متاهات

كصة بكصة

يسعد مساؤكم حبايب...اليوم نزلت من وكت لان معزومة وما اريد أخركم...متابعة ممتعة
متاهات
همس ليل
البارت التاسع
نظرة عين مهند كلها ألم وشي ثاني ماكدرت اوصفه...
_شبيك مهند صاير شي
_لا تخافين ماكو شي
راد يطلع جلبت بيده...
_لا اكو داشوفك مو على بعضك...
احجيلي خيي...
_مو هسة صبا بعدين...
صعد لغرفته ...وبقيت الوب...
شنو الصار هيج مضايق مهند...
حتة مانزل اتعشى...واني هم ما أكلت...
بالي مشغول...هشام مارجع اتصل..
يعني معقولة ماشاف مكالمات فائتة...
لليل وعيني ما أخذت نوم...
سمعت حركة وانفتح باب المطبخ...
طلعت بهدوء...
شباك الصالة على الحديقة...
باوعت شفت مهند كاعد على الكرسي...
ومخلي راسه بين ايديه مال واحد مهموم
ترددت اطلع اشوفه شبي...
لو اخلي براحته وما أضايقه...
بعدين ماكدرت ...طلعت ومن وصلت يمه..
خليت ايدي على جتفه...
_شبيك خيي...شنو الصاير...
رفع راسه لي...جانت عيونه كلهن حزن..
_ليش كاعدة لسة..
_بالي يمك...هنودي الله عليك شكو...
_لا تشغلين بالج ماكو شي..
_الموضوع يخص لارا...
رفع عينه لي متفاجأ...شعرفج
_عيونكم فاضحتكم من تلتقون...
_يجوز من هاي امها مصرة عليها تنخطب...
يجوز هم عرفت..
كعدت بكاع على ركبي بصفه...
_خيي شورطك...امها كل همها الفلوس...
_مو بيدي صبا...ولا بأختياري
وجان أملي بصاحبي يوكف وياي...
_هشام...ليش حاجيته ماوافق...
_اصوري...كال لارا ماتتحمل
_يعني راسا رفض...
_لا جاملني...بس من البداية حطها بوجهي...
كال لارا ماتتحمل...مع ذلك أسألها...
_خلص مو تدري هية تريدك ماكالت لاخوها
_اي...بس الام معارضة...والبارحة جايين بيت صديق ابوها....
_بيت ابو احمد
_شمدريج
_اعرف...بس اني جنت اعتقد عمهم يصير مؤخرا يلا عرفت همة اصدقاء ..
_علاقتهم قديمة كلش من جانو شباب...
ومن مات ابو هشام ظلوا متواصلين...
_اجو البارحة شعدهم...
_خطبوا لارا لابنهم..
_لا...وليش مارفضت...وشنو جان موقف هشام
_ماعرف الصار...لارا من اخابرها بس تبجي...
وهشام كال كلشي قسمة ونصيب...
_وهسة شنو نخطبت
_لا بعد مامرجعين خبر...
وكفت...هونها تهون خوية...
هز راسه ...عفته وطبيت جوة....
اريد اعرف امهم وين تريد توصل...
الصبح خابر هشام...
_شلونج صبا
_هلو
_شو من ورة خشمج
_كم مرة دكيت عليك البارحة ماجاوبت
_جان عدنا خطار...
_ومن طلعوا ماكدرت ترجع تخابر
_طلعوا متاخرين...هسة شنو زعلانة..
ماجاوبته...
_زين شنو رأيج اصالحج ونطلع نتغدة ...
نعوض مال البارحة...
فكرت فرصة بلكت اكدر اقنعه على مهند
_ميخالف...
_بدلي...ب١٢ امر عليج
بالنيشان اخذت هواي ملابس...
كلها كشخة وانيقة...بس المشكلة
من ياخذني لمكان اكون مرتبكة...
ماداخلة هيج مطاعم ومولات واظل اتلفت...
مرات احاول ابين مايهم وماركز حولي...
بس بداخلي ابقى مامرتاحة...
احس مو مكاني...حتة مرات استحي أكل...
وماعندي ثقة بنفسي واني اشوف الي حولي
يدخلن وعبالك شي طبيعي وعادي عدهم...
المهم...لبست بنطلون بيجي قماش...
