متاهات

البارت السابع عشر

يسعد مساؤكم....حبايب قبل مانبدي البارت...مااريد ندخل بتفصيل صحة فراق الزوج لزوجته مدة سنتين
لان يختلف حسب المذهب...راح نجاوز هذا الفقرة.
لان بيها اسباب وشروط ..وهنا قصة مو موضع تبيان
صحة وخطأ اي حكم شرعي...تحياتي
متاهات
همس ليل
البارت السابع عشر...
رجعت من المدرسة اتمشى...
ردت افكر...جان الجو حلو ونسمة هوى باردة تهب
لان شهر الثالث...
وين جان هشام كل هالفترة...
ليش ماسأل...وليش اصلا رجعني لذمته...
جان واضح يريد يتخلص...
بس كتله طلكني ..وافق راسا...
رجعت اسال لنفسي...ليش طلبتي الطلاك لعد
واجاوب...ردت اشوفه شاري لو بايع...
وجنت مصدومة من شوفته...
نفس رفة الكلب له رف كلبي...
ونفس الرجفة والارتباك ....
شلون بيوم كرهته...معقولة اجت لحظات ماطقت شوفته...
دامشي على الرصيف وشفت ناس واكفة...
داجنبهم...نزلت على الشارع...
وبنفس اللحظة سمعت شخطت سيارة يمي...
صعدت الرصيف بجفلة..
والتفت على السيارة...انفتح الباب الي من جهتي...
_اصعدي...
باوعت هشام...وبدون تفكير صعدت
_ليش هيج شخطت السيارة فززتني...
جنت احجي واسد الباب...وبمجرد ما سديته انطلق بسرعة...
خفت ...اباوع لهشام صاير عصبي نار...
_خير شبيك هشام...
_اشش ...ما اريد اسمع صوتج لحد مانوصل...
سكتت لان جان يسوق سريع...
شصار هو كله صار كم يوم من شفته...
طبك يم بيت ماعرفه...
نزل وكال انزلي...نزلت واني اتامل البيت..
هو صغير بالنسبة لبيتهم ذاك.
بس واجهته حلوة...فتح الباب...
ودخل بدون حتة مايحاجيني...
ورجع فتح باب من دخلت عرفت مطبخ...
جنت امشي وراه واتفرج لحد ما وصل للهول...
وكف بنص الهول...
واني وكفت وعيوني تتفرج على التأثيث...
مبين جديد....
_لمن هذا البيت
_لي...
منو سلام...
نزلت عيوني عليه واني صافنة...منو هذا
جان فكري بحالة ارتباك
_يعني ماتعرفين سلام منو...ابو علي
هسة طخت عندي نسيت اسمه...
دائما اصيحله ابو علي...
ارتبكت عبالك مسوية شي...
_شو سكتي
_هذا تاجر اخذ بضاعة لمحل فاتحته
_اعرف شفاتحة انتي...
بس ماجنت اعرف ادورين زواج ...
_شنو هالحجي هشام...
تقدم بسرعة بأتجاهي... لزمني من زندي
_ليش ماعجبج حجيي...
ليش لعد دازته علية ...
حتة يتفاوض وياي على الطلاك
صفنت بوجهه ورغم ضغطته تأذيني...
بس صدمة حجايته خرستني...
_احجي ...متفقة وياه على كلشي حتة قبل ما اطلكج...
واني شنو طنطل....زين على الاقل كليلي..
واتفقي وياي...شكو دازته
_هشام اوكف والله مادزاته ولا متفقة على شي
_لا تكذبين...يعني اجى هيج من نفسه...
لج ليش...
جنت مطمن ...اكول كد الثقة...مستحيل يطلع منها العيبة...
اثاري نايم ورجلي بالشمس..
جان يحجي ويهزني...
من كال حجايته الاخيرة...حسيت الدم صعد لراسي
نفضت ايدي من ايده..
_هو شنو الي نايم ورجليك بالشمس...
انتة تحجي صدك...وينك صار تقريبا سنتين
سألت شسويتي..شأكلت شلبست..
شلون خلصت كليتي...
تدري شنو جانت ظروفي...
عايش برة وجاي تحاسبني...
حتة ماكلفت نفسك وكلت ترة انتي بعدج زوجتي
شنو عذرك...
