بدلت وخرجت رحت لعندهم دراكولا كان في غرفة المكتب كيف العادة و ريتا راحت قعدت مع جداتو تعشينا مع بعض و هو ما تعشاش بعدها هزيت سلين لغرفتها قعدت معاها على الكرسي حطيتها في حضني نرضع فيها - يا روح الماما غدوة تروح بنتي لعند الطبيب و نعملها العملية وترجع صحيحة و مرتاحة و نرجع نطيبلك و نوكلك يا روحي
قعدت نمسح على شعرها وهي مغمضة عينيها ترضع حتى رقدت شفت الباب تحل لقيتها جداتو تبسمت وجات لعندي حطت يدها على راسي و يد علا سلين
سعاد: ربي يحفظها من كل عين و شر و يخليك ليها
-يعيشك و يخليك لينا
وقفت حطيتها في بلاصتها و خرجنا
سعاد: هيا امشي ترقدي ترتاحي شوية الايام الجايين صعاب
تبسمت ومشيت اكيد مش رح يكونو اصعب من اني في غرفة وحدة مع دراكولا حليت الباب ودخلت مكانش الحمد لله مكملتش جملتي نلقاه دخل من ورايا ما حكاش معايا قفل الباب قلبي كي العادة ضرب وانا دخلت في حيط مشا حط تليفونو فوق طاولة جنب السرير و دخل الصالدوبان يغسل سنيه ناوي يرقد هنا اكيد قعدت على حافة السرير رجلي ترعش من التوتر وهو خرج قعد على السرير من بعد هز الغطا دخل تحتو و رقد وقفت تلفت ليه
-رح ترقد هنا ؟
دور ليا شاف معايا يتعجب
شهاب: غرفتي معليش ؟
-وانا ؟
شهاب: ترقدي هنا اتفاقيتنا تقول هكذا حتى تروح ماني من عندنا لانك مضطرة تكذبي
-لكن ؟
شهاب: واتفاقيتنا تقول بلي مش راح نقرب عليك السرير راهو بلاد كاملة انتي في جهتك وانا في جهتي
عوجت فمي وقعدت
شهاب: ايه ثيابك لي بالحليب و لعاب بنتك بدليها ما ترقديش بيها
تلفت ليه خزرت فيه حمار يشوف فيا معفنة بش نرقد بيهم مشيت هزيت ثياب من الفاليز مزال مافرغتهاش دخلت للصالدوبان غسلت اطرافي و سناني بدلت و خرجت مشيت قعدت في جهتي هزيت الغطا و رقدت رغم انو مسافة مليحة تفصل بيناتنا لكن حكمني توتر كبير مش مصدقة اني معاه في فرش واحد قلبي تقول عليه في مراتون دورت على جنبي حطيت يدي تحت خدي وغمضت عينيا رقدت
الصباح نضت حليت عينيا تلفت مالقيتوش قدامي عاودت غمضت عينيا تنهدت و نضت رحت غسلت وخرجت رحت لعند سلين مكانتش في غرفتها تفجعت نزلت نجري لقيتها مع جداتو و ريتا
سعاد: وش بيك يا بنتي ؟
حطيت يدي على قلبي و نفخت
-تفجعت كي مالقيتهاش في بلاصتها
سعاد: ايه سمعتها تبكي رحت هزيتها بش ما تفيقكش انتي و شهاب
تبسمت ومشيت هزيتها بستها - يا روحي صباح الخير يا قطقوطة
تلفت شفتو واقف في الباب.الحلقة 27
فات النهار و انا مع سلين تحاليل وفحوص و أشعة تعبت بزاف وانا تعبت معاها اخيرا قعدت في الغرفة معاها نزلت الستائر و طفيت الضو ورقدت حطيتها في حضني نرضعها بش ترقد ترتاح وغمضت عينيا معاها رقدت
___________
شهاب كمل خدمتو ورجع للدار لكن قلبو ما طاوعوش يخليها وحدها رغم انو قاسي وتصرفاتو باردة لكن قلبو حنين طلب من ريتا تحضر ثياب يديها للسبيطار لنجوى و سلين
سعاد: ربي يشفيها يا بني وقتاه يديرو العملية
شهاب: غدوة الصباح
سعاد: وانت وين رايح
شهاب: نشوفهم و ندي ثياب بش يبدلو
هز الفاليز وخرج وهي قعدت تتبسم وحدها -هههه كون مشفتش بعيني يا شهاب نكذب والله خلاتك تهتم صح
