Lawa Ng Salita

Blangkong Papel

(5/28/18)

*** 

Nakatitig sa blangkong papel na nilaan para sa mga salita

Iniisip, dinadama, paano kung kadalisaya'y mawala?

Dito sa mundong laganap ang kasalanan,

Makaiiwas kaya sa paggawa ng kasamaan?

Huy, tara dito tayo, dito sa madilim na eskinita

Magsaya tayo sa gitna ng kadiliman, walang iniisip na iba

Tamang tama, may dala akong gamot na may mabangong halimuyak

Matutulungan tayo nitong humalakhak

Huy, tara dito tayo, dito sa gusaling maraming ginto

Pasok tayo sa loob, magmina tayo sa sahig na semento

Ang daming papel, papel na napakahalaga

Sa atin na ito, wala nang makakapigil pa

Huy, tara dito tayo, dito sa lugar na maraming tao

Ang nagtatanghal sa harapan ay tignan mo

Minsan ba'y naisip mong gayahin siya?

Minsan ba'y naisip mo kung bakit hindi ka kasing galing niya?

Huy, tara dito tayo, dito sa lugar na tahimik at payapa

Magpahinga ka, magpahinga dahil maaga pa

Huy, teka, wag ka munang tumayo

Alam kong gusto mong magpahinga, magpahinga hangga't gusto mo

Huy, tara dito tayo, dito muli sa maraming tao

Napagtanto mo na bang mas magaling siya sa'yo?

Alam kong galit ka, kaya tara

Gumawa ka ng ikasasama niya

Huy, tara dito tayo, dito sa hapag na maraming grasya

Para sa iyo lahat yan, ubusin mo't wag bigyan ang iba

Alam kong gutom ka, sige lang kumain ka

Ang mamigay ay wag nang isipin pa

Huy, tara dito tayo, dito sa mataas na trono

Nahila mo na pababa ang taong mas mataas sa'yo

Nasa iyo na ang korona, wag ka nang tumingin sa ibaba

Ang tumingin sa ibaba ay isang mahina

Huy, tara dito tayo, dito sa mapulang kwarto

Gumawa tayo ng bagay na walang nakaaalam ni sino

Ako at ikaw, tayong dalawa'y mag-iisa

Magsasaya't walang iisiping iba pa

Ang blangkong papel, pagmasdan mo

Ngayo'y puno ng pulang tintang dulot mo mismo

Napagtanto mo na bang mas maganda ang blangko?

Blangko, at walang bahid ng sama ng mundo?

Napagtanto mo na ba? Namulat ka na ba?

Kung gayon, may tanong muli ako sa'yo

Nagsisisi ka na ba?

At kung nagsisisi ka, gagawin mo pa ba?