متاهات

صدفة خير من الف ميعاد

#متاهات
همس ليل
البارت الثاني
تعثرت وحسيت راح اوكع على وجهي...
وبلحظة تخيلت راح ادعبل على الدرجات ...
بس بسرعة انسحبت من ايدي...
ارتجيت على الحايط وكلبي احسه يريد يطلع من صدري من كد مايضرب سريع...
رفعت عيني شفت هشام واكف مسافة عني متخوصر...
_انتي منو ..وشدسوين هنا
الهبطة الي اكلتها...وية نظراته المستجوبة...
خرستني...اريد يطلع صوتي ماكو...
_شنو خرسة.
فتحت عيني...شنو هالاسلوب المتعالي...
_يعني شنو قابل صاعدة ابوك
_ماعرف والله...هذا الطابق محد يصعده بس اصحاب البيت...
وانتي لا من اصحاب البيت ولا من الاقارب
ظلت نظراته تحوم علية من فوك لجوة...
واكو ابتسامة على شفايفه من نزلت عينه على سيقاني....
فجأة اذكرت شلابسة ...وردت الكاع تنشك وتبلعني
_محد كايلك تغض بصرك عن ضيوفك
_ومحد كايلج عيب تفترين أبيت العالم بدون علم اصحابه
رفع تك حاجب باستهزاء...
وظليت حايرة شلون اجاوبه...عرفته ما تعرف علية
بس اني بلحظتها بس اريده يوخر من كدامي
جنت كلش مستحية ...وجهي ينطي الوان
التفتنا اثنينة على صوت خطوات تصعد الدرج...
شفت لارا اجت...
_هاي شنو هشام شوكت رجعت...
_نسيت محفظتي ورجعت اخذها..وشفت الست
اشر براسه علية....تفتر هنا
التفت عليه متفاجأة ...شافتر هو شافني دانزل من الدرج...حجيت وية نفسي
شفت لارا ضحكت..
_لازم ماعرفتها...هاي صبا اخت مهند شبيك
رجع التفت عليه متفاجأ ونظرته تغيرت...
_ليش ماتحجين لعد
_هو انتة انتطيت مجال...
فتح حلكه يريد يجاوب بعدين سكت...عافنة ونزل
جريت نفسا عبالك جنت مخنوكة...
تقربت مني لارا....لا تزعلين منه...هو اسلوبه حاد شوية...
جانت الدمعة بطرف عيني....وبس احجي تنزل
لاحظت لارا هالشي
_الظاهر هواي قسى وياج بالحجي
_عبالك شافله حرامي
اخذتني من ايدي للغرفة....
_ماعرفج وتفاجأ...لان حظرنا غرفة جوة للبنات الي يريدون يعدلون لبسهم ومكياجهم...حتة محد تصعد فوك...
صارت مشكلة سابقا بعرس اخوية الجبير...
عوفج من هالحجي وخلي نعدل مكياجج وجهج اصفر...
عدلت نفسي ونزلت وياها...وطول فترة المهر ماكمت من مكاني بس مرة وحدة من دخل العريس
اخذتلي زاوية بعيدة عن نظره....
طبعا تفاجأت باللبس والذهب الي لابسيه البنات....
وحتة النسوان الي كبار بالعمر...
مع العلم كلهم اقارب ابوية من ناحية الام...
وتعجبت اكثر من اجى العريس واهله....
جانوا جايبين النيشان بسلات ومغلفيها مثل الهدايا...
دخلن البنات كل وحدة شايلة سلة خلنها على الميز كدام العروسة...
وسلة الذهب دخلت ام العريس شايلتها...
ظليت اتفرج.بعيوني واحس عايشة بحلم...
هذا عالم بعيد كل البعد عن عالمي...
تعاي هبة وشوفي ودكلي اتحيزي الفرصة...
والله ياالله ...حتة الصدفة الي صارت بينا جانت كارثية...
اجت لارا كالت مهند برة ينتظركم...
رحت لبست صايتي وشالي....ومن سلمنا وطلعنا
ابد ماباوعت على هشام الي أصر يوصلنا...
الطريق كله دايرة وجهي على الجامة...
اني وين وهو وين...هذا حتة بالاحلام ما افكر احصله
وصلنا...نزلت حتة بدون ما اسلم....
خليت امي ومهند يشكرون منه....
بالليل ظليت افكر هسة لو ابوية مامضيع فلوسه
يجوز جان اني مو اقل من البنات الي شفتهم
اكيد وضعي راح يختلف...راح اكدر البس براحتي وارتب نفسي...