وقميص زيتوني وبيه شغل ايد بيجي...
وشال بيجي...
وخليت مكياج بس مو طوخ ...
باوعت جان لبسي مرتب...
سمعت هورن بالباب...
طلع ابوية ورجع...صبا هشام ينتظرج برة...
كلت بداخلي ليش مانزل...
طلعت شفته كاعد بالسيارة..
صعدت يمه..السلام عليكم
_وعليكم السلام
_ليش مانزلت..
_ما اريد نتاخر ...عود من نرجع..
سكتت...ولحد المطعم جان اغلب حجينا على الازدحامات والحر لان شهر السابع
ومثل كل مرة من ندخل مطعم كادني اول مانزلنا
بس هالمرة بالي جان مشغول شلون راح احجي وياه على شغلة مهند...
كعدنا وطلبنا اكل...
_شوكت النتائج مالتكم...
_ماعرف بس اصور بعد اسبوع
_خوش...من تاخذيها اتفرغي تكملين جهازج..
_ليش
_شنو ليش...مابقة نهاية التاسع نزوج...
هزيت راسي...ابد ماجنت مركزة..
جان يحجيلي على الغرفة...وسفرة بعد الزفة...
_شبيج صبا
_ها مابية شي...
_شلون مابيج شي...اعيد السؤال عليج مرتين يلا تجاوبين...
_هشام اريد احجي وياك بموضوع بس ماعرف شلون
_ليش لهدرجة صعب...
عموما نخلص غدة ونروح لبيتنا...
وهناك احجي ...
_بيتكم شعجب
_صار شهر ونص مخطوبين وبعدج ماشفتي غرفتنا..
كملنا غدانا بسوالف عادية ...
وطلعنا بعدها لبيتهم وطول الطريق ..
اني ساكتة ارتب الحجي ابالي...
من وصلنا تلكتنا امه...
طبعا كدامه ماكو هيج لطيفة وناعمة...
واجت لارا هم سلمت...جان مبين عليها تعبانة
واثناء الحجي...
_احمد اتخرج السنة مو...سالت ام هشام
_اي
_اي خطية حتة يساعد مهند...الولد.يركض ليل نهار
_يمة عوفي هالموضوع...حاجاها هشام
يلا صبا خلي اشوفج غرفتنا...
جاوبته امه...السويت امي مو غرفة ...
باوعلها بغضب...سكتت...
صعدنا ومن وصلنا لنهاية الدرج...تبسمت
انتبه علية هشام...
_شتذكرتي...
_اول مرة التقينا هنا..
_شكد لسانج طويل جان...
_وانتة اسلوبك.جاف ومستفز...
ضحك...عموما مو اول لقاء...بس ماعرفتج بدون حجاب...
وصلنا لباب فتحه...تفضلي...
ماجان غرفة نوم...لا جناح كامل ...صالة صغيرة بيها تخم ومعرض تلفزيون جبير...
وحمام واخر شي دخلنا غرفة النوم...
كلها تأثيث درجة اولى ...جانت عيني تفتر حولي واحس نفسي داخلة بواحد من المسلسلات...
معقول اكو هيج بالعراق هم...
وهاي عود هشام حالته موكلش اغنياء...
عجبج....التفت عليه...حلو
_من تجهيزين اجيبلج كتلوك...واختاري التأثيث
هزيت راسي...
وابالي اكول لعد هذا وين يروح...
شو كله بعده جديد...التفت اباوع على الغرفة...
ردت اخذ فكرة عن ذوقه ...
الغرفة جان لونها غامض مثل شخصيته...
وكلشي بيها رجالي...حتة لون البردة...
شوي حسيت شخص وكف راي..
وهمس باذني...صبا
فزيت...وبنفس اللحظة نحطت ايد على خصري...
ارتبكت وردت انسحب بس ايده جانت مثبتتني بمكاني...
_ليش خايفة...
_هشام...خلي ننزل
_هسة...
دارني بأتجاهه....جنت منزلة نظري...
رفع وجهي له...باوعيلي...
باوعت لعيونه...بيها بسمة...
_ليش وجهج احمر صار...ماسويتلج شي
ردت اجاوب بس حسيت حلكي جف
توسعت ابتسامته...وين لسانج...
جان يحجي بهمس...وابهام ايد يداعب خدي
غمضت عيني...