رفعت ايدي ...اريد احجي...
بس خاني التعبير...رجعت طبيت ايدي على جانبي...
وسكتت...
جنة واحد واكف مقابيل الثاني...
واثنينة مشتعلين نار...
رجع ليورة وكعد على القنفة...طلع جكارة ورثها...
بدة يدخن وهوة متجي على رجليه...
وعينه على الكاع.....
_انتة ماتعرفين شي
_شنو الجديد...
عشت وياك اكثر من سنة ونص وماعرف شي...وعفتني سنتين وهم ماعرف شي...
ظلينا ساكتين...
جريت نفس....باوعت لكعدته جنت احسه مهموم..
كلبي حن له...بس يجوز اريد بس الكى له عذر
كعدت على الكرسي...
_هشام..اني تعبت...احنة مانتوالم...
الزواج غلط من اوله...خلي كل واحد يشوف طريقه
رفع راسه يباوع علية...
_ماكدر اجبرج بعد...
بس جاوبيني بصراحة...ليش دزيتي علية
تحركين دمي...لو شنو القصد
_قسم بذات الله مادازته...
اجى يريد يخطب كتله مزوجة ...
ورفضت..ولاجان ابالي ممكن يدور عليك
هز راسه...وسكت كأنما يفكر...
_تريدين الطلاك...
سكت واني انتظر جوابه...
_اني ماطلك ...حلم هذا لج
وكف...وجر باكيت الجكاير وسويج السيارة
من الطبلة كدامه...
ورجع باوع علية...ماكو طلاك
_تعرف اكدر ارفع عليك قضية بالمحكمة...
وبسهولة اكسبها لان انتة هاجرني سنتين...
رجع طب اغراضه على الميز...
_هاي سهلة نكدر نجاوزها هسة...
جان يحجي وينزع سترته...
اباوع عليه واريد افهم شيقصد...
بس من جرني من ايدي...
طخت عندي...حطيت ايدي على صدره اريد ابعده
وهو لازمني من خصري بيد...
واليد الثاني برة ظهري...يريد يقربني منه...
ماعرف خفت...بس مو منه ...لا
من مشاعري الي تحركت بقربه...
من ايدي الي رجفت بمجرد لامست صدره...خاف تفضحني رجفتهن...
باوعت عليه..واجت عيني بعينه...
جانت عيونه تقرأ رغبة وشوك...
ردت احجي بس ريكي جف...
ولساني مانطق ولا كلمة...
شفايفه الي تقربت تطبع على شفايفي...
وتخرس كلمات الاعتراض..
بس ماعرف الوضع شوكت تغير...
بالبداية القبلة جانت افراض رأي وتثبيت موقف...
بعدها تغيرت صارت كله عاطفة...
وايدي وحدة تحركت تلف حول رقبته...وتلتمس شعره...
جنت اسمع صوت رنة ماعرف وين...
وتكررت هالرنة...بس اخر شي فزينا على صوت موبايله...
ابتعد شوي...
وراد يرجع يجرني له...بس دك التلفون مرة ثانية...
هالمرة اني نسحبت...
رفع التلفون يجاوب...اي وياي لاتخاف..
جان يحجي ونفسه سريع...واباوع...
قميصه مفتوحة دكمه...وشعره مخربط...
باوعت على نفسي...تفاجأت...الشال بالكاع
والقميص مفتوح للاخير...
عفته يحجي...ورحت فتحت باب مبين مال حمام
باوعت لنفسي بالمراية...
جان وجهي احمر دم...ركبتي واعلى صدري بيها نغزات شواربه حمرة صايرة....
غمضت عيني....شسويت اني....
سمعت صوته يصيحني...غسلت وجهي...
وسديت دكم قميصي ...
طلعت بدون ما اباوع عليه..دنكت شلت الشال ولفيته
_صبا
مالتفت ...
_داحجي وياج...
_شتريد هشام...ثبتت موقف
سحبني بهدوء من ايدي...
_باعيلي...رجعي...ونبدي من جديد...
_مايفيد هشام...هواي امور معلكة بينا...
ماكدر اظل عايشة بجو غموض...
تعبت..والله العظيم تعبت
_هالمرة غير...جربي وشوفي...
_واذا رجعت لنفس اسلوبك...
