراد واحد يلزمه طول اليوم..
زين ليش ماافتح كوزمتك...
اني اعرف بالمكياج...من يكول من اتخرج راح الكى تعيين...
بس مين لي راس مال محل..
فكرت بهبة...خابرتها وكتله تعاي..
_ادري مين لنا براس المال...
_اني راح ابيع جزء من نيشاني...
وانتي دبري كم فلس...
نأجر محل ونرتبه
_والبضاعة شلون
_اوصي زينب ...البنية الي حجيتلج عنها..
تعرفنا على اخوها...وهو ينطينا بضاعة على التصريف
_واذا ماكدرنا نسد فلوسها
_كولي ياالله...
وافقت هبة...
واني حجيت وية زينب...
كالت خلي اكوله...
ثاني يوم رجعتلي خبر...
اخوها اسمه سلام يصيحوله ابو علي...
انطتني عنوانه وكالت روحوله بالشورجة...
بس قبل ما اروح لازم ادورلي محل...
وصيت احمد....وفعلا شافلي محل يم صالون
على الشارع العام...ومايبعد هواي عن بيتنا
رحت بعت جزء من ذهبي...
وهبة كملت على المبلغ...هية اخذت دين من اقاربهم
دفعنا سر قفلية للمحل..
وسويناله رفوف وديكورات...هو جان صغير...
واخذت احمد ورحت للشورجة...
لان ما اندل ...دورنا على ابو علي...
ولكينا محله...جان المحل جبير..
وكله عمال...بس من سالت على اخو البنية
واجانه وكتله اني صديقة زينب...
رحب بينا بشكل...
ابو علي جان شاب يطلع عمره نهاية الثلاثينات...
متوسط الطول ضعيف...اسمر فاتح..
صاحبة لحية خفيفة وعيون صفر
بصورة عامة نكدر نوصفه بالوسامة
شخصيته من النوع المريح...
والي تاخذ عليه بسرعة....
ولبق بالحجي ودبلوماسي كلش..
انطانا بضاعة...وفهمنا شلون احمل عليها...
ملينا المحل...واتفقنا وية ام الصالون...
تأخذ منا ونسويلها تسهيلات...
اول شهرين جان المحل كلش تعبان شغله
حتة ماكدرنا نسد فلوس البضاعة...
وابو علي سامحنا...كال يريدلكم وقت...
بعدها ولان بنات نوكف بالمحل...
واسعارنا مناسبة...  بضاعتنا زينة ...
شوي شوي بدة يشتغل المحل....
هبة جانت تفتح المحل الصبح...
واني العصر...ومرات تبقى وياي...
محل ابوية صفيت البضاعة الي بيه...
وأجرناه حتة يساعدنا شوي...
مشت الايام بين الكلية والمحل لحد مامر سنة...
امتحنت وتخرجت...
هشام ماكو خبر ...لا خابر ولا دز خبر...
ماجنت متوقعة غير هالشي...
اعرف طبعه...
صح لوعة مهند بقت بكلبي...
بس بديت اشتاق لهشام...
واكو لحظات تجيني اصفن وية نفسي
الي سويته صح
ام هشام ولارا ابد ما اسامحهم...
بس هشام ليش سويت هيج وياه...
من اذكر تصرفاتي احس جنت بغيبوبة...
ومع ذلك هو ماصدك...
من يوم وصلني لاهلي لا سأل ولا كال...
بيوم جان شهر السادس سنة ٢٠١٤...
صار سقوط الموصل...والناس ضجت...
السوك وكف...واغلب الناس كامت تخاف تصرف الجوة ايديه...
شغلنا حيل
ابو علي ما اعترض الرجل ...
كال براحتكم اعرف الوضع..
جان من اروح اشتري بضاعة منه...
يستقبلني استقبال خاص...
اني شخصيتي تغيرت ...
احس الوكت قواني...وخلاني اعتمد على نفسي
وما اخاف من شي...
احمد قرر يبني فوك وية الغرفة مطبخ وصالة...
كال ابدي على كيفي سلفة ...
بس بالمقابل قلل الجزء الي خصصه للبيت
كال اريد ابني نفسي حتة ازوج...
بيومها بقيت صافنة عليه...
وذكرت مهند...حبيبي جان يركض ليل نهار عمره مافكر بنفسه...
وية نهاية ٢٠١٤...ابوية تأزمت حالته...
وتوفى...موته خلاني اشعر فقدت اخر سند الي...