حسيت من خله شفايفه جانت خفيفة ...ابتعد
لكن مو نهائيا بس لف ايده على خصري وقربني اكثر عليه...
وهالمرة جانت قبلته اقوى واعمق...
جانت تطلب استجابة من شفايفي بريئة...
مالها سابق عهد بالقبلات...
حسيت نفسي انكطع...ورجلي صارن مي ماسندني...
وهو يتوسع بقبلته...رفعت ايدي استند على صدره
ابتعد شوي واني احس بعالم ثاني...
احساس زحف على جسمي وشل عقلي...
فتحت عيني وهو يتامل وجهي...وجان ساندي
سحبني بهدوء كعدني على الجرباية...
جان الخجل كاتلني...واحس الحرارة تطلع من وجهي...
طويت ايدي بحظني...هو كعد قريب مني...
مد ايده فتح الشال...حاولت اكمش ايده...
بعد ايدي..
_لا تخافين ما اسويلج شي...
نزع الشال...ودنك طبع قبلة على ركبتي..
شهكت ...زاد القبلات على طول ركبتي..
ما جنت اكدر امنعه لان اصلا جنت بعالم ثاني
سحبني من مكاني وكعدني بحظنه...
بهاللحظة اندكت الباب ما الجناح...
فزيت راسا من حظنه...
جانت عيونه ذبلانة وهو يباوع علية...
_ابقي هنا...
طلع واني احس جسمي كله يرجف..
وصلت للمراية اباوع على وجهي احمر دم...
وركبتي بيها اثر طبع شفايفه...
جريت الشال لفيته على السريع..
وطلعت من الغرفة...
شفت الخادمة داتخلي عصاير ...
التفت شافني تبسم ...
من طلعت الخادمة...
_نهزمتي...
_هشام مايصير هيج خلي ننزل
_هو شنو المايصير...احن عاقدين يعني بحكم الشرع انتي زوجتي...
وبعدين ماجنت اتجاوز وياج اذا خايفة...
_اعرف...
_تعاي اشربي عصيرج...وكوليلي...شنو جنت تريدين تحجين..
اذكرت شغلة مهند ..
كعدت على القنفة واجة كعد يمي ونطاني العصير
شربت اريد ابلل ريكي قبل ما احجي...
_هشام...ردت احجي وياك بخصوص..
سكتت
_احجي هيج الطلب صعب...
بس لا تريدين نأجل الزواج...ماكو تأجيل مقدما
_لا مو هذا الموضوع...
خليت الكلاص على الطبلة ...
علمود مهند...
شفته جر نفس...شبيه...
_ليش رفضته...
_هو كال رفضته اني...
_لا بس هيج افتهمت...
_باعي صبا...انتة بعدج صغيرة ماتعرفين الحياة..
ولا تفهمين البشر...
اني سويت الي بيه مصلحة مهند...
_يعني شلون الي بيه مصلحته
_لارا مدللة....وكلشي تريده تلكاه...
يعني ماراح تستحمل وضع مهند...
_ترة الفقر مو عيب...واذا تريده تتحمل كل ظروفه
_ماكلت الفقر عيب...
كلت اختي ماراح تتحمل...
_وليش من كتلك الفرق بينا جبير...
لمتني وكلت هذا سبب تافه
_لان اني الرجال...
_بين قوسين انتة راح ترفعني لمستواك...
بينما مهند لا ينزل اختك
_استغفر الله...
لا تفسرين على مزاجج...
ماتعرفين التفاصيل لا تحجين بكيفج...
سدي الموضوع...
وكف ...كومي خلي اوصلج..
وكفت مقابيله...لا ما انسد الموضوع...
اريد اعرف ...صار شكد تعرف مهند..
وعلى اساس خويك وصاحبك ما شفعت عندك هالصداقة...
_صبا ...لا تعصبيني...قبل الخطوبة كتلج حجاية
اني ما افسر واشرح تصرفاتي...
_واني ما يوالمني هالشي
_يعني شنو...
_يعني لازم اعرف وافهم...
ليش كسرت كلب اخوية...
تقرب مني....باعي خطبتج ماتعني ينفرض علية اقبل
بخطوبة مهند للارا...
ما مأخذين كصة بكصة احنة...
نزل وعافني...
