حلقة 3 الصباح نضت بكري على السبعة تاعبة ليل كامل سلين مارقدتش عندها غازات في كرشها وجعتها لازمني نعس روحي واش ناكل لانو حليبي يتأثر نحك في عينيا و نثاوب عضامي نحسهم مكسرين هزيت سلين لفيتها وهي راقدة حطيت حليبها و ليكوش تعها وثياب في ساكها غسلت وبدلت مكانش فطور خلصت ومخرجتش نقضي هزيتها ورحت لعند سلطانة نعرف تقلي تحب زيادة اذا كنت رح نجيبلها سلين على السبعة تاع صباح لكن مش مهم اكيد رح يزيد الخلاص تاعي لانو رح نخدم في الاوتال وقفت نستنا في bus - ففف طول هكذا رح نتوخر بزاف من اول نهار نوصل روطار اه يا ربي من جهة أخرى شهاب وصل الاوتال كي العادة يحب يوصل الصباح اول واحد يتفقد الحسابات الناقص و الداخل و الخارج بعد ما يكمل ينزل يتفقد الخدامة كلهم قبل ما يبداو الخدمة نزل تحت بدا من عند مكتب الاستقبال وفي هذاك الوقت وصلت نجوى تلهث دخلت للمكتب تاع الاستقبال ترجع في النفس و شهاب يشوف معاها من فوق لتحت ثيابها لمهدرشة شعرها كعكة بطريقة فوضوية شفايفها لمشققين *وصلت نلهث دخلت نجري للمكتب مزال ما لحقتش 8 الحمد لله وقفت نرجع في النفس هزيت عينيا نلقاه يخزر فيا رمشت عينيا مرات ورا بعض وبلعت ريقي حكمت كبشت بيديا في ساكي ووقفت بدنو وقفتو خزرتو ريحتو كلها عوامل تزيد في التوتر تاعي للحضة كل واحد كان واقف من غيري انا وهو اختفى كأنو هو فقط لي موجود في الغرفة نسمع في قلبي نبض تاعو يزيد - مدموزال نجوى..؟ نطق موضف الاستقبال شفت معاه رسمت تبسيمة من الخوف مش قادرة نتبسم حركت راسي قلتلو ايه - راكي متوخرة بنص ساعة آه يا نجوى راكي في موقف واحد ما يحسدك عليه هو عينيه لي كيف الظلمة مبعدهمش عليا وهو يبحلق فيا وشبيه هذا كاينة حاجة فيا مش نورمال رجعت جاوبت موضف الاستقبال - سامحني تعطلت في الطريق اخر مرة وعد عضيت على شفتي التحتانية حركة كي نتوتر نعملها شفت هو هز يدو شاف مع الساعة و تكلم بكل برود و ثقة صوتو يجمد الما شهاب: راني نازل للكوزينة نحب العمال كلهم حاضرين لابسين ومستعدين نكره لي يتوخرو لوكان دقيقة لانو تتخصم ساعة كلها من اجرهم مشا و موضف الاستقبال وقف لعندي يجري في يدو لبسة تاع الخدمة حطهالي في يدي - اجري البسيها وانزلي من هنا للكوزينة على الجهة اليمنى راهو يعدي علا قسم التنظيف قبل ما يروح للكوزينة حكمت عليه وانا نسقسي فيه واش خدمتي وهو يدز فيا للباب منين ننزل - سقسيهم كي توصلي نزلت وانا نتفرج من و من دخلت للكوزينة كبيرة و عريضة والناس فيها رايحة جاية تلفتو كلهم شافو معايا تبسمت هزيت توني تاعي باه يشوفوها - راني روطار جاو يجريو دخلوني نبدل كوثر: انا كوثر مش مهم ازربي البسي يوصل المدير يلقاك مش لابسة تخلا عليك وقفت نبدل بسرعة ونحكي - انا نجوى راني جديدة هنا كوثر: ايه قالولنا عليك انتي لي راح تغسلي الماعن في الكوزينة وقفت لحضة مفهمتش واش قالت - كيفاه يعني نغسل الماعن فقط هذي خدمتي كوثر: ايه البسي هيا راهو هنا خرجت تجري وانا قعدت نقفل في زرار الشوميز وخرجت نجري وراها نعاود نلم في شعري بصوابعي شفتهم واقفين جنب بعضهم رحت نجري وقفت شفت مع الصباط تاعي مزلت مدخلتش رجلي فيه لبستو وخرجت نجري نلحق طبست نلبس فيه وزدت لبست الفردة التانية نسمع في صمت رهيب هزيت عينيا للي جنبي نشوف فيها تشوف معايا وتحرك في عينيها والصف كلو ساكت ويشوفو قدامهم نسمع في صوت رجلين وقف قدامي دورت نشوف في صباط كحل كلاسيك يلمع يشعل شعيل هزيت عينيا معاه لقيتو هو المدير يديه في الجيب ويخزر فيا غمضت عينيا بلعت ريقي ووقفت مهبطة عينيا منقدرش نشوف معاه قرب مني قلص المسافة لي بيناتنا وانا لا شعوريا رجعت خطوة للوراء نحب نخلي مسافة نحس في الهوا خلص من الكوزينة نتنفس بصعوبة شهاب: توخرتي في اول نهار ما احترمتيش الصف يعني ما احترمتينيش وزيد هندامك مش ملائم زرار شوميز مش قفولين قدقد يحكي يديه في الجيب هبطت عينيا نشوف مع الشوميز لقيتها زر لفوق و زر تحت متخالفين فففف من زربة مشفتهاش مشا يشوف مع الموضفين التانيين وانا نقفل في الزرار من بعد وقف شهاب: تعرفو النظام هنا علموه للي ميعرفوهش خرج و وانا رجعت النفس اه اخيرا رجع الهوا للبلاصة هذي مش ممكن يكون انسان هذا بلا مشاعر تحسو روبو نظرة عينيه باردة مفيهاش حياة تبا راح نعاني هنا اكيد.(vote +commentair)
