متاهات

احراجات

متاهات
همس ليل
البارت الحادي عشر
وصلنا للبيت وتفاجأنا بهوسة...
دخول البيت يصير عن طريق المطبخ ...
باب الصالة للضيوف...
تلكتنا خالته تهلهل....
بس امه ولا يمها....
اباوع المطبخ هوسة عبالك عدهم مناسبة
بس من طبينا وكعدنا...
_يلا صبا بدلي حتة ترحين للصالون...
التفت على هشام ورجعت عليها
_ليش خالة
_ماحب كلمة خالة كولي باجي ...
اليوم مسوين حفلة مكان السبعة...
وجايات صديقاتي واقاربنا يباركون ...
باوعت على هشام ماجان مبين شي على ملامحه...
بس اني كلش ضجت...
هسة واصلة وتعبانة كلش...
ومامحضرة نفسي...
عبالك داتخليني امام الامر الواقع...
بس كلت ولا انطيها مجال...
_خاف ماتلحك ام الصالون...
وبعدين الساعة ب١ الظهر...
_لا احنة حاجزين والبنات كلهم تلكيهم هناك
انتظرت هشام يحجي شي ماكو...
_صبا اصعدي للغرفة...
باوعت عليه...صعدت بس بقت حصرة بكلبي
راح يحجي وياها لو لا....
حتة اعرف شلون اتصرف منة وهيج...
صعدت بس ماكملت طريقي..
الصالة جانت من نوع مفتوحة والدرج بجانب منها...
وهشام وامه بقوا وحدهم بعد ماخالته راحت للمطبخ
سمعت هشام كال لامه
_شنو الموضوع...حبكت اليوم تسوين حفلة
_غير فرحانة بيكم...وبعدين ناس جاية تبارك ...
شكوللهم لا تجون
_جان تكدرين تأجليها لباجر على الاقل...
تدرين نوصل تعبانين...
_صارت بعد....توقعت توصلون من وكت..
_صارت...بس بعد لا تسويلي هيج مفاجأت...
سمعت صوته من كام...راسا كملت طريقي
ماجان قصدي اسنط بس ردت اعرف رد فعله
دخلت للسويت...باوعت كله متغير...اثاث الصالة...
غرفة النوم جايب غرفة جديدة...
تبسمت صح ما أخذ رأيي...
بس ماباقي على القديم...
_عجبج...
اجاني صوته واني واكفة اتفرج على الغرفة ...
التفت عليه..
_اي حلو ذوقك...
حبست انفاسي بس لايكول امي اختارته...
بس ماكال ارتاحيت...
_بما انه راح ترحين للصالون وبراج حفلة...
راح اطلع اكمل كم شغلة...
_ارتاح.. هسة وصلنا اكيد تعبان...
كلت خلي اشوف شيجاوبني...
تقرب مني...وخله ذراعه حول خصري....
وجرني لحظنه....
_يوم ويخلص مو مشكلة...انتظرج جوة حتة اوصلج للصالون...
طبع قبلة سريع على شفايفي وطلع...
يجوز انتة صعب...وماتنطي من نفسك هواي...
بس لازم افهمك واعرف شلون تفكر...
حجيت وية نفسي...
سبحت وغيرت ملابسي...
اخذني للصالون ولكيت بنات خاله واخواته بالصالون...
اجو باركولي بمافيهم لارا...
بعدها التهينا...بس جنت اباوع مرات لها
اريد اشوف هم متأذية مثل اخوية ...
لو عادي عدها...
طبعا خطوبتها تمت وية العقد بالشهر الي نكطع بيها عني هشام...
امها استعجلت خاف يصير شي...
وماعرف شنو الحجة الي قدموها لغياب خطيبة ابنهم عن الحفلة ...ومايهمني
اجوا ازواج أخواته رجعونا....
من وصلت تلكتني امه بسرعة بدلي اجو الناس...
وماخلت وحدة تصعد تساعدني...
بحجة لازم يخلصن لان الضيوف وصلوا...
وطبعا الي يشوف التسريحة واللبس مالتها مو عبالك وحدة مزوجة ولدها وبناتها...
من داصعد كالت عود خليتلج بدلة على الجرباية...
من شفت البدلة تخبلت...
البدلة ذهبية بس قصيرة لحد الركبة...
وفتحة من الخلف لنهاية الظهر...
ظليت صافنة شلون البسها...
جنت خايفة ماعرف ليش...يجوز هية حفلة بنات عادي
يلبسون اي شي...