_الي ترديه سوي
_وغياب هاي الفترة كلها
_بعدين اشرحلج عنه
_خاف تصدمني...
_خلي ثقتج بية اكبر من هيج...
_ما اعرف...خايفة
_فكري براحتج...
هانسيت دك احمد...يكول ادك على تلفونهة ماتجاوب
_عزة صدك...تأخرت
رجعني للبيت...بس بمجرد ماوصلنا..
_حظري نفسج باجر اجي اخذج...
دخلت للبيت واني صافنة شراح اسوي...
امشي ورة كلبي وارجعله...لو ورة عقلي...
شافني احمد...
_شكد دكيت عليج ماجاوبتبني
_التلفون بالجنطة جان
_شتفقتي وية هشام
_يهمك تعرف
_ليش لعد مو اختي
_ صار سنتين...مافد يوم سألتني شو رجلج ذبج وبعد ما سأل..
وين راح...ليش ماهوة
_انتي كلتي طلكني...والولد ماجان موجود ما مختفي
_يعني شلون موجود
_جان يدز علاج ابوية دائما
جنت متجية على الكاونتر ...راسا عدلت وكفتي
_شلون
_مثل ماسمعتي من وفاة مهند هو قايم بعلاج ابوية
لان علاجه مو مناه...
_شو ابد ماكلت
_ماسألتي...وعبالي تدرين
_مين ادري يعني
ومع ذلك ماسألت ليش عايفج هيج
_شوفي صبا...اني تركتج اشهر...جنت اصلا ماتتقبلين حجايةواحد وبس تبجين...
وبوقتها حجبت وية هشام...وعرفت هو مرجعج
اصلا طلاقكم مو صحيح
_زين مسألته ليش عايفعا معلكة
_بوقتها ظروفه جانت تجبره....
اول تالي جان مسالة وقت وهو راح يجيج
_مافهمت
_هو يفهمج
راد يطلع...جلبت بيه
_احمد فهمني...
_صدكيني هو يفهمج لان مو كل الظروف اعرفها
يعني ما افيدج...
النوب دوخني...
واني المصورة احمد جار ايده كلش مني...
مانمت للصبح...والمحل مارحتله خابرت هبة تبقة بمكاني...
ورحت للدوام واني مسطورة ...
من رجعت شفت سيارة هشام بالباب...
دخلت لكيته كاعد وية امي واحمد
تلكتني امي...على الخير يومة رجعتكم سوة
باوعت لهشام...
كعدت ...اني مارجع اذا ماتفهمني كلشي
جاوبني احمد...روحي ابيتكم تفاهموا...
هشام...ابيتنا شنو تريدين افهمج
باوعت للكل بعينهم رجاء اوافق...
_زين..
رحت لميت ملابسي بسرعة...
وطلعت وياه بعد سلمت على امي وهية اتوصني اطول بالي وية رجلي...
بس ماودانة للبيت ...
اخذني لمطعم نتغدة
من كعدنا وطلب الاكل...
_صبا المدرسة اتركيها...
_مستحيل...كوة لكيت الوظيفة
_اذا تردين على السنة الجاية اسويلج تعيين
_وعد
_وعد...والمحل
_شبيه...
_مامتوقعة راح اقبل توكفين بيه
_بس حرامات خوش رزق بيه
_مو مشكلة خلي هبة واحمد يلزمونه لج
_اوكي هسة اتفق وياهم
_هسة دوري
_شنو تريدين
_هشام اني قبلت ارجع وياك...وقبلت بشروطك هاي...
بس هذا كله مايتم ولا اصير لك زوجة...
اذا ماعرفت سبب غيابك صار سنتين..
_والله اشرحلج بس انطيني مجال...
_خلص لعد...اكون زوجتك بعد ماتشرح
تنهد....شنو صبا داتعاقبيني
_لا ...بس ما اريد نرجع مثل الاول يجمعنا بس الفراش...
اريد اسمع منك وتسمع مني..
طلع جكارة شعلها ونفخ دخانها...
_ يعني متوقعة تكونين يمي واكتفي بس احجي وياج
_صارلك سنتين بعيد...ماراح تأثر كم يوم لحد ماتشرح...
هز راسه واحسه مامقتنع...
رجعنا بس مو لبيتنا القديم...لا للبيت نفسه الي جابني قبل يوم..