صح جان اغلب وقته مريض...
وماجنت اعتمد عليه مثل مهند...
بس حسه بالدنيا...
بعد ماطلع الاربعين...
احمد كال ايجار المحل وشغلج كافي عليكم...
اني اريد اكمل الطابق الفوك...وافصله
بيومها بالليل...طلعت لنفس مكان جان مهند يكعد بيه...
كعدت بجيت لمن كلت بس...
مو لاجل الفلوس...لا بس لان حسيته اخوية يفكر بس بنفسه...
وبسهولة ممكن يتخلى عنا...
الصبح من دابدل وكفت مقابل المراية...
اتلمس المدالية الي هدانياها هشام...
هيج هشام صار سنة ونص...
لا سالت لا كلت...هاي وصية مهند لك...
هيج جنت رخيصة عندك وبسرعة بعت....
بيومها رحت لابو علي ادفعله فلوس...
جنت اروحله بس من ادفع...
بس من اريد بضاعة اخابره...
وحدد نوع البضاعة والعدد ويدز مندوب...
بس فلوس لا لازم بيده....
من وصلت ومثل كل مرة ترك كلشي بيده...
واستقبلني ...جان كاعد ورة ميزه واني من الجهة الثانية...
طلعت الفلوس من جنطتي...
_ابو علي....هاي فلوس البضاعة...
واني جدا ممنونة منك هواي تأخرنا عليك
_ست لا تكولين هيج.... جان أجلتيها...
اعرف فاتحة عدكم ومصاريف
_الحمد لله ..رجع شغل المحل زين...
وطبعا ماشكرتك على جيتك للفاتحة...
_هذا واجبنا....بس انتي عليمن جنتي لابسة اسود سابقا...
_اخوية الجبير..
_صارله شكد
_سنة ونص
_الله يرحمه...لازم جان كلش حنين ومابطلتي لبس اسود...
_ماكو مثل حنيته...
اجاه عامل حجى وياه على شي...
_ست ربع ساعة وراجع عندي شغلة وياج..
اني بعد ماطلعت سنة مهند نزعت بس الشال
الاسو ولبست الوان لان خالتي لحت علية...
وباقي لبسي بقى اسود...
بقيت عيوني تتفرج على المحل...
اكو ناس...نسوان وزلم يفوتون يشترون ويطلعون
اباوع على ابو علي شلون يتعامل وياهم..
جان مرن كلش ولا عبالك خير من ربنا عنده
رجعت هاي شبيه واذا حالته زينة قابل يتكبر...
لو ام هشام سوت عقدة عندي...
_ها ست خوما تأخرت عليج...
صحيت من تأملي على صوته
_وين وصلتي بصفنتج
_هنا مو بعيد...تفضل ابو علي ردت مني شي
_ست صبا ...انتي مو خريجة تربية ونفس قسم زينب...يعني خوش قسم شعجب ماتقدمين  تعيين على التربية...
_هية وينها التعينات ...حتة موازنة السنة ماكو...
_زين مدارس اهلية لحد ماتنفتح التعينات..
_يمنا ماكو مدارس اهلية...
_اقرب منطقة لكم اكيد اكو...عموما اني اعرف كم مدرسة راح اشوفلج اذا محتاجين كادر
_ما اريد اتعبك....
_تعبكم راحة...
من رجعت للمحل حجيت لهبة
_وج بس لا حاط عينه عليج
_شيحط ...مزوج وعنده اطفال
_مايمنع...عنده فلوس واكيد من النوع الي يدور ونسة...
_لا لج خوش رجال ومحترم ما اعتقد هالشي
جان باقي على دوام المدارس كم اسبوع..
وفعلا خابرني وانطاني عنوان مدرسة...
كال روحي قدمي اوراقج....
رحت وقدمت وكالوا تعاي باشري بعد اسبوع..
ما صدكت صح اهلية...بس تفيد
ومن باشرت دزلي مسج على الفايبر...باشرتي
جاوبته اي...
كال اطلبج عزومة....
اجى حجي هبة ابالي...
بس كلت هية المرة الي تحدد طريقة تعامل المقابل وياهة...
ومثل كل مرة ...رحت اوديله الفلوس...
وسويت وياي جدر دولمة...
من وصلت تلكاني بأبتسامة...
_مبروك على الدوام...يوم تحصلين تعيين
_ماعرف شلون اشكرك
_ماسوينا شي
_صح مو كد الي سويته...بس هاي شي بسيط..