بس ماعرف كل الجايين...شمدريني اذا احد صورني
قررت مالبسها ...
وحتة ماخليها تسجل نقطة ضدي يم هشام دكيت عليه
_هلو صبا...محتاجة شي
_لا هشام...بس
_بس شنو...صار شي
_لا...بس خالة  جايبتلي بدلة حلوة...لكن قصيرة ودلع...
كلت اخذ رأيك خاف ماتقبل البسها...
_لا طبعا ماتلبسيها...ذني جماعتها يصورن نفسهن بالحفلة وخاف يصوروج هم
_زين ردت اتاكد ..يلا باي
فتحت الكنتور ودورت فستان من الي اشتريتهم...
والي اصلا دزيت بنت خالي رتبتهن بالغرفة...
جنت متاكدة عندي شي مناسب...
فلبست فستان ازرق فاتح....يصير مخصر على الجسم وشغل ليلو عليه...وردنه شيفون...
وينزل من جوة عريض ...بس كلش حلو...
من نزلت وشافته تخبلت...
_ليش مالبستي البدلة
_خالة...العفو باجي اخاف هشام مايقبل
_ليش شكو...مو كلهن لابسات هيج فساتين...
بس مين اجيبين الذوق...
اصعدي البسيها...
_اسفة باجي ماكدر...
عفتها ودخلت الصالة...
صالتهم جانت كلش جبيرة..
ومليانة نسوان وبنات...همزين مالبستها
يعني اذا صورت وحدة ولا ادري...
الكل جان ملتهي بالركص والاكل والسوالف...
وطبعا هواي ماخذهن الفضول يتعرفن على عروسة هشام...
كل شوي وحدة كاعدة يمي تسولف...
اجت سالي تسلم وتبارك...
جانت تتنعوص من تحجي...
امه شاورتني...شوفي الاناقة والذوق...مو حرامات الله عليج...
ماكدرت اجاوبها لان ابتعدت عني...
بعدها جابت ام خطيب لارا واخته...
عرفتني عليهم...اعرف تريد تغثني وتشوفني
شأخذت لارا...
بس مانقهرت لان عرفتهم نفس شاكلتها...
رجعت شاورتني...شوفي المستوى ودكوليلي اخوية...
وماخلصت الحفلة الا عيني طالعة ....
ومتت جوع لان بدون غدة ولا فكرت ادكول انتو وصلتوا وية الظهر...
والحفلة خلصت ب١١ بالليل
وكدام الضيوف استحيت اكل من باب عروسة...
رغم جان الاكل بوفي مفتوح...
جنت تعبانة كلش بس ردت اسبقها خاف تخلقلي مشكلة وية هشام...
لان واضح هية حادة سنونها وخاصة من شافتني مااسمع كلامها...
نزعت الفستان ولبست البدلة الي جابتها لي...
ولبست روب فوكها...
وانتظرت هشام ...هو ماتأخر ...
من دخل جان ضايج...
كعد بالصالة بعد ماسلم
_شلون الحفلة
_زينة...اتعشيت...
_لا...وانتي
_صراحة على الريوك...ماداشوف راسا سالتك...لان بطني داتطلب الرحمة...
شو هذا طك ضحك....
ماسأل ليش ما اكلتي...
راسا كام فتح تلفون داخلي..
خابر...ورجع كعد يمي
_هذا تلفون داخلي من تحتاجين شي دكي على المطبخ هية اتصعدلج الاكل
دخل يسبح...واني مترددة انزع الروب...
اغلب لبسي لغاية الان هو سيتات نوم طويلة...
طلع لابس برنص ودينشف شعره...
_هشام خالتي حسيتها ضاجت
_ليش
_لان مالبست البدلة...
_كتلها اني ماقبلت تلبسيها
باوعت عليه ...يعني ماحاجيته ...لذلك دخل ضايج...حجيت وية نفسي
_عموما اني لبستها حتة ادشوفها ودكول رأيك
_وينها ...هاي
اشر على الروب...
ضحكت... اي مو طالع موديل الروب...
جرأت نفسي ونزعت الروب...
شفته فتح عينه بقوة ...
_وشوفها من ورة...
انداريت...بس ماحسيت الا ايد انمدت على طول ظهري الطالع...
وبدت تتلمسه...جمدت بمكاني....
_لو لابستها جان عشيرتج كلها ماتخلصج مني ...
صوته جان هامس وبيه بحة...
بدل ايده كامت شفايفه تمشي من جوة الفتحة باتجاه ركبتي...