بوقتها يمكن هشام يباوعلي...
بعدين استغفرت ربي...كلت على الاقل اهلي ناس طيبين...ومامقصرين وياي...
وعايشين احسن من وضع غيرنا...
وذكرت حال هواي بنات ويانة حصرة عليهن يكمل دراستهن...
ثاني يوم طلبت من مهند يوصلني لبيت هبة حتة ارجع اغراضها...
بس طبعا ماكتله هيج...كتله اريد ارجع ملازمها...
مهند احن اخ بالدنيا واي شي احتاجه هو يسوي
اذا اريد اروح للسوك هو ياخذني..
او اروح لصديقتي هو يوصلني...
بس احمد ماله شغله همه نفسه وبس ...
المهم وصلني....وبس دخلت لبيتهم تلكتني هبة
_ها ولج بشري شسويتي
جنة بعدنا واكفين أباب الصالة
_هسة خلي افوت ...اكعد....ارتاح
_اي مو على اساس جنتي تحصدين...
_شكد عوبة...هاي اغراضج تسلمين حبي
اخذتها وخلتها على القنفة واحنة نكعد مابطلت حجي
_دحجي...شفتيه...حجيتي وياه...شافج بالفستان...شكال
_لوك لوك لوك...انطيني مجال
حجيتلها الصار
_ثول اي والله ثول...الناس ادكول رب صدفة خير من الف ميعاد ...
وانتي ماعرفتي تستغلين هالفرصة
_قابل شسوي...اجلب بركبته
_لج غبرة...جان تنعوستي بالحجي...وبجيتي شوية على اساس مقهورة من حجايته...
مو اطولين لسانج...وين الانوثة ...
_غير ماشفتي اسلوبه شكد متعالي...حتة من عرف منو اني هم ما اعتذر ...عافنة وطلع بدون كلمة
_يعني شنو ابد ما اهتم...
هزيت راسي ب لا
_شيهتم اذا انت مطلعتله جاسم ابو لبلبي...
متت ضحك على حجايتها
_وج يمكن جاسم اكثر انوثة منج...
_انجبي عاد...هو وين واني وين ...
حقج ماشفتي البنات الي اجني للحفلة ...
_اي ويجوز ولا وحدة عاجبته منهن...زين ماتعرفين هو يحب وحدة ...
_لا شمعرفني
_من اخوج...مو علاقتج قوية بيه
_قابل اروح اكوله هشام يحب وحدة
_لج املخ نفسي...اشك هدومي...ليش تبقين ثولة
_شبيج خبلة
_يعني ماتعرفين تجرجرين اخوج بالكلام وتأخذين منه حجي...
عوفي هاي...اخذي رقمه من اخوج...وخابري
شاغلي بالتلفون...
_ويكلك البنات ماتنحرف من ورة صديقات السوء
_اي مو شايفتني يوميا مصادقة واحد...اشو حالي من حالج ...مثل الشرطي أنروح وأنرجع للمدرسة
_مين تعرفين هالشغلات داصدميني ولج
_من المسلسلات والافلام ...والبنات الي ويانة ماسمعيهن شيحجن
_هذا مو دربنا هبة
_قابل داكلج اطلعي وياه...هية مكالمة شوفي مايه شنو
_تعرفين ماعندي تلفون
_هو اكو وحدة ب٢٠١٠ ماعدها تلفون...هسة كله فايبر وفيس مو عاد تلفون
عموما خلي اخوج يأخذلج واحد مستعمل...
لو تعاي هنا وانطيج تلفوني..
وكفت ...لا حبي هذا مو طريقي...وبعدين اخوي صديقه...وهو اقاربنا...اذا صار شي شسوي
_شيصير...قابل يروح يكل لاخوج اختك خابرتني
صفنت عليها...بعدين هزيت راسي
_اطلعي من دماغي هبة...خليني مركزة بقرايتي
سمعت هورن برة...
_هاي عليج
_لا مو تعرفين مهند ماعنده سيارة
اندك الجرس...شوي واجت ام هبة...
_خالة اخوج ينتظرج
طلعت بعد ماسلمت لكيت مهند وهشام كاعدين بالسيارة..
ادري اليوم جمعة ...بس هذا ماعنده غير مهند يفتر وياه...