شهاب راح لعندها دقدق بشوية وحل الباب تاع الغرفة دخل كانت راقدة و سلين في حضنها مشا حط الفاليز جنبها على الطاولة وتلفت كانت سلين مكبشة في صدر امها بزوج يدين كانت مغطية لكن جزء يبان دور عينيه حس انو تصرف وقح يشوف بلا علمها من بعد حط يدو هز الغطا لي حاطتو بش يغطيها تحركت سلين فطنت ورجعت كبشت اكتر في امها و ترضع ضحك وهو يشوف معاها من بعد رجع على وراه وقعد على الكرسي مقابل يتفرج فيها ويخمم - مش مذكر امي لكن كانت هكذا معايا؟ حنينة هكذا ؟ وقوية على خاطري ! يعني الراجل صح عندو القوة لكن الصبر لي عند المرا يغلب قوتو لانو القوة بلا صبر معندها حتى معنى و الضعف مع الصبر قوة في حد ذاتها
بقا يتأمل فيهم ورجع راسو لورا غمض عينيه يرتحهم حتى رقد
__________
فطنت في آخر الليل حليت عينيا سلين راقدة هزيت عينيا لقيتو راقد على الكرسي حاط يدو علا وجهو يسند في راسو قفلت زرار الشوميز تاعي اه يا ربي تبهديلة محسيتش عليه كي دخل شافني في هاذ الحالة اووووف فجأة تحرك رجعت حطيت راسي على المخدة عملت روحي راقدة حليت طرف عين نشوف معاه مسح وجهو بيديه و تنهد من بعد كح و وقف مشا للشباك نظن هز الستائر و يشوف برا لانو ضو الشارع دخل للغرفة نسمع في صوت نفس تاعو واش قاعد يدير هنا مفروض راهو في الدار تبسمت لانو مخلانيش وحدي تحكت سلين و بدات تصدر في اصوات اكيد حلم مش مليح حطيت يدي عليها
-اسسس ماما هنا اسس
رجعت هدات و رقدت
شهاب: راكي فاطنة
غمضت عينيا لزيت علا سنيا "اففف سلين يعني فضحتيني " رديت بصوت خافت بش ما نوضهاش
-ايه
شهاب: جبتلك شوية ثياب ليك و لسلين لقيتك راقدة
-مرسي
كنا نحكيو انا ما تلفت ليه وهو ما قرب جيهتي
شهاب: كيفاه حالها ؟
-تعبت اليوم
طلع النهار و دخلو سلين للعملية منذكرش خفت في يوم كيما راني خايفة درك قعدت رايحة جاية قدام غرفة العمليات ونشوف مع الساعة دقايق فاتو عوام اه يا ربي واش رآهم يديرو لداخل كل ما يمر الوقت وانا نخاف اكتر شهاب قاعد على الكرسي يتفرج فيا بكل هدوء كيفاه يقدر تكون اعصابو باردة لهاذ الدرجة نكرهو نكرهو و ما نطيقوش مشيت قعدت في الكرسي مقابلو رجليا يرعشو وبدا نفس تاعي يتسارع ودموع تجمعو في عيني حطيت يديا على وجهي و بديت نبكي حتى حسيت يدين باردين و كبار على يدي دخلو صوابعو حكمو يديا و نحاهم من وجهي و قبل ما نحكي ولا ندير رد فعل حط يدو ورا على رقبتي و جبدني بقوة لخضنو و لف يدو ورا ظهري و غرس وجهي في صدرو يمسح على شعري ويحكي
شهاب: اسسس متخافيش راح تكون مليحة
قويت انا في البكا وكبشت بيديا في الفاست تاعو
-راهي هي كلش عندي في الدنيا هي عايلتي الوحيدة معنديش من غيرها كون تروح نرجع وحدي كيف ما كنت قبل
شهاب: معندها وين تروح راهي هنا و مكش وحدك
حسيت براحة كبيرة وانا حاطة راسي في صدرو صوتو نحسو طالع من صدرو والبحة لي فيه خلاتني نحس بأمان كبير ونصدق كل كلمة قالها
__________
قعدت رايحة جاية قدام غرفة العمليات وهو توتر محبش يبين بش ما تخافش وفجأة قعدت مقابلتو وبدات تبكي متحملش يشوفها هكذاك وقف لعندها و فكر انو يحكي معاها يطمنها لكن عرف انو لي هي محتاجتو في هاذا الوقت هو حضن وكتاف تبكي عليه بلا تفكير جبدها لحضنو في هاذا الوقت جات سعاد و ليندة من بعيد شافوهم هكذاك سعاد ضحكت و ليندة طلعت حواجبها بتعجب مش متعودة تشوف خوها حنين هكذا تبسمت على جنب وراحو لعندهم