حاوطني بيديه وسحبني له وقبلاته تتوزع على طول رقبتي...
اندكت الباب...
_هشام الباب
_اششش عوفي...
_يمكن الخادمة جابت الاكل
_اشتعل ابو الاكل ...
عافني وفتح الباب...اخذ منها الصينية...
حطها على الميز...
وجرني للغرفة...
_اوكف خلي ناكل...
_وكت اكل هسة
_حباب
_لا تحجين هيج..
_شلون يعني
_تتميعين
جان يحجي وايده تتلمس طريقها على جسمي
وشفايفه ماتبتعد بس شوية وترجع تكمل
طريقها الرطب على كل مكان توصله...
زواجنا كان بشهر التاسع...
بدا دوام الكلية بعد اسبوع من رجعتنا...
هالاسبوع خلص عزومات بين اهلي الي مااجى بيها بس اني وهشام...
وخواله....وهاي العزومات جنت اشبع بيها حجي من امه ...
بس مو كدام هشام...
هشام جان الصبح لحد المغرب يلا يجي...
و نطلع عزومة العشى...وبالليل الي يجمعنا السرير...
بعدها بدت الدوام...وسجلني خط وية لارا...
الي شكد حاولت تتقربلي ...
بس ماجنت انطيها مجال لان شطبتXعليها...
جنت الصبح اطلع للدوام...
واحاول اكل شي بالكلية وكت الغدة...
من ارجع اصعد للسويت اغسل وابدل وابدي اقرا
لحد العصر انزل للمطبخ...
اسوي عشى بيدي...وهالشي جان يخبل ام هشام
_مو اكو خدامة هية تسوي
_خالة...العفو باجي احب اسوي لهشام بيدي
جانت كلما تشوفني اظل تبسمر حقج متعودة على الخدمة...
جنت اتغاضى عنها...لان اشوفها اتضوج من مااجاوب
واصعد ابدل واتعطر وانتظر جية هشام
طبعا امه ماجانت تكتفي بهيج...
دائما تعزم سالي وامها ...
وتخابرني لازم انزل اسلم عليهم...
وتحرجني كدامهم
_ماعرف ليش اتحب اتعب نفسها...عدهاقراية ودوام ودنزل تسوي عشى بيدها
_هشام يعجبه يأكل من ايدي
_شكو بيها خالة تعاي شوفي جنايني ...جاي مايسون لرجولتهن...جاوبت ام سالي...
كمت من أتخابر انزل اسلم واصعد مابقة...
هشام ...اول يوم من داومت كلية ...
رجعت انتظره يجي على الغدى ماكو...
بقيت للعشى سويته وصعدته...
من اجى وغسل...
_شو ما اجيت على الغدة ..
_مامتعود اتغدة بالبيت...
_لعد وين تاكل
_ندز غدة اني ومهند من المطعم الي يمنا...
_يوميا ما اضوج
_هنا نفس الشي ...
الاكل بيد الخادمة وما احب اكلها...
_لا العشى اني سويته
كدته من ايده للميز ...
صفن على الاكل...صدك ليش تعبتي نفسج
_مامتعودة اكل بس من ايد امي ومرات اني اطبخ
_خلي نجرب
تعشينا سوة...
الي اكتشفته هشام ابد مامعتمد على امه بشي
ومن خلال المواقف عرفت ماجانت تتفقد اذا تعشى او تغدى لو لا مثل مرة تأخر يم اصدقائه...
من رجع لكاني انتظره على العشى
_ليش ما اكلتي
_انتظرتك
_بس اني تعشيت
_ميخالف المهم اتاكد انتة اكلت
_زين انتي تتغدين لو لا
_لا اكل شي بالكلية وانتظر نتعشى سوة
من عدها كام يرجع المغرب وبعده نادرا مايطلع...
ينزل شوي يم امه...والباقي يبقى يمي
صح مايحجي هواي...
بس نأكل سوة...ونباوع مرات فلم...
ومن هو متمدد عل  القنفة واجي يحول نومته...
بحيث يخلي راسه بحظني....
هاي الحركة رغم بساطتها بس جنت احبها...
اظل امسد بشعره...
ومرات من عندي امتحان وماملحكة اكمل دراستي الظهر....ابقى  اقرة وهو يكلب بالموبايل
لحد موعد النوم...
وهو من هاي الناحية كلش متطلب ...
طبعا هالنظام خلاني بعيدة عن امه...
لان دائما بغرفتي...
بس من انزل اسوي عشى...
وهية ساعة بس.... ادشبعني مغثة...