صعدت سلمت ودرت وجهي عل الجامة...بس اتفاجات من سمعت هشام حجى وية مهند
_ذولة الناس تعرفهم
_لا...بس بنتهم صديقة صبا
_لعد شلون تخليها اطب عدهم...غير تعرف وضعهم شنو
_اذا قصدك من هاي الناحية...لا اعرفهم خوش ناس..
_زين...الدنيا ماتتأمن
اسمع حجيه واني فاتحة عيني عليه...يحجي ولا كأنما موجودة اني
ردت اجاوبه بس اذكرت مهند كاعد..
من وصلنا مهند حاجاني....صبا خاف ابوية يسأل
رايح وية هشام بشغلة...
هشام جان حاط عكسه على الستيرن...ويده الثانية امنزلها ويباوع لكدام...
نزلت بدون ما اسلم...
جنت بداخلي كلش ضايجة..شعليه يحشر نفسه
مر يومين الروتين اليومي اكعد من الصبح
اقرأ ومن يرحون للدوام اخواني وابوية للشغل..
امي أسوي غدة واني انظف على السريع
حتة ارجع اقرا...وامي حتة العشى كامت هية تسوي
تنطيني فرصة اكمل قرايتي لان مابقى شي
على الامتحانات...
بس بالليل تجي ابالي حجاية هبة...وصورة هشام ماراحت من خيالي..
ثالث ليلة ماعرف شنو صار بية....
رحت بدون ما افكر لمهند...
_مهند اكدر اخابر من تلفونك على هبة
_اي حبيبتي...هاج اياه...
اخذته ورحت للمطبخ...وبقيت واكفة متجية على الكاونتر ومترددة...بعدين فتحت الموبايل...
اخذت رقم هشام...وسديته
رجعته لمهند...
_ها خابرتي
_لا
_ليش
_ترددت خاف نايمة...اعرفها تنبل مال نوم
_تحتاجين شي اجيبلج
دنكت بسته من خده...سلامتك حبيبي
ونزلت واني فرحانة ماخابرت...ماتسوة اخون ثقتهم
مر كم يوم ركزت حيل بقرايتي وألتهيت عن الموضوع...
حتة من يجي ابالي ...افكر بغير امور...
لحد يوم جنت اغسل امواعين ودخل مهند
_هاج صباوي
مسحت ايدي بدشداشتي...واخذت منه علاكة
_شنو هاي
_موبايل صح مستعمل بس يفيدج ..مابقى شي ادخلين كلية وتحتاجيه
فتحت العلاكة وطلعته ...جنت كلش فرحانة بيه
تقربت شبكت مهند
_تسلم خوية فدوة لطولك...بس خاف كلفت نفسك
_فدوة لج...كافي فرحتج بيه
التهينا بالامتحانات...مهند واحمد امتحاناتهم قبلي بدت...
قبل يوم من الامتحان الاول جنت حيل متوترة...
وحتة الكتاب ماكدرت الزمه...
وطول اليوم بس افتر...اخر شي بالليل اريد انام
ماكدرت...
طلعت بالطرمة افتر دنيا ليل...والكل نايمة...
ماعرف ليش اجى أبالي هشام...
ظليت افكر بيه...حسيت اشتاقيتله...
كلت خلي اقرا احسن من هالتفكير...
فتحت دفتري...واني اكلب بالاوراق...طلع رقمه
اذكرت من اخذته من مهند...وسجلته
من دون تفكير...دخلت الغرفة واخذت الموبايل
ورجعت طلعت بالطرمة...سجلت الرقم وخليت اصبعي على الاتصال...
ادوس لو لا ...اخر شي قويت نفسي ودست اتصال
دك فترة ماجاوب ...راسا فصلته
كلت احسن...شبية تخبلت داكة عليه...
واني دافكر بهالشكل دك موبايلي...بحيث فزيت وشمرته...
بعدين اذكرت اهلي نايمين...ركضت اخذته وفتحت خط ...
اجاني صوته
_الو...الو ..منو وياي
اريد اجاوب...استحيت
_ليش ماجاوبين...مو هسة اتصلتي..
_هلو
_هلة بيج...ليش دكيتي وفصلتي
_عبالي نايم
_لا مانايم
_ليش كاعد لسة
_اتفرج بالفيس...انتي ليش كاعدة
_ماجايني نوم
_ليش قلقة على امتحان باجر
فزيت من كال هيج...حتة صوتي ماقبل يطلع بعد
_الو...صبا وين رحتي
راسا سديت التلفون...وضربت على خدي..
عزة بعيني هذا عرفني...رجع دك التلفون...
