الحلقة 5 خرج شهاب من الكوزينة نادا على المسؤول تاع الكوزينة شهاب: واش كيفاه شفت الطفلة لي جات جديدة -مليحة مسيو شهاب خدمت خدمتها كاملة البارح شهاب: كسرت كاش حاجة -لا شهاب: نحبك تقلقها نحب تكثرو عليها الخدمة و خليها تسيق الارض شحال من مرة نحب نشوف الاستقالة تعها قبل ما يكمل هاذ الاسبوع وقلها اي حاجة تتكسر راهي تتخصم من شهرية تعها -مسيو شهاب متأكد ؟ شهاب: اكيد قلت منحبش واحد هنا بلا كفاءة ولا شهادة حتى لو لغسيل الماعون حنا اوتال كبير معروف منحبش نزل المعايير تاعي نفذ و ما تناقشنيش -حاضر ______ كنت في الكوزينة نغسل آه هذا راهو غير الفطور مزال حتى مبداوش يوجدو في الغدا ثيابي كلها تبللت -مدموزال واش الخدمة راكي مليحة لقيتيها ساهلة -ايه ساهلة مكانش مشاكل -ايه عندي ملاحضات ليك : اي حاجة تكسريها تتخصم من شهرية تاعك و متخليش الما في الارض واي حاجة تسيح للطباخين في الارض تنضفيها هو يحكي وانا حليت فمي وش هذا تقول راني نفوت في العسكر حكم عسكري - لكن يعني ... قص عليا بكل وقاحة -لا لكن ولا شي مكانش مناقشة في قرارات المدير تتنفذ فقط مشا وخلاني نغزل نحس في قرون رح يطلعو من راسي من غشي رجعت لخدمتي وانا نخض - حمار حيوان محال يكون بشر دراكولا هذا شهاب كان يراقب في الخدمة من مكتب تاعو من بعد حط يشوف واش راهي دير يسمع فيها تسب فيه ...دراكولا مصاص دماء شيطان .... حط صوابعو علا ذقنو يمسح على شفتو بسبابة و يخمم من بعد محس على حاجبو ووقف هبط لعندها .. آه يا ربي كرهت حاجة اسمها صحون ناس هذو بش ياكلو طرف زبدة يحطوه في 5 صحون تلفت نقزت من الخوف كي شفتو ورايا واقف عند الباب يسند في ظهرو يديه في الجيب بلعت ريقي و عضيت شفتي كاس في يدي مقدرتش نتحرك نحس روحي تجمدت وهو قاعد يقرب ليا مقدرتش حتى نرمش وقف قرب صوابعو مس يدي نحالي الكاس حطو بعيد بلعت ريقي كي حسيت صوابعو فوق صوابعي شهاب: تعرفي هنا كي تقولي على المدير دراكولا و حمار وهاذ الامورات راح يخصملك من شهرية على كل كلمة راني جيت بنفسي هنا باه نقلك هاذ الكلام بش تعرفي كل حركة هنا مراقبة وبحقها مشا خرج وانا قعدت نبحلق فيه ريحتو قريب تجيبلي جلطة دوختني وعينيه يدخلوني في حيط رمشت مرتين ورا بعض نستوعب في لي صرا جبدت نفس طويل - اه يا ربي كان يسمع فيا ..هزيت عينيا نشوف مع السقف لقيت كاميرات - اففف يخي هم رجعت لخدمتي هذاك النهار قتلوني يا ربي تقول البلاد كلها خرجت تتغدا برا واحد ما تغدا في دارو وصلت الخمسة رحت جبت سلين كيف العادة ورجعت لداري نحس في روحي غلبانة عمرت البانو و دخلت فيه انا و سلين قعدت ندوش فيها و دوشت انا تاني (يتبع)