مرت الاشهر على زواجنا ...خلالها ام هشام ماقصرت تخلق مشاكل بينا...
منها مرة تاخر الخط...وبعدين خابر كال عاطل...
لارا جان جاي خطيبها عليها ...
من اجت علية ماقبلت ارجع وياها...
كتلهة عندي محاضرات...
وجنت ناوية اخابر هشام...
بس بنية بالخط اجى اخوها ...
فكالت اوصلكم بطريقي...
بقيت اخر وحدة وصلوني...
بيومها مثل كل مرة قريت ونزلت سويت عشة
وبدلت وانتظرت هشام...
بس الغريبة اليوم امه ماحجت وياي...
من اجى هشام جان كلش عصبي..
صاحني بصوت...
طلعت من الغرفة مخروعة على صوته
_خير هشام صار شي
_اليوم شلون رجعتي
_وية اخو بنية صديقتي
_وليش مارجعتي وية لارا
_جان عندي محاضرة
_يعني هيج مهمة هالمحاضرة تخليج ترجعين وية غريب وحدج
_اولا مو وحدي اخته ويانة واغلب الخط...
وبعدين خطيب اختك هم غريب
تقدم بسرعة مني ولزمني من زندي
_وياج اختي...مو وحدج...
_كتلك مو وحدي
هزني ...اشش لا تعيدين...من مايجيج الخط ماترجعين وية احد...
خابريني وابقي انتظري ...
افتهمتي...
سكتت ...ولزمته لايدي تأذيني...
ضغط حيل...وصاح...افتهمتي
هزيت راسي...اي
دفعني وطلع...
كعدت على القنفة واني مصدومة على مخروعة من صوته وعصبيته...
عرفت ليش ظلت ساكتة...جانت ضامتها للاكبر...
مارجع هشام الا متأخر واني بقيت انتظره...
من اجى سلم بثكل ودخل للغرفة...
جنت كاعدة على القنفة اقرى...تأخر ماطلع من الغرفة
رحت وراه...
شفته مبدل ونايم على الجرباية يكلب موبايله
_ماتتعشى
_لا ما اريد...
حاجاني بدون مايباوع علية....
ظليت اباوع عليه فترة...
وبعدين انسحبت خارج الغرفة...
رحت لميت العشى وخليته بالثلاجة بدون ما اكل
ورجعت حاولت انام....واني اتوقع باي لحظة.
لمسة ايده...
بس شوي...وانتظم تنفسه عرفته نام...
ثاني يوم الصبح قبل مايطلع من السويت خابر ابو الخط يتاكد منه يجي ومن راد يطلع..
_لا تنسين اذا ما اجى الخط ...خابري لا ترجعين وية احد...
ومثل قبل ليلة رجع بالليل..غسل وراد ينام...
واني محضرة العشى...وهم ماقبل يتعشى
كعدت على الميز...صافنة شلون راح تخلص وية بسمة...جان اسم امه...
جمالة مسميها بسمة كولوا تعاسة...حزن...مشاكل...
خليت لكمة بحلكي...بس ماكدرت اكل...
كمت دارجع الاكل بالثلاجة ...
هو اول وتالي باجر ينذب الزبل...
لان حظرتها ماتاكل منه...
_خليه واكعدي تعشي...
سمعت صوته...
_اكلت...
_على اللفة مال الكلية تعتبري اكل
جر الماعون من ايدي رجعه على الميز..
_اكعدي يلا
صح كعدت بس مامديت ايدي..
هو اخذ من الفطاير وخله بحلكي..
وجان يتعمد يلامس باصابيعه شفايفي...
وبعد كم لكمة...كام من مكانه ودنك عليه...
بس هالمرة بدل اللكمة خله شفايفه...
سحبني وكفني وهو محاوطني بايديه...
وبدون مايبعد شفايفه...
من بعدها جانت تتلمس طريقها على طول خدي وأذاني...
وايديه الي محاوطه خصري...بدت تاخذ مسيرها المعتاد على انحاء جسمي المستسلم بيده...
ماعرف بليلتها بيش الساعة نمنا ...
بس كعدت على صوت موبايله...
_هاي لارا دكول الخط ينتظر...
كمزت من مكاني....عزة عندي امتحان...
_كتله خلي يروحون...اني اوصلج...
يلا اسبحي على السريع...
هواي مواقف جانت امه تسوي من هاي...
بس جنت احاول ما اطنكر عليه...
واخليها تشمت...بالعكس جنت احاول
ابينله اهتمامي ...