فصلته...وهم رجع دك ...ورجعت فصلته
دزلي مسج.....افتحي خط بسرعة احسلج
دك التلفون فتحت خط
_الو ...اسمعيني زين ...اخوج خوش ولد ومن اشترالج التلفون جان وواثق بيج...
لا تخونين ثقته...محد يستاهل...
سمعتيني...
هزيت راسي ب اي عبالك ديشوفني...
صوته واسلوبه بالحجي جان حدي كلش
_جاوبيني ...سمعتي الي كلته
_اي
طلعت همس ...يدوب تنسمع
_روحي نامي...براج امتحان احسنلج
سد التلفون...واني دموعي نزلن...
ليش هيج نزلت نفسي....
شلون عرفني راسا...
بس لا يكول لمهند....هالخاطرة رعبتني
وخلتني للصبح ما انام...ماخليت مادعيت
حتة مايكول لمهند....
الصبح من شافتني امي
_ليش هيج عيونج مورمة
_من السهر
_اي يمة غير تنامين من وكت حتة تركزين بأمتحانج
ماتدري اني خلصت الليل بجي...
ندمت على سويته...وحسيت هو ضربني راشدي صحاني بيه...
وبالنفس الوقت جرح كرامتي من رفضني..
طلعت للامتحان واني مصممة اركز بقرايتي
ومااخلي بعد ابالي هيج موضوع...
خلصت الامتحانات ...بس حسيت مامسيطرة كلش
لان نفسيتي تعبانة...
جان اكو بنات يتواعدن ...لذلك من ندخل بالفروع نشوف ولد هواي...
جنت اجنب هاي الفروع واروح للفرع البعد 
اخر امتحان ...هبة اتخربطت واجلته...
لذلك رجعت وحدي...واكو ولد طول فترة الامتحانات ملاحكنة اني وهبة...
من دخلت بالفرع...تقرب حيل علية بحيث صار بصفي...
وظلي يحجي...اوكفي بس احجي وياج...
لا تخافين بس اسمعيني...
اني جنت امشي سريع...بس من شافني هيج وكف كدامي حتة اوكف...
خفت كلش وظليت اتلفت ...شفت ماكو احد بالفرع
_هاي شبيج بس اسالج
_ابتعد عن طريقي احسلك
شفت سيارة فاتت لنهاية الشارع...بس بسرعة رجعت ليورة...
_قابل شمسويلج...اريد احجي وياج
بنفس اللحظة سمعت صوت السيارة وكفت يمنا...
وبلحظات انفتح الباب ونزل صاحبها يركض..
شهكت واني اشوف هشام كدامي...
جر الولد من ياخته بقوة وضربه....وبعد كمت ما افهم الصار من الخوف...
بس حسيت بي من جرني من ايدي بقوة وصعدني بالسيارة...
صعد وساق سريع واني مخرسة...جنت حاضنة كتابي 
ومصفوطة وية باب السيارة...
_تعاي هنا راح توكعين...
صاح بية...
راسا انسحبت ...طبك السيارة بالفرع الثاني...
والتفت علية
_منو هذا
ماجاوبت جنت اباوع كدامي...رجع صاح بصوت
_مو داحجي وياج ....منو هذا
_ما اعرفه
_ليش لعد واكفة تحجين وياه
_هو اعترض طريقي
_من يكول
التفت عليه ....يعني شنو من يكول..
ماعندي هاي السوالف اني
_ليش مو تحارشتي ودكيتي علية
فتحت عيني بوسعهن مصدومة...
حسيته حيل جرحني بهالكلمات...
_شوف اكلك مو من حقكك تحاسبني...
قرب اصبع السبابة من وجهي وهو يهز ايده
_اياج ترفعين صوتج علية...وعندج اخوج اكوله هو يحاسبج...
_بالضبط عندي اخ روح كله هو يحاسبني مو انتة
ساق بسرعة...واني بداخلي ميتة خوف ...
شراح يكول لمهند ...ومهند شيسوي
وصلنا للبيت...ونزلت قبل مايحجي...هو دك هورن
طلع مهند شافني سلم وصعد وياه...
وطلعوا...طبعا عباله وصلنا بنفس الوقت صدفة...
لليل الخوف كتلني...شراح يكله...
سويت عشى لاهلي ...بس كلشي ما اكلت...
عفتهم ودخلت للغرفة...رجع مهند متاخر...
دخل علينا للغرفة
_صبا تعاي اريد احجي وياج
لحكته للصالة وان اطكطك من الخوف....
وتستمر الحكاية....