ضحكت ...هاي عزومتك مال التعيين
خليت جدر الدولمة على الميز...
_من دخلتي واني اتسائل شنو شايلة وياج...
هاي دولمة ريحتها دخلت بخشمي..
_اي...
_شمدريج احبها
_كل العراقيين يحبون الدولمة...
_تسلم اليد الي سوتها...
_عافيات...
طلعت الفلوس ...وتحاسبنا...ومن ردت اطلع
_وين...وجدر الدولمة من ياكله..وحدي
_لا موجودين العمال وياك...مع السلامة
قررت اخفف الروحة...وادز احمد مرات..
صح مرات يتعاجز ويتحجج عنده شغل...
حياتي روتينها عبارة عن....
الصبح مدرسة ..ارجع تعبانة...اتغدى وانظف البيت امي ماتكدر بس تطبخ...
والطابق الفوك...احمد على كيفه يشتغل...
يعني الترابة فوك راسنا ماتخلص...
وادخل انام ساعة..واطلع للمحل...
يعني الحياة عندي شغل بشغل...
اريد الهي نفسي حتى ما افكر...
من يجي الليل...بس اخلي راسي على المخدة انام من التعب....
بس مرات ياخذني الشوك...
واظل اتكلب واذكر ساعاتنا سوة...
اطلع التلفون...وافتح رقمه...
واذكر اول مرة خابرته...وهالشي يرجعني لمن تلاكينة على الدرج...
وذكرى تجر ذكرى...
اكعد الصبح عيني ورامة من البجي...
وصداع يضرب براسي من التفكير...
شكد جنت اكره هاي اللحظات...
جان يوم جمعة...ماكو مدارس...
دخلت للمحل...
_ها مبين ماكو البارحة نوم...
رفعت عيني لهبة...
جانت ترتب بالملابس وعينهة علية...
المحل بشكل حرف Lمقدمته سويناه ملابس اطفال وداخليات نسائية وسيتات
والجزء الثاني...مكياجات...
واشترينة ثلاجة صغيرة...وميز وكرسيين...
خليناه بجز الصغير نتغدى عليه...
رحت كعدت على الميز...
واجت هبة كعدت كبالي...
_اليوم وضعج متأزم
_تعبانة هبة...البارحة ماغمضلي جفن لو لحظة
_صبا...مااكدر الومج...الله يلوم الي يلومج
فقدتي اخوج وابوج...والنوب زوجج لا حس ولا نفس
وهسة شايلة همج وحدج...
بس لازم تلكين لنفسج صورة حل
خليت جنطتي على الميز وياها النظارات...
وسندت راسي ليدي..
_شلكى صورة حل....
قابل ارجع المات...لو اتوسل بالي طلكني
_المات مايرجع...وتبقى بس تترحميله ويبقى بكلبنا
والي طلكج انتي دستي بطنه...
وترة طلاكج مو كامل...
زين هو ابد ماخابر ولا حجى
_ابد
_احمد مايسألج...ماحاول يعرف عنه شي
_الي يسأل ويدور ويستفسر عن احوالي..
صار جوة التراب...
والي بقة حاير بنفسه...
_صبا ..حتة لو ماتريدين ترجعين..
لازم تتصلين بيه وتكملين امورج...
خوما تبقين معلكة هيج...
_ماعرف هبة...اكولج ترة ماكدر اروح ادفع فلوس باجر...
روحي انتي...
_خلي احمد...مو بالفترة الاخيرة هو ديروح
_ماقبل عنده شغل...
_مااعرف صبا...وماندل...وشلون اعرف شكد يطلبنا
_اول شي لازم تتعلمين...تمرضت شلون...متت
اسدين المحل
_اسم الله شبيج اليوم
_باعي اخذي اخوج...واني ادليج هو مايتيه...
واكو وصولات عليها ادفعين الفلوس...
من كصيت بضاعة النوب...سألني ابو علي شو ماكو
كتله مشغولة شوي...
اني جنت اتعامل بس وياه ومحل ملابس ثاني ...
هو عرفني عليه...
ومرة ثاني هم دزيت احمد...
يوم جان عطلة وصلنا للمحل الصبح وبدت تمطر وصارت ظلمة بحيث شغلنا الاضوية....
_هسة منو بجي يشتري بهالمطر...سألت هبة
_شنسوي بعد اتورطنا....
