دخلت انا وهو للاوتال العينين كل حاستهم علينا ففف اكره حاجة عندي هي هذي منحبش نكون محط الانظار كبس يدو علا يدي
شهاب: راكي مليحة ما تتوتريش ابتسمي برك
وين هي الابتسامة هذي كرشي وجعتني من الستراس هذا كل ضحكت ضحكة خفيفة و دخلنا للصالة استقبلونا الصحافيين يصورو حط يدو علا كتافي و يضحك وانا نتبسم كي البلهاء من بعد دخلنا
شهاب: هاهو بابا تسلمي عليه تضحكي ما تحكيش بزاف سقسيه على صحتو من بعد استأذني وروحي مع نادية فهمتي
-ايه فهمت
مشينا لعند باباه تلفت لينا و يتبسم حل يديه سلم على شهاب و انا كنت رح نمد يدي لقيتو جبدني لحضنو سلم عليا بالبوس
صادق: مرحبا بيك
-بيك يعيشك واش احوالك ؟ صحتك ؟
صادق: مليحة مليحة يا بنتي وانتي ؟
-مليحة الحمد لله
صادق: واش شهاب معاك راهو مليح ولا مغلبك
-ههه لا مش مغلبني خلاص
شهاب: هههه كيفاه نغلبها راهي روحي
-نستأذنكم انا
مشيت كيما قالي رحت لعند نادية
-صحيتي على لي درتيه
نادية: والله جيتي تفتقي تحبي شهاب يشوف مع غيرك هنا ؟
-يشوف و من بعد افف
__________
صادق: ايه فسرلي الاخبار هذي كل لي طلعت وعلاه انا اخر واحد يسمع بلي مزوج
شهاب: حكاية طويلة يا بابا مش وقتها
صادق : لا وقتها
-مسيو معليش نصوركم
شهاب: ايه
صورهم و مشا
صادق: في ليلة و نهار نلقاك متزوج و بطفلة فسرلي
شهاب: راني متزوج عندي مدة بصح هي كانت خارج البلاد تعرفت عليها برا كي كنت في خدمة وهي رجعت هنا من بعد ما كملت قرايتها برا
صادق: يعني كانت تقرا برا؟
شهاب: ايه
صادق: مليح
شهاب: سامحني نروح
_______
الحفلة كانت مملة علخر الناس كل تتبسم من فوق قلبها وكلهم يجيو يسألوني على حالي و على سلين وانا نتبسم اففف طلعت روحي تلفت نشوف فيه واقف مع واحد يحكي وعينيه عليا من بعد شفتو جاي لعندي دورت عينيا نشوف بعيد
شهاب: تجي نشطحو
مدلي يدو
-لا مكان لاه نشطحو
شهاب: متنسايش لازم نمثلو بلي نحبو بعض
نزلت راسي تنهدت و حطيت يدي في يدو ومشينا لوسط الصالة دورني ليه وحط يدو علا خصري لزني ليه قلبي رجف من يدو وقشعريرة حكمتني بلعت ريقي هزيت عينيا ليه وهو يشوف معايا مهزش عينيه مني زاد عقدني اكتر كنا نشطحو و للحظات حسيت غير انا وهو في هذيك البلاصة نحس فيه غير هو هزيت عينيا ليه مرة أخرى ميل راسو لعندي غمضت عينيا بسرعة لا مش ممكن يدي....قبل ما نخمم فيها لقيتو طبع بوسة على شفافي حبيت نبعد و ندزو وحنا هكذاك في دخلت للدار من وجها عرف بلي هي مغششة و بش تطرشق عرف بلي اول ما يوصلو بش تعمل فيها حكاية طويلة و عريضة هو اصلا مش فاهم كيفاه حتى قرب عليها مش فايق كيفاه باسها لكن هو مقدرش يقاوم بدنها الصغير بين يديه شفايفها بروج هو يعشق روج و برفان لي حاطتها سلبتو مش مصدق انها نفس الطفلة لي عرفها لي ثيابها مهدرشة و شفايفها مشققة مش مصدق انها نفس الطفلة لي جات لغرفتو بش تبات معاه ليلة مقابل دراهم في لحضة نسا كلش نسا كل حد يوقف بينو و بينها نسا اتفاقيتهم ونسا الناس و نسا روحو غطس في شفايفها كان مضطر انو يعمل هكذاك حس بحاجة شديدة لهذيك البوسة شفايفها كانو يتحداو فيه يقرب عليهم وهو قبل التحدي قفل الباب وراه سمعها كي طربقت باب الغرفة خرجت ريتا من الصالة
ريتا: مسيو شهاب كلش مليح؟
شهاب: ايه مرسي ريتا الشوفور يستنا فيك تقدري تروحي