دخلت وراه...
_هذا بيتنا
_وذاك
_نباع...اكو غرفة نوم جوة...وفوك ٣ غرف نوم
_راح اخذ وحدة فوك...
صعدت قبل مايكول اي شي...
اختاريت اول غرفة...
من دخلت جنت اتفرج عليها...
_هاي حدسج قادج...
لو القلب دليل
التفت عليه...جان واكف بالباب وبيده جنطة الملابس مالتي...
_مافتهمت قصدك
_هاي غرفتي
_ها ما ادري..عبالي غرفتك الجوة
نزل الجنطة من ايده...اجيت اطلع..
من فتت من يمه...لزم ايدي
_هو عبالج طبت الحمام مثل طلعتها...
وقبل ماجاوب جرني عليه...
حاوطني بيديه الاثنين...وهو يهمس
_مشتاقلج صبا ...باغلاة مهند لا تشلعين كلبي
ماكدرت ادفعه ولا اجاوبه...
اني هم مشتاقة له...بس ماردت بس افهم الصار
لهنا وتوقفت افكاري... اشتت تركيزي...
صار محور اهتمامي هشام ولمساته..
من كعدت من النوم..ظليت متمددة بمكاني...
مدري اضحك على نفسي.. مدري ابجي
وين قراري ...باول ساعة دخلنا ...
وباول لمسة منه...ضاعت قراراتي ادراج الريح...
باوعت الساعة بالعشرة بالليل...
جريت الغطى على نفسي...
واني استعيد ذكريات الساعات السابقة...
جان هشام كله حنية وشوك...
وحسيته مجان يكتفي مثل العطشان
وشاف مي بارد ويريد بس يرتوي...
كمت اريد شي البسه....باوعت الجنطة بعدها مقفولة...
لفيت نفسي بالجرجف...وجريت الجنطة...
صار بطريقي بالكاع تي شيرت هشام بالكاع...
رفعته...وقربت لخشمي...
بعده عطره ماليه...لبسته
وطلعت من الغرفة البيت اضويته مشعولة
اشتميت ريحة جكاير...عرفته موجود
نزلت على الدرج واني اباوعه...
كاعد بس بالشورت...كدامه باكيت الجكاير وبيده
الموبايل يحجي بيه...
رفع راسه شافني...تبسم...
وسد الموبايل...وكفت بداية الهول...
مد ايده لي...خليت ايدي بيده...
جرني يمه...
_ماعرف هيج تي شيرتي حلو
_لا مو هو الحلو...اني الحلوة
_هلا هلا بالحلوة
_شنو تضحك علية هشام
_ليش شسويت
_والي صار
_ها...ضحك...كل عقلج بين ايدي واعوفج
شوية دفعني ...وتمدد وخله راسه بحظني...
تبسمت واني اذكر..غمض عينه...
_هشام
_عيونه
_احجيلي
_مين تريدين تعرفين...
نبدي بالصار بهالسنتين...
فكرت ما اريد اسمع هالشي...يجوز اعرف شي مايعجبني...
لو ما اقتنع بسبب غيابه...
لو...ما ادري...بس حسيتها فرصة اعرف شي عنه
وبعدين اسمع سبب غيابه
_اني سمعت مرة انتي ربيت عد بيبتك ليش
سكت....امي من ازوجت جان عمرها ١٤ سنة وابوية ٣٠ ...شافها وحبها وكتل نفسه عليها...
اخذها طفلة بالنسبة له...
بس دللها وشالها بالصلوات...
حتة خدامة جابلها بذاك الوقت...
بس عيبه جان نحس من ناحيتها ويغار عليها بشكل
حتة من اهلها ومنة احنة...
ومن جابت اخوية الجبير...ومن باب هية صغيرة بيبتي ربته...وهكذا كلنا...جان عليها بس ترضعنا
وحتة ننفطم من وكت...
الي جان يسهر علينا ويدير باله على اكلنا ولبسنا بيبتي....
_وعمامك...ماجان يريدون امهم ليش بس يم ابوك
_ابيت عمامي نسوانهم تحكم...
هنا كلشي بيدها...وهية تحب ابوية وتفضله لان اصغر واحد عدها
_شوكت ماتت
_من جنت بالمتوسطة...