كعدت بمكاني واني حايرة شلون اساعد مهند
نزلت ...لكيت امه كاعدة بالهول تشرب كهوة..
_تعاي اكعدي نسولف...
راح ادزلج على كهوة ...اكيد مامجربتها...
باوعت عليها شجاوبها...
_وين هشام
_طلع بشغلة وكال خلي تستعد من ارجع اوصلها
صارلكم هواي فوك شسوون
_نحجي
_تحجون...
خلت الفنجان كدامه...شوفي خالة...
المهم البنية تحافظ على نفسها لليلة الزفة
...كلشي يصير هاي خطوبة
حسيتها تقصد حجايتها
_ممكن اسالج سؤال
_كولي
_تصورين كلشي بالدنيا الفلوس
_اي...لان هية اتجيب كل الي تريديه
_بس ماتجيب المشاعر..
_حتة هاي تجي بالفلوس...
ماكو فلوس تكثر المشاكل والمرة تبدي تكره زوجها
_غير منطق غريب...
هواي ناس على كد حالهم
_ياخذون من مستواهم حتة مايتعبون..
_خالة ...مهند يحب لارا وبنتج تحبه...
ليش توكفين بوجههم...
_يامهند...بنتي متعلمة على الدلال...
تروح عند اخوج الفكر...
شتشوف يمه...
شوفي اكولج...عوفو بنتي بحالها
مو عبالج من خطبج هشام...تنسقين لاخوج
لا حبيبتي...
لارا نهاية الاسبوع كعدت خطوبتهة...
ولا تخليني احجي اكثر...
هزت ايدها وكامت...والله ياالله بقوا علية بس الفكر
حيل جرحني كلامها...
اجى هشام...كال يلا...
وطول طريق الرجعة ساكت...
بقى يومين مايخابر...
واني حايرة شلون اكول لمهند عن خطوبة لارا
بالليل دك تلفوني...
من رفعته اجاني صوت هشام
_بالجذب ارفعي تلفون واسالي
_ماخابرت كلت خاف مشغول...
_متأكدة هذا السبب...
_ليش انتة ماخابرت لعد...
_فعلا مشغول
_بخطوبة لارا
سكت
_ليش هشام..ليش مو حرام عليكم
_صبا لا تحجين زايد...
_طبعا مايصير احجي ...شلون اتجاوز مقامكم الكريم...
_روحي صبا
سد التلفون...
صار نهاية الاسبوع واني اشوف اخوية يذوي كدامي
ومابيدي شي عليه...
بالليل طلعت على صوت...
شفت مهند كاعد بالحديقة بالكاع...
جان يبجي...مو بس يبجي يشهك...
دموعي نزلن على كسران اخوية...
حسيت بلوعته لعد شكد جبيرة...
بس ماطلعت يمه...ماردت يحس احد شافه بهالموقف
دخلت واني اكول بداخلي هية الخسرانة...
عافت هيج انسان يحبها وكله طيبة واخلاق...
ثاني يوم جنت يم هبة...
هية الوحيدة تسمعني وتريحني بكلامها...
_باعي صبا...كلشي قسمة ونصيب...
وهمة يفكرون بمصلحة بنتهم...
_اي من حقهم...
هو رادني مو مشكلة لان هاي رغبته...
بس اخوية راد اخته ...لا مشكلة شلون تاخذ اقل من مستواها
_لا تربطين نفسج وياهم....
هشام رجال يكدر يوكف بوجه امه...
بس لارا لا...
هاي مجتمعنا ...ماكو حجاية للبنية..
_وجان وكف بصف اخته..
رجعت منها واني اشوف سيارة هشام واكفة ابابنا
دخلت...جان كاعد بالصالة...صاحني ابوية
من دخلت طلع ابوية...
_وين جنتي
_يم هبة
_شو ماكلتي طالعة
_شنو لازم انطي تقرير بتصرفاتي
_اللهم طولج ياروح...
صبا عدلي اسلوبج وياي احسلج
_اسلوبي عدل...
_واذا كتلج ماعاجبني...
_دقيقة هسة...
طلعت من الصالة ...
واني قراري نهائي
مااكدر اكمل وياه...اصلا موافقتي من الاساس خطأ
اهله ناس ماديين ويباوعون للشخص من اعالي قصورهم...
رحت اخذت علبة الذهب....ورجعت عليه
_هشام...هاي نيشانك...وماترهم نكمل سوة
مديت ايدي بالعلبة....
باوع عليها ورجع رفع نظره لي...
_هية لعب جهال
_لا بس اساسا الموضوع من اساسه خطا
جان كاعد...وكف وعيونه اطاير شر...
مد ايده ...وكل اعتقادي راح ياخذ العلبة...
بس تفاجأت من خلى ايده جوة العلبة وشمرها..
شفت الذهب اطاير بالجو واطشر...
هو عافني وطلع...
كعدت بالكاع المه وادموعي تنزل...
واحجي وية نفسي...لازم اجمعهة...
لان ماكدر ارجع مثله......
******
مهند...
لارا بالفترة الاخيرة ظلت تلح علية احجي وية هشام خاصة بعد خطوبته من صبا...
وكالت امها شكت بشي...
وكامت تقرا براسها وتلح عليهة توافق على ابن صديق ابوها....
امه جاية حاجية وية ام هشام...
وام هشام منطيتهة كلمة بس تخلص لارا امتحانات
رحت حجيت وية هشام واني كلش متردد
وتفاجأت بجوابه...
_مهند انتة خويي...واتمنى ازوجك اختي...
بس لارا ترة ماتناسبك...
يرادلك وحدة توكف بظهرك...واسندك للزمن...
واختي مو هيج اعرفها...
مدللة وتريد كلشي يجي ليمها....
ومع ذلك راح اسالهم
يومين ورجعلي خبر...
ماكو موافقة...
والصدمة من خابرت لارا وبس تبجي...
خليتها يومين ورجعت خابرتها...
كالت مابيدي شي...امي مصرة اتمم الخطوبة..
_لارا واني والوعد بينا
كامت تبجي...مو بيدي والله مهند شسوي...
بعدها ادك عليها كله مغلق...
جربت كم مرة...كله مغلق
لحد ماسمعت اليوم حفلة خطوبتها...
ليش لارا...على الاقل احترميني وكوليلي
ليش تخليني اتفاجأ...
وين حجيج لي...وين وعدج ماتصيرين لغيري
وين الامل الي جنتي تنطينياه يومية...
هاي تاليتها تلفون مغلق ...وتتهربين مني
ضاكت الدنيا بعيني...وبليلتها حسيت اختنكت...
والهوى محصور بصدري ...
طلعت للحديقة وماكدرت احجب دموعي...
حلم تلث سنوات اراعيه ويوميا يكبر الامل بداخلي
صار سنة واكثر اركض ليل نهار حتة احقق هالحلم
ويوميا احلم باللحظة الي تصير لي...
تالي فقر الحال كتل هالحلم...
ليش ياربي الفقير ماله حق يحب ...
كسرة بداخلي صارت قوية كلش...
وحسيت كلشي انسد بوجهي...
ضاكت بية الدنيا...وفقدت اي امل جان عندي
وما اظل عندي اي هدف ...
جان اكو مجموعة اصدقاء اشتغل وياهم مسائي بمكتب...
هم حالهم امر من حالي...
يحجون عن هجرة خارج العراق ...
هذا جان عام ٢٠١١...
بس هجرة غير شرعية تهريب عن طريق الشمال...
جانت هاي بدايتها وقليل الي يطلعون...
قبل من جانوا يتناقشون مايهمني الموضوع...
بس هسة بديت افكر بيه جديات...
اذا ابقى هنا كلش مراح اكدر اسوي...
واهلي شلون....
بعد تفكير طويل...قررت اهاجر بعد ما ازوج صبا واطمن عليها...
اعرف هشام يصونها...
والفلوس الي جمعتها افتح محل من البيت لابوية
اسواق صغيرة...
واتفق وية احمد يسوكله...
ومن اوصل وارتب اموري واستقر ادز عليهم...
صح اطول سنتين ويجوز اكثر...
واحمد...هم اضمنله تعيين حتة لو بواسطة وبفلوس...
على الاقل يساعد بالبيت...
رتبت وضعي على هيج...
وبديت اشتغل بهالاتجاه...
على اقل ابعد تفكيري عن النار الي بصدري...
وتستمر الحكاية....
القصيدة حال مهند وية لارا 👇👇👇