ريتا: تصبحو علا خير
خرجت وهو عاود قفل الباب وراها وتنهد - وش من خير فففف
_____________
دخلت للغرفة و طربقت الباب رميت بوشات لي في يدي قعدت نرجع في النفس تفكرت سلين عاودت خرجت رحت لعندها شفتها كانت راقدة في سابع نومة حطيت يدي نمسح على شعرها من بعد خرجت نشوف وين راح تلفت نسمع فيه في الغرفة مشيت وانا نخض حليت الباب ودخلت ربعت يديا و نخزر فيه وهو مش معبرني ينحي في الكرافات حطها في الخزانة
-واش تسمي لي درتو
شاف معايا بطرف عين وهو ينحي في الساعة حطها علا طاولة جنب السرير
-نحكي معاك رد عليا واش هذا لي درتو
شهاب: حتى شي
وقف يحل في الشوميز لي لابسها
-كيفاه حتى شي واش تسمي هذيك البوسة اتفاقيتنا ما جاش فيها هكذا كان شرطي انك ماتقربش عليا وانت قلت انا محال نقرب على وحدة كيفك كي تكون وحدي على وجه الدنيا
شهاب: قلت على جزيرة مهجورة
-ما تبدلش الهدرة انا نحب نفسخ الاتفاقية و راني رايحة
شهاب: واش قصدك تفسخي الاتفاقية
-لانك تعديت على شرط من تاعي
شفت كي تغيرو ملامح وجهو عينيه ظلامو
شهاب: يعني انتي قضيتي مصلحتك و بش تفسخي الاتفاقية
-هيه وافهم كيما حبيت
شهاب: مكانش تكملي لي بديتيه بعد 6 اشهر يخلص كلش
-لا اصلا مزال ما وقعت على حتى شي وانت تعديت على شروطي
شهاب: واش من شروط كل لي كاين بوسة باش نبين بلي حنا صح متزوجين ونحبو بعض مكان والو من لي في مخك و شوفي انتي لي كنتي جاية تباتي معايا على جال الدراهم واش يفرق على هاذا
كي قالي هكاك حسيت كون تتشق الارض ندخل فيها تعباو عينيا بدموع وشفتي ترعش عضيتها بش ما نبينش
-انت واحد حقير و آخر مرة تمد يدك عليا منسمحلكش راك فاهم ندمت لي وافقت علا لعبة هذي معاك
شهاب: ما وافقتيش على خاطري وافقتي على خاطر بنتك وانا على خاطر بابا يعني في زوز عندنا مصلحة من هاذا الشي ما تتضاهريش انك ضحية
-غدوة نحب تجيب الاوراق نوقعوهم في زوز و تجيبلي نسخة ليا الحمد لله لي راحت جداتك لاني مش متحملة نشوفك
خرجت و طربقت الباب ورايا ومشيت للغرفة لي كانت فيها جداتو و تمديت على السرير نبكي سمعت صوت في الخارج مشيت نجري حليت الباب لقيتو رما ثيابي كلهم خارج الغرفة من بعد خزر فيا و طربق الباب في وجهي
-حقير خماج
مشيت طبست هزيت تريكو من ثيابي نبات بيه و رحت لعند سلين هزيتها و رجعت للغرفة حطيتها على السرير بدلت لبست التريكو و رقدت قدامها حطيتها في حضني
- متخافيش يا روحي طول ما انا حية انتي رح تكوني بخير حتى لو كنت مضطرة نعيش مع دراكولا 6 اشهر
غمضت عينيا ورقدت
الصباح حليت عينيا على تدقديق في الباب
ريتا: مدام
-نعم ريتا ادخلي
حلت الباب و دخلت
ريتا: مدام مسيو شهاب طلب مني نفيقك و نقلك تلبسي و تنزلي لعندو بش تخرجو
-وين نخرجو
ريتا: مش عارفة
وقفت هكذاك اففف مجبتش حتى سروال
-ريتا من فضلك جيبيلي حاجة نلبسها
ريتا: حاضر
خرجت و رجعت جابتلي ثياب تاع خروج نفخت من بعد الساعة و مشيت لقيتها لمت الثياب المرمية كلها رحت غسلت وجهي لميت شعري لفوق ونزلت لعندو وقفت عاقدة حواجبي
شهاب: اذا واجدة بش تخرجو هيا
-وين ؟
شهاب: للمحامي بش توقعي الاتفاقية
عوجت فمي من بعد مشيت لبست صباطي هزيت ساك و قلت ل ريتا تفطر سلين كي نرجع نغسللها و نبدللها