وهو هم جانت مواقف عنده يبين اهتمامه...
حتة لو محجى...
مثلا مرة ديرجعني من اهلي شفت عنب...
_كتله الله عنب ...شعجب مو وكته
_مو عراقي..استيراد...
طبك السيارة ونزل جابلي
_هشام غالي شسوي بيه
_مايغلى عليج
بالليل من تعشينة...خليته كدامه
_ها طلع طيب
_ماذكته نأكل سوية
صفن علية...
_شو ابد ما اشوفك تاكل فاكهة...
_صدك ما منتبه...
_اني اموت عليها...
_الثلاجة مليانة جوة ليش ما تصعدين
سكتت...
بس بعدها كام كل مايجي لازم جايب وياه فد نوعين
بالليل اسويله ماعون وهو يتفرج...
طبعا امه من كامت دشوفه هيج...
اشد اكثر وياي...ولازم تخلق مشكلة...
بشهر الرابع جان عيد ميلاد هشام....
حبيت اسويله مفاجأة...
اشتريت كيكة بطريق الرجعة...
وهو هم جان كل بداية شهر ينطيني شهرية...
ويدفع فلوس الخط...
فما اصرف هواي...بروحة من روحاتي لاهلي اشتريتله مدالية فضة بيها اية الكرسي وختمتها باسمه
وكتبتله كارت...
وزينت الصالة...وحضرت شغلات حلوة على الميز
بس من دخلت شايلة الكيكة...امه ظلت تباوع
من نزلت اخذ شغلات
_لازم عدكم حفلة
عرفت لارا كالتلها لان وكفت الخط واشتريت ...
_باجي عيد ميلاد هشام ...وردت اسويله فد شي صغير
فتحت عينها متفاجأة واني كلتها ابرأة...
اخذت الاغراض وصعدت...
من نزلت جان باب الصالة مفتوح...
جنت متعودة انزل باللبس العادي...
لان ماكو احد...بيومها جنت لابسة بنطلون جينز
وبدي تعلاكة...ومسوية شعري ومكياج
من طلعت من المطبخ...
_شو انتي ماعندج احترام للبيت
_ليش شسويت
_ها مامسوية شي...اكو وحدة تنزل هيج
_ماكو احد بالبيت بس احنة
_ليش وخطيب لارا الي كاعد بالصالة
اني راسا اصفريت...الباب مفتوح جان
_ما ادري بيه ...ليش عايفين الباب مفتوح
_ماتدرين...ليش اول مرة تسويها...
دائما من يجي تتقصدين تسوين هيج
وبعدين شنو تحكمينة ابيتنا لازم نسد البوب علمودج
_شنو هالحجي...عيب ....عندج بنات
_وجمالة تتجاوزين....تعاي علميني
باوعت عليها شجاوبها....
عفتها وصعدت...بس جنت خايفة...
بس لا راح تخلقلي مشكلة جديدة...
لا قابل هشام مايعرفني شنو...
بقيت انتظر رجعة هشام واني فرحانة بترتيباتي
ونسيت شغلة امه....
*****
مهند....
بعد ما طمأنيت على صبا...
بلشت ابني محل بداية البيت اخذت جزء من الطرمة...
ويوميا بعد مانرجع من الشغل ...
نشتغل بالبناء بيدينا...
لذلك تاخرنا...
كملنا المحل...وسوينا رفوف وجبت وجبة مسواك
وكعد ابوية بيه
بنفس الوقت قدمت تعيين لاحمد بأكثر من مكان
ووصيت هواي اشخاص...
حتة فلوس انطيت وبعد كم شهر ...
الحمد لله طلع تعيينه...
والمحل ابوية اخذ على كعدته ...
بهالوكت جان عام ٢٠١٢...طلعت وجبة من اصدقائي
وصلوا بالسلامة...
جانت اكو وجبة ثانية راح تطلع واني بعدهم...
صح هالشغلة أخذت اشهر...
بس ماغيرت رأي...
بقت نفس حركة الكلب....
ونفس اللوعة بصدري...
طول النهار اشتغل واروح واجي...
بس من يجي الليل ...
يجيب كل الونة وياه...
اووووف ياليل شطولك على بيه وجع...
وياقلب يمتى يخلص شوك البيك...
للباعونة ومشوا...
ونسوا حتة يسألون شلونكم ببعادنا...
مرات الليل ما أنام ربع منه....
جنت انتظر شوكت يجي سراي واطلع
بلكت من ابعد انسى لو يخف هالوجع...
.....وتستمر الحكاية