سويلنا كهوة...واني راح استفاد من الوكت ارتب بالمحل واجرد البضاعة...
جنت مدنكة على الرفوف الجوة...وسمعت جرس الباب انفتح...
جنة مخلين جراس فوك الباب...من ينفتح الباب
ويدخل احد تنظرب بالباب من فوك واطلع صوت
رفعت راسي شفت ابو علي كدامي...
تفاجأت...اول مرة يجي..
وبيته مو بمنطقتنا ...ليش جاي...
هاي الافكار كلها اجت ابالي خلال ثواني
_السلام عليكم...
_وعليكم السلام...اهلا ابو علي
_ماتوقعت الكاكم مفتحين بس كلت بلكت
_تورطنا وصلنا وصارت المطرة
_ان شاء الله خير
خلى جدر على جامخانة كدامي...
_لازم تأخذين ايجار عليه...صارله اشهر
لو ماترديه...
_ليش متعب نفسك ...مايسوة...لو جان دازه وية زينب...
_ما اكذب عليج واكول علموده اجيت...
بس هو حجة
انحرجت من حجايته...بس مابينت هالشي...
_ريحة كهوة...بيها مجال تعزميني عليها...
وحتة اكول ليش اجيت
بهاللحظة طلعت هبة...
_وهاي الكهوة خلصت...مو دكولين تاخرت حتة اذب الشغل براسج
ومن شافته سكتت...
_هبة صديقتي وشريكتي بالمحل...
هبة اقدملج ابوعلي
_اهلا وسهلا ...باوعت علية بتساؤل
_اهلا بيج
هسة ست صبا اكو مكان نحجي بيه
_اي تفضل...
كعد على الميز...واشرت لهبة خلت الكهوة كدامه
واجت جابت الفنجان الثاني كدامي ..اني بقيت واكفة ورة الجامخانة...ابقي قريبة شاورتها من خلت الكهوة
_راح تبقين واكفة..
_لا طبعا...سحبت الكرسي الي وراي وكعدت...
هو صار مقابيلي عبر الجامخانة
_هاي خوش فكرة...مال الميز
_اي مرات نتغدة هنا ...لو من يجون معاميل عرف يستريحون...خاصة اذا وياهن امهن
شرب من كهوته...واني كاعد بالي يودي ويجيب
شيريد جاي
خلى فنجان الكهوة على الميز...وباوع علية
_صبا ممكن اعرف ليش بالفترة الاخيرة كمتي ماتجين للمحل...
بدر شي مني ازعجج...
اول مرة يكول اسمي بدون ست...
هاي بداية ماتبشر بخير...
_ابد ابو علي....انتة قمة الاحترام...
بس تعرف عندي دوام الصبح والعصر المحل..
تعب...فكلت على الاقل يشيلون عني هالمشوار
تنهد...ولو مامقتنع بحجايتج...بس راح امشيها...
لان اصلا اني جاي اخصمها وياج
ارتبكت وخفت من راح اسمعه...
وحسيت كلبي كام يضرب سريع
_شوفي يابنت الناس...صار سنة تقريبا من عرفتج
اني اشكال تمر علية نسوان بالمحل...
بس انتي غير...حيل عجبني ثكلج واخلاقج
عجبتني شخصيتج.....
وحتة مايروح بالج لبعيد...
اريد اجي اتقدملج...شدكولين...
فتحت حلكي ...
هواي مرت افكار ابالي...
لكن ماتوقعت هالشي...
_بس ابو علي انتة مزوج...واني هم ترة
_مزوج مابيها شي...عندي امكانية ...وظروف تخليني ازوج مرة ثانية....
وانتي مزوجة ...هم ادري...بس اعرف انتي منفصلة حاليا صار سنتين...والحلقة بيدج تمويه...
حتة تبعدين عنج الناس الي متخاف ربها...
بس ترة اكو هواي يلبسنها وهنة مامقدرات صاحبها
حشاج...
الرك على المرية هية توكف الاخرين باسلوبهة وطريقة تعاملهة...
_طلاكي مو نهائي...وحاليا ماعندي استعداد للارتباط
مو عاد اهجم بيت غيري...
_حتة لو مو نهائي اكو انفصال...
وعندج وقت تفكرين يلا تجاوبين...
وماراح تهدمين شي...ولو ادوخج بس خلي احجيلج قصتي...
وبعدها قرري....
وتستمر الحكاية ....