_عاد رجعت امك تهتم بيكم
_لا كبرنا بعد...بس لارا جانت بالابتدائية...
_بس متوسطة بعدكم...اكيد تحتاج واحد يدور اكلت لا...شلونك بالدراسة..يراقبك
_الاكل جانت الخدامة تسوي...
والباقي تعلمنا نعتمد على نفسنا...
_زين ...لحد ماخلصت معهد وبعدها ما عجبتك بنية
ماحبيت...ماجانت عندك علاقات
_لا اكيد...جانت اكو علاقات ...بس عابرة
_ولا مرة حبيت
_مرة نعجبت بوحدة ابوها صديق ابوية...وجنت ناوي اخطبها...
بس مأجل الموضوع...وامي جانت ادك علية اخطبها
_وشصار
_صار عرس اخوية....
وتعرفين البيت هوسة...وناس طابة طالعة...
والبنات كل شوي يصعدن يعدلن بالبسهن...
وية ماطلعت من غرفتي صارت بوجهي طالعة من غرفة رند
لابسة قصير ودلع ومكياج وتسريحة...اول مرة ماعرفتها لان هية محجبة...
بس بعدين من حجت ميزتها...
توقعت راح تخجل وتدخل بالغرفة...
بس شفتها تقدمت باتجاهي...
وصارحتني بحبها...
واني شاب وشفت هيج ردت اجربها...
تفاجات مامانعت...وجان ممكن اروح لابعد من هيج وياها...
سقطت من نظري...والاهم من صعدت مرت اخوية الجبير وشافتنا...وهي هم اقاربها
اتهمتني اني اعتديت عليها...
_من هاي يوم الي شفتني فوك بالحفلة تنرفزت
_اي ...حذرتهم محد تصعد لان بوقتها كوة خلصنا من المشكلة ...
التفت باس فخذي الي مخلي راسه عليه...
ورفع راسه لي...
_كافي عاد...نظل نحجي للصبح
ثاني يوم ...طلع للشغل واني بقيت انظف البيت .واسوي غدة...
جنت فرحانة هاي ممكلتي ...ماراح اسمع حجاية من احد..
والاهم هشام بدة يفتلحي كلبه...
عرفت هشام مامتعود يحجي لاحد...
اكيد من صغير جان يكتم بنفسه...
لان مهما كان بيبته حنينة ماتكون مثل الام...
هاي بسمة بس أذية...شكد جنت احبها قبل
والنوب سمعت هالشي...
رجع هشام الظهر على الغدة...
وهستونا بدينا نتغدة...دك تلفونه...
شفته تغير لونه
_خير هشام منو
اشرلي...واخذ موبايله وراح بالهول يحجي...
تاخر يلا رجع...جان مبدل ملابسه
_ها وين
دنك باس خدي...عندي شغلة ضرورية
اذا تأخرت بالليل ...لا تخافين
طلع...واني ميت فكرة اجت ابالي...
منو خابر...وليش طلع مستعجل...
شكد ثولة شمدريج شسوة خلال هالمدة
كمتي تتعيقلين بعدين اسال...
تعبت من كد مافتريت بين غرف البيت...
صعدت نمت...
حسيت على ايد تتلمس بظهري...
وشفايف تمشي على طول خدي ورقبتي...
جنت نايمة على بطني...رفعت راسي
_هشام
_اي حبيبتي
_شوكت اجيت...
_ادني سويلي مجال...
كعدت الصبح...دخلت غسلت بالحمام الفوك
ومن رجعت للغرفة ...شفت هشام كاعد على الجرباية
كام من دخلت وتقدم ناحيتي
_صبا ...اريد اطلب منج طلب
_كول
_عدنا ضيوف...بغلاة مهند عندج استقبليهم زين
لخاطري
هزيت راسي...منو
_نزلي وتعرفين
عافني ونزل ...بقيت ابدل واني اكو خوفة بكلبي
منو يكون الضيوف
نزلت..واسمع صوت مرة بس ماداميزه...
بس فجأة سمعت صوت طفل يبجي...
وطلعت من الغرفة بنية شايلة طفل صغير...
ماشفت وجها...
بس حسيت كلبي راد يوكف
....وتستمر الحكاية
الاثنين ان شاء الله نطوي الصفحة الاخيرة من قصتنا...متابعة ممتعة