سعاد: يا ولاد واش احوالها؟
تلفت شهاب ليهم ووقف بسرعة بعد من نجوى عدل الفاست تاعو وجبد منديل مسح دموعها لي على صدرو وهي مسحت عينيها
سعاد: يا بنتي زينة ما تبكيش
حضنتها جداتو و ليندة قعدت تشوف مع شهاب و تتبسم وهو طلع حواجبو يسأل واش كاين تبسمت و مشات لعند نجوى
ليندة : قداه عندهم من لي دخلوها للعملية
- قريب ساعة
في هذيك الأثناء خرج الدكتور وقفت تجري لعندو
- دكتور !!! كيفاه كانت العملية
تبسم الطبيب
- كانت ناجحة و ساهلة و بنتك بخير درك نطلعوها للغرفة وتقدرو تشوفوها
تبسم شهاب و هو يشوف فيها كيفاه فرحانة و تبكي - هههه خايفة تبكي فرحانة تبكي مش طبيعية
حط يديه في الجيب
شهاب: بما انو خلصت العملية و ماني و ليندة هنا معاك انا نروح لخدمتي
- شكرا
بعد اسبوع قضاتو سلين في السبيطار وانا معاها خرجنا رجعنا للدار اخيرا سلين تحسنت حالتها بزاف عطاونا مواعيد مراجعة ورجعت لحياتي الجديدة تاع الستة أشهر الجاية
حليت عينيا الصباح رقبتي توجع من الرقدة في الكرسي بت عند سلين سهرت معاها نراقب فيها رقدت كيف الملاك ومافطنتش في الليل وقفت نمدد في طرافي -آه تقول ضربتي طوموبيل كسرتلي عظامي
سمعت الباب تحل تلفت لقيتو شهاب تبسمت كي شفتو صراحة طول ما كانت سلين في السبيطار كان معايا و عطاني الدعم لي نحتاجو اكتشفت قداش هو حنين وقلبو طيب وعمري ننسا دعمو ليا
شهاب: نحتاجك الحقيني راني في الغرفة
خرج وانا درت نظرة أخيرة على سلين ولحقتو دقدقت الباب ودخلت كان واقف قدام الشباك و يلبس في ساعة يدو الغرفة كلها بريحة برفانو قفلت الباب وهو تلفت ليا مشا للسرير هز الفاست تاعو يلبس فيها
-نعم واش كاين؟
شهاب: اليوم يجي جدي
تفكرت بلي قال جدو يعرف واش الحكاية يعني مخفتش
-ايه مرحبا بيه
شهاب: راح نكون انا مكانش يعني اعرفي كيفاه تتصرفي هو يعرف انو كلش اتفاقية لكن ماني هنا فهمتي تصرفي ك كنة ليهم
-حاظر ..وكي ذكرت امر الاتفاقية مزال ما كتبهاش المحامي ؟
شهاب: علاه
-بش نوقعوها و تبدأ انت تنفذ لي فيها
شهاب: علاه ماش قاعد نفذ ؟ بنتك ودارت العملية
-لا بخصوص الخدمة
شفت ملامحو كي تغيرت اكيد قاعد يلعب بيا
شهاب: كي يوصل وقتها وبلا ما ننسا متلبسيش ثيابك هذو من فضلك
خرج كارت تاع بنك من جيبو و حطهالي في يدي
شهاب: كلمي نادية وروحي معاها
-علاه وش خصها ثيابي
شهاب: مخصها والو مش لايقة و جدي صعيب اكيد مش حابة طيحي في لسانو
خرج بلا ما يجاوب على سؤالي على الخدمة اكيد يلعب اكيد بصح وين رح يروح مني مشيت نوضت سلين رضعتها كي العادة و دوشتها معايا في البانو متعت روحي مليحة عيشة الدلال ماخص كون جات دايمة خرجت لفيتها بمنشفة معايا و رحت بدلت و لبستلها و خرجت نزلت لتحت عند جداتو
سعاد: صباح الخير يا نوارة الدار
مدت يديها حطيت سلين في حضنها وطبست بستها على خدها
-صباح الخير
سعاد: ايه والله نتوحشها كي نروح
-وين تروحي ؟
سعاد: اليوم يجي سي حسين هو و صادق ولدي شيخك يعني
-ايه قالي مسيو شهاب ..اه هههه شهاب ههه والفت نضحك معاه نقلو مسيو شهاب هههه
اففف موقف كيف الهم انشاله منغلطش قدام باباه
سعاد: ايه نرجع لداري انا تاني بصح نجي نشوفكم اكيد منخليكمش تستفقدوني
تبسمت