خرجت معاه كلمة ما حكيتها حتى وصلنا لمكتب المحامي دخلنا قعدنا حط الاوراق قدامنا
-مسيو شهاب كتبت لي طلبتو مني و مزال غير توقيع تعكم
شهاب: تفضلي اقرايه واذا موافقة وقعي
هزيت نقرا فيه
-بعد 6 اشهر ينتهي الزواج
-لا يوجد عمل
-لا تلامس جسدي و لا كلام الا عند الضرورة
-لا يسمح بعلاقة حتى الانفصال نهائيا
-يجب ان يصدق الكل قصة الزواج
-لا احبه
-لا يحبني
شهاب: واش قرارك
-معجبنيش شرط انو مكانش خدمة
شهاب: تنحيه نحي شرط من شروطك
-كيما واش ؟
-هز الاوراق و أشار لشرط -لا تلامس جسدي
وجهي طلع حمر ضيقت عينيا نخزر فيه حقير يستغل في الموقف هزيت الستيلو وانا نغزل و وقعت هز وقع هو تاني و عطاني نسخة من الاوراق ونسخة للمحامي و خرجنا
شهاب: استناي نوصلك
-متحكيش معايا غير للضرورة متنساش و نرجع وحدي
مشيت حكمت طاكسي و خليتو
عندي يومين من لي وقعت الاوراق منحكيش مع دراكولا خلاص غير للضرورة كيما كان شرطو اليوم سلين عندها موعد مع الطبيب هو خرج كي العادة راح لخدمتو شفتو الصباح خارج اففف حاجة تغلب انك تكون كل يوم في كامل اناقتك كيفاه ميغلبش هو دوشت سلين بدلتلها و هزيتها وخارين حليت الباب لقيت جدو
-صباح الخير
مد يدو سلم عليا
حسين: صباح الخير وين رايحين كنت جاي نشوفكم
-شهاب خرج وانا رايحة ندي سلين للطبيب عندها فحص
حسين: امم اوكي اطلعي نوصلكم
-لااا مش حابة نتعبك
حسين: لا مفيها حتى تعب اطلعي نوصلك ل مشفى تاع ...؟؟
-ايه مشفى *** الخاص
مشا حلي الباب طلعت و هو مشا بعيد شوية هز تليفون معلاباليش شكون كلم نشاله مايكونش شهاب برك عاود رجع و طلع من جيهتو
حسين: هيا
مشينا و طريق كل وهو يستجوب فيا وانا نعمل في روحي مشغولة مع سلين و نمهمه علابالي يحب يوقعني في فخ و الطريق هذيك تقول زادت طوالت بسيف لا وصلنا حليت الباب نزلت و دخلت معاه سألنا على الطبيب لي متابع حالتها قالولنا درك يجي مشينا نستناوه من بعد جات ممرضة
-مدام نجوى تفضلي معايا للداخل
وقفت و مشيت معاها دخلت لغرفة حطيت سلين على السرير و جدو قعد برا يستنا من بعد رجعت
-مدام ممكن تحكميها لازم نحيولها شوية دم للتحاليل
-علاه
-الدكتور طلب عينة من الدم تعها
-ايه اوكي
حكمتها و هي حطت الإبرة في يدها غمضت عينيا مقدرتش نتحمل نشوف بعدها نحاتلها الدم و مسحتلها و غطات الثقب تاع الإبرة
-شكرا مدام درك يجي الدكتور يفحصها استناي هنا
-حاضر
فجأة الباب تحل تقول عليه تخلع ضربة قوية تحل على آخرو و دراكولا واقف عاقد حواجبو تقول راح يرتكب جريمة قلبي زاد في دقاتو ترعبت وشبيه هذا علاه داخل هكذا سلين بدات تبكي
-مسيو شهاب وشبيك واش كاين
محكاش معايا و ماعبرنيش مشا لعند الممرضة نطر عينة الدم من يدها و جدو دخل وراه
حسين: شهاب عيب لي راك دير فيه
دخل رجل امن يجري حكم شهاب يبعد فيه
شهاب: سيبني
-مسيو هذا راهو مشفى مش كوري
شهاب: اكيد مش كوري لدرجة تسمحو لاي واحد يهز عينات دم كيما يحب و يشتي
انا وقفة مكنت فاهمة والو جدو منرفز وهو عينيه ظلمة تقول اسد راح يهجم على الناس كل دز رجل الامن وجا لعندي حكمني من ذراعي و يجرجر فيا وراه
شهاب: امشي قدامي تحركي
-واش كاين وشبيك
شهاب: بلعي فمك منحبش نسمع صوتك
وقفت و نطرت يدي منو و سلين فاحمة من البكا
-شبيك انت هبلت راك م
