الحلقة 50
بعد تبهديلة البارح مكنتش عارفة كيفاه نقابل زياد نضت بدلت لبست روب طويلة حليت شعري بدات الصيف تدخل والسخانة تعها سلين راقدة محبيتش نفيقها نزلت للكوزينة كليت شوية من بعد انتبهت على شهاب مكانش
-ريتا وين هو شهاب
ريتا: مسيو شهاب خرج كي وصلت انا الصباح
كملت ناكل عوجت فمي ماتعبش روحو حتى يقلي الدورة هذي بعدتنا اكتر من لي كنت بعاد صونا تليفوني وصلني ميساج لقيتو من شهاب ...صباح الخير كنتي راقدة محبيتش نفيقك لكن اليوم عندي طريق روحي وحدك للمطعم ..... تبسمت حطيت التيليفون على الطاولة هزيت عينيا شفت مع الشباك هه ظلمتو سرحت وانا نخمم فيه من بعد وقفت ودعت ريتا و صيتها على سلين وخرجت
_________
خرجت من الدار حكمت طاكسي و حسام كان موقف علا جنب يشوف معاها رجع وراه نزل تحت شوية بش ما تنتبهش عليه كي فاتت طاكسي عليه تنهد وقعد يخمم كيفاه راح يدير اصلا لي راح يديرو يعتبر اختطاف لكن هو لصق مع هذا حسين لي مش عارف واش لي راح يستفيد منو كي يدي الطفلة في آخر المطاف قرر ينزل و يمشي يديها لانو مزال حاب يدي دراهم مشا دقدق الباب حلتلو مرا في عمر الاربعينيات سمرة وقصيرة
ريتا: نعم
حسام: انا من شركة الكهرباء و قاعدين نتفقدو في المنازل نقدر ندخل نشوف
ريتا: سامحني مكانش صاحب البيت هنا نقدر نشوف بطاقتك ؟
بلع ريقو و بدا يتوتر لانو معندو حتى بطاقة دخل يدو في الجيب عامل روحو يحوس عليها ويخمم واش يدير دورت ريتا وجها لثانية هو استغل الفرصة دزها للداخل ضربها طاحت قفل الباب ومشا يحوس علا سلين من بلاصة ل بلاصة ناضت ريتا تصيح و لحقتو كي دخل للغرفة لي فيها سلين هزها وهي كبشت فيه وتصيح
ريتا: خليها شكون انت
حسام: بعدي من طريقي انا باباها
دزها ضرب راسها في الباب داخت وهو خرج من الدار يجري طلع في الطوموبيل وراح
_________
وصلت للمطعم فففف لازم نتعامل بهدوء مش حاجة لازم نكبرها كل ماكان رد فعلي كبير كل ما راح يرجع هاذ الوقف يبهدل اكتر خلاص لي فات مات نمحيها من تفكيري ما نخممش فيها يكون احسن نمشي ونحكي وحدي حتى سمعت صوتو من ورايا
زياد: ديري هاذ اللقطة بزاف
وساعو عينيا و خدودي طلعو حمر واش قصدو بسؤالو هذا يعني لي صرا البارح صرا بزاف لا هذيك اول مرة تلفت ليه
-وش قصدك
زياد: يعني تحكي بزاف مع روحك ؟ كيما درك ؟
تنفض قلبي كي سمعتو يشرح في سؤالو يعني مش راح نرجع كل حديث يحكي على البارح اكيد رجعت نحكي مع روح
الحلقة 51
زياد: شهاب !!!
سمعت اسم شهاب من بين شفاف زياد بلعت ريقها نزلت يدها بسرعة مش فاهمة علاه تكركبت كي شافتو هذاك حست بغصة وانها تمادات مع زياد شوية مع انو مش من حقو يحاسبها لانو مكان حتى شي بيناتهم عالاقل من طرفو لانو اعجابها بيه واضح
شهاب حك راسو يحوس منين يبدا يحكي
شهاب: نجوى عندي حاجة نحب نقولهالك بصح لازم تكوني هادية و تسمعيني للاخير
-خوفتني بالمقدمة هذي احكي
شهاب: سلين
مسحت يديها في المريول و مشات لعندو صوتها زايد و خوف في عينيها
-وشبيها سلين شهاب ؟ وشبيها احكي ؟ شهاب احكي ؟
شهاب: كاين لي جا للدار و هزها
-وش تقصد هزها كيفاه هزها وين هزها شكون هزها شهاب شكون هزها احكي معايا علاه ساكت
شهاب: قال هو باباها
-حسام داها منين يعرف عليها شهاب ويني بنتي
حكمتو من كول الفيستا بزوز يدين تخض فيه هبلت مش متصورة لي يحكي فيه صح حكملها يديها بيديه
-قلي راك تضحك و مكانش منها
شهاب: نجوى نحب تقوليلي وين يسكن
-وين نعرف عليه وين يسكن يسكن في جهنم انشاله نحب بنتي انا ويني بنتي
شهاب: اعطيني اسمو نجوى
-حسام ****
شهاب: نرجعها متخافيش
-شهاب رجعها لعندي شهاب هي كلشي في الدنيا معنديش من غيرها
كانت تصيح و تبكي و تضرب فيه و هو يحاول يهديها حتى داخت حكمت راسها تغمضو عينيها و لقفها بين يديه قبل ما يضرب راسها علا الارض زياد كان داهش هو تاني راح يجري كي شافها طاحت قرب منها
زياد: نجوى شبيك
شاف فيه شهاب بخزرة بعدها عوج فمو
شهاب: وصلها للدار واقعد معاها حتى نرجع
هزها و مشاو خرجو حطها في الطوموبيل تاع زياد و مشا طلع في الطوموبيل تاعو كلم واحد من معارفو لي واصلين عطاه اسم حسام بش يعرفلو وين ساكن اقل من 10 دقايق كان العنوان تاعو في يدو مشا لعندو كيف المهبول طلع للدار يدقدق قريب يخلع الباب حلت مرتو
-وشبيك انت علاه دقدق كيف المهابل وش تحتاج
شهاب: وينو راجلك
-مكانش هنا شكون انت
شهاب: نحبك تكلميه درك قبل ما نتصل بالشرطة و نخليه يتعفن في الحبس
حطت يدها على قلبها
-علاه واش دار
شهاب: كلميه يجي دز الباب و دخل مشا يشوف في ارجاء الدار من و من يحوس علا سلين
-اسمع انت شكون اخرج قبل ما نتصل بالشرطة
تلفت شهاب شاف التيليفون هزو رماه لعندها
شهاب: تفضلي كلميهم بش يجيو يهزو راجلك يديوه للحبس ولا كلميه يجي نفزوها
قعدت ترجف وهي تمركي في نمروه بش تكلمو
-الو
حسام: الو نعم
-وينك راهو هنا واحد ق
الحلقة 52
حليت عينيا كل بلاصة نحسها توجع سلين تفكرت سلين قمت من بلاصتي بسرعة نلقا في يدين زياد حكموني
-زياد سيبني سلين محتاجتني سيبني
زياد: نجوى اهداي
-واش نهدى متقليش نهدى سلين هذي لي راك تحكي عليها تقلي نهدى
كلشي كنت نخمم فيه كون كشما يصير عليها كون مانزيدش نشوفها كيفاه نعيش وهي بعيدة سمعت صوتها تبكي وساعو عينيا سكت نصنت لصوتها صح ولا نتخيل فيه
-سلين سيبني
نحا يديه مني وانا خرجت نجري من الغرفة صوتها ايه هي نزلت نجري مش عارفة كيفاه ندعثر في هذوك الدرجات قريب نطيح شفت شهاب واقف هازها بين يديه وهي تبكي حطيت يديا على فمي دموعي نازلين قطعة مني هذي روحي هذي مش عارفة نعيش بلا بيها مشيت لعندو هزيتها حضنتها نبوس فيها ودموعي مش حابة توقف مش عارفة علاه نبكي لانو الف سبب قاعدة نبكي عليه في هاذ اللحضة نبكي لانها رجعت نبكي لاني تصورت منشوفهاش مرة أخرى نبكي لاني مزلت نقدر نحضنها و نشم ريحتها نبكي لانها قاعدة تبكي نزلت على ركايبي قعدت و ضامتها لصدري بكل قوتي
__________
نزل زياد وراها و ريتا شافوها وهي في الارض تحضن في سلين و تبكي ريتا رجعت تبكي معاها زياد تبسم مع شهاب و عملو حركة بعينيه تعني صحيت شهاب قرب و طبس عليها يمسح على شعرها
شهاب: نجوى سايي هاي رجعت سلين بخير
هزت راسها شافت معاه عينيها كلهم دموع خدودها حمر شفايفها حمر اكتر وقالتلو بصوت يرعش من البكا
-عمري ننسا انك رجعتها ليا
من غير ما يفيق لاحت يدها دورتها على رقبتو و جبدتو حضنتو ولانو كان مطبس مش قاعد الحركة هذي خلاتو يفقد توازنو يطيح عليها لكنو حكمها بيدو قبل ما طيح وحط ركبتو على الارض هي مكانتش اصلا حاسة انها رح طيح منعڨشة في رقبتو بيدها وهو حاط يدو ورا على وسطها يضم فيها بينهم سلين و حاط يدو التانية علا الارض يحكم توازنو مش عارف واش صارلو في هذيك اللحضة هو سبقلو انو يحضنها لكن حضن بسيط تلف هي يدها علا وسطو لكن هذا اول حضن تلف يدها علا رقبتو و يحس نفس تعها على رقبتو و دموعها لي نزلو على كتافو ريتا كانت تتفرج فيهم حاطة يدها على خدودها و عينيها قلوب و زياد نزل عينيه و يشوف لجهة التانية مع انو يعرف انو لي بيناتهم مجرد عقد لكن هي مزالت تعتبر مرت صاحبو ومش من حقو يحس باي شي اتجاها الا بعد ما يسأل شهاب
____________
كنت حاضنتو فجأة حسيت طمأنينة و ارتحت علخر سمع صوت نفسو قريب من رقبتي سلين حكمتني من خدي تقرص فيا فيقتني
