الحلقة 7 فقت الصباح حليت عينيا تلفت ل سلين مزالها راقدة نضت نحس كرشي توجع من الجوع غسلت و فطرت فاقت سلين حطيتها في حضني رضعتها نمس في جبهتها سخونة شوية - لاااا سلين مش ليوم علاه هكذا ..حطيتها ورحت جبت دوا تاع السخانة حطيتو في الما ومديتلها شربتو قعدت معاها نستنا تنزل السخانة تعها كي شفتها مليحة هزيتها ورحت عند سلطانة -سلطانة راهي مريضة شوية و طلعتلها السخانة راني نزلتها درك مي تعيشي ديري بالك عليها واذا شفتيها مش مليحة كلميني سلطانة: متخافيش راني هنا روحي متهنية خرجت نجري اكيد رح نوصل متوخرة دراكولا ليوم يعمل فيا حكمت طاكسي بفف دراهمي كل راحو في طاكسيات وصلت دخلت نجري 8 شفتو خارج من مكتب الاستقبال ونازل لتحت آه خلات عليا دخلت لعندهم نجري - معليش ننزل من هنا راني متوخرة ليوم يقتلني وقف هذاك لي في المكتب مسكين حللي الباب نزلت نجري نحيت تريكو لي لابستو و لبست الشوميز ونقفل فيها وصلت كلوار (رواق) شفتو من بعيد عند جماعة تنظيف الغرف تخبيت ورا الحيط هبطت السروال راح نلبس سروال الخدمة نشوف في ظل من ورايا بلعت ريقي يديا فشلو شفتي رجفت من الخوف عضيتها وغمضت عينيا نتمنى ميكونش هو -يا ربي يكون خاطيه... دورت رقبتي نشوف بطرف عين واقف ورايا مربع يديه قلبي بدا يضرب لدرجة نسيت اني مزلت ملبستش نبلع في ريقي و نعاود تلفت ليه قلبي زاد في السرعة مع السكوت هذاك قريب نحلف بلي نسمع فيه يدق قرب مني هز يدو يحسبلي شهاب: واحد وصلتي روطار..زوز تبدلي في الكلوار ..تلاتة واقفة هنا بلا سروال ..ربعة ظني بلي مشفتكش متخبية مني نحس في راسي يغلي وجهي طمطم يا ربي عجزت حتى نتحرك واقفة نصف عريانة مشا هو شهاب: نص اليوم راحلك من الشهرية للروطار لي درتيه ثاني مرة في الأسبوع و غدوة جمعة تخدمي مكانش ويكاند على بقية المخالفات وساعو عينيا ومشيت وراه - كيفاه لااا متقدرش تلفت ليا عينيه يخوفو رموشو و لونهم بلعت الهدرة تاعي هشام: تحبي نزيد نخصم من الشهرية تاعك لانك تناقشي فيا؟؟؟ سكتت ونخمم وقتاه ندي سلين للطبيب يعني يمكن نقول لسلطانة تديها ففف هو مشا دخل للكوزينة وانا تفكرت روحي رحت نجري لبست سروال و دخلت للكوزينة وقفت معاهم وهو يمشي و يشوف و يتفرج من بعد خزر فيا من فوق لتحت وخرج هو و شاف تاع الكوزينة _______ شهاب: راني ماشفت حتى نتيجة لليوم مزال ما قدمتش استقالتها - مسيو شهاب درت كلش قلتلي عليه الطفلة خدامة لاباس بيها شهاب: نحب نشوف استقالتها اليوم قبل غدوة امشي حل الما البارد خليها تغسل بيه اليوم قلها كاين عطل في التبريد - مسيو شهاب محال تقدر تغسل بيه شهاب: قاعد تناقش فيا؟ حط يديه في الجيب وطلع حاجبو يخزر فيه - لا درك ندير لي قلتلي شهاب: صحيت امشي ______ دخلت للكوزينة وين نغسل افففف ماعون على الصباح حليت الما - آه وش هذا راهو جامد وشبيه ....خرجت لعندهم نسقسي فيهم وشبيه الما بارد - عندنا عطل في الما لي يبرد الفريجيدار - وانا كيفاه ندير بارد بزاف محال نقدر نغسل بيه - دبريها اليوم حتى يجي لي يصلح مشيت وانا نخض الكلام مش معاه نطلع لعند دراكولا هذاك هو المسؤول وصلت لقيت السكرتير تاعو - مسيو شهاب راهو هنا ؟ - ايه راهو هنا عندك موعد مخليتوش يكمل كلامو دخلت لعند شهاب كان المكتب تاعو كبير و مضلم شوية ربحت برفان تاعو معبية الجو مع ريحة الڨارو قلبي بدا يضرب مش عادي كل ما نشوفو تصرالي هكذا علاه نخاف منو هو ما تزعزعش من بلاصتو هز عينيه هذوك يشوف معايا دخلني في حيط بيهم شهاب: خير مدموزال نجوى - عندي شكوى منقدرش نخدم خدمتي الما بارد وقالولي كاين عطل ولازم ندبر راسي حتى يجي لي يصلح شهاب: ايه جاوبوك علاه جاية هنا باه تعاودي تسمعي نفس الكلام ؟ - الما راهو جامد كيفاه تحب نخدم شهاب: الخدمة هكذا فيها صعوبات مكش قدها قدمي استقالتك سكت وشفت معاه تمنيت في هذيك اللحضة نقز عليه نخنقو نتفلو شعرو هذاك الاسود شعرة شعرة و نضربو نخرجلو عينيه لكن منقدرش نقعد بلا خدمة هبطت عينيا و بداو يتعباو بدموع نحس فيه وقف وماشي لعندي شهاب: رح تبكي ؟ ههههه قعد يضحك عليا شهاب: اكتبي استقالة ساهلة علاه تصعبي فيها هكذا محسيتش على روحي كيفاه شعلت فيه - وش لي ساهل وين تشوف فيها ساهلة انت كلش ساهل عندك نحتاج دراهم منقدرش دزيتو ضربتو علا صدرو حكملي يديا رمشت عينيا قشعريرة مشات في بدني كل كي حسيت يديه حكمو يديا مقدرتش نجبدهم كبس عليا وجعني هزيت عينيا فيه وجهو عندو زين مش نورمال لحضة مرت نسيت حتى يديا بلي وجعني وبهت في زينو قعد يشوف معايا وانا في هذيك اللحضة كلماتي هربو مني و نظراتي هربو منو مقدرتش نشوف معاه قلبي نحس فيه رح يخرج قعدت نفارع فيه نطرت يديا منو وخرجت نجري من